2013年1月13日星期日

水土不服

去旅行最麻煩係乜?對於我嚟講,肯定係水土不服。自問有少少潔癖,絕對唔係去到邊痾到邊嘅人。除非十萬火急,否則大單嘢一定會喺酒店房解決。好彩我個唔係玻璃肚,而係效率奇高嘅多功能有機堆肥桶,所以喺飲食方面,本人一向都係百無禁忌。點知三十年道行一朝喪,兩個禮拜前喺緬甸竟然水土不服,搞到行程最尾幾日冇晒mood。

出事唔係食咗污糟嘢,而係當地食物實在太肥膩。嗰啲團餐,碟碟餸都油淋淋,而且餐前例牌有薯片或者蝦片之類嘅油炸小食,仲要無限量供應添。本人恃住內置功能強勁嘅環保堆肥桶,自然係有殺錯冇放過啦。頭幾日都仲好地地,直至有晚食咗個用油浸住嘅「蜜糖雞」,第二日起身就覺得飽飽滯滯,連早餐都冇胃口食。跟住全日肚脹脹,仲感覺到堆肥桶裏面不斷有氣體產生,谷到鬼死咁唔舒服。經驗話俾我知,雖然個肚谷到爆咁滯,但係絕對唔可以靜雞雞放氣減壓,否則隨時會一褲都係。結果忍足成日,頂到食完晚飯返酒店,入房就第一時間衝去廁所排污。先係排咗好多糊仔狀嘅便便,跟住係大量氣體。過咗一陣,見再冇乜動靜先敢做善後清潔。點知啱啱搞掂,褲都未著番,肚仔又作動嘞,唯有將之前嘅排污程序再重複一次。如是者,最後排咗三次先排得清。

有別於一般由食錯嘢引起嘅腹瀉,呢次完全冇攪肚痛,而且啲便便同氣體亦唔算十分惡臭難當,所以相信唔係食物中毒,而係食得太多肥膩嘢,諗住排清晒第二朝瞓醒應該就會冇事。點知事與願違,第二朝瞓醒,仍然係嗰種脹爆嘅感覺。咪講笑,即刻衝入廁所減壓先。至於事後會唔會令同房一路刷牙一路嘔,咁就唔理得咁多喇。

雖然之後每餐都食得好少,而且主要係食白飯,脹爆情況仍然維持咗四日,要返到香港先冇事。個團只不過玩八日,結果有一半時間肚仔唔舒服,都咪話唔掃興。而且仲搞到我破埋戒,要喺公廁做大事添。

話說有一日下晝去到大金塔(Shwedagon Pagoda),領隊喺售票大堂話有需要嘅就去咗先,入到景點就冇廁所架喇。其實食完午飯,個肚已經脹到想爆,我自己都驚捱唔到返酒店,咁咪入廁所視察吓,就算唔掂都冇乜損失啫。又真係估佢唔到,雖然大金塔萬七咁多遊客,但係個廁所竟然相當乾淨,好過仰光國際機場九千幾倍。而且廁格尚算寬敞,有地方俾我掛背囊。題外話,以前大陸啲廁勁污糟,我真係試過孭住個大背囊做大事囉。言歸正傳,個廁所都有不足之處,就係廁格裏面冇廁紙。本人萬一要喺公廁開大,一定會消耗大量廁紙。首先要抹乾淨塊廁板,不過單用廁紙就抹得乾淨,講出嚟都冇人信啦。用廁紙抹,極其量只可以抹乾塊廁板,跟住仲要鋪起碼四層廁紙先坐得落去囉。廁格冇廁紙,而我自己隨身又只係得一包迷你紙巾,咁冇辦法嘞,唯有坐唔知幾多年冇坐過嘅無影櫈啦。結果又係經過三輪大爆發先排得清,真係坐都坐到腳軟。排完污,玩都玩得輕鬆好多。

不過輕鬆狀態只係維持兩粒鐘,未到晚飯時間個肚仔已經勁作怪。嗰日仲要係喺街食,跟住先返酒店,慘!返到酒店,仲要等領隊慢慢分房,而我嘅團號又排到最後咁滯,大鑊!本人一向好守規矩,但亦明白「辦大事不拘小節」嘅道理。喺咁危急嘅情況,唯有厚住面皮打尖,叫領隊俾鎖匙我先。上到房,衝入廁所,啱啱趕得切喺大爆發臨界點同馬桶嚟個終極結合,真係遲一分鐘都死得人!

講開又講,本人肚仔一向聽話,除咗食完辣嘢一定會有反應,絕少連續幾日扭計。對上一次嚴重水土不服,已經係三十年前嘅事喇。

話說82年一條友返大陸玩,由西南開始,玩咗兩個月先去到新疆。本人一早有晒心理準備,喺大陸預咗要大菌食細菌,總之眼不見為乾淨,根本唔驚得咁多。事實上,喺湖南四川,食涼粉冷麵仲多過食飯,肚仔都完全頂得住。點知一入到新疆就出事嘞,痾足成個禮拜。不過唔係因為食物唔乾淨,嚴格嚟講,係自己攞嚟衰。

由第一站吐魯番開始,已經覺得新疆係美食天堂。因為除咗唔使再捱本人最討厭嘅豬肉,嗰度有勁好食嘅烤羊肉串。喺和靜就創咗個紀錄,一口氣消滅咗31串,到而家都仲回味無窮。睇到呢度,大家都應該估到,本人出事係因為「多吃壞肚皮」。不過你地一定估唔到,食到出事嘅,根本唔係烤羊肉,而係最最最健康嘅生果。

新疆盛產瓜果,其中又以哈密瓜同葡萄最出名。葡萄都算嘞,始終唔係乜嘢特別嘢。哈密瓜就唔同喇,喺嗰個年代嘅香港,絕對算係貴價生果。當年本人係一個清貧學生,老實講,呢啲高貴嘢根本就食唔起。一去到吐魯番,見到啲哈密瓜堆到成座山仔咁,而且又賣得平,豈有不大察特察之理呢?唔知乜水話「日啖荔枝三百顆,不辭長作嶺南人」,我當然冇咁誇張,只要每日食兩三個,就覺得不枉千里迢迢去到新疆咁遠囉。

事實上,第一日去到吐魯番就食咗兩個哈密瓜同大量葡萄。跟住日日如是,除非冇得賣,每日都keep住消滅起碼兩個哈密瓜同一公斤葡萄。亦係由第一日開始,每日都keep住起碼去四次廁所(肚瀉嗰隻),足足持續咗一個禮拜。我就硬係唔信,個肚仔會敵唔過區區哈密瓜囉。果然,過咗一個禮拜,肚仔適應咗就冇事嘞。

本來呢,旅行遇著水土不服真係好唔方便。不過嗰時已經喺大陸玩咗兩個月,習慣晒去到邊痾到邊,大不了咪喺路邊解決囉。而且嗰時大陸根本冇坐廁,反而仲少咗啲顧忌添。如果換轉係今日,唔使講,我一定會選擇忍口。

不過講番轉頭,見到堆到山仔咁高嘅哈密瓜又真係好難忍口囉。大家咪恥笑我住,冇錯,喺今日嚟講,哈密瓜根本唔係乜嘢矜貴嘢。但係你地有所不知嘞,當年我喺新疆食嘅,係白肉哈密瓜,同而家喺香港買到嘅紅肉貨色可以話係天壤雲泥。白肉哈密瓜冇咁爽脆,不過就超甜多汁、香味濃郁,跑贏紅肉貨色九條街。都唔知點解,咁好食嘅哈密瓜,喺香港竟然從來未見過有得賣。喺今日,哈密瓜已經唔再係高不可攀嘅嘢,但係就完全提唔我嘅興趣。講得老土啲,曾經滄海難為水呀!

Bagan, Myanmar

Mandalay Hill, Mandalay, Myanmar

Shwedagon Pagoda, Yangon, Myanmar

烏魯木齊, 新疆

12 則留言:

  1. haha, 同你走咗轉水土不服腸胃大爆發喇!

    無偈咯,年紀大了,由手腳到腸胃已非金剛不壞身 :(

    回覆刪除
  2. 第一張相你兩邊臉上貼了甚麼?定畫了兩筆?

    回覆刪除
  3. 哈哈,駛唔駛形容得咁詳細呀(連幾多廁紙都講埋):-P
    其實唔少人對油膩敏感的,我同我媽咪都係,但佢犀利啲,可以成枱人都冇事,但唔啱的話即嚟,所以我媽唔太鍾意出街食飯的。
    另,你副“武裝”(相機)好勁喎,換鏡都慳埋,孭兩部主機,咪好重囉!

    回覆刪除
  4. 唔記的講,你呢篇令我諗起中五果年去桂林,個廁所核突到唔知點形容,差啲跌咗個銀包落去,嚇到的個心都“跌”埋出嚟!!

    回覆刪除
  5. laulong,
    年紀大機器壞,呢個道理我當然明白。其實腸胃一向冇乜問題,水土不服只係偶發嘅啫。反而皮膚敏感同鼻敏感近年就差咗好多,尤其是鼻敏感,今年差唔多日日都發作,真係勁難頂!

    Coffee,
    嗰啲係由樹皮加水磨成嘅糊仔,當地人話有美容護膚作用,男女老幼個個日日都會搽。好多遊客,特別係啲鬼,都會入鄉隨俗架。

    SKII,
    哈哈,我一向都鍾意短話長說架!其實油膩嘢都冇乜問題,反而近年食親勁辣嘅嘢都會肚痛。至於孭兩部相機,梗係重到飛起啦,不過勝在唔使換鏡,影相快好多。講到廁所,當年喺大陸都見識過唔少,真係千奇百怪,等我揾次寫吓先!

    回覆刪除
  6. 我每次去內地都會痾嘅,點小心都好都會有問題。聽說要用樽裝水刷牙會好啲,同埋洗頭唔好開口!以前喺香港我都有好勁鼻敏感,做咗逃兵就冇哂,我諗都喺香港空氣差咗好多。

    回覆刪除
  7. 我去泰國都係咁,最後兩天,大瀉特瀉.

    回覆刪除
  8. 我都好似佛爺咁,去泰國出事,跟住要入醫院...

    回覆刪除
  9. 我去吐鲁番那年,是自己去田裏摘哈密瓜,即摘即食,清甜可口,而家諗起都流口水。

    回覆刪除
  10. eric,
    哈哈,睇嚟你嗰個一定係玻璃肚嘞!講到空氣質素,點污染都唔夠食煙咁厲害啦!其實我自己都有啲懷疑,都唔知啲鼻敏感會唔會係同食煙有關囉。

    佛爺:
    哈哈,喺湄南河水上市場見到啲人就咁攞黃泥色嘅河水嚟煮河粉,連本人咁勇都唔敢食呀!

    minor,
    嘩,搞到要入醫院咁大鑊呀?!睇嚟你嗰個都係玻璃肚喎!

    Jessica,
    嘩,有得自己摘哈密瓜咁盞鬼呀!我嗰時淨係去過葡萄溝食葡萄咋,而且仲唔可以自己摘添!

    回覆刪除
  11. 係咯,眼見葡萄溝頭頂嘅葡萄唔俾摘,真係有d失望。

    回覆刪除
  12. Jessica,
    係呀,其實去葡萄溝係貪佢有得自己摘,夠過癮囉!如果只係想食葡萄,我唔識喺街買咩!

    回覆刪除