2012年10月14日星期日

請勿侮辱文學與藝術!

內地作家莫言獲得諾貝爾文學獎,本人真係啞口無言。千祈咪誤會,我絕對唔係要質疑評審結果。「無言」係因為唔知講乜好,以本人嘅文學修養,根本就冇資格評論。況且喺莫言嘅作品之中,我淨係睇過「紅高粱家族」一篇咁大把,仲要係九十幾年前嘅事,內容已經唔記得晒,想評都冇得評。

無啦啦摷呢單嘢嚟講,係因為睇報紙見到內地「藝術家」艾未未大發高論(「高」字要用普通話發音),話莫言獲獎「是對人性和文學的侮辱,是諾獎委員會的恥辱。」

條友都黐孖筋,作為一位「藝術家」,竟然踩過界批評諾貝爾文學獎嘅評審標準。人地嘅作品冇傳遞到佢認為正確嘅政治信息,就話人冇資格獲獎,都唔知係乜嘢理論。

以李杜為例,李詩明顯比杜詩少咗一份憂國憂民嘅情懷,但係後世並冇因此而貶抑李白。事實上,詩仙詩聖得以齊名,正正說明咗文學領域容納到唔同嘅題材,有空間自由發揮先係硬道理。

以艾未未嘅主張,文學作品只可以有一種聲音,咁同大陸鉗制言論自由又有乜分別呢?公然提出要扼殺作家嘅創作自由,唔知邊個先係喺度侮辱緊文學呢?!

講開艾未未,又忍唔住要提吓佢嘅「藝術創作」嘞。鄙人對藝術一竅不通,本來都冇資格評論啲乜嘢。不過有一樣嘢我起碼知道,令人覺得嘔心嘅就點都唔講得上係藝術品囉。

就以大「藝術家」嘅名作「一虎八奶圖」為例,據聞內裏深藏玄機、隱喻甚多。不過橫睇掂睇,我都只係見到一個肥到爆晒膏嘅裸男,再加埋四個其貌不揚嘅裸女。咁核突嘅嘢,真係望一眼都想嘔,仲邊會有興致探討佢嗰啲所謂嘅隱喻呢?

講真,呢件所謂作品,分明就係一個不知羞恥為何物嘅男人同四個博出位嘅女人喺度玩即興露肉!如果咁都算藝術品,根本就係對藝術嘅極大侮辱囉!

本人絕對支持言論自由,但唔可以對文學同藝術肆意侮辱!艾未未,唔該你收皮啦!

哈哈,最緊要嗰樣唔記得講添!大家千祈唔好摷「一虎八奶圖」嘅原裝版嚟睇,否則後果自負!如果閱後令大家對異性(或同性)喪失興趣,本人概不負責!

一虎八奶圖

7 則留言:

  1. 哈哈,呢個八奶圖,我之前睇過,話說同政治有關?我真係唔識“欣賞”,亦都完全睇唔出有乜美感,可能,我真係冇乜藝術細胞啦!

    回覆刪除
  2. 這張照片咁肥膩,你唔覺有礙觀瞻咩?好似污染了你個博客喎!讀者會誤會入了豬肉舖的網頁。嘻嘻!

    回覆刪除
  3. SKII,
    哈哈,如果咁都覺得有美感就大鑊喇,肯定要送入青山接受再培訓囉!至於內裏嘅政治隱喻,據聞係關於黨中央、知識份子、資產階級、新聞媒體、同埋農工階級,真係虧佢諗得出!

    佛爺:
    張相簡直令人反胃,如果豬肉舖用嚟做宣傳,實聽執笠都得啦,哈哈!

    蝸牛:
    歡迎光臨!

    回覆刪除
  4. 莫言嘅書我以前係圖書館借過嚟睇。

    >>「是對人性和文學的侮辱,是諾獎委員會的恥辱。」

    就像他的「擋中央」核突照片一樣,艾未未除咗搏出位,都還是搏出位。

    回覆刪除
  5. 那一堆肥垃圾,我丙咗佢好耐,是叫人作嘔的人間廢物!!

    回覆刪除
  6. Coffee,
    哈哈,你咪理,雖然核突到爆,但係佢嘅「擋中央」行為藝術都不知幾多人模仿呀!

    laulong,
    哈哈,借用內地網民金句:生得人豬難分唔係佢嘅錯,但係走出嚟剝衫嚇人就肯定係佢唔啱囉!

    回覆刪除