火都嚟埋

本來諗住寫吓近期大熱嘅路姆西，點知琴日接連發生兩單嘢，搞到火都嚟埋，咁冇辦法嘞，粗口神獸都要讓路。

話說琴日買完餸返屋企，入到電梯大堂，見到部啱啱閂緊門。以本人身手，要飛撲㩒番開佢絕對唔難。不過見裏面有人，費事阻到人地啦。結果過咗成兩分鐘先有另一部到，期間又多咗個男人等。入到，都冇乜留意個男人㩒咗邊層，總之係低啲，即係阻住我返屋企煮飯啦。

去到六樓部停咗，個男人冇乜反應，望吓排掣，見仲有兩個著住燈。呢個情況，如果唔係有人喺外面亂㩒掣，就係有人要上樓，通常以前者居多。門打開，有個女人帶住兩個大約四至六歲嘅豆釘入嚟。唔使審，一定係日本人。啲架婆無所事事，最鍾意就係玩串門，成日喺同一座大廈上上落落，阻住晒個地球轉。

講番單嘢，見條架婆㩒咗八樓，真係唔多高興，又阻住我煮飯。點知啱啱閂埋門，部都未開始郁，件男豆釘又㩒咗個掣。奇怪嘞，唔通佢地唔係一家人？到咗七樓，門打開，但係男豆釘冇出，條架婆跟手㩒掣閂門。我心諗：咁都得，係咪玩嘢呀！原來更玩嘢都仲有，門啱啱閂埋，件女豆釘又㩒咗另一個掣。

到咗八樓，架婆冚家出晒，剩番我同個男人，但係排掣仲有三個著咗燈。除咗我嗰層，仲有十樓同十一樓。我想取消番女豆釘㩒嗰層，但係唔肯定個男人㩒咗邊層，咁咪直接問佢囉。男人用普通話答我，話係十樓。佢跟手取消埋十一樓，臨出仲好有禮貌咁say goodbye添。

條死架婆，真係想揾隻路姆西掟佢！見到兩件PK豆釘玩竟然唔阻止，又冇取消番佢地亂㩒嘅樓層。就算佢唔知㩒錯咗可以取消，但係阻礙到其他人，起碼都應該表示吓歉意啩。條死架婆好似乜都冇發生過咁，唔通當咗部係佢冚家嘅私人遊樂場？香港人成日話日本仔質素有幾高，其實係見得少佢地啲虛偽嘢囉。

講開又講，香港人都好冇家教，細路玩我就遇過唔少，只係未見過家長一齊玩啫。有一次同個七八歲嘅豆釘同上樓，佢㩒咗低我四層。上到佢嗰層，門打開咗，條PK仔竟然㩒晒我對落嗰三層先出。真係P佢個K，唔通佢唔驚會俾人打？！

言歸正傳，返到入屋，飯都唔煮住，即刻開電腦。話說喺街市菜檔見到啲一舊舊好似番薯咁嘅嘢，菜佬話係雪蓮果，仲講到不知幾有益添。舊嘢橫睇掂睇都冇忽似生果，咪諗住上網摷吓佢乜料囉。點知一開IE，竟然要我揀啲乜嘢選項，原來無啦啦自動幫我upgrade咗去IE11。心諗，今次PK嘞！

果然，又見到我最討厭嘅tabs，仲要係冇得disable添。都算嘞，只係討厭啫，其實唔係好大影響。最大鑊係次次upgrade親，必定有啲用開嘅嘢唔work囉，尤其係Google旗下產品。入去Blogger睇吓，一登入就已經彈個error message出嚟（見下圖）。跟住試埋統計資料、留言、新文章，全部都有同樣問題。

上網摷吓，原來好多人已經提出過呢樣嘢，但係就揾唔到解決方法。無計可施之下，唯有釜底抽薪，uninstall咗個upgrade，revert番去IE10啦。結果討厭嘅tabs就冇咗嘞，但係Blogger嘅問題仍然存在，真係俾佢玩謝！講真，Microsoft次次出親新嘢都劣評如潮，好心班友就檢討吓啦！

後記：
啱啱去過校長嗰邊……唔知講乜嘢好，唯有送上無言慰問！

Garni, Armenia

撞鬼

係咪覺得今日張相好熟口熟面呢？冇錯，張相基本上係之前嗰篇chok相其中之一。係就係，唔係就唔係，點解會話「基本上係」呢？想知點解，大家就要坐定定，聽我娓娓道來喇。

其實上篇嗰張相曾經執過……哈哈，咁講真係好多餘，我所有相都執過先出街架啦！特別強調「執過」，係因為除咗光暗色調減噪呢啲基本嘢，仲做咗啲結構上嘅改動，執走咗一啲嘢。

話說幾十年前去八仙嶺行山，途經一間荒廢村屋，覺得幾有懷舊feel，就喺門口影咗張相留念。當時影完就走，冇諗過要入去探險，因為呢類廢屋，肯定會成為行山人士解決三急嘅地方。

啲相晒咗出嚟，第一時間就喺晒相鋪睇，效果都相當滿意。揭吓揭吓，揭到去廢屋嗰張，竟然發現下巴有幾條類似血痕嘅嘢，一張俊臉立時變得詭異非常！當時反應係：有冇搞錯，晒成咁都得？！即刻摷番張底片睇吓，當堂嚇到傻咗，原來連底片都有！再睇清楚，啲「血痕」呈瘀紅色，總共有五條。無論喺顏色或形態上，都十足十俾人用手搲出嚟咁，真係好得人驚囉！當時就諗，會唔會係有「人」唔鍾意我喺佢屋企門口影相呢？

整啲咁嘢出嚟，幾十年前當然無計可施，唯有收埋張相喺櫃桶底啦。到而家呢個數碼年代，用Photoshop消滅區區幾條血痕簡直係依斯執，張相終於可以重見天日嘞。

睇住張相，自然又諗番起當年行山所見。雖然嗰帶已經了無人煙，但係山墳沿途都見到唔少，相信係附近村民最後安身之所。既然唔係搬到冇雷公咁遠，得閒返舊居行吓都係「人」之常情啫。咁啱見到有不速之客喺屋企門口擺款影相，用另類方法下逐客令都唔出奇。間廢屋伶伶仃仃，左右唔見有其他鄰居，睇嚟屋主並唔係好客之「人」囉。

哈哈，情節同「凶兆」有啲相似，唔知咁算唔算係撞鬼呢？雖然有過疑似撞鬼經歷，其實我係唔多信鬼神之說架。不過唔信唔代表唔怕，尤其是去到陌生地方。以前返大陸出差，一返到酒店房就會開晒所有燈，就算瞓覺都唔會熄囉。咁當然係唔環保，不過鬼叫我怕黑咩！話時話，好彩本人光撐撐都瞓得著啫！

講到怕黑，可能係因為有過童年陰影。咁又要講吓一單陳年舊事嘞。

話說九十幾年前，本人只得幾歲。嗰時屋企有個執人地嘅古老衣櫃，其中一邊櫃門鑲咗塊全身鏡。有晚半夜起身交水費，只係開著一盞昏暗嘅檯燈照明。交完水費，經過衣櫃前面，好自然咁停低照一照，點知咁就照出事嘞。

鏡中所見，除咗自己之外，竟然仲有另外一個「人」！佢企咗喺我左後方，係一個著住工人褲、比我更細嘅細路。屋企無啦啦出現咗個陌生「人」已經夠怪架啦，不過有樣嘢仲怪，佢塊面冇眼耳口鼻架！如果遇到咁嘢畸屎，唔知大家會有乜反應呢？

我當時覺得好奇怪，擰轉頭睇吓，根本唔見有其他「人」。再望吓塊鏡，淨係得番我自己，咁咪上床繼續瞓囉。嗰時又真係唔識驚喎，可能係因為嗰個「人」嘅樣完全唔恐怖啦。佢冇眼耳口鼻，塊面凹凹凸凸，就好似一個菠蘿包咁。對一個幾歲嘅細路嚟講，又真係冇乜驚嚇效果啫。如果係啲青面獠牙、或者條脷泵到落肚臍嘅鬼樣，話唔定會嚇到我瀨屎囉。哈哈，嗰時啱啱交完水費，想瀨尿都唔得啦！

後來再大啲，對「鬼」嘅認知多咗，諗番起單嘢先識驚，而且越諗越驚添。又再後來，本人已經唔信鬼神之說，就算再諗起都唔會當係乜嘢一回事。不過單嘢始終解析唔到，而影響亦持續到今時今日。自從後來識驚之後，我喺光線唔充足嘅環境係絕對唔會照鏡架！話時話，我都聽過好多人講，話夜晚唔好照鏡，否則隨時會見到啲唔想見嘅嘢囉。

有時都覺得好矛盾，我明明唔信有鬼，但係又會驚撞鬼。夜晚完全唔照鏡當然冇可能，所以本人一早就諗定對策。常言道：人怕鬼三分，鬼怕人七分。萬一見到啲唔想見嘅嘢，我會大喝：Ｘ！死Ｘ開啦！說明一下，兩個「Ｘ」係分別代表唔同嘅字。好彩，本人一直未有機會使出呢招殺手鐧！Touch wood！

八仙嶺

再chok

唉，好人真係唔易做！

為咗提醒大家飲酒要有節制，小弟不惜以貓樣示人，親身示範酒過三巡會發生啲乜嘢。經此一役，多年嚟苦心經營嘅斯文靚仔形象可謂蕩然無存！為咗挽救跌到落谷底嘅形象，本人唯有摷番幾十年前嘅chok相出嚟，希望可以中和番先前啲貓相造成嘅負面影響。

都係唔講咁多嘞，睇相啦！

Honningsvag, Norway

西湖, 杭州, 浙江

大圍

南丫島

南丫島

八仙嶺

八仙嶺

酒過三巡

上回講到保安阿頭出於一片好心，勸喻年輕女士唔好飲咁多酒，以免俾色狼有機可乘。點知好心著雷劈，自己反而受到圍攻。有三條阿毛飛撲而出，唔單止批評佢干預女性自主權，仲屈佢鼓勵色狼強姦貓女添。貓女者，貓咗之女人也。

呢三條阿毛，對醉姦嘅認知好可能仲係停留喺粵語殘片時代，以為就係好似林蛟灌醉羅艷卿嘅情節咁簡單。如果未見識過香港嘅劈場，就唔該佢地唔好咁多廢噏啦！

本人縱橫酒界幾十年，深明「酒能亂性」呢個道理。雖然嚴重到酒後亂性（亂咁發生性行為）未必人人都會，但係影響自制同判斷能力就肯定架嘞。講到酒後失態，本人的確見過唔少。

有幾個酒友平時都不知幾man，但係就試過飲大兩杯喊到flea flat，完全收唔到聲。搞到我手足無措，都知應該安慰定係恥笑佢地好。酒精會削弱自制能力，令人將抑壓喺心底嘅情緒釋放出嚟。喊吓當然好小事，如果係第啲嘢，就有可能會好大鑊囉。

有時啲女仔飲到high咗，會無啦啦對異性做出一啲親暱或富挑逗性嘅舉動。俾女擒上身同坐大髀，本人就試過唔少嘞。如果你以為咁係因為啲女對你有意思，就隨時會出事嘞。呢啲畸屎，其實十次有十一次都係啲女貪玩啫。套用網上名句：認真你就輸鳥！不過當判斷力受酒精影響，男方可能會誤以為女方嘅舉動係一種邀請。如果男方係食得唔好嘥嘅人，又或者本身對對方有意思，而女方又貓到神智不清，咁酒後餘興就肯定係爆房啦。當條女酒醒，咪又多咗一單醉姦囉！

少劈酒嘅朋友未必相信，但係酒過三巡，真係乜嘢都可以發生。有一次，成班同事食晚飯，已經劈到天昏地暗日月無光。唔知邊個覺得未夠皮，飯後仲要拉隊上其中一位女同事（Ｔ）屋企再劈。酒過三巡，忽然有人發現，Ｔ竟然同一個平時冇乜兩嘴嘅男同事打緊車輪。點解會發生啲咁嘅嘢就無從稽考嘞，不過可以好肯定佢地兩個唔會有路，因為男主角條女（後來做埋老婆）當時都在場。酒再過三巡，Ｔ又被發現打緊車輪，不過對手係另一位女同事（Ｍ）。事態發展又係莫名其妙，因為Ｔ同Ｍ都肯定唔係les囉。Ｔ係無男不歡嗰隻，而Ｍ條仔都係公司同事，不過佢冇參與我地嗰次盛會。

其實上述事件我都係第二日喺公司睇到啲相先知道，據影相嗰位男同事（Ｂ）講，本人一早就貓咗囉。本來睇到啲相都覺得好好笑，不過突然諗到一啲嘢，我就用凌厲嘅眼神望住Ｂ，然後問佢：「你有冇影埋……」見到Ｂ陰陰嘴咁笑，我都心知不妙。果然，佢跟住講：「你自己睇埋落去啦。」

當晚發生嘅嘢真係全無印象，不過事後返到屋企，發現個肚花晒，我都估到一定係俾人搞過。到睇見啲相，再加埋Ｂ嘅講解，真相終於大白。原來本人貓咗之後，攤屍咁瞓咗喺度，點知竟然引嚟幾個女子垂涎。佢地夾手夾腳將我㩒住，由Ｔ出手，用唇膏喺我塊面化妝。條衰婆意猶未盡，跟住仲扯高我件衫，喺我心口寫字添。但係咁都未能夠滿足佢嘅獸慾，個死婆就再下一城，攻破埋我嘅褲鍊防線，喺我肚腩畫公仔。然後越畫越低，連我條超低腰白底褲仔都俾佢畫到變晒紅色咁滯。

睇完相，我又狠狠咁睥咗Ｂ一眼。條友見我眼神不善，就連忙補鑊，話見到Ｔ將枝唇膏伸埋入我條底褲裏面畫，佢自己都驚會出事喎。真係聽到火都嚟埋，呢條雞蟲有乜淫亂場面未見過，連佢都覺得會出事，當時情況梗係好危急啦，佢竟然仲掛住影相，完全冇諗過要幫我解圍。正當我要鏟佢鑊甘，條友居然先發制人，話見我當時識得笑，以為我好enjoy喎。我再睥佢一眼，然後揭開本相簿睇吓，跟住同佢講：「你返埋位做嘢啦！」係喎，我當時真係笑住咁俾人搞喎，但係點解會一啲印象都冇嘅呢？！

話時話，呢單嘢我又唔係好介意。始終，男人唔會有貞操名節呢類包袱。如果換轉，俾人咁搞嘅係女人，肯定唔可以當乜都冇發生過囉。講真，如果飲到貓晒嘅係女人，又點會只係俾人畫吓公仔咁簡單呢？仲有，咪以為熟人就唔會搞你。High到阿媽都唔認得嘅時候，仲邊會理得你係新相識定老相好先！

所謂「匹夫無罪，懷璧其罪」，身懷奇寶自然會招人覬覦。呢個係千古不變嘅定律，糾纏喺誰是誰非只會令人錯失焦點。真係好奇怪，港女一方面以為自己有寶，覺得身邊個個男人都打緊佢地主意，但係另一方面，佢地又成日飲到爛醉如泥，好似完全唔驚俾人執死豬咁。可能港女對中國古諺不甚了了，但係英文應該識喇啩，「don't leave your valuables unattended」冇理由未聽過啫。講到尾，色狼唔一定有樣認，所以女性飲酒要量力而為，時時保持清醒至係保豬嘅不二法門囉！

各位女網友咪插住，「港女」係指具備某啲性格特質嘅香港女性，本人絕無以偏概全之意！舉個例，文首提及嗰三條阿毛就庶幾近矣。哈哈，又講錯嘢添，嗰三條係「港毛」先啱！

另外要澄清一點，本人唔係話醉姦案件中嘅女性一方都要負上若干責任。不過，將涉事男方一律打成十惡不赦嘅淫魔又係咪絕對公平呢？事實上，因為男人身懷「攻擊性武器」，一旦出事就往往百辭莫辯。無可否認，的確有啲賤男會設局灌醉、甚至落藥，以圖迷姦目標女子。但係本人傾向相信，更多畸屎係喺「互動」情況下發生囉。

正如上文提到，酒過三巡，男男女女都可會做出一啲不尋常舉動。受酒精影響，無論男女都有可能會俾錯同收錯signal囉。如果其中一方醉到不省人事，唔俾對方夾去爆房先怪啦。而且之前都提過，貓到冇晒意識並唔表示會全無反應，好似我俾人搞緊都識得笑，班友見到仲以為我好enjoy添。如果咁嘅畸屎發生喺女性身上，男方見到條女唔止唔反抗，仲笑住受搞，有乜理由會覺得自己係強姦緊對方先！

仲有，咪以為發生呢類醉姦事件，蝕底嘅只有女方，其實男方可能仲冤枉呀。以為只係開場友誼波啫，點知無啦啦變成強姦，結果留埋案底，一生前途就係咁先嘞。當然啦，如果有Ｋ仔咁靚仔都仲可以喺演藝界發展，但係移民就唔使諗囉。

小飲怡情，大飲亂性，所以無分男女，酒呢家嘢都係飲得節制啲好。話時話，其實保安阿頭真係應該勸喻埋男士唔好飲咁多酒囉，咁就唔使俾班阿毛插啦。

Georgian Wine

男又得

女又得

羅漢坐蓮

車輪戰

車輪混戰

人為刀俎

我為魚肉

飲醉就可以俾你姦？

本人自問缺點一大籮，多到講唔晒。至於優點，雖然只係寥寥可數，不過就好實在。例如，我衰咗一定會認，絕唔會砌詞狡辯，更唔會諉過於人。

上回提到本人試過N次唔見銀包、電話、同公事包，都係飲到貓晒留低咗喺的士，結果只有一次攞得番。啲人拾遺不報當然唔啱，不過本人冇保管好自己嘅財物，亦係難辭其咎。事實上，班豬朋酒友都提醒過我好多次，叫我要適可而止，唔好鑊鑊飲到貓晒囉。當然啦，我可以講，飲到貓晒係我嘅事，咁唔代表啲人執咗我個銀包可以據為己有啫。我仲可以反咬班豬朋酒友冇義氣添，明知我貓咗都唔送我返屋企，由得我自己搭的士。哈哈，咁樣衰嘅嘢本人梗係做唔出啦，否則餘生睇怕都要「舉杯邀明月，對影成三人」囉！

不過咁，香港幾樣衰嘅人都有，我地又不妨睇番一單幾個月前嘅舊聞。保安阿頭回應記者就今年首季強姦案件激增嘅提問，話「所有個案都涉及友姦，部分個案是受害人飲得很多酒後發生的，所以我會勸喻年輕女士不應飲得太多」。此言一出，大群雌性動物即刻飛撲而至，咬住保安阿頭唔放，誓要咬到佢人頭落地。不良傳媒亦唔放過抽水機會，大肆渲染之餘，更任意扭曲保安阿頭嘅言論。例如爛生果就即刻出咗一篇題為「強姦案多賴少女飲酒 『飲醉就可以俾你姦？』」嘅報導，揾嚟兩位婦女界發言人大放厥詞。

爛生果絕非浪得虛名，一個「爛」字正正就係此報向來堅持嘅宗旨。保安阿頭只係引述實際統計數字，從而提醒番年輕女性點先可以保障自己嘅人身安全啫，標題中嘅「賴」字又從何說起呢？統計數字係客觀事實，雖然強姦數字飆升亦有可能係因為受害人事後報案嘅畸屎多咗，不過友姦同醉姦問題相當嚴重，確實係不容忽視嘅題目。如果要問責任誰屬，咁就真係一匹布咁長嘞。我絕對唔敢講被姦女子都要負上丁屎咁多責任，不過如果受害人可以提高佢地嘅自我保護意識，呢類強姦案肯定會少啲囉。正如警訊成日教人「財不可露眼」，唔通咁又係警方將保安責任卸俾市民大眾？除非爛生果證明到強姦數字飆升係因為保安當局辦事不力，否則用個「賴」就係老屈囉！

至於「飲醉就可以俾你姦？」就更係無厘頭中之無厘頭。或者呢句只係受訪婦女界發言人嘅白痴言論，但係爛生果喺標題中冇特別講明，當然可以理解為報紙嘅立場。究竟呢句嘢有乜咁白痴？好簡單，我又反問一句：如果你貓到不省人事，又點可以確保自己唔會俾人姦呢？你唔係無厘頭到期望所有男人都係正人君子啩！仲有，護苗基金夠成日教啲細路俾人侵犯時要識得講「唔好」啦，唔通咁又代表「冇講唔好就可以俾你侵犯？」此報記者同編輯連咁低B嘅標題都可以用，真係非一個「爛」字可以形容囉！

嗰兩位受訪嘅婦女界發言人，又係笑死人冇命賠。某會社婦女事務發言人尿銀鳳反問保安阿頭：「人哋飲醉酒，你就可以強姦人？」佢又話：「任何有公德心的人，發現有人飲醉酒，都應該是照顧她，而不是乘人之危。黎棟國咁講係鼓勵強姦犯乘人之危，好得意，男士酒後犯罪就係求情理由，相反女士飲酒被侵犯就係咎由自取。」

首先，本人忍唔住要俾鳳姐一個溫馨提示：地球太危險喇，絕對唔適合你架，都係即刻返去巴魯坦星啦！正常地球人都知道人類有好有壞，要防範壞人係基本常識，咁絕唔表示我地容忍、認同、或鼓勵犯罪行為囉。至於好人應該係點，歷任道德重整會會長都講過九千幾次，根本就唔需要佢再喺度重複。可能因為鳳姐係外星新移民，唔係咁熟識地球語，佢亦對保安阿頭嘅言論作出咗錯誤理解。本人話晒都用咗地球語幾十年，但係就點都睇唔出保安阿頭嘅言論有邊忽係「鼓勵強姦犯乘人之危」囉。至於「男士酒後犯罪就係求情理由」，咁就要睇法官受唔受嘞，根本同保安阿頭都完全唔啦更。而保安阿頭「勸喻年輕女士不應飲得太多」係咪就等同佢認為「女士飲酒被侵犯就係咎由自取」呢？從字面上理解，我可以話一定唔係。「咎由自取」係「自作自受」咁解，意指當事人自己要為惡果負上相當程度甚至全部責任，而保安阿頭嘅勸喻根本就唔帶有咁嘅意思。事實上，與其廢噏一餐，例如強烈譴責啲無良色狼、或者提醒男士們強姦係嚴重罪行，勸喻女性咪蝕底肯定嚟得更實際囉。可能基於腦電波波段差異，鳳姐對人類嘅語言同思維都唔係太理解，都係無謂同佢計較咁多嘞。

至於另一位受訪者，某大學性別研究部兼任講師狐露西對保安阿頭就有咁嘅批評：「佢咁講係等同限制女性生活自由，甚至對男女平等意識的一個蔑視。佢需要解釋同道歉。」

同鳳姐一樣，露西姐嘅語文程度都係極其低劣。保安阿頭用嘅係「勸喻」二字，根本就冇「要求」或「指示」嘅意思，你覺得唔啱聽咪當佢發噏瘋囉。「限制女性生活自由」云云，直頭係無限上綱啦。至於「對男女平等意識的一個蔑視」呢個講法，就更係可笑添。哈哈，係咪要保安阿頭勸喻埋男性都唔好飲咁多酒先算係尊重男女平等意識呢？事實上，基於男女生理有別，絕大部分強姦受害人都係女性。而家保安阿頭建議女性用一個簡單、直接、有效嘅方法保護自己，都唔知條婆娘有乜好嘈。

講真，以香港現今情況，要大幅減少強姦案件，根本唔係保安部門可以做得到。強姦係嚴重罪行，相信喺香港唔會有男人唔知囉。而香港警隊以效率見稱，類似印度嘅執法不力問題亦唔存在。歸根究底，要令情況得以改善，就要從個人操守同正確認識兩性關係方面入手。方法只有一個，就係教育。枉露西姐係教育工作者，而且仲係大學性別研究部講師添，都唔知佢有冇檢討吓，究竟自己喺兩性教育方面作出過乜嘢貢獻，點解到今時今日仲會有咁多友姦同醉姦呢？明明連自己本份都未做好，條婆娘仲有時間撲出嚟廢噏，真係……哈哈，本人一時腦閉塞，諗唔到可以點俾評語露西姐添！

另外仲有一位阿姐級人馬都評論過呢單嘢，雖然冇乜嶄新觀點，本人都想攞出嚟講吓。知名「學者」兼垃圾會議員黃迫暈女士對保安阿頭有咁嘅批評：「黎棟國的言論，反映他的性別偏見，有指責受害人的意識形態，隱含女人被強姦是咎由自取的錯誤思維，也助長男士不尊重女性的性自主權。」

迫暈姐嘅觀點同之前講過嘅兩位婦女界發言人其實冇乜大分別，本人就唔另作評論嘞。我只係想講，貴為垃圾會直選議員都可以低B成咁，選佢出嚟嘅九龍西選民真係……弊嘞，又諗唔到點講添！

上述三位婆娘都只係識撲出嚟抽水，佢地嘅騎呢言論唔止無助減少強姦罪案，仲可能會有反效果添。如果保安當局真係俾佢地嚇窒，以後淨係講埋晒啲所謂「政治正確」嘅廢話，而唔敢向公眾提供有效嘅自保資訊，咁最終損失嘅會係邊個呢？又或者，香港女仔受晒佢地嗰套，覺得自由（或自主）大過天，而唔考慮吓貓到不省人事有乜風險，咁最終受害嘅又會係邊個呢？

不過咁，我又唔係話保安阿頭嘅言論完全冇問題。佢只「勸喻年輕女士不應飲得太多」就真係有年齡歧視之嫌嘞，咁講會引起不必要嘅猜想，覺得佢暗示緊上咗年紀嘅女士就算貓到攤晒屍都唔會有人執死雞，叫一眾大嬸阿毛情何以堪呢？！其實講少兩個字就皆大歡喜啦，保安阿頭嘅政治敏感度真係爭咗少少囉！忽然諗到，上述三位婆娘反應咁激，真正原因可能係俾保安阿頭插中死穴喎。哈哈，崩口人忌崩口碗呀！

Vodka Get

Black Russian

Sangiovese Rose

十評香港人之三：誠實排行榜

聲明：文中提及之「香港人」乃指部分香港人，本人絕無以偏概全之意。雖無確實數據支持，唯本人相信此等「香港人」絕非極少數。

啱啱先睇番早幾日報紙，又發現一單都幾有趣嘅花邊新聞。話說《讀者文摘》喺全球16個城市做咗個跌錢測試，睇吓有幾多人拾金不昧，然後整咗個「誠實排行榜」出嚟。個測試好簡單，喺鬧市地下留低總共12個內有折合港弊$370現金同埋失主聯絡資料嘅銀包，再統計番有幾多執到銀包嘅人會聯絡失主。接受測試嘅城市分別係：
　阿姆斯特丹（荷蘭）
　柏林（德國）
　孟買（印度）
　布加勒斯特（羅馬尼亞）
　布達佩斯（匈牙利）
　赫爾辛基（芬蘭）
　里斯本（葡萄牙）
　倫敦（英國）
　盧布爾雅那（斯洛文尼亞）
　馬德里（西班牙）
　莫斯科（俄羅斯）
　紐約（美國）
　布拉格（捷克）
　里約熱內盧（巴西）
　華沙（波蘭）
　蘇黎世（瑞士）

如果係我就唔會搞啲咁無聊嘅嘢嘞，唔使測試都知，最誠實頭3位梗係紐約、倫敦、同蘇黎世啦。美國係舉世公認嘅正義代表，國民質素當然無容置疑。英國人出晒名有紳士風度，斷估都唔會cheap到將人地嘅失物據為己有啩。而瑞士係富翁天堂，啲人根本唔會稀罕嗰區區幾百蚊囉。

要估包尾3位亦絕無難度，唔使審，一定係孟買、里約熱內盧、同莫斯科。論貪錢程度，印度人比中國人更甚，如果佢地認咗第二，恐怕只有猶太人敢認第一。南美諸國亂到七彩，里約更係惡名遠播，誠實當然冇佢份啦。莫斯科治安都好差，本人仲可以做見證添。我地成團人浩浩蕩蕩，喺大街大巷竟然會有人走埋嚟搶嘢，都咪話唔得人驚囉。

相信好多香港人都係咁諗，以人民質素而言，北美同西北歐肯定位居世界前列。跟住輪到南歐、東歐，然後係亞太、中東，包尾嘅實係南美、南亞、同非洲。當中亦有個別例外，好似澳紐同日本，普遍認為可以同歐美睇齊。講穿其實好簡單，一般人會將膚色深淺同經濟發展程度作為人民質素嘅指標。

我地又睇吓嗰個跌錢測試，結果究竟係咪符合一般預期呢？

根據嗰篇報導，排行榜首位係赫爾辛基。呢個賽果都唔算意外，因為北歐人一向都係擔屎唔偷食。而倫敦只係喺中游位置，咁就令人有啲失望嘞。最跌眼鏡嘅係蘇黎世，竟然名列尾四。忽然明白，地靈唔表示人傑，發財唔一定立品囉。更估佢唔到嘅都仲有，孟買居然排第二，只係輸咗個馬鼻俾赫爾辛基。對於呢個結果，本人用咗半粒鐘都諗唔到合理解釋，咁唯有不予置評啦。

除咗部分賽果令人意外，本人亦有啲唔明，作為一個國際大都會，點解香港會冇份測試呢？唔通經過16年「大陸化」，香港已經從西人嘅視野消失咗？

點都好啦，香港做咗滄海遺豬，始終令人有啲心癢癢。自問非一般無聊，又等我估吓如果喺香港進行呢個測試，結果會係點先。

我估香港嘅交還數目會係1，同里斯本並列倒數第一。本人絕對唔係無的放矢，呢個估算係有實際數據支持架。本人試過N次唔見銀包、電話、同公事包，多數都係飲到貓晒留低咗喺的士，結果只有一次攞得番。我班豬朋酒友都有唔少類似經驗，尤其是唔見電話，尋回率基本上係0囉。

話香港人質素普遍有幾高，其實只係班政棍投其所好，氹啲無知細路啫。難得啲人又咁冇自知之明，連咁嘅謊言都信到十足。真係好希望《讀者文摘》可以喺香港搞一次跌錢測試，等香港人認清自己嘅真面目。

越諗越唔順，香港冇理由冇份啫，即管喺網上摷吓，果然有料到。根據星島日報一篇題為「港人拾金不昧排尾二」嘅報導，原來《讀者文摘》喺香港都曾經做過類似測試。以下係節錄自有關報導：

「原來在香港丟掉一個銀包﹐只有三成機會可失而復得﹐機會率竟低致十四個國家或地區中的倒數第二﹗」

「原來一向視香港為競爭對手的新加坡﹐該國國民的誠實度﹐亦是香港人拍馬都追唔上﹐在新加坡遺失錢包﹐歸回率竟可高達90﹪﹐比香港高出兩倍。」

「總括來講﹐北歐人最誠實﹐美國、加拿大、澳洲、印度人的銀包歸回率也接近七成﹐算是誠實的國家。在亞洲﹐除新加坡外﹐日本、韓國人的表現也不俗。」

原來兩次測試嘅結果非常吻合，都係北歐人最誠實，而印度人亦相當唔錯。至於香港排尾二，亦係本人意料之中。不過歸還率有三成咁高，我就有啲意外嘞。哈哈，如果香港人睇到呢篇報導，唔知佢地又會有乜反應呢？

呢樣我就估到嘞，香港人一定會話而家通街都係「自由人」，啲銀包梗係俾佢地執晒。香港人更會趁勢反擊，批評「強國人」唔止搞到香港亂七八糟，仲影響埋香港嘅國際聲譽添。當香港人知道單新聞其實係2001年嘅舊料，嗰時根本未有自由行，佢地就會即刻改口，話拾遺不報嘅全部都係由大陸落嚟嘅劣質新移民囉。

咪當本人吹水唔抹嘴，其實以上推論係參考香港人喺思辨模式，再經精密分析所得出嘅結果。話「香港人」唔係「中國人」、連「X你老母」都唔算係粗口、用暴力手段阻止異見者發言竟然可以講成係民主公義嘅體現，香港人仲有乜嘢會噏唔出呢？！冇錯，香港人就係咁架嘞，明明邏輯思維欠奉又要強詞奪理，到詞窮理屈就顛倒黑白、指鹿為馬，咁唔係自欺欺人係乜？！香港人連對自己都唔誠實，喺「誠實排行榜」唔使包尾都冇天理啦！

誠實排行榜

Red-light District, Amsterdam, Netherlands

Berlin Wall, Berlin, Germany

Parliament House, Budapest, Hungary

Sibelius Park, Helsinki, Finland

Lisbon, Portugal

London Tower, London, UK

Ljubljana, Slovenia

Madrid, Spain

Cosmonauts Obelisk, Moscow, Russia

New York, USA

Old Town Square, Prague, Czech Republic

Rio de Janeiro, Brazil

Old Town Square, Warsaw, Poland

唐詩不解之謎

適逢中秋佳節，本人忽然雅興大發，想吟吓唐詩添。最有中秋feel嘅唐詩，當然莫過於王建嘅《十五夜望月》：
「中庭地白樹棲鴉，冷露無聲濕桂花。 今夜月明人盡望，不知秋思落誰家？」

不過以本人嘅無聊性格，齋吟梗係唔夠啦，唔惡搞一番又何遣有涯之生呢？一分鐘都唔使就諗咗以下版本：
「Ｘ庭地白樹棲鴉，冷露無聲濕Ｘ花。 今夜月圓人盡望，不知……」

頭三句各改咗一個字，但係第四句就諗極都諗唔到可以點搞添，咁唯有嚟個「腦打風」啦。點知越打越亂、越吹越遠，雖然諗嘅仍然係唐詩，但係就已經同中秋冇晒關係。其實連我自己都唔知點解，最後諗到嘅竟然係唐詩中「可憐」二字。

「可憐」一詞作何解析，應該唔使我多講啦。舉個例，凸首處處受人針對，出現親都俾人叫下台，佢都算可憐囉。一眾盲毛廢青俾啲無恥政棍同垃圾傳媒蒙騙甚至利用，白白浪費大好青春，佢地亦算可憐。「天安門母親」丁老太唔肯走出喪子傷痛，迫自己與仇恨共度餘生，咁就更係可憐。弊嘞，越講越遠添！

F5中文sir話過，詩詞唔可以逐字解析，否則會冇晒意境同美感。聽落不無道理，雖然明知佢其實係想偷懶啫。但係好似我呢啲咁鍾意尋根究底嘅人，遇到疑問而唔去揾答案，肯定會搞到食不下咽、寢不安席囉。

言歸正傳，「腦打風」時諗起幾首唐詩，都有「可憐」二字，但係睇番詩句意思又唔覺得有乜咁可憐，真係令人百思不得其解。為咗解開謎團，本人用邏輯思維分析過有關詩句同上文下理，至於乜嘢意境同美感就唔理得咁多嘞。

白居易《長恨歌》有「可憐光彩生門戶」之句。

「光彩生門戶」好易理解。所謂「一人得道，雞犬升天」，楊貴妃「三千寵愛在一身」，冚家富貴係必然嘅事。問題嚟嘞，咁直頭可喜可賀啦，有乜理由會係可憐呢？

其實答案就喺上一句：「姊妹弟兄皆列士」。「列」古通「烈」，即係話楊貴妃唔係冚家富貴，而係冚家烈士。雖然為國捐軀係光榮嘅事，但係冚家捐軀就真係可憐囉！謎團解開！

李白《清平調》有咁嘅一句：「可憐飛燕倚新妝」

趙飛燕係美女中嘅美女，化埋個時款靚妝，簡直係錦上添花啦，咁都話可憐？

喺冇任何明顯線索嘅情況下，最好係先從首詩嘅主旨入手。首詩係擦鞋之作，李白要討好嘅其實係另一位大美人楊貴妃，趙飛燕只係用嚟襯托呢位主角嘅啫。唐代對女性嘅審美標準好特別，體態崇尚豐膩，以今日嘅講法就即係高脂。揀趙飛燕做比較，自然係要以佢嘅瘦，突出楊貴妃嘅肥。掌上可舞嘅趙飛燕，就算化完個靚妝都仍然係面無四兩肉。以楊貴妃嘅角度睇，咁當然係唔合格，話唔定仲會覺得佢好可憐添。好明顯，嗰句詩係要投其所好囉。謎團再解開！

李商隱《賈生》最後兩句係：「可憐夜半虛前席，不問蒼生問鬼神。」

漢文帝特登召見被貶逐嘅賈誼，談論嘅竟然唔係民生疾苦，而係鬼神之事（今稱玄學）。喺度用到「可憐」二字，又係不明所以。如果話漢文帝係昏君，咁應該用「可恨」囉。至於賈誼，詩中提到「賈生才調更無倫」，即係話佢「上窮碧落下黃泉」，天文地理無所不知。玄學嘅嘢當然難唔到佢，根本唔使驚答唔出而俾皇帝推出午門斬首，咁又何「可憐」之有呢？

關鍵就喺「夜半」二字。要談論玄學，根本唔使等到半夜三更啫。有理由相信，賈誼「能以精誠致魂魄」，漢文帝揾佢唔係要討論乜嘢玄學，而係要佢問米，咁「可憐」就講得通嘞。大家都知啦，問米唔止會發羊吊，仲會問到嘔添，而且洩漏天機要折壽架！謎團又再解開！

雅興嘅嘢，有時真係一發不可收拾。講完唐詩，忽然又想講對聯添。中秋只係過咗兩日，以下上聯都仲算應景：
「天上月圓，人間月半，月月月圓逢月半；」

下聯就唔講住嘞，因為而家仲未係時候。

Sossusvlei, Namibia

Sossusvlei, Namibia

低Ｂ列傳之：姣婆遇著脂粉客

忽然想潮吓，學人講吓本土文化。本人係一件老餅，當然唔知呢排ＭＫ仔或膠登仔興玩啲乜。今日想講嘅係一句比本人更老餅得多嘅本地俗語：姣婆遇著脂粉客。

有網民將呢句俗語理解為「當雞蟲遇上雞」，其實咁係絕對唔正確，因為句嘢既唔香豔，亦無關某種不道德交易。呢句俗語而家已經好少人講，啲細路唔知點解都好正常。其實真正意思係：兩個人（唔一定係一男一女）臭味相投，一拍即合。要注意一點，句嘢帶有貶義，所以「臭味相投」要按照字面意思理解。係咪有啲抽象呢？唔緊要，就等我舉個實例，大家睇完就會明架喇。

話說毛姑姑同飯桶威都鍾意惺惺作態，正係惺惺相惜、臭味相投。自從雙雙晉身垃圾會，佢地更萌生相逢恨晚之慨，結果一拍即合，組成一個名為「香肛本土」嘅政團。「香肛本土」嘅宗旨係將一切議題（包括但不限於民生、文化、甚至語文）政治化，利用無中生有、小事化大等政治技巧製造中港矛盾，誓要將香港搞臭，變成香肛。奈何先天所限，搞出嚟嘅嘢冇一樣唔係貽笑大方，簡直俾佢地笑爆嘴。呢兩條友，用「小丑」二字都不足以形容，我就話佢地直頭係低Ｂ囉！

「低Ｂ二人組」近排又有代表作，佢地化身「本土語文警察」，專捉啲用咗「大陸用語」（見下圖）嘅本地傳媒，仲去信通訊事務管理局要求關注添。毛姑姑更指出，ＣＹ成日將啲「大陸用語」講到朗朗上口，佢擔心引入咗呢一套，會成為大陸嘅統戰工具喎。

哈哈，真係俾毛姑姑笑死，人講統戰佢又講統戰，究竟條低Ｂ婆知唔知統戰係乜春？！如果用幾隻字就統到，咁香港俾架仔統咗九世啦。「達人」、「熟女」、「人妻」、「顏射」呢啲唔通都係本土詞彙？點解毛姑姑又唔批判吓呢？淨係識針對「大陸用語」，究竟係毛姑姑無知，定係佢吃裡扒外呢？不過咁，我又唔會話佢係漢奸，因為咁低Ｂ嘅人根本配唔起個「奸」字！

香港精神之一係包容多元文化，所以雖然我十分唔like架仔，都唔覺得引入呢啲詞彙有乜問題。而且語文係有機生命體，會自我演化，又會混種交配、互為影響，機制只得一個，就係「自然選擇」。事實上，唔少「香港用語」一早就已經反攻大陸啦。又例如，猩爺嘅無厘頭金句一樣可以傳遍神州大地。連經典如牛津大字典，好多年前都已經收錄埋嗰個F-word。估唔到喺呢個年代，竟然仲會有人鼓吹文化自閉，拒絕接觸「非本土」用語。飯桶威都算嘞，睇佢都唔似係有文化嘅人。毛姑姑先嚇死人，仲話係大學講師添！哈哈，話時話，唔知邊間大學咁有悻請到佢呢？本人喺度俾個建議毛姑姑，佢應該呼籲香港人唔好睇諾貝爾文學獎得主莫言嘅書，因為睇咗唔止會學到大陸用語，仲會學埋大陸農村用語添呀，肯定死多二錢重囉！

始終，香港有言論自由，「低Ｂ二人組」鍾意廢噏都只係自暴其短，唔算乜嘢大問題。不過佢地去信通訊事務管理局要求關注就離晒大譜嘞，咁根本就係干預傳媒嘅編採自主。唔知點解妓協冇人企出嚟講番兩句呢？

至於兩件低Ｂ提供嗰個「兩地用語對應表」，又係笑死人冇命賠。成個表由頭睇到尾，除咗有部分譯名香港人可能用唔慣，其他「大陸用語」我就唔覺得有問題。而且有啲根本就唔係新近引入，例如「內地」一詞，起碼我自己就用咗幾十年嘞。而「冷氣」係口語，老師都有教我地書寫嘅時候要用「空調」囉。

而且，佢地所謂嘅對應用語，好多根本就唔完全對等，其實存在住若干細微分別，例如「勢頭」同「趨勢」、「水災」同「汛情」、「山泥傾瀉」同「泥石流」、「完美」同「到位」、「二世祖」同「富二代」、「好評」同「正面評價」等等。最搞笑係「小電影」同「微電影」，簡直係南轅北轍添。飯桶威冇理由未睇過小電影啫，咁都搞得錯？！咪住，其實飯生未睇過嘅可能係微電影喎，所以先以為等同小電影囉。

呢啲都算嘞，兩條低Ｂ唔俾人用「祖國」，就真係火都嚟埋。佢地要數典忘祖，或者要幻想自己係石頭爆出嚟，呢啲係佢地嘅事，但係有乜理由干涉埋人地點諗先。我祖先世世代代都喺廣東生活，直到我老豆嗰代先落嚟香港，咁中國唔係我祖國係乜！另外，釣魚島係中國領土，中國官方用得呢個名，呢個名就有絕對權威性，兩條低Ｂ有乜資格喺度指手畫腳先！

最搞嘢係居然連啲電影譯名都攞埋出嚟講。就算人地啲戲名譯得唔好，都只係喺大陸用啫，關你兩條低Ｂ叉事咩！而且，佢地提供嘅所謂譯名，其實只係啲無聊網民嘅惡搞之作。兩條友求其喺網上摷到啲嘢就如獲至寶，完全唔查證吓資料嘅真確性，仲懶醒咁攞出嚟公諸同好。連資料蒐集都馬虎成咁，都算低中之低喇！等我醒吓佢地啦，如果想揾電影譯名，應該去國內嘅電影資訊網站，例如「豆瓣電影」。

講開電影，又順帶一提「好萊塢」。呢個譯名喺文字媒體已經用咗好多年，都唔知點解兩條低Ｂ仲會攞出嚟大做文章。等我估吓先，飯桶威梗係成日唱「荷里活大酒店」啫。如果用「好萊塢」代替，咁又真係唔啱音囉。哈哈，其實我都識唱架：荷里活有間大酒店……

大家睇完以上實例，係咪對「姣婆遇著脂粉客」呢句俗語了解多咗呢？

Serbia

網上圖片

十評香港人之二：Too naive, sometimes stupid!

聲明：文中提及之「香港人」乃指部分香港人，本人絕無以偏概全之意。雖無確實數據支持，唯本人相信此等「香港人」絕非極少數。

大鼻窿話香港記者「too simple, sometimes naive」，結果俾香港人笑到面都黃。阿蕉將名句轉成中文版，再稍稍改動，承認自己「好天真、好傻」，作為對艷照事件嘅回應。雖然佢已經避重就輕，將負面嘅「頭腦簡單」改為帶可愛意味嘅「傻」，但係一樣俾人笑到變黃面婆。咁鍾意恥笑人，其實香港人有冇檢討吓，「好天真、好傻」嘅又何止阿蕉一個呢？

2010年底，突尼西亞爆發咗舉世震驚嘅「茉莉花革命」，結果引發骨牌效應，掀起席捲中東同北非嘅「阿拉伯之春」民主運動。影響所及，連大陸都人仿效，學人搞乜嘢「中國茉莉花革命」。至於食飽無憂米嘅香港人，除咗睇到拍爛手掌，仲話要積極支援「中國茉莉花革命」添。老實講，香港人又知道伊斯蘭世界啲乜春呢？本人當時就曾經大潑冷水，絕對唔相信「阿拉伯之春」或者「中國茉莉花革命」會有乜嘢好結果。

事隔差唔多三年，我地又不妨睇吓嗰場「阿拉伯乜春」運動究竟搞咗啲乜嘢大頭佛出嚟。

喺埃及，人民踢咗獨裁者穆巴拉克落台。不過埃及人好似革開有癮，喺首位民選總統上任短短一年後又搞革命，最後軍方乘機介入，拉咗穆爾西下馬。期間埃及政局動盪非常，敵對陣營日日開拖唔在講，軍方仲對異見者進行血腥鎮壓。禍不單行，作為埃及主要經濟支柱嘅旅遊業亦受嚴重打擊，搞到人民冇啖好食，肯定衰過舊時。最近仲發生炸彈襲擊，禍及平民百姓，唔知埃及人有冇少少懷念以前嘅獨裁統治呢？

敘利亞更大鑊。總統巴沙爾企硬唔肯就範，跟住又有軍人倒戈，結果爆發內戰，打到七彩。早排仲爆出有平民遭化學武器殘殺，政府同叛軍都指責係對方所為。呢單嘢，美國同一眾正義盟友認定係政府軍做嘅，紛紛磨拳擦掌準備軍事介入，誓要將敘利亞變成伊拉克嘅翻版。如果唔係中途殺出隻北極熊，咁就真係冚包散嘞。

至於突尼西亞，雖然仲未有乜大鑊嘢，不過講真，佢地以前都唔算好差啫，冇爆大鑊並唔表示嗰場「茉莉花革命」嘅影響有幾正面。貪腐問題係導致革命嘅主因，但係根據路透社題為「民調：阿拉伯之春後貪汙更嚴重」嘅報導，有關問題喺革命後仲嚴重咗添。而家見到埃及再革命，突尼西亞人似乎有啲蠢蠢欲動，話唔定又會有樣學樣，咁就想唔趴街都難啦。

香港人當然唔知點解「阿拉伯乜春」會搞到咁大鑊，因為佢地唔會明白，嗰場所謂民主運動根本就同民主扯唔上關係。人民推翻極權政府，並唔係為咗爭取平等同公義，而係要掌權。如果「革命」成功，佢地當然會以其人之道還治其人之身，用不民主手段打壓番以前嘅當權派。講到底，無論係什葉派對遜尼派、抑或保守派對世俗派，都只係派系鬥爭，根本無關是非黑白。民主云云，只係「熱愛民主」人士一廂情願嘅理解啫。

講真，冇民主唔一定會死人，不過喺啲民主意識唔普及嘅地方搞「民主革命」就大鑊嘞。當極權政府受到挑戰，強勢平衡被打破，派系間自然會為爭權而打生打死，野心家（例如軍人）就有機會介入，而民眾亦會趁亂謀取私利。最終，「革命」搞出嚟嘅只會係一個爛攤子。俾「阿拉伯乜春」橫掃嘅國家，幾乎冇一個例外囉。至於西方國家介入，自然唔會對呢啲國家嘅民主進程有幫助。班友只不過係混水摸魚，乘機喺當地建立勢力啫。

睇番中國，其實情況都係差唔多。如果真係搞乜嘢「中國茉莉花革命」，只會有兩個可能結果。第一，政府強勢鎮壓，嚟個六四翻版。第二，中國四分五裂，進入冇王管狀態。到時，官員貪污瀆職，民間偷呃拐騙，只有比今日嚴重百倍囉。

香港人都識得講啦，大陸人質素低劣無比，連化外之民都唔算，根本就係一群蝗蟲。由一群貪得無厭嘅蝗蟲搞壇「中國乜春」，試問點會有好結果呢？香港人就係咁架嘞，一聽到「民主」兩個字就上晒腦，連蝗蟲係點樣都唔記得，簡直天真得嚟好可愛、傻得嚟又好勻循。

天真嘅人思想單純，以為一條簡單公式可以解決晒世上所有複雜問題，結果俾人猛餵糖衣毒藥。傻人就以耳代目（仲代埋腦添），人講乜佢信乜，連冇包糖衣嘅毒藥都照吞落肚。「好天真、好傻」，用嚟形容香港人都應該冇乜走雞喇啩。

本人又試吓狗尾續貂，將大鼻窿同阿蕉嘅名句嚟個crossover，今次俾香港人嘅評語係：「Too naive, sometimes stupid！」

咪住，諗諗吓都唔知有冇丟錯英文書包添。「stupid」好似係「蠢」咁解喎，比「傻」負面好多啫。例如，「蠢豬」同「傻豬」就差天共地啦。咁究竟「傻」嘅英文係乜呢，用「silly」又得唔得呢？跪求各方英語人指點！

後記：
啱啱喺今日報紙睇一張新聞圖片，係一個親政府嘅敘利亞民兵俾叛軍斬首。早排新聞亦有報導，幾個政府軍戰俘俾叛軍集體槍決。美國國務卿克里仲走出嚟解畫，話叛軍中嘅壞人只係佔極少數。哈哈，你信唔信？如果有人以為反專制政權嘅就一定係好人、西方社會支持嘅就一定係正義之士，咁唔好意思，就算得罪都要講聲：stupid！

Giza, Egypt

Palmyra, Syria

Sbeitla, Tunisia

謹此致歉！

先賢教我地要不時自我檢討，有「吾日三省吾身」之說，本人向來奉為座右銘。啱啱屎坑走一回，趁等運到之際諗番呢兩日做過同講過啲乜嘢，果然發現自己有不足之處。早兩日講過林老屍單嘢，而家再睇番，先發覺篇文真係有問題。

本人雖然墨水唔多，但係勝在中肯持平，論點當然唔係問題所在。文中對林老屍同眾粉屎嘅批評，絕對係有碗話碗有碟話碟，並無誇張失實或任意扭曲。只係行文之時，態度稍有輕挑，措辭略嫌尖刻，有負讀者對一位謙謙君子嘅期望，本人深感歉疚！

首先，本人曾提及林老屍副尊容，話佢「肥腫難分」、「疑似豬頭」、「連砵蘭街阿伯都唔吼」。冇錯，呢啲都係事實，林老屍的確生得貌賽無鹽。不過生得醜唔係林老屍嘅錯，只可以話係一個悲劇，佢同佢老母都唔想嘅囉。本人冇對身罹不幸嘅人溫言安慰、勸佢節哀，反而連番嘲弄，真係非常慚愧！

再者，本人竟然冇懷住悲天憫人之心，唔識體恤弱勢社群，實在罪過！大家有冇覺得奇怪，林老屍明明如狼似虎，直頭強悍無匹，又何弱之有呢？咁就要聽我道來喇。

本人喺屎坑分析過，林老屍嘅言行作為絕非任何正常人做得出，結論只有一個：佢有病！

就短片所見，林老屍唔止口出狂言，辱罵警員時仲張牙舞爪，肢體動作極多，顯然係處於極度亢奮狀態。條片6分幾鐘，開始嘅時候林老屍已經鬧緊，一直鬧到條片播完都未停過。佢全程鬧咗幾耐雖然不得而知，但係就肯定遠超一般潑婦罵街嘅範疇。由此推論，佢好可能患有躁狂症。另一方面，頻繁而突兀嘅肢體動作，伴隨住可怖而扭曲嘅面容，亦有可能係由肌肉痙攣或腦癇症引起。

林老屍語無倫次，言詞內容極其低Ｂ之餘又九唔搭八，如果唔係有語言障礙，就可能係精神錯亂所致。林老屍要Ｘ警員老母，亦表示佢可能有性別認同障礙，覺得自己係男人。事實上，得睹林老屍粗獷不文嘅風範，真係連我呢個麻甩佬都自愧不如囉。話唔定佢仲幻想自己有啫啫添，咁就係思覺失調嘞。

條片曝光之後，林老屍否認講過嗰句四字真言，仲話係俾人配音插贓。本人絕不懷疑林老屍嘅誠信，相信佢唔係存心抵賴，但係鐵一般嘅事實擺喺眼前又點解析呢？好明顯，林老屍做咗又即刻唔記得，應該係患咗腦退化症。至於插贓嫁禍云云，亦說明咗林老屍可好能係妄想症患者，成日幻想自己俾人迫害。

對一個百病纏身嘅可憐人嚴詞譴責，未免稍欠愛心同包容，實在於心有愧！所謂「錯就要認，打就企定」，本人謹此向各位扑友鄭重致歉！至於林老屍，本人亦專誠揾咗隻移居英國、趁暑假返鄉下尋根嘅科索沃小學雞向佢致意！

作為一個有公民責任感嘅扑客，淨係道歉當然唔夠。所以本人亦希望亡羊補牢，諗吓有乜方法可以幫到林老屍呢位可憐人，算係為香港嘅弱勢社群稍盡棉力。

首先，社處應該即刻關注林老屍呢個畸屎，睇吓有冇需要轉介佢去青山。任由林老屍喺街頭遊蕩，只會令病情惡化，喺青山佢先會得到最適切嘅照顧。雖然社會上普遍支持精神病患者融入社群，但係林老屍好可能有暴力傾向，肯定會嚇親班小學雞，所以留喺學校並唔適當。

如果連青山都唔收，民間志願組織亦應施以援手。舉個例，希望紫藤可以屏除門戶之見，考慮破格收容，幫吓呢位可憐嘅姐妹。正如一位網友所言，林老屍係「師中之婊」，其實咁都算有啲同門之誼，希望紫藤可以認真考慮吓囉。

向積極方面睇，有病唔等同無能，只要有機會發揮所長，病人一樣可以對社會作出貢獻。八大不妨建立調理農務學院，並於其下開設蘭花系，誠邀林老屍出任系主任。呢個係多贏方案，無論對林老屍、大學、以至香港都有好處。

蘭花系開正佢嗰瓣，林老屍精神有所寄託，自然唔會隨街發癲，真係藥箱都變首飾箱啦。至於大學本身，有林老屍坐鎮，啲熱愛民主嘅學生就唔會走堂去示威遊行，絕對有助提升學術水平。最後，憑住林老屍喺蘭花系嘅卓越成就，香港亦有望一吐多年烏氣。大家都知啦，喺近年熱演嘅雙城記，香港鑊鑊輸俾新加坡，仲要輸足九條街添。作為香港一分子，本人都覺得好冇面囉。有林老屍呢位蘭花系高手出馬，將新加坡國花撚到出神入化，香港肯定可以贏番鑊啦，話唔定坡佬會再一次向香港取經添呀。哈哈，為港爭光就全靠林老屍喇！

Young Kosovo immigrant now living in UK, Pristina, Kosovo

老屍傳奇

上兩個禮拜去咗旅行，諗住可以避開香港嘅吵鬧聲，等耳根清靜吓。點知遠在巴爾幹半島，竟然都要受到林老屍單嘢轟炸，被迫睇（同聽）埋晒啲核突嘢，真係忍唔住要講一聲：挑！

話說有個熱心團友喺屈屎鴨收到條片，內容係林老屍用經典港式四字真言「Ｘ你老母」辱罵警察，而唔係之前新聞提到嘅英文粗口「ＷＴＦ」。呢位團友如獲至寶，即刻捉住我睇片，完全唔理就嚟要食晚飯。片中所見，一個肥腫難分嘅女子不斷講埋晒啲低Ｂ嘢挑釁一位警員，豬如「你連人都不如呀，豬狗不如呀」、「公安呀」、「阿sir膊頭冇冧把嘅」、「警務處長呀」、「Ｘ你老母，你拉我吖」等等。如果大家唔知乜嘢係「貧嘴惡舌」同「潑婦罵街」，不妨睇吓呢條片。先旨聲明，閱後如有任何不適，本人概不負責！事實上，本人對啲核突嘢幾乎已經免疫，但係睇完條片都搞到食慾不振，真係多得呢位團友唔少呀！

講真，呢啲咁嘅癲雞乸，旺角跌個招牌落嚟都閒閒地責死十幾件，本來不提也罷。但係作為人之患，竟然不吝喺大庭廣眾展示低劣成咁嘅質素，都咪話唔佩服佢嘅勇氣囉！更離奇嘅都仲有，呢種貨色都可以得到「全民力撐」，咁就唔封佢做傳奇都唔得嘞！締造傳奇嘅唔止係林老屍呢位奇女子，仲有喺背後力撐佢嘅一眾「正義」粉屎。就係因為呢班人嘅傾力演出，我地又一次清楚睇到香港嘅絕望真相：無知同愚昧已經好似瘟疫咁傳遍香港每一個角落！

首先，我想問吓奇女子同佢班死硬粉屎，究竟知唔知「師表」呢兩個字點解？班友當然唔知啦，咁本人又要校長上身嘞。「表」有模範同榜樣嘅意思……咪住，林老屍喺片中提及港英時代點點點，可能佢同眾粉屎都唔係太識中文喎。雖然自問雞腸係有限公司，都唯有頂硬上啦，如果譯成英文就係role model。即係話，為人師表者，除咗喺課堂講解，亦要以身作則，示範俾學生睇乜嘢應該做同唔應該做，此之謂身教。好明顯，因為立場唔同而肆意對異見者作出離題嘅人身攻擊、甚至連四字真言都出埋，當然係極壞嘅榜樣啦！尤其是嗰句四字真言，出自女人口中簡直係不知所謂，試問一個婆娘憑乜嘢Ｘ人老母先！撇開道德層面，對陌生人立亂講仲隨時會招致殺身之禍添架！林老屍識揀，問候嘅係香港警察，如果換轉喺港人推崇備至嘅歐美民主國家發生同樣事情，睇怕佢會由疑似豬頭變成貨真價實嘅豬頭都有份！不過受業於奇女子嘅小學雞就未必識分邊啲人唔可以隨便問候，如果有樣學樣，恐怕未夠秤投票選凸首就俾人打死囉！所以話呢，奇女子嘅身教絕對係失敗之作，佢根本就冇資格做人老師，做一條老屍就差唔多！

講開又講，其實香港警察已經好克制架啦，都唔明點解啲人仲要豬多批評。我誠心希望佢地可以移民外國，見識吓人地嘅警察係點。成日踎喺香港，淨係識坐井觀天同閉門造車，想唔變到豬咁蠢都難啦！更搞笑係，啲人（包括扮民政棍同無聊人士豬如陳老太之流）話凸首要求教育局就有關事件提交報告係搞民革式批鬥，要撕裂香港。講真，而家係邊啲人逢中必反，係邊啲人堅持寸步不讓，係邊啲人拒絕求同存異，係邊啲人唔肯以對話縮窄分歧先！撕裂香港云云，根本就係賊喊捉賊！仲有，人講文革班友又講文革，究竟佢地知唔知文革係乜呢？發動文革背後嘅動機並唔係重點，反正中共高層權力鬥爭絕非新鮮事物。文革之所以遺害極深，係因為牽涉到群眾層面。群眾受鼓動而變得極度亢奮，頭腦發熱令人難辨是非，繼而發展成為批鬥而批鬥，亂扣帽子、任意抄家無日無之。最後情況失控，群眾為求自保而打倒別人，形成惡性循環。如果話凸首要發動文革，佢究竟有冇咁嘅意圖同能耐先！你都咪話，睇番而家香港嘅情況，文革式批鬥又的確已經稍具雛形。不過係邊啲人搞成咁，大家心裏有數啦，賊喊捉賊又一例證！

講番林老屍單嘢，個婆娘好撐唔撐，竟然走去撐法輪功。明明係一個政治團體，硬係要用宗教嚟掩人耳目，一句講晒：名不正則言不順！如果李洪志條神棍敢當眾表演吓白日飛昇嘅絕技，我第一個撐佢囉！奇女子根本就係土共思維，當晒敵人嘅敵人都係朋友。佢都唔去求證吓，究竟大紀元有幾多成嘢係老作。仲有，你又拉橫額，我又拉橫額，點解一定要俾法輪功獨佔冇遮擋嘅有利位置呢？條婆娘又話佢唔係法輪功，只係睇唔過眼佢地表達意見嘅權利被剝奪喎。咁唔該佢出席吓建制派舉辦嘅論壇，呢啲場合就最多人用叫囂或搶咪方式阻止他人發言，絕對最適合佢執行捍衛言論自由嘅神聖任務囉！

呢條婆娘根本就係潑婦扮聖女，明明面皮已經夠晒厚架啦，仲要猛咁喺自己面上貼金，真係頂得佢順都食得屎囉！本來我都唔知點解教師會叫做人之患，而家經佢人肉示範，我明喇，原來係人之禍患咁解！哈哈，一個唔覺意得罪埋其他教師朋友添，唔好意思呀！

Mummy, British Museum, UK

金縷玉衣, 河北省博物館, 石家莊, 河北

沐猴而官

今日忽然校長上身，想同大家講吓一句成語。

「沐猴而冠」，字面解作馬騮戴帽，係用嚟形容啲人面草包，意思同「金玉其外」差唔多。其實唔難理解，就算馬騮戴咗頂帽扮成人咁樣，內裏當然仲係一隻馬騮啦。據聞呢句成語有個典故，被形容為「沐猴而冠」嘅竟然係「力拔山兮氣蓋世」嘅楚霸王，都唔知堅定流。諗落又有啲似喎，雖然成敗不足以論英雄，但係項羽話「富貴不歸故鄉，如衣錦夜行」，咁又真係膚淺咗啲囉。

至於呢句成語嘅用法，可以參考以下例句：

「明明係沐猴而冠，癲狗、長毛、大舊之流竟然可以循民選途徑晉身議會，你話係咪好得人驚？如果聽日就有雙普選，大家好即刻做定壽衣喇！」

話時話，用「沐猴而冠」嚟描述現今政壇眾生相又真係幾貼切吓架。

另外，「沐猴而冠」嘅讀音亦有啲特別。如果知道呢句成語點解，反而會更易讀錯。雖然同帽有關，但係詞中「冠」字唔係音「官」，而係要讀成「灌」。因為「冠」字喺呢度係動詞，指戴帽嘅動作。

記住喇，同「醫錦還鄉」一樣，講「沐猴而官」會俾人笑架！

不過咁，香港係一個黑白顛倒嘅地方，幾荒謬嘅嘢都可以變成理所當然。話「沐猴而官」錯咩，但係呢四個字偏偏就反映咗香港官場嘅現實情況。一眾高官嘅辦事能力有幾高，大家有目共睹。咁都算嘞，港府施政始終受制於社會大氣候，都唔怪得晒佢地。最頂唔順係班友闖少陣禍都唔得，係要踩屎踩鑊甘嘅先安樂。哈哈，咁仲唔係「沐猴而官」？！

睇吓近排好唔得閒嘅波叔，上任唔夠一年就接連爆出「劏房風波」、「啤酒事件」、「東北炒地」幾單大鑊嘢，可謂絕無冷場。首先，本人唔會評論波叔喺呢幾單嘢裏面有冇問題，亦無意質疑佢嘅誠信。法律達人張達明教授都發表過極具權威嘅闡釋啦，只要冇觸犯香港法例，無論做乜都唔會有問題囉。基於呢個觀點，波叔冇被起訴，喺現階段當然係處於白紙狀態，任何對佢嘅攻擊根本就唔成立。本人睇唔順眼嘅，反而係佢就外界質疑所作出嘅應對。我嘅評語只有一個字：蠢！

面對政客同輿論窮追猛打，波叔選擇用唧牙膏方式每日講啲，但係又前言不對後語，有乜理由唔俾人食住上先。呢種策略唐唐喺「地下宮事件」都用過，後果係點唔使我多講啦。枉佢仲係有識之士，連乜嘢叫前車之鑑都唔識。要講就應該事先全盤整理好，確保唔會出現前後矛盾，以免俾人覺得佢用大話冚大話囉。就算係事實，如果難以令人入信，咁就唔講好過講嘞。好似佢話嗰幾塊山卡啦農地係買嚟作休閒用途，連我都唔信啦，人地又有乜可能會收貨先。如果佢話十九幾年前已經睇好嗰幾塊地嘅發展潛力，我就唔覺得有乜問題嘞，仲會讚佢眼光獨到添，做乜係要令到人地覺得佢唔誠實先安樂呢？再唔係，佢亦可以用張教授嘅觀點據理力爭，起碼唔使搞到而家咁，連招架之力都冇囉。

如果唔係呢單嘢，大家都未必知原來波叔有咁多瓣數。又農地，又劏房，仲開咗九十幾間公司，你揸我，我揸你，關係複雜到冇人有。本人雖然睇唔明，但係都知道佢揾錢觸覺極其敏銳，而且財技玩到出神入化添。其實已經生活無憂架啦，都唔明佢點解硬係要走入政府呢個超熱廚房。

波叔之所以會執二攤坐呢個位，完全係因為前任局長老麥一上任就中伏，搞到周身蟻而被迫辭職。除非波叔真係覺得自己白過白紙（即係透明），否則就太睇小一眾傳媒同金手指嘅辦事能力喇。不過，所謂有危必有機，而家咁多嘢曝咗光，俾人睇到佢原來眼光咁獨到、財技玩得咁出色，一定可以吸引到好多潛在客戶，咁都未嘗唔係好事啫。我就建議佢即刻引退，俾啲心機揾真銀仲好啦！

Lake Manyara National Park, Tanzania

Ngorongoro, Tanzania

Chobe National Park, Botswana

地獄走一回

大腸癌係香港第二號癌症殺手，每年新症超過四千宗。早期大腸癌冇乜特別徵狀，就算中咗招都好難及早發現。到出現病徵，好多時已經係中後期。

後期大腸癌病徵包括：
－　便便帶血、黏液
－　大便習慣改變
－　如廁後仍有便意
－　腹痛、腹瀉
－　貧血
－　體重減輕

高危因素有：
－　家族遺傳
－　肥胖
－　不良生活習慣，例如食煙、飲酒、少運動
－　不良飲食習慣，例如偏好高脂、高糖、低纖、或加工食品
－　年過五十

本人自問生活習慣唔多健康，大腸癌高危因素中咗一半。而後期病徵亦有一半出現過（有部分仲好頻密吓添），都咪話唔得人驚。雖然唔係咁like俾人搞後面，不過為咗求個安心，都係決定做次大腸內窺鏡檢查。話就話檢查，但係如果發現息肉都會順手割埋，不過要另外加錢。琴日先啱啱做完，感覺就好似去地獄打咗個轉，然後重回人間！

話就話要喺醫務所搞一粒鐘，但係照大腸鏡只係用咗十幾分鐘，因為仲有前戲，做完又要瞓番個事後覺。前戲係乜？哈哈，首先梗係要剝衫剝褲上床啦！會唔會好尷尬？咁又唔會喎，因為上床前要著番件有少少透視嘅特製開背睡袍。以本人咁厚面皮，呢啲當然唔算得乜嘢，跟住嚟嘅先惡頂。因為被插會好痛，真正埋牙前先要喺手背拮一針，注射止痛藥同鎮靜劑入靜脈。本人自問大膽，怕嘅嘢唔算好多，偏偏打針就係其中之一。點知拮完一針又一針，拮到第六針醫生就同我講，話我啲靜脈好扁，拮極都插唔正中間。好彩第六針終於搞掂，但係我已經想死咁滯囉。喺命懸一線之際，只感覺一股涼意由手背向上蔓延，跟住就迷迷糊糊咁瞓著咗，人事兩不知。

搞嘢過程幾乎一片空白，淨係記得醫生曾經叫我睇吓個screen，話係大腸裏面嘅現場直播。當時瘟瘟燉燉，望咗一眼就再瞓番，印象中畫面好似係一個無底深洞。到再醒番，已經俾姑娘推咗入更衣室。佢話藥力未過，仲未落得床，叫我瞓番個靚覺先。其實當時已經冇乜睡意，不過就有啲手軟腳軟嘅感覺。反正閒著也是閒著，不如check吓有冇插到開晒花仲好啦。首先凝神聚氣，繼而意守丹田，最後收腹提肛。好彩，既唔痕又唔痛，總算冇穿冇爛，應該唔會有啲乜嘢創傷後遺症啩。不過已經唔係完璧，惘然若失就點都有少少囉！

胡思亂想咗一陣，竟然覺得神完氣足，姑娘亦喺呢個時候叫我出去聽報告。聽完醫生講解，仲有隻大腸實景拍攝嘅DVD帶返屋企留念添。咁都好，可以填補番人生中一段十幾分鐘嘅空白。返到屋企，二話不說即刻開電腦睇片。唔睇都唔知，原來照大腸鏡係由大腸最末端（即係盲腸位置）開始，然後慢慢褪出嚟架。初初睇真係覺得好神奇，仲有啲感動添，做咗幾十年人，從來未試過咁清楚見到自己嘅inner self囉。但係越睇越唔對路，到臨近結尾，直頭恐怖過睇鬼片添，因為……我見到……屎呀！我已經跟足指引做架啦，估唔到仲會見到啲咁恐怖嘅嘢！

照大腸鏡只係十幾分鐘，但係事前準備就要早兩日開始做，確保大腸裏面嘅廢物可以排清。檢查前兩日唔可以食高纖食物，例如豆類、蔬菜、生果等。檢查前一日只可食流質食物，朝早要食兩粒細細粒嘅瀉藥(Dulcolax)，夜晚要飲一樽仔瀉劑(Fleet Phospho Soda)。

其實好耐以前已經聽人講過嗰樽瀉劑難頂架喇。樽瀉劑勁鹹唔在講，飲完仲要大量飲水（三粒鐘內唔少於一公升）。跟住就會頻頻去廁所，痾水痾到腳都軟。講真，我又唔覺得嗰樽嘢好似啲人講得咁難頂囉。其實肚仔都冇痛，只係漲住漲住，成日要去廁所。痾水亦冇乜特別不適，唔會痾到腳軟，根本就同小便差唔多，只係出口唔同啫。

反而朝早食嗰兩粒丸仔先惡啃，雖然只係痾咗兩次，但係就辛苦到想死咁滯。本人肚仔一向唔聽話，肚痾可謂家常便飯，不過從來冇試過痛得咁厲害。嗰種攪吓攪吓、抽住抽住嘅痛法，真係非筆墨可以形容。一路痾一路痛，痾到全身軟晒，真係驚隨時會休克。而且猛標冷汗，唔止搞到成身濕晒，仲連滴到地下都濕埋添。痾完之後腳步浮浮，企都企唔穩，當時淨係想即刻瞓低，係長眠不起嗰隻囉！不過成身濕晒當然唔可以瞓上床，沖涼又驚會喺浴室暴斃，咁唯有坐低唞吓先算啦。結果坐咗半粒鐘先回到魂，直頭係死過翻生呀！呢隻藥我真係打死都唔會再食囉！

哈哈，其實又唔使講得咁死嘅，醫生話我一粒息肉都冇，下次再照大腸鏡都應該係十年後嘅事喇！

Halong Bay, Vietnam

Halong Bay, Vietnam