2012年10月6日星期六

刁民社會

刁民係乜?以本人嘅中文程度,恐怕好難講得清楚。而且網上有大把現成資料,信手拈來就用得,又使乜自己獻醜呢?!以下係節錄自百度百科有關「刁民」嘅條目:

刁民
翻开字典,“刁”,是狡猾的意思,从原始意义上讲,“狡猾”应该是一个中性词,不具有褒贬意义。“刁民”绝对不是愚民。它是民众中的聪明人。 “刁民”,是与官员相对应的,是官员对一些难对付的民众的专用称呼。“刁民”就是对官员刁难,很难对付的一类百姓。“刁民”的称呼是官员赐予的,“刁民”的贬义也应该是官员赋予的。自古以来,官员是不大喜欢“刁民”的。“刁民”多了,工作难做,官员难当。

基本信息
“刁民”带有无赖,狡猾,奸诈特征的人被称为刁民。也可以说是蛮不讲理的人,狠毒心肠的人。

由来
一是百姓享有一定的人权。中国之所以“刁民”历史悠久,是与中国的“民本”思想占主导地位有关系的。民众享有基本的人权,才会有“刁民”出现! 在生存权力随便可以被剥夺的社会中,是没有“刁民”的,只有“顺民”或者“暴民”!曾国藩在衡阳练兵时,对抢粮的饥民,一次性砍下二十多颗血淋淋的人头。曾的解释是乱世要用重典。在这种重典下,谁还敢作刁民呢?在日本统治的中国满洲,是没有人敢同“皇军”使刁的,所以那时只有“良民”和抗联战士,而没有“刁民”。

對於上述解說,本人並唔完全認同。首先,“狡猾”一詞肯定係帶有貶義。而且要做刁民,其實門檻好低,根本唔需要乜嘢聰明才智。再講,刁民所「刁」嘅對象,亦唔一定係官員。被「刁」者可以係任何個人、私人或公共機構、甚至整體社會。不過有一點我就非常同意,就係「百姓享有一定的人权」,先會有刁民出現。今日睇報紙,就見一單人肉示範嘞。

報載有私家醫院清潔女工,因為喺工作時間瞓覺,俾上司用手機拍低短片,最後被迫辭職。事後女工「不滿被侵犯私隱,向私隱專員公署投訴,但未獲受理,日前她入稟高院申請司法覆核。」據醫院解釋,該女工「曾多次偷懶,院方每次與她對質時,她均否認,反向院方要求證據」,所以先拍低佢嘅睡姿。報導仲話,該女工「原於瑪麗醫院工作10多年,後來因為薪金較高而轉工,一直以來跟部分新同事關係不太好,懷疑遭上司針對。」

眾所周知,喺公營機構做嘢,基本上係捧住個鐵飯碗。除非導致嚴重事故,對於一般輕微失職(例如偷懶),主管都會隻眼開隻眼閉,費事搞咁多嘢。私營機構講求成本效益,莫講話主管對下屬偷懶唔會視而不見,就算係同級同事都會睇唔過眼,因為隨時要做埋佢嗰份。所以當事人話俾同事針對,根本就係正常不過。

至於話侵犯私隱,更係荒謬絕倫。喺工作地點偷懶瞓覺都算係私隱?俾人影到,自然唔係匿埋喺廁格之類嘅隱蔽地方瞓覺。明目張膽偷懶,斷正咗仲反咬人一啖,呢位女工都算「刁」得緊要喇。喺公家醫院hea過世咪好囉,佢偏偏要貪多少少人工轉去私家醫院。去到私家醫院,又要好似喺公家醫院咁hea,唔俾人兜都冇天理啦!

單嘢絕對唔係單一事件,呢類將社會核心價值無限放大、甚至肆意扭曲嘅行為,根本已經成為風氣。例如次次示威遊行,最後都演變為暴力衝擊警方防線、或者強佔馬路。唔通為咗表達意見,就可以破壞社會安寧、甚至剝奪公眾(道路使用者)權益?

又好似某名店阻止港人喺店外影相,網民就發起萬人圍堵,搞到附近嘅舖頭都做唔到生意。認為店方冇權唔俾人喺店外影相,咁咪報警囉,唔通班友又有權對人地作出滋擾?呢種近乎任用私刑嘅行為,究竟又係咪切合文明社會嘅核心價值呢?

另外,小號喺店內用簡體字做產品說明,又得罪咗某啲民主派人士,結果一樣受到圍堵。你可以抗拒簡體字,不過絕對冇權干涉我用邊種文字嘅自由。唔鍾意就咪幫襯,但係走嚟小店搞事,阻住晒我做生意,咁就佛都有火嘞。最得人驚嘅係,帶頭搞事嘅竟然係候任民選垃圾會議員嚟添!

由此可見,呢種將個人權利無限放大、肆意扭曲嘅刁民行徑已經深入民心。毫無疑問,香港正逐步走向刁民社會,安定和諧嘅日子將一去不返!

弊嘞,冇將上面引述百度百科嘅一段文字轉番繁體添,會唔會俾人鬧我係五毛黨呢?

Great Zimbabwe, Zimbabwe

8 則留言:

  1. 看到說>>香港正逐步走向刁民社會,安定和諧嘅日子將一去不返!

    唉,好慨嘆!呢個人權高舉的年代,很多東西明明錯的,一套入人權私隱,就好似堂而皇之了。

    回覆刪除
  2. Coffee,
    啱啱喺電視新聞睇到,班友又走咗去佔領獅子銀行喇!唔通人權真係無限大,連私人產業都可以話侵佔就侵佔?!

    回覆刪除
  3. haha, 啲人有理無理,一句五毛黨就車埋黎架喇!不過佢地咪又係老美一毛黨,老美俾條毛佢地就覺得皇恩浩蕩!

    香港變晒質喇,冇得救!

    回覆刪除
  4. 我又唔明,為何加拿大的香港人,不去抗議政府印刷的中文刊物全用簡體字?莫非,西人用簡體字,香港人就不敢吠,只會搖尾。

    回覆刪除
  5. //會唔會俾人鬧我係五毛黨呢?

    難道你不是嗎?不是世上反對他們的都是五毛嗎?用不用簡體字,分別不大吧

    回覆刪除
  6. laulong,
    哈哈,香港人有幾崇洋,唔使講都知啦!莫講話西人嘅毛當係寶,就算鬼老放個屁都係香架!

    佛爺:
    香港乜都有得政治化,文字當然唔會例外啦!全球絕大部分華人都係用緊簡體字,呢個根本就係大勢所趨。而且又冇人迫班友用簡體字,佢地反而走去干涉人地用,簡直不知所謂!

    國之三維:
    歡迎光臨!鄙人立場鮮明,本來唔會介意人地點講。不過本人從來冇收過中央或西環政府一分一毫,自認五毛黨咪好蝕底!哈哈,話時話,如果鬧人有錢收,咁又真係幾盞鬼喎!

    回覆刪除
  7. 不是有沒有收錢的問題
    而是現在的環境,「被五毛」的門檻低得可怕

    回覆刪除
  8. 國之三維:
    有冇收錢當然係問題,因為如果收咗錢,即係話有關言論並唔係真正民意。啲人郁啲就將異見者打成五毛黨,其實係因為佢地自己冇料到。呢類人多數係口號派,除咗嗌口號就乜都唔識。當佢地反駁唔到異見者嘅論點,就會將對方打成五毛黨。就好似有部分傳媒同犯民議員咁,將投票俾建制派嘅選民醜化為俾中聯辦操控嘅鐵票。因為佢地根本解釋唔到點解喺民主選舉,竟然有人會投票俾唔支持「民主」嘅候選人!

    回覆刪除