2012年5月9日星期三

一年一鑊

星期六飲完茶返屋企,無啦啦喺樓下大堂俾管理員芳姐截住,心諗唔慌會有好嘢啦。果然係濕滯嘢,原來樓上又塞坑渠,要約時間俾師傅入屋通渠。我都知唔關芳姐事,不過又要煩到我,忍唔住要表達吓不滿:「又冇搞錯呀,又通渠!舊年先啱啱通完,而家又嚟一鑊,樓上真係變態!」其實我都唔預芳姐會有乜嘢睇法架喇,點知佢竟然又回應喎。佢話一年通一次都好正常,仲話有啲住戶甚至半年嚟一鑊添。咁我當然唔信啦,估計佢都係想幫樓上講句好話啫。

我喺呢度住咗超過十年,從來未塞過坑渠。樓上以前上幾手都係日本租客,亦冇試過話需要通渠。自從兩年前搬咗家香港人嚟,已經係第二次塞坑渠,咁當然係佢地有問題啦。舊年通渠嗰鑊,樓上戶主曾經講過大概情況。佢話每次洗衫,當洗衣機去水嘅時候,啲水連埋污糟嘢(例如飯粒)就喺渠口谷番出嚟。連飯粒都有,咁當然係個賓賓懶,洗碗之前冇處理好啲剩飯剩菜,乜都沖晒落星盤,先會搞到塞坑渠啦。當時我已經同樓上講,要求佢叫個賓賓小心啲,唔好再乜都沖晒落星盤,費事大家麻煩啦。點知事隔一年,而家又嚟多鑊,真係俾佢激爆!

不過激氣還激氣,始終都要俾佢搞囉。師傅上到嚟,我就順便問吓一年塞一次係咪好過份。點知佢嘅答案竟然同芳姐一模一樣,真係懷疑佢地係咪夾過口供。佢話如果晚晚煮飯,真係好易會塞渠,尤其是印度人,可能煮嘢用油比較多,大約半年就要通一次。咁講法,我咪要酬謝神恩,好彩樓上嗰家唔係印度人?!都唔知真定假,我夠差唔多晚晚煮飯啦,又唔見我塞渠?我又再八吓通一次渠收幾錢,原來都唔平,要成三千幾蚊。真係唔明樓上點諗,就算唔介意麻煩到樓下,搞到自己破財都唔好啦,如果個賓賓唔聽話咪炒咗佢囉。

雖然唔使我落手做啲乜嘢,不過搞足兩粒幾鐘,霸佔咗廚房同客廁,部通渠機又轟轟聲嘈住晒,都咪話唔煩。卒之等到師傅話搞掂,檢查過廚房同客廁嘅牆身地板都尚算乾淨,先叫做一天光晒。點知師傅啱啱走咗,入客廁一睇先發覺大鑊,馬桶底竟然多咗一大堆類似沙石嘅黑色污糟嘢。咁就即刻試吓沖水啦,點知完全沖唔走。雖然呢啲嘢我都搞得掂,不過冇理由要自己落手啫。拿拿林打電話落樓下叫芳姐截住個通渠佬,叫佢上嚟搞番掂篤蘇州屎。條友上到嚟,睇完之後竟然若無其事咁話:「鐵銹嚟啫,唔會塞廁所嘅。」真係俾佢吹脹,我都知道唔會啦,沖得走自然唔會塞,沖唔走亦冇機會塞囉。問題係嗰堆嘢沖唔走,好似成日都有篤屎喺個馬桶度咁,個廁所以後仲點見得人呢?!而且清理埋嗰堆嘢,根本就係佢嘅責任,呢啲人真係唔鏟都冇天理啦!本來諗住又要有排搞,點知條友二話不說,即刻踎低伸手入馬桶。挖吓挖吓,竟然挖咗好大堆出嚟,要兩隻手掌拼埋先兜得住。睇見佢嘅專業精神,我都無話可說,真係唔好意思再鏟嘞。

今次叫做煩完,但係唔知樓上幾時又會整多鑊,我都覺得好無奈吓。點解樓上做咗啲唔合理嘅嘢,樓下竟然要一齊承擔後果呢?我絕對同意候任凸首嘅講法,香港真係有住屋問題。如果人人都有house住,就唔使再俾樓上煩啦,咁至係真正嘅安居樂業囉!

10 則留言:

  1. 搬上頂樓,咁只有你塞人,冇人塞你 XDDD

    回覆刪除
  2. laulong,
    頂樓我都住過,夏天熱到焗爐咁,開極冷氣都唔覺得涼,而家諗起都怕怕!

    回覆刪除
  3. 成日好多飯粒等嘅喺渠口谷番出嚟,好明顯個賓賓要接受再培訓啦!

    回覆刪除
  4. 咁嘅野都有一年一鑊?你真係“好彩”!! 另,幅相同篇文有咩關係呢?

    回覆刪除
  5. 你令我想起渠王詹....哈哈!

    回覆刪除
  6. Coffee,
    件賓賓唔使再培訓嘞,應該直接炒咗佢,等佢返鄉下耕田啦!

    SKII,
    原來我都算好彩架喇,如果住喺啲印度人樓下,隨時半年一鑊呀!至於張相,係鑊仔煮節瓜嚟架,都係一年煮一次囉!

    Ebenezer,
    哈哈,其實做渠王好好揾架,我都想呀!不過我真係做唔嚟囉,起馬伸手入馬桶我就唔掂嘞!

    回覆刪除
  7. 噢,我好鍾意食節竹瓜的!

    回覆刪除
  8. 我都幾乎每天煮飯,完全冇問題。擺個隔喺嗰去水口就OK啦。

    樓上塞浴缸就試過好多次,可能西人毛比較多,哈哈哈。

    回覆刪除
  9. Arm:

    住house,煮完飯,日日將D油倒落廚房個升盤,D油太多,凝固佐,一樣會塞。

    倒米飯落去,日積月累,那些PVC喉,爆開添呀!

    回覆刪除
  10. SKII,
    我都鍾意食,不過嫌刮皮麻煩囉!

    eric,
    哈哈,毛多當然會差啲,不過有人留長頭髮可能影響仲大!

    佛爺:
    如果住house,塞渠係自己嘅問題,心甘命抵囉!最唔順係俾樓上麻煩到,好無辜啫!

    回覆刪除