2012年10月15日星期一

發雞瘟

琴日有鋪牌真係激死!我手揸住以下萬子:

二三三四四五六七八八八八九

雖然本人連16隻嘅台灣牌都打花章,但係呢鋪牌都要睇咗好耐先知道叫乜。最衰打麻雀game係眼看手勿動,冇得將啲牌砌嚟砌去。不過呢度咁多雀林高手,話唔定有人已經一眼就睇得出鋪牌係叫三六七九萬。

當時只係去到中局,食糊嘅機會都相當大吓。果然,轉個頭就摸隻七萬,真係開心死,因為只有食七萬先係平糊。清一色平糊門清自摸,加埋啱啱夠10番。個game只係打到10番,食鋪打出十三么仲冇自摸十番咁實際囉。

都摸咗上手,咁當然係實食冇黐牙啦。點知好衰唔衰,都唔知突然發乜嘢雞瘟,明明想食糊,但係竟然㩒錯咗食糊掣隔籬嗰個開槓掣,無啦啦攞咗4隻八萬去槓。拆散咗鋪牌唔在講,如果槓隻返嚟出銃俾人就PK啦!

好彩都有少少運,槓返嚟嗰隻係九萬,起碼唔使輸先,因為我係獨家萬子。再睇真啲,原來打隻七萬出去仲可以叫番二五八萬添,雖然食糊機會細咗好多,但係點都好過連糊都冇得叫囉。更好彩嘅係,對家跟手就打隻五萬俾我食埋。雖然有得食,不過得打出7番,同自摸10番爭咗幾倍,就算唔係打真金白銀都激死啦!

話時話,類似嘅發雞瘟事件其實都發生過唔少。試過想delete一張相,結果就成個folder都鏟埋。又試過沖完涼諗住放啲底衫褲入廚房嘅洗衣籃,點知竟然掟咗落垃圾桶。就算係行入房,有時都會無啦啦撼頭埋門框。

本人好有自知之明,明知自己有時會發吓雞瘟,所以有啲高危嘢我係永遠唔會做。例如處理食材,我就只會切而唔會斬。就算真係非斬不可,我都一定唔會用隻手傍住。萬一發起雞瘟上嚟,連隻手都斬埋咪大鑊?總之就博唔過啦!

話時話,唔知其他人有冇類似嘅慣性發雞瘟問題呢?

Kars, Turkey

4 則留言:

  1. 我都試過呀,撳錯咗變咗冇得食,真係恨都恨唔番!

    可能係太攰喇,長期夜瞓,唔夠精神就容易撞板!

    回覆刪除
  2. 梗有啦!明明自己食清對,撳錯變咗俾人食清一色!!

    回覆刪除
  3. 好似這是源自生活壓力,所以做成人們不時會發雞瘟,這是難以避免的。

    回覆刪除
  4. laulong & 佛爺:
    疲勞會有影響,唔夠專注亦係原因。但係太專注又死,會造成精神緊張,反而更容易出事!

    Coffee,
    哈哈,好彩電腦麻雀冇得食詐糊,如果唔係仲死呀!

    回覆刪除