狗噏風波

北大教授單狗噏事件鬧得沸沸揚揚，網民紛紛發表評論，搞到我都有啲痕，忍唔住要學人講埋一份添。不過事先聲明，我份人冇乜涵養，如果講得唔啱聽就當我狗噏啦，要插就無謂嘞！

單嘢喺我去咗旅行之後發生，喺非洲呢啲蠻荒之地，連電話都費事開，所以香港發生乜嘢事，原本都唔會知道。都係多得一位身在非洲心在港嘅團友，全靠佢日日上網睇香港新聞，朝朝向大家做早餐匯報，我先知有單咁嘅嘢。呢位團友一連講咗幾日，鑊鑊都講到咬牙切齒。直到年初三，喺鬧爆孔教授同廣大國內同胞之餘，佢仲忿忿不平咁話：點解香港九七嗰時唔獨立呢！聽到呢度，我差啲啲就忍唔住，想開聲反駁佢。不過最後我都係冇出聲，初三赤口，費事搞咁多嘢啦。

真係唔明白，點解佢幾十歲人仲可以咁天真嘅呢，連香港獨立都噏得出。講大原則，香港根本唔應該獨立，而睇實際環境，香港亦冇條件獨立。其實呢位團友想唔做中國公民都應該冇乜難度，佢兩公婆年年用一百幾十萬去旅行，絕對係有米之人，要移民真係話咁易啦。有能力走又唔走，但係就日日喺度鬧，你話有乜謂呢。話時話，我相信香港有好多人都係咁嘅心態。

講番孔教授嘅言論，條片我返到香港先上網摷嚟睇，果然極盡挑釁之能事，話係狗噏都不為過。問題主要出喺佢嘅態度，簡直囂張跋扈到無倫，對於一啲自覺比國內同胞優越嘅香港人嚟講，當然係難以接受。但係睇清楚佢嘅論點，就會發覺唔係完全無的放矢。所以呢一番言論，極有可能代表咗一部份國內人嘅心聲。

事實上，孔教授並冇話所有香港人都係狗，佢仲講過香港都有好多好人添。佢亦提到香港有比國內優勝嘅地方，例如法制。根據我嘅理解，佢話係狗嘅香港人，主要有幾類。第一，唔肯承認自己係中國人嗰啲。第二，同國內人溝通，故意唔講普通話嗰啲。第三，自恃殖民地遺民身分，歧視、欺負國內同胞嗰啲。我睇嘅片係七分鐘完整版本，應該係最全面。如果大家睇嘅係某互動媒體嘅兩分鐘精選版本，觀感當然會完全唔同。

講到國民身分認同，香港真係有好多人唔承認自己係中國人。早排港大嘅一個有關民調就引起一場小風波，最後仲扯埋干預學術自由嚟講，都咪話唔搞笑。更搞笑嘅係政府想喺教育同宣傳上做啲嘢，增加港人對國家嘅歸屬感，但係咁都要俾人鬧，香港都算係舉世無雙喇。正如孔教授所講，香港已經優勢盡失，全靠阿爺照住。呢個係鐵一般嘅事實，國內人自然好明白。香港攞盡阿爺著數，但係偏偏有好多香港人唔肯認自己係中國人。以國內人嘅角度嚟睇，咁樣根本就係食碗底反碗面，真係唔嬲至奇啦。

至於普通話，又真係有好多香港人唔肯學或者唔俾心機學，完全搞唔清佢地係乜嘢心態。對於一個國家嚟講，有一種共通語言係理所當然嘅事，根本冇得異議。香港人唔識普通話，蝕底嘅最終都係自己。當然啦，呢種情況唔係喺香港先有。我去上海出差，當地同事講上海話，我一句都聽唔明。去北京出差，啲同事講嘢猛咁捲脷，我淨係聽到一半。講真，我覺得班友好討厭囉。呢種山頭主義，對任何人都唔會有好處。

以上兩點都未必係個中矛盾嘅主因，我覺得香港人對大陸人長期以嚟嘅歧視先係關鍵所在。由八十年代開始，香港人已經叫國內人做阿燦，後來又出現咗北姑、北嫂、大陸喱呢啲名詞，最近仲將啲同胞貶為蝗蟲添。如果易地而處，大家究竟會有乜嘢感受，又會點樣反應呢？當然啦，呢個問題已經有咗答案。但係喺插爆孔教授嘅同時，香港人又有冇諗吓，歧視咗人地幾十年就好地地，而家俾人鬧番一次就發晒癲咁，會唔會有啲嚴人寬己呢？算嘞，基於言論自由嘅大原則，鬧爆一個北大教授根本唔算得乜嘢。香港人一向自由慣，上至國家領導人，下至販夫走卒，總之鍾意鬧邊個就鬧邊個。不過搞到要圍中聯辦，又要迫北大炒孔教授，咁就有啲唔妥當嘞。人地話晒都係知名學府嘅教授，發言當然有作為學者嘅觀點，而家搞到向官方機關施壓，咁又係咪干預學術自由呢？淫人妻女笑呵呵，香港人果然優為之呀！

講真，我只係以事論事，絕對無意幫孔教授護航。好似佢話香港人嘅質素係屬於全國比較差之列，我就唔多同意嘞。我當然唔會覺得香港人嘅質素高到識飛，事實上，嚴人寬己已經冇乜道德可言。唔理你認唔認都好，大家始終都係中國人，質素自然唔會有太大分別。你鬧吓我，我又插番你，大家半斤八兩，咁咪幾好囉！

Seal, Galapagos, Ecuador