2013年6月4日星期二

投我以木瓜

選擇題:如果有人揾個木瓜掟你,你會點應對呢?以下答案三選一:

(一) 報之以瓊琚 - 送番塊美玉俾對方講和,咁最合乎中國人息事寧人、以和為貴、以德報怨嘅性格。
(二) 報之以番茄 - 以牙還牙、以眼還眼,用同等殺傷力嘅番茄掟番對方。
(三) 報之以榴槤 - 十倍奉還,成個榴槤(當然連埋殼)兜頭兜面車埋去。如果冇榴槤,用大樹菠蘿都得。

揀(一)表示你心存仁厚,但係因住好心冇好報。揀(二) 代表你好講原則,事事要求公平公正。不過原則唔值錢,雖然未必使捱餓,但係發達實冇份。揀(三)你就醒喇,簡直係王者之材呀!點解?睇吓以下單實例你地就明架嘞。

話說N年前,㗎仔挑起太平洋戰爭,失驚無神偷襲珍珠港。美國佬似乎早有預感,一早調走太平洋艦隊嘅主力航母,留番啲廢銅爛鐵任㗎仔炸。結果美國參戰,請㗎仔食咗兩粒原子蛋。雖然話係一報還一報,但係以破壞力而言,相去何止十倍。

太平洋戰爭自此結束,美國成為大贏家,仲收咗日本做藩屬國。話時話,我最唔鍾意聽到「抗戰勝利」呢四個字,因為中國根本冇贏過。「勝利」云云,只不過係自欺欺人。如果真係戰勝國,有乜理由會全無話事權,連被侵佔嘅領土都收唔番?事實上,㗎仔亦從冇就侵華暴行誠心道歉。中國人以勝利者自居,㗎仔只會竊笑、恥笑、繼而會心微笑囉。

言歸正傳,咪以為硬食兩粒原子蛋,㗎仔就會憎死美國佬。事實啱啱相反,自從戰敗,㗎仔搖身(或尾)一變,變成一條忠誠的狗,對美國佬言聽計從。不過對日本呢隻看守遠東門戶嘅柴犬,作為主人嘅美國似乎唔係好有愛心,竟然縱容駐沖繩美軍姦淫當地民女。所謂狗都有火,一隻叫做橋下切嘅柴犬就走出嚟吠咗兩嘢,建議駐沖繩美軍如果有生理需要,可以考慮光顧當地色情服務。仲同場加插一番偉論,話戰時嘅慰安婦制度係有必要性。小橋偉論一出,中韓等國立即譁然,齊聲抗議。美國佬見柴犬倒米,隨時影響拉攏南韓圍堵中國嘅如意算盤,所以亦速速出言譴責。

其實小橋都未算吠,只係胡胡咗兩聲啫,點都估唔到主人會咁大反應。不過忠犬即係忠犬,最識睇主人眉頭眼額,見到主人唔like,小橋就即刻撲出嚟搖尾乞憐,承認侮辱咗主人嘅高尚品格。但係對於慰安婦言論,小橋就立時展現柴犬嘅堅忍特質,拒絕收回。

講真,我又睇唔出小橋嘅言論對美國佬有幾侮辱。美國大兵鍾意叫雞就係人都知架啦,如果唔係灣仔點會咁旺先。小橋只係建議班友做番佢地做慣嘅嘢啫,咁又何錯之有呢?而佢嘅慰安婦言論就真係冇人性嘞!哈哈,簡直九唔搭八,狗又點會有人性呢?本人誠心認錯,決定收回之前嗰句。只可以話,小橋講得出啲咁嘅嘢,真係連狗都不如!

如果㗎仔只係徵召本土㗎妹做慰安婦,咁小橋點講都得,因為呢啲係佢地嘅內政,外人不宜干涉。但係佢地強迫中韓婦女做性奴,咁根本就係強姦、輪姦!事實上,強姦都未能夠滿足㗎仔嘅獸慾,班友仲要玩埋先姦後殺、殺完再姦添!小橋嘅言論亦暗示侵略戰爭有必要性,條友根本就唔當中韓民眾(唔單止婦女)係人。佢事後只選擇向美國道歉,亦正正說明咗呢一點。相信日本一眾右翼分子嘅心態都係一樣,只會敬畏降伏佢地嘅美國佬,而對所謂戰勝國嘅中韓,根本就唔使尊重。

呢個柴犬故事說明咗一個千古不易嘅道理,就係「勝者為王」,拳頭夠硬先至唔使仰人鼻息。講到呢度,可能有人會以為我同國內班主戰憤青冇乜分別。咁就錯嘞,要十倍奉還俾人,都要自己夠實力先得,中國而家仲未係時候囉。而且打狗都要睇主人面,㗎仔有美國佬撐腰,實在不宜輕舉妄動。中國而家最需要嘅係韜光養晦,相信呢個亦係中國領導人自改革開放以來嘅方針。美國佬當然睇到呢點,所以先千方百計圍堵中國,唔俾中國有機會休養生息,威脅到佢嘅王者地位。

所謂「人不為己,天誅地滅」,站喺佢地嘅立場,美國佬咁做絕對冇錯。我最唔明係點解會有咁多中國人(包括香港人)幫美國佬拖,係都要搞到中國立立亂。中國人呀中國人,唔通你地真係要見到中國亂過伊拉克同敘利亞先安樂?至於唔認自己係中國人嘅香港人,中國亂到九彩對你地可能無關痛癢,因為你地唔知乜嘢叫做「覆巢之下無完卵」,但係到你地知道嘅時候就太遲架喇!如果咁討厭中國就學陳X誠移民去美國啦,唔好喺度搞亂檔喇!

木瓜

Gemstone Museum, Rio de Janeiro, Brazil

Fresh market, Yerevan, Armenia

Jackfruit tree (大樹菠蘿), Zanzibar, Tanzania

7 則留言:

  1. 哈哈,點解你呢排忽然出現得咁密?我早果排重以為自己喺個 blog list 度 delete 咗你個 blog 添!! :-P

    回覆刪除
  2. btw, 我揀2,即係蕃茄,所以冇發達!

    回覆刪除
  3. 揀2!

    如果對方太強勢,會加埋遠遠避開以自保,但絕不會報之以瓊琚。

    回覆刪除
  4. SKII,
    早排掛住打牌,幾個月打咗5萬幾鋪,所以唔得閒寫。呢排黑過墨斗,打親都輸,咪唔打住,寫番囉。其實我都係揀2架,做人都係公平啲好!

    Coffee,
    有時人地踩到埋嚟,真係想避都冇得避架,所以最緊要係自己有實力,唔使咁被動。

    回覆刪除
  5. 如果中國搞到好似敘利亞咁,香港即刻冇水缺糧.香港無乜農田,又無畜牧業,又無乜淡水,當堂出現人吃人,飲人血,殘酷過非洲原始森林!班憤青莫講可以六四七一遊行,直頭要互相殘殺,食朋友D肉,飲同輩D血.嘻嘻!

    回覆刪除
  6. 哈,班香港廢青、廢中青都中晒普選毒,以為普選就乜嘢問題都可以解決,白痴到無倫。菲律賓行普選廿幾年,咪仲係衰到貼地!

    另外美國根本就係哩個世界嘅最大威脅。橋下切宜去食糞,佢夠胆講叫啲美國大兵去歌舞伎盯嗎?去沖繩佢就敢講,因為沖繩人根本唔係日本人,佢係曲線當沖繩女人係慰安婦!

    回覆刪除
  7. 佛爺:
    哈哈,你少擔心喎!班友一向唔中意食大陸嘢,因為全部都有毒。佢地飲慣Perrier,食慣法國春雞、美國牛肉、日本米,話知大陸有冇食物供應啦!

    laulong,
    哈哈,菲律賓都未算,印度先經典呀!喺呢個世界最大嘅民主國家,極度違反人權嘅種姓制度依然存在,強姦(甚至姦殺)婦女暴行無日無之,睇怕連北韓都好過佢呀!至於美國呢個大惡霸,直頭雙手染滿鮮血添啦,伊拉克都唔知有幾多平民俾佢害死,早排就試過一日有十幾單炸彈襲擊,簡直係人間地獄!

    回覆刪除