2012年3月26日星期一

偽科學

我一向唔係好信啲學者,尤其是啲所謂法律學者同埋專做民調嗰啲。對於我呢啲草根階層嚟講,班學者嘅學術範疇簡直係高深莫測,根本冇能力理解,真係俾佢地呃咗都唔知。

好似法律界知名學者張達明教授,就將溫總對凸首選舉嘅評語「嚴格依照法律辦事,香港一定能夠選出一個為多數香港人所擁護的特首」作出非常精闢嘅解讀。張教授寫咗篇文章,用「3月25日流選正正符合溫總及多數港人的意願,這亦是筆者過去多個星期的禱告所祈求的。阿門。」作總結。溫總係咪支持流選我當然冇資格評論,不過最令我招架唔住嘅係連「阿門」都出埋,簡直將學術領域提升到神級境界。我呢啲凡夫俗子又點會明呢,唯有任佢講啦。話時話,唔知法律算唔算係一門科學呢?

另外,港大學者鍾庭耀早兩日搞咗個「3.23民間全民投票」,俾全港市民一人一票選凸首。結果有超過22萬市民投咗票,比原先預計高出3倍有多。不過鍾教授話唔會分析結果,留番俾市民自己判斷喎。呢樣嘢我就有得講嘞,因為我一直相信民調(其中包括統計學)確實係一門科學。

鍾教授果然係聰明人,呢啲咁嘅公投,就算佢唔親自分析結果,自然有其他學者會義不容辭咁走出嚟解讀,而傳媒亦會大肆報導,又使乜自己做醜人呢。琴日明報頭版就登咗呢單嘢,雞乸咁大隻字話「22萬人公投 逾半白票」、「唐梁何均不足兩成 學者:新特首難管治」。

相對於700萬港人,22萬呢個sample size係咪好有代表性我就唔敢講,因為我對統計學真係冇乜認識。不過小弟做咗幾十年人,對於人情世故點都有啲體會,對於呢個民調係咪有廣泛代表性,我就真係好懷疑嘞。問題係出喺取樣方法,呢個民調唔係隨機抽樣,而係要啲「選民」長途跋涉走去「票站」,一係就透過網上或手機短訊投票。不過用手機投票,費用就要「選民」自己承擔。咁大家諗吓,啲投咗票嘅有心人,會唔會真係代表到廣泛港人,抑或係以某啲特定取向居多呢?

睇番公投結果嘅數據,投咗梁、何、唐、同白票嘅百分比分別係17.8%、11.4%、16.3%、同54.6%。而喺另一個由有線贊助嘅港大民調,截至23/3,上述單位嘅得票率就分別係35%、14%、19%、同32%。喺兩個民調之中,揀震鷹哥同投白票嘅百分率都有極大差異。究竟係忽然民意大逆轉,定係其中一個民調出咗問題呢,大家不妨諗吓。

又睇吓另一樣嘢,每年各大小示威遊行,幾乎全部都係反建制嘅,而反泛民政棍嘅就少之又少,如果單講人數,肯定少過1比99。不過根據大型選舉結果,泛民同建制派嘅得票率一直都維持住64黃金比例,咁又係點解呢?

其實好簡單,會走出嚟搞事嘅,多數都係嗰啲不滿現狀、覺得民主大過天嘅人。好似我呢啲希望和諧穩定、社會繁榮嘅人,當然係多一事不如少一事啦。話時話,我相信香港唔係得我一個咁諗囉。

講番鐘教授搞嗰壇嘢,一聽到「公投」兩個字,我就肯定唔會騷佢啦。會積極走去「表達意見」嘅,自然係以反對小圈子選舉嘅人居多。結果嚟個民意大逆轉,根本就係意料中事。講真,走去投張白票,又起到乜嘢實質作用呢?今年仲係小圈子選舉嘅事實,根本就冇可能改變。學阿爺話齋,咁做只會添煩添亂囉。當然啦,對於癲狗長毛之流,呢個「公投」結果絕對樂於見到,因為又可以大條道理搞事。班友琴日就走咗去圍會展同中聯辦,話要即刻普選凸首喎,你話係咪搞笑呢?

或者有人會覺得,我冇參與呢個「公投」,只係自己放棄表達意見嘅機會,根本與人無尤。實情無係咁囉,如果係有法律效力嘅選舉,我一定會去投票。不過而家一個所謂學者,搞埋晒啲偽科學,目的只係爭取爆光,可能背後仲有某啲政治意圖添,我做乜要陪佢玩先!

廣西旅遊紀念品

8 則留言:

  1. 鍾庭耀搞的非洲酋長式投票,什麼人會去投呢?雞食放光蟲,一目了然。

    即係咁,若果我搞一項研究,睇下香港有幾多男人性慾不振。我去青山精神病院取樣,出來的結果肯定係全香港九成男人都對性事無哂興趣。

    鍾教授前世可能係巫師,有招搖撞騙的遺傳基因。

    回覆刪除
  2. 佛爺:
    係囉,鍾教授不如喺64或者71移屍去維園做民調,結果肯定震撼到無倫,因為係100%反政府同反阿爺!

    回覆刪除
  3. 鍾生搞嘅呢次模擬投票,當中疑點甚多,例如點解駭客似搞非搞?低低能能?鍾生俾人搞完又唔肯即刻去報警,點解唔肯即刻向駭客講唔好?同埋點解唔肯將件事即刻講俾信得過嘅警察叔叔聽?點解兩壇都係佢搞嘅民調,結果會有相當大嘅出入?點解無啦啦唔肯做結果分析?

    我覺得呢次模擬投票,反而有D似抽IPO,都係在個市“消息”滿天飛嘅情況下,財演胡亂測市,散戶突然出現非理性亢奮,而背後邊個係大鱷,邊個造緊市,散戶永遠冇法知道。

    回覆刪除
  4. 看來普選真是要有個過程,睇下,連硬件都未能著陸。

    回覆刪除
  5. Ebenezer,
    哈哈,果然係模範家長同財經達人!又等我向張教授偷吓師,變身法律達人先。既然單嘢咁多疑點,基於疑點利益歸於被告,本席裁定白票無效,應該按得票比例分番俾老夫子同秦先生。大番薯當然冇份,因為佢都唔係被告。至於幕後黑手係邊個,暫時仲未揾到有力證據。不過基於只要證明到有人喺事件中得益,就算冇確實證據都可以入罪嘅原則,本席宣判癲狗長毛罪名成立。因為喺單嘢裏面,除咗佢兩個係贏家,其他所有人都係輸家!

    Coffee,
    定啲嚟,就算即刻普選,硬著陸都冇有怕!學秦先生嘅口吻,香港始終要衰鑊甘嘅,班友先會識驚,呢啲叫做置豬死地而後生!

    回覆刪除
  6. 323 嗰壇嘢,我睇見就想嘔,用啲紙皮箱做投票箱,一張爛紙就叫選票,造假易過食飯。仲有啲友用手機投票,收唔到驗證回復,追極都冇,過左幾分鐘就自動成為白票!

    阿鍾博士真係神人咯,淪落到咁奸到咁,真係戢佢老母老豆慘!

    回覆刪除
  7. 係囉!連我咁戇居都知「取樣」最重要,無理由成班精英「撚樣」會話22萬係真正反映民意架?吾!唯一解釋,飯民班精英,行過騎樓底時,比一批「見紅」女人底褲跌落黎,覆蓋著頭頂,所以全部中哂邪!嘻嘻!

    回覆刪除
  8. laulong,
    哈哈,緬甸就嚟有選舉嘞,睇嚟軍政府應該邀請鍾教授去做顧問,咁操控選票就有啲揸拿啦!

    佛爺:
    哈哈,班飯民精英自己梗係冇中招啦,其實啲見紅底褲係佢地掟落街架,一個二個盲毛俾人由頭頂笠到落下巴都唔知囉!

    回覆刪除