2012年5月24日星期四

反簡廢柴

呢排鼻敏感發作,要攬住卷廁紙過日辰,搞到連鬧人都冇mood添。不過早幾日俾人踩到上心口,條氣頂住頂住,唔鏟到條友反艇真係難洩心頭之憤!

話說上個禮拜,飯桶威條廢柴帶埋班嘍囉去咗旺角佐丹奴搞事,喺人地門口舉牌抗議,叫人唔好入去買嘢。事緣係條PK發現佐丹奴店裏面所有宣傳標示牌都淨係用英文同簡體字,「一個繁體中文字都睇唔到」喎。佢話咁係向大陸客獻媚,唔尊重本地消費者,所以要抗議佐丹奴「見錢開眼、以簡代繁」。

首先,條友正一白痴,連簡體字係點簡法都唔知就喺度亂噏。事實上,有好多中文字根本冇簡化到,淨係「佐丹奴」三個字都已經係繁體啦,又點會「一個繁體中文字都睇唔到」呢?就算用簡體字又點,唔通咁都有罪?飯生冇理由唔知啩,香港嘅全名係「中華人民共和國香港特別行政區」。而簡體字係中國嘅法定文字,咁喺香港用又何錯之有呢?條友無啦啦搞埋晒啲文字獄,而家當香港係極權國家咩!

話時話,唔知飯生有冇間中蒲吓老蘭呢?我去開嗰間pub,個酒牌就淨係得英文,連一隻中文字都冇。我又知有啲所謂高級西餐廳,個餐牌都只係得雞腸,咁又算唔算歧視我地呢啲A至Z都未識齊嘅本土華人呢?如果飯生咁得閒,不如去掃蕩吓呢啲視中文如無物嘅酒吧食肆啦。係喎,可能條友以為自己仲係大英子民,咁當然覺得淨係用英文冇問題啦。

仲有樣好搞笑,條友竟然鬧佐丹奴「見錢開眼」。人地打開門口做生意,梗係為咗賺錢啦,見錢開眼根本就係理所當然。為目標顧客提供方便,我就睇唔到有乜問題嘞,連咁都做唔到就聽執啦。如果有人硬要將好客之道講成係獻媚,咁分明係指鹿為馬,居心叵測。至於話佐丹奴可以喺簡體字以外再加埋繁體字,我都覺得呢個唔係問題。不過人地係商業機構,喺策略上犯錯自然會受到市場懲罰。你唔鍾意可以唔幫襯,呼籲其他人杯葛佢都冇問題。但係喺鋪頭門口搞事,阻住人地做生意,咁就係唔可以接受嘅滋擾行為囉。

條友又話「我唔贊成呢啲盲目嘅中港融合,只會摧毀香港嘅核心價值,旅客應該入鄉隨俗,呢啲行為會令本土文化逐步受到侵蝕、影響。」真係俾佢笑死,話呢啲係「盲目嘅中港融合」,條友就真係盲嘞。認識自己國家嘅語言文字係國民嘅本份,根本唔算乜嘢融合,更加唔可以話係盲目。條友都唔知乜嘢心態,玩自閉只有死路一條囉。至於「入鄉隨俗」,咁啲鬼佬嚟香港玩之前,係咪應該學定中文先呢?事實上,好多英國鬼喺香港住咗幾十年,除咗粗口之外就一句中文都唔識,唔知飯生又點睇呢?講到「核心價值」,眼前就有一單真正破壞香港核心價值嘅嘢嘞,又唔見條友敢開句聲。如果飯生敢拖齊馬去龍眼山莊聲討班土皇帝,我就即刻寫個服字俾佢,仲會喺屋企供奉住佢嘅長生祿位,早晚焚香參拜添!

講到尾,條友喺度無限上綱,搞埋晒啲文革式批鬥,當然係有佢嘅政治目的啦。挑起中港矛盾,乘機混水摸魚,爭取政治本錢,自然係因為覬覦垃圾會議員嘅寶座。講真,條友咪一樣係見錢開眼。以佢咁嘅質素,如果唔喺政界呃飯食,最多咪只可以做跟車或者看更之類嘅嘢。垃圾會議員高薪厚祿,條友自然係恨到留晒口水啦。不過呢條咁嘅廢柴,我就睇死佢選唔到嘞。如果佢今年選到,我俾個頭佢坐!

大家係咪有啲奇怪,點解我對呢單嘢會咁大反應呢?哈哈,因為佐丹奴我都有份架,話晒都揸住佢幾手股票。而家條友喺度搞事,唔嬲就有鬼啦!如果再嚟搗亂,我連佢祖宗十八代都鏟埋呀!


Ghorepani, Nepal

7 則留言:

  1. 跟你有同感, 那些咬住簡體字不放借題發揮的人, 心底裡存在偏見, 跟他們爭辯永遠沒結果. 雖然簡體字不完美, 現在已經成為中文世界的主流, 聯合國官方文字中的中文規定為簡體字, 外國人學中文學的也是簡體字為主, 熱愛中國文化的人, 完全可以繼續使用繁體字, 但不應抗拒簡體字, 當然最好是內地學校也同時重視學會繁體字,即使漢字簡化了,繁體字不能不懂.

    回覆刪除
  2. 啲人反簡體字反到上綱上線,仲有從政的人要較人先知先覺,觸覺要敏銳,去到惹人反感都唔知,邊會有號召力架!

    保重身體!

    回覆刪除
  3. haha, 就算你冇股份都要剷班不該喇!班友有權唔用簡体字,但边有權鬧人用簡体字!

    而且現行簡体字有部分係民國時已頒佈,中國文字一直有簡化的情況,班廢柴識鬼咩!

    回覆刪除
  4. 加拿大魁北克省規定招牌和餐牌等等只可用法文,否則屬於違法。香港立法會,有沒有定明只可用繁體字?若果有,那麼使用簡體字便要罰款或判監,而不是找幾個人去抗議。

    犯民成班PK話要講法治,他們口是心非,把自己當成是土皇帝,從他們口中說出的,就是法律。

    回覆刪除
  5. 路漫漫:
    歡迎光臨!雖然唔知學校有冇教,不過我估國內仲有好多人識繁體字。我喺去開嗰個大陸攝影網站,所有留言都係用繁體字,啲網友都睇得明,而且從來冇俾人話過我唔尊重佢地。反正都係中文嚟啫,稍為有教養嘅人都唔會因為啲咁嘅嘢而發爛渣囉。當然啦,我用嘅書面語,如過用廣東口語,咁就真係唔尊重人地嘞,因為我好肯定啲外省人唔會睇得明。

    Coffee,
    哈哈,鼻敏感係煩啲,不過都唔係乜嘢大病,唔死得人嘅!至於嗰班廢柴政棍,又真係唔使替佢地擔心喎。只要爭取到最激嗰班選民,喺比例代表制呢個遊戲規則,要攞到一席根本唔係咁難囉。

    Laulong,
    哈哈,香港有言論自由,班廢柴當然有權鬧,不過我都有權鏟到佢地開花囉!就係呢班友喺度製造矛盾,搞到香港極度分化,真係人人得而鏟之呀!

    佛爺:
    魁北克搞埋啲咁嘅嘢,似乎仲專制過星加坡喎,簡直令加拿大呢個民主國度蒙污囉!至於嗰班廢柴,當然係認為只有支持民主(係佢地定義嘅民主)嘅人先可以享有言論自由啦!

    回覆刪除
  6. 魁北克情況有點不同﹐它本來是法屬殖民地﹐主要人口由法國人組成。當年因為法國打輸才割讓給英國﹐其後英國讓加拿大獨立﹐加拿大成為君主立憲國家﹐加拿大國王由英國國王兼任。
    其後﹐魁北克多次爭取脫離加拿大聯邦獨立但都失敗﹐現在魁北克省本身經濟疲弱﹐也使它無力獨立。
    然而﹐加拿大聯邦政府為免魁北克再鬧獨立﹐所以給它很大的自主權﹐當中包括容許它們立法保護當地的法國文化﹐將法文列為官方語言等等。
    這種保護少數族裔的政策﹐在國外很常見﹐中國也有政策向少數族裔傾斜的。

    香港情況則不同﹐中港兩地居民同文同種﹐香港沒用簡體雖有其歷史因素﹐但不論繁簡﹐從本質上來來說都是中文。

    現在很明顯的情況是﹐有人借簡體字和普通話問題﹐鬧文化港獨。

    回覆刪除
  7. 文少:
    魁北克個畸屎,無論有乜歷史因數,喺一個民主國度嚟講都係難以接受,因為咁係侵害咗民眾對表達方式選擇嘅自由。而且呢種自閉心態對任何人都冇好處,唔通遊客想去嗰度玩,真係要學定法文先?法國佬自大成性,由此可見一斑!至於班廢柴喺香港反簡,其實只係借題發揮,將文化議題帶到政治層面,根本同阿扁嘅去中國化冇乜分別!講真,我又唔覺得班友喺文化議題上有乜見地囉!

    回覆刪除