2013年1月18日星期五

剪影情人橋

本人縱橫影圈幾十年……哈哈,我當然唔係打牌打到思覺失調,以為自己做咗大明星!其實「影」係指攝影,而「縱橫」就係橫衝直撞、毫無章法嘅意思。冇錯,本人影咗幾十年相,一向都係有拍無類、見乜影乜,總之亂影一通啦。雖然話有拍無類,但係有啲題材就完全冇接觸過,因為本人只係去旅行先會影相。例如人體寫真,試問跟鴨仔團又點會有機會影到呢?哈哈,除非係日本仔最鍾意嘅採花團啦!

話時話,有一種唔算好特別嘅題材,本人都係甚少影,而且就算影咗,效果滿意嘅亦少之又少。影呢種題材,唔需要乜嘢特別技術或高級器材,難度一啲都唔高,相機用auto mode就搞掂。之所以少影,係因為跟團旅行好少會遇到適合嘅場景。聰明嘅你相信已經估到,我講緊嘅係剪影。

剪影一定係逆光拍攝,主體嚴重曝光不足會令表面細節消失,得番個輪廓。想有滿意效果,主體最好係輪廓分明、線條唔過於呆板,如果能夠帶有美感、動感、或趣味性就更好嘞。而且暗部(主體同前景)不宜有太大片死黑,光部(背景)亦不宜有太大片死白。如果暗部面積太大,最好能夠保留番適度細節。同理,光部面積太大容易流於單調,如果真係細節欠奉,起碼都應該喺色調上有啲變化。講到呢度,大家可能已經暗笑緊在下冇料扮四條。其實我只係講出一個初學者嘅體會,同埋解釋番點解會咁難遇到適合嘅場景啫。嚴格啲嚟講,本人連初學者都未算,因為我根本就冇學過攝影。至於啲大師級人馬,自然能化腐朽為神奇,完全唔會受呢啲限制啦。

基於上述條件,如果以戶外環境嚟講,最適合拍剪影應該係日出或日落時分。不過鴨仔團甚少會安排睇日出日落,一來避免啲團友披星戴月咁辛苦,亦唔想延誤用餐時間。如果安排得睇日出或日落,咁嗰個一定係當地旅遊指定動作,而有關景點就必然係人山人海。叫得做鴨仔團,自然係樣樣都趕,絕對唔會安排團友早幾粒鐘去霸定靚位。通常去到景點都已經插針唔入,莫講話影靚相,就算見得到個太陽都要劏雞還神啦。本來以剪影嚟講,人絕對係極佳素材。但係如果人頭湧湧,影出嚟疊埋晒變成一大pat黑影,咁就唔影好過影囉。

啱啱聖誕假去咗緬甸,行程包括喺曼德勒嘅情人橋睇日落。事前做過吓功課,知道嗰度最出名係黃昏剪影,初時仲擔心會唔會又只係影到人頭添。好在去到當地,落車一睇,條橋成1.2公里咁長,完全唔使同人爭位,鐘意點影就點影。哈哈,終於影到覺得滿意嘅剪影喇!

話時話,大家有冇對呢幾張相嘅紀實性有些少懷疑呢?哈哈,唔使懷疑嘞,啲相全部都執過架!所謂「相不執不發」,我所有相都會執過先發上網嘅囉。就好似有啲女士一樣,唔化妝係絕對唔會出街見人架。當然啦,如果本身天生麗質,就算唔塗脂抹粉都唔會失禮人。不過天賦唔係人人都有,如果先天不足,用人工方法補救吓亦無傷大雅啫。講真,其實本人已經好克制架喇,雖然啲相有執過,但係都只屬於化妝程度,仲未算整容囉!

補充:
加咗幾張相嘅原片,等大家睇吓化妝前同化妝後嘅分別。

U Bein Bridge, Mandalay, Myanmar

U Bein Bridge, Mandalay, Myanmar

U Bein Bridge, Mandalay, Myanmar

Original version of photo #1

Original version of photo #2

Original version of photo #3

11 則留言:

  1. 嘩!簡直一流呀!不過咁既光線,容許拍攝的時間其實好短暫.

    回覆刪除
  2. 我想問下橋上的人,係特意係上邊,定係咁啱路過?

    因之前見過有一張相類似的,不過就係每個人都帶住草帽,不過每個人之間嘅距離又一樣,令我嘖嘖稱奇

    回覆刪除
  3. 很喜歡第三張,觸動!

    回覆刪除
  4. 唉呀,突然覺得係假景?有點失望:p

    回覆刪除
  5. 佛爺:
    多謝先!通常影日落真係得兩三分鐘咋,不過如果快手,都影到一百幾十張架喇!

    minor,
    喺情人橋拍日落剪影係遊客嘅指定動作,所以網上一定有好多類似嘅相囉。嗰度就好似尖東星光大道咁,唔止遊客會去影相,連本地人都會無無聊聊走去hea吓。緬甸夏天真係會熱死人,所以人人戴晒草帽都唔出奇。至於連距離都一樣,有冇做過手腳就好難講嘞。剪影主體一pat黑色,唔使考慮陰影問題,又唔驚接駁位會穿崩,要移花接木簡直不費吹灰之力呀!

    Coffee,
    多謝先!點樣先算造假,人人尺度都唔同。所謂「有相有真相」,而家附上幾張相嘅原片,等大家自己判斷吓。

    回覆刪除
  6. 哎吔,可能我講得唔清楚,首先要講的是向來對你的攝影作品仰慕到不得了,很有大師風範呀!

    我所謂假景係指橋上的人影:P

    回覆刪除
  7. 第二張橋上成排走過的是和尚?

    個落日好大呀,剪影更正!

    回覆刪除
  8. 大師嘅作品一向有水準。
    擦咗胭脂啫,又唔係面目全非。

    回覆刪除
  9. Coffee,
    哈哈,太見外喇!其實剪影真係好易造假,而且絕對睇唔出添!講真,啲相造假我都試過,揾日放上嚟俾大家指正吓先!

    laulong,
    係呀,緬甸真係好多和尚架!不過唔知佢地走去情人橋做乜囉!

    Jessica,
    多謝先!哈哈,大師就真係唔敢認嘞!

    佛爺:
    我從來都唔用RAW架,一來怕麻煩,而且去親旅行都影幾千張相,實在太大喇!

    回覆刪除