2012年8月16日星期四

女神打救你!

好日唔搭吓邨巴出街,琴日一搭就遇到驚慄場面,嚇到魂飛魄散,搞到差啲冇命返屋企!大家唔使幸災樂禍住,唔係發生乜嘢交通意外,不過驚嚇程度就同九車連環相撞有得揮囉!

話說邨巴去到鬧市遇到塞緊車,正係行不得也哥哥。無聊之際,見到隔籬有架小巴都係塞到唔郁得。再睇真啲,就發現小巴車身有個廣告,寫住雞乸咁大嘅八隻字:「民主女神重返議會」,仲有某知名女子嘅肉照添。究竟有邊位女子可以令睇慣恐怖片嘅我都嚇餐死呢?哈哈,之唔係前垃圾會議員痰香聞囉!

講番張相,大家唔好誤會,並唔係啲乜嘢導彈警鐘之類嘅物體。事實上,呢類物體亦唔會令我嚇破膽囉。張「肉照」其實係痰小姐嘅大頭相,而「肉」係指終極橫練嘅面部肌肉。

喺度要澄清一下,本人係「平等機會」支持者,當然唔會攞痰小姐嘅無鹽之貌嚟大做文章。俾痰小姐嚇親,其實係因為佢嘅金面罩功夫,簡直已經練到刀槍不入水火不侵,絕對可怖可愄!佢竟敢以「民主女神」自居,面皮之堅厚,都可謂舉世無匹喇!

大家知啦,封痰小姐做「民主女神」,其實只係啲傳媒同好事之徒嘅揶揄戲謔。但係佢竟然唔自我反省,仲使出一招「女神借箭」,將呢句笑謔之詞攞嚟做宣傳口號,本人真係服到佢五體投地!

老實講,我就諗唔起痰小姐對香港民主發展、或者喺佢所屬功能界別方面有乜建樹嘞。不過咁,又唔可以話痰小姐一無是處,因為佢起碼識捉蟲。捉乜蟲?哈哈,之唔係捉甘奶威呢類咁嘅老淫蟲囉!

如果邊位屋企附近有色魔出沒,又或者成日俾人性騷擾,女神一定可以打救你!就算冇呢啲情況,女神一樣會打救你,不過「救」字就要讀第一聲嘞!

住喺九龍東嘅朋友,女神可唔可以重返垃圾會打救港人,就要睇你地點用手上神聖嘅一票喇!

Temple of Hathor, Dendera, Egypt

9 則留言:

  1. 女神之名豈可如此濫用,無論如何都難套在她身上呀!

    回覆刪除
  2. Coffee,
    哈哈,係呀,如果佢自封「性感女神」,我都覺得仲比較容易接受啲囉!

    回覆刪除
    回覆
    1. 嘩!X!!(真係爆粗)

      吳君如做民主女神應該會受歡迎D。

      刪除
  3. 男人見到,聽到痰香聞都嚇到謝晒,縮晒,唔會有風化案架喇,叫佢日日喺地鐵車廂走來走去,就包冇風化案。叫佢對住啲風化積犯,效果等同天閹!

    回覆刪除
  4. laulong,
    哈哈,痰小姐副專容確實足以震懾一切牛鬼蛇神,將佢張大頭相當門神貼喺門口,包保冇小偷敢光顧!

    回覆刪除
  5. 咁嘅準則,我覺得我可自封女神中之女神囉 ... XD

    回覆刪除
  6. SKII,
    所以話呢,痰小姐真係厚面皮得緊要!連女性選民都頂唔順,就證明佢嘅宣傳策略有幾失敗!

    詩白爾:
    哈哈,吳君如嘅強項係「神女」,梗係唔會蠢到自封「女神」啦!

    回覆刪除
  7. 痰小姐也有番兩度散手,起碼無人會挖她瘡疤,睇下佢私生活是否檢點。嘻嘻!

    回覆刪除
  8. 佛爺:
    哈哈,其實痰小姐都唔想架!奈何以佢嘅瓜容,真係唔會令人對佢嘅私生活產生興趣囉!

    回覆刪除