2012年5月7日星期一

奢華

琴日經過屈神屎,見到櫥窗有句雞乸咁大隻字嘅宣傳口號,寫住「世上最奢華修護」。上網摷吓,原來係某牌子嘅「極致純膠原蛋白眼霜」廣告。究竟點解護膚品廣告嘅著眼點會係「奢華」,而唔係產品嘅功效呢,真係諗到頭都爆!

其實廣告裏面出現「奢華」,已經唔係新鮮嘢,幾年前開始,啲「豪宅」樓盤廣告就好鍾意用到呢兩個字。住得起豪宅,自然係非富則貴,可能啲人覺得豪華都未夠尊貴,要奢華先夠面子。而護膚呢家嘢,咁啱屬於面子工程,咁喺廣告標榜「奢華」,似乎又講得通喎。

不過我又唔明嘞,「奢華」明明帶有負面意義,點解啲人反而攞嚟做商品嘅賣點呢?我唔係亂噏當秘笈架,根據我本中華新字典,「奢」字嘅意思係「用錢沒有節制,過份享受」,例如用喺「奢侈」同「奢華」。見到「奢華」呢兩個字,我就會聯想到啲揮霍無度嘅生活方式,好似紂王嘅酒池肉林。咁點解啲廣告人有比較中性嘅「豪華」唔用,而要用咁重口味嘅「奢華」呢?

搜索枯腸,諗嚟諗去都只係得三個原因。第一,啲廣告人唔係咁識中文,唔知道「奢華」帶有負面意義。第二,有部分港人覺得揮霍得起先至有面,基於「顧客永遠是對的」嘅原則,啲廣告人唯有投其所好。第三,經過文字嘅自然演化,「奢華」已經唔帶任何負面意義,只有「比豪華更豪華」嘅意思。

究竟係邊個原因,我都唔敢確定。首先,啲廣告人中文掂唔掂,我自問冇資格評論。話時話,我都喺廣告公司做過,對於啲創作部同事嘅出品,我又真係好多時都唔識欣賞囉。當然,咁係因為鄙人程度未夠,如果我係掂嘅,一早就轉咗做copywriter啦。至於話有人認為浪費同浮誇唔係問題,最緊要係揮霍得起,我就覺得有啲似嘞。年中都唔知有幾多人碌爆卡買名牌消費品,還唔起咪玩破產囉,真係一啲問題都冇。試問呢類人又點會覺得奢華係壞事呢?最後,當人人都笑貧不笑娼,當所有媒體都大肆宣揚浮誇嘅生活方式,咁「奢華」呢兩個字自然會演化成正面嘅詞語啦。

弊嘞,真係莫衷一是添。咪住,諗吓諗吓,會唔會係我自己一直理解錯咗字典嘅解釋,其實「奢華」從來都冇帶負面意義嘅呢?

Exhibition Hall of Economic Achievements, Moscow, Russia

Summer Palace, St. Petersburg, Russia

Summer Palace, St. Petersburg, Russia

5 則留言:

  1. 哈哈,奢華的階梯冒出了個靚仔頭!

    奢肯定有負面意義架喇,但依家都笑貧唔笑娼咯,直頭都笑儉唔笑奢咯!

    回覆刪除
  2. 版主及樓上二位文字高人面前,我覺得自己嘅語文水平似 primary chicken ,所以我只依女人感覺嚟說,「最奢華修護」讓女人有寵,值得,豪得起的錯覺。

    回覆刪除
  3. 我理解喺,洗左一大筆錢,只喺為咗炫耀,但喺冇乜實際效果,就喺奢華。所以用喺化妝品上喺負面嘅。

    回覆刪除
  4. 奢華,咁即係物無值,比人搵笨囉!嘻嘻!

    回覆刪除
  5. laulong,
    貧同娼我都唔會笑,至於有人可以過奢華嘅生活,我亦冇任何亦見。總之奢得起係人地嘅事,不過如果啲人喺度存心炫耀,我就會覺得有啲反感囉!

    Coffee,
    首先,文字高人我就一定唔敢認囉!至於對「最奢華修護」有唔同反應,我只可以話男女有別。女人重於感覺,而男人就比較實際,會考慮功能多啲。

    Eric,
    哈哈,同意!女人行出街,冇可能會周圍話俾人知自己用緊隻化妝品有幾貴啫!

    佛爺:
    貴嘢係咪物有所值,真係好見仁見智。我隻表幾十皮,人地隻表又係幾十皮(不過此皮不同彼皮啫),但係我敢肯定我隻表一樣係咁準囉!

    回覆刪除