自駕遊

雖然基本法保障咗港人表達意見嘅權利啫，都唔使個個禮拜日都搞遊行啩！唔通駕駛人士使用部分道路嘅權利就可以任意剝奪？琴日又有政黨同民間團體遊行去政府總部，要求無限期擱置粵港自駕遊計畫。

我連車牌都冇，其實呢單嘢完全唔關我事。而且自駕遊又唔見得有好大實質作用，就算擱置計畫我都冇乜意見。遊行人士就認為自駕遊會帶嚟空氣污染同交通安全等問題，其實唔係無中生有，不過程度上有冇佢地講得咁嚴重就唔知嘞。我始終覺得，對於有啲參與者嚟講，遊行根本就係反蝗運動嘅一部分。好似有人高舉嘅標語，上面竟然寫住「反簡體字」。其實簡體字關自駕遊乜事呢？而且，簡體字又有乜好反呢？話時話，我都好想大陸轉番用繁體字，不過咁同反簡體字係完全兩回事囉。

更離奇嘅係連豉油黨都玩埋一份，同政府打對台。仲有邊個敢話建制派唔重視民意？不過咁，豉油黨嘅訴求始終同其他遊行人士有啲分別。佢地唔係想煞停成個計畫，而係要求淨係俾港人自駕北上，唔俾大陸人揸車南下。黨主席瘤健儀話，喺呢單嘢上面，粵港唔需要對等喎。佢呢番偉論，真係聽到我無名火起，中港矛盾日益加深，就係因為某啲港人有咁嘅態度！

好多內地人唔妥香港，就係因為唔抵得港人有特權。隨住大陸改革開放，經濟起飛，內地人肯定會有一份自豪感，亦難免會有啲暴發戶心態。而另一方面，香港嘅重要性就已經大不如前。喺此消彼長之下，內地人自然唔會認同港人可以擁有特權。當然啦，呢個期實係歷史遺留落嚟嘅問題。不過內地人普遍認為香港嘅殖民史係喪權辱國，而港人竟然因此得到特權，甚至覺得自己高高在上，佢地又有乜理由唔反感呢。

對於內地人嚟講，自由行嘅意義唔單止係購物同觀光，更係國家主權嘅體現。中國嘅土地，有乜理由中國人反而要禁足呢？將心比心，假設你係國內人，你又會點諗？而家瘤主席居然話自駕遊只准北上，唔准南下，咁喪權辱國嘅不平等條約，我就諗唔到點解啲同胞會受嘞。如果唔想大陸人揸車落嚟，就應該成個計畫拉倒，而唔係提出啲咁嘅無理要求囉。好心啲人唔好再製造啲新嘅中港矛盾啦，真係嫌未夠煩咩！

香港真係越嚟越民粹，而家連建制派都中埋毒添！再係咁落去，香港好快會自我邊緣化，套用Dr. Dylan嘅名句：The city is dying！

South Island, New Zealand