半文盲

之前喺格魯吉亞撞車中頭獎，好彩有買旅保險，可以幫補番啲醫藥費。早幾日填claim form先知道鬼死咁麻煩，原來要作文，寫番事發經過。寫字呢家真係攞命，寫得肉酸唔在講，仲要有好多字唔識寫。結果要喺電腦打咗先，睇番啲筆劃至寫得出，簡直戇居到暈！不過更戇居嘅都仲有，試過喺超市買完，填送貨單時寫寫吓地址先發覺有兩隻字唔識，早知寫英文冇咁嬲啦！

其實我睇中文冇乜問題，絕大部分常用嘅字都識，只係寫唔出啫，所以最多算係半文盲。講到執筆忘字，原因好簡單，就係平時寫得少。以前讀英中，除咗中文同中史之外，其他科嘅功課都係用英文做。上到大學，亦只係大一嗰年修過一科中文。出嚟做之後就更加少寫，基本上所有公文都係用英文，連講都開始中英夾雜添。

到呢兩年間中寫吓blog，先叫做寫番多啲中文。不過都只係喺電腦打，並唔係書寫，亦對書寫一啲幫助都冇。我唔識打倉頡，打字只係用漢語拼音。當然啦，如果有好多字唔識寫，根本就用唔到倉頡，手寫板亦一樣。拼音輸入仲有個好處，就係有關連詞呢個功能，可以大大減少出現別字嘅機會。不過咁，凡事有利必有弊，就係因為輸入法會自動搞掂，根本冇需要記住正確嘅用字，到手寫時就更易出錯。

中文字嘅筆劃鬼死咁複雜，同音字又多，想唔寫錯別字其實已經好難。而且香港一向重英輕中，根本就俾唔到動力啲人去學好中文。有理由相信，好似我咁嘅半文盲，香港應該仲有好多！

咪以為淨係中文先係咁，其實英文都有啲好大鑊嘅畸屎。有個教書嘅朋友同我講過，佢學校有啲讀到中二嘅細路竟然連26個英文字母都未識齊，都咪話唔得人驚！

哈哈，有樣仲得人驚，我會考中國語文科攞B架！幾十年前嘅會考，攞B真係唔算容易，其實我一直都懷疑啲閱卷員係咪發咗雞盲！

遍地美食

這裏美食遍地！遼闊無垠的草原就在腳下，對於食草動物來說，除了飯來張口，還需要做甚麼？話說回來，世事總難盡如人意，隨著季節更替，草原也有枯竭的時候。食草動物不得不千里迢迢的往別處尋找青草和水源，這就是有名的東非動物大遷徙。牠們所到之處，自然也成為食肉動物的樂園。對於獅子猛獸來說，這些食草動物當然也是天下之美味！但這可不是肉來張口，要飽餐一頓也得付出勞力，甚至賠上性命！食草動物絕不是省油的燈，有些跑得快，擒之不易，有些長著獠牙尖角，具一定殺傷力。而且草原上的競爭十分激烈，就算兇猛如獅子，到口的獵物也會被成群的鬣狗搶奪。生活從來不易，無論是野性原始的塞倫蓋蒂草原，還是你我身處的文明大都會！

霸權再現

今年71，民陣以關心對方人身安全為藉口，唔同意持相反立場嘅獅子山學會喺同日發起遊行。自己遊行就天經地義，人地遊行就天地不容，此謂之民鼠霸權！不過咁，民陣只係喺背後使橫手，霸都霸得比較斯文。事隔個幾月，琴日又有兩班民鼠聖鬥士阻止其他人遊行，而且仲係攔途伏擊添！哈哈，原來「文有文鬥，武有武鬥」唔係啲土皇帝嘅專利，民鼠陣型都一樣咁拿手！

話說琴日一個反對外傭爭取居留權嘅組織（愛護香港力量）發起遊行，打算由維園行去狀棍黨總部，抗議佢地喺外傭居留權嘅立場。點知未出發就俾兩幫民鼠聖鬥士（中大左翼學會同社會主義行動）截擊，搞到進退不得。雖然警方介入調停，班聖鬥士唔止唔理，仲即刻進入極度興奮狀態，全力衝擊警方防線。結果當然係求仁得仁啦，既然班友博拉，警方定必一力成全，最後拉咗19件。被拉嘅廢青當中，有幾個好熟口面，包括嗰位瞓街鼠輩中堅份子，即係攞綜援做另類社工嗰件長毛飛。

事件嘅導火線係外傭居留權官司，雖然我對單嘅立場好清晰，不過呢樣並唔係今日要講嘅重點。無論對單嘅立場係點，我都唔會阻止持不同意見嘅人發聲。此謂之尊重言論自由，係民主社會不可或缺嘅核心價值。班友用實際行動阻止人地遊行，等同用暴力剝奪他人嘅言論自由，難為班發開口夢都講民主嘅聖鬥士會做得出！班友連民主係乜都唔知就學人去搞民主運動，直頭同大陸文革時嘅大煉鋼有得揮！

對於有中大學生牽涉在內，如果係以前，我會覺得痛心或憤怒，家陣反而冇乜太大感覺，只係得啖笑。先有高錕校長嘅搶咪事件，再有針對董建華嘅畢業禮之亂，中大學生一早已經俾人愛搞事嘅印象。班友一而再，再而三咁尋釁滋事，要嬲都唔嬲得咁多啦。況且班友掛住搞事，無心向學，遲早會自嚐惡果。記得睇過壹仔嘅專訪，講嗰個搶高錕咪嘅學生讀書唔成中途退學，淪落到要做地盤。我絕對冇職業歧視，亦唔覺得做地盤好折墮，不過呢個肯定吾係嗰位學弟嘅人生目標！喺搶咪事件中，高錕校長話唔需要懲罰有關同學，因為佢地冇做錯。我知道高校長好人，不過就有啲婦人之仁。我都同意懲罰可免，不過開導就必需，用暴力侵犯他人嘅言論自由，又點可以話冇做錯呢？！講真，而家嘅大學生真係俾啲校長縱壞晒，個個都極其自我中心，鍾意做乜就做乜，完全唔會考慮其他人嘅意願。

雖然話叫囂、搶咪、搗亂呢啲根本就係班民鼠聖鬥士阻止其他人發聲嘅慣常技倆，早已見怪不怪，不過今次單有啲唔同，性質嚴重得多。以往被搞嘅，通常都係政客、高官、或者公眾人物，佢地從來都有好多機會發言，俾人搞吓都唔會有太大影響。但係今次就唔同，俾人狙擊嘅只係普通市民，就好似你同我咁。點解有部分市民會覺得佢地有權阻止其他市民表達意見呢？如果呢班友支持嘅政客做咗凸首或者喺垃圾會取得控制權，我又會唔會連呢個blog都唔准寫呢？借用一個琴日被截擊嘅阿伯嘅金句：呢啲叫做民主咩？

雖然我對呢班民鼠聖鬥士極度反感，不過都有樣要讚吓，就係佢地起碼有番啲方向感。有上過香港各大網上討論區嘅人都知，民鼠陣型人士對於持不同意見者嘅回應，一律都係左狗或者共狗。其實邊個先係思想左傾，佢地好似完全搞唔清楚咁。琴日搞事班友就擺明車馬，毫不掩飾佢地嘅左傾立場。哈哈，今次真係可以學吓啲民鼠陣型人士喇，等我都鬧番句先：死左仔！

澄清：
上文提到有中大學生讀書唔成，走咗去做地盤。記得真係睇過一單咁嘅報導，但係就搞錯咗個當事人。原來有關學生唔係搶咪嗰個，係淫褻學生報嘅搞手至真。對嗰位無辜受到牽連嘅搶咪同學，本人深表歉意！不過班友成日尋釁滋事，真係分唔清佢地邊個打邊個，一時搞錯都情有可原啫！

三入急症室(2)

上回講到早幾日去急症室睇醫生，結果搞咗成六粒鐘。喺急症室要等到變化石先見到醫生，呢樣就係人都知。至於等六粒鐘值唔值得，咁就真係見仁見智嘞。

其實等嘅時間都係一種成本，最簡單嘅方法係以最低時薪$28計算。當單喺私家診所可以一粒鐘搞掂，咁去急症室嘅成本就係$100+5x$28=$240，仲未計要搭的士去。雖然仲係比私家診所平少少，但係如果計埋喺急症室悶到發瘟咁等多五粒鐘造成嘅精神折磨，根本就一啲著數都冇。事實上，我係喺私家診所越搞越大鑊，都唔知係咪感染到啲抗藥性超級惡菌，所以先去急症室。始終對香港嘅公營醫療比較有信心，就算等耐啲都唔介意。

不過咁，喺急症室等到媽媽叉叉嘅都大有人在。有兩個原本三九唔識七嘅男人，可能因為等得太悶，無啦啦就咁傾起上嚟。喺咁嘅情況，話題當然離唔開急症室服務啦。佢地一致認同，就算冇病都會等到病。佢地又講到如果啲菲傭爭取到居留權，肯定會迫爆急症室。呢樣我又有同感喎，如果單真係成事，急症室絕對係首先淪陷嘅地方！就當日所見，非華裔求診者就佔咗接近兩成。雖然我唔知啲少數族裔佔香港人口嘅確實比例，不過就好肯定冇兩成咁多。聽啲醫生叫名先搞笑，讀到甩甩咳咳，真係懷疑啲少數族裔求診者會唔會聽得明。

最近大狀黨因為幫外傭爭取居留權單，俾人鬧到狗血淋頭。佢地就話係啲政敵抹黑，誇大咗單對香港公共資源造成嘅潛在壓力。班友身嬌肉貴，就算睇病都係去私家醫院，當然唔會知道急症室嘅walk-in clinic係乜世界啦！

雖然等成幾粒鐘真係悶到嘔，不過其實急症室都幾多睇架，我指嘅係人生百態。坐低咗冇幾耐，就見兩三個差人夾住個金毛飛入嚟，跟住又見另外兩三個差人同一個中年女人入埋嚟。原來係家暴事件，個仔喺屋企發神經，阿媽阻止嘅時候發生糾纏，混亂中兩母子都受咗傷。後來有人報警，結果齊齊入急症室驗傷。為免佢地喺急症室再大打出手，嗰兩母子要分開坐，五六個差人分成兩批，分別傍住佢地。

件金毛大約二十歲，一睇就知唔係好人，喺大庭廣眾（包括阿sir面前）不停un身un勢，個格有啲似嗰位淫照事件嘅男主角，不過個樣就差天共地，絕對係樣衰格衰嗰隻！個女人咁啱坐咗喺我附近，所以佢同差人嘅對話都聽得好清楚。原來係兩母子相依為命，阿媽含辛茹苦養大個仔，不過阿仔就好食懶飛，成日打交生事，上差館多過上酒樓。咁都不特止，阿仔仲成日攤大手板攞錢，滿足唔到佢嘅需索就發晒癲咁喺屋企搗亂。阿媽聲淚俱下咁同差人哭訴，話為咗個仔搞到破過產、攞過綜援，唔明點解阿仔會當佢係仇人。難得幾位阿sir又有耐性聽佢講啲不斷重複嘅，仲關懷備至咁加以安慰同輔導，連社工嗰份都做埋。

講講吓，個女人忽然情緒激動起嚟，晒地之餘，仲話要生要死添。一眾阿sir即刻大為緊張，有啲㩒住佢，有啲就安慰佢。事件發展成咁，當然馬上吸引晒候診室所有人嘅目光，只有一個除外。隔冇幾遠嘅阿仔竟然氣定神閒咁同唔知邊個傾電話，對單完全視若無睹！

跟住我就被召咗入醫療室處理傷口，出番嚟已經唔見咗嗰兩母子，應該係輪到佢地驗傷。之後嘅就無從得知，亦冇興趣知。阿仔係人渣當然毫無疑問，不過我亦唔會覺得阿媽好可憐。做咗幾十年人，有一樣已經睇通晒，就係有果必有因！喺呢單裏面，我反而關心公共資源有冇浪費。咁嘅都要搞成幾粒鐘，仲要全程由五六個差人傍實，我就覺得係浪費警力嘞。喺得急症室嘅walk-in clinic等，都係非緊急或者次緊急嘅症，就算再等多一陣都唔會有大問題，我自己就完全唔介意俾佢地兩母子打尖嘞。唔係話要特別優待佢地，我只係覺得唔值得為咗啲咁嘅嘥晒警察嘅時間。

喺香港呢個人權大晒嘅社會，浪費公共資源嘅情況真係無處不在。就以急症室為例，而家只係收一百蚊，以前仲免費添，call白車又唔使錢，有乜可能唔俾人濫用呢？！記得嗰時政府提出急症室要收費，一班為民請命嘅尊貴議員同啲病人權益組織曾經大力反對。佢地話咁會令啲低下階層有病都唔敢去醫院，係草菅人命。呢班友提出嘅理據當然係荒謬絕倫，不過當時又真係有好多人buy喎。點解荒謬絕倫？就等我分析吓啦。

輪街症都要俾錢，反而call白車去急症室就免費，啲人梗係事無大小都直接去急症室啦，咁仲唔係鼓勵濫用？！當然啦，班友絕對唔會同意有濫用嘅情況，因為佢地覺得香港人個個都係好公民。好，又當冇人會濫用。不過班友講到話有人會因為嗰一百蚊而唔去求醫，咁急症室唔收錢，又係咪間接鼓勵啲人有病唔去輪街症，要等到小病變成大病先去急症室呢？！仲有，政府已經講到明有困難嘅人會獲得豁免，都唔知班友仲有乜好嘈！

最後，如果真係有人會為咗慳番一百蚊而攞自己條命做賭注，我只可以奉勸佢地一句：萬般帶不走！

圖片說明：
張相係啱啱拆完線嘅頭頂，因為過份血腥，驚住會引起觀眾不安，所以就用Photoshop搞咗兩。仲有，頭頂出現嘅疑似地中海，其實係縫針之前俾人剃嘅，絕對唔係男人最痛嗰隻！

三入急症室

做咗幾十年人，前日第三次入急症室。如果連唔喺香港嘅都計埋，咁就應該係第四次，因為上禮拜先光顧過格魯吉亞嘅急症室。旅行遇到有人受傷嘅交通意外，今次都係第一次。我地架旅遊巴同架車仔迎面碰撞，大部分團友都中招，而我就係表面上傷得最重嗰個，因為流得最多血。鬼咩，嗰時啱啱同周公討論緊香港政情，點知失驚無神玩撞車，喺毫無防備之下，個頭就同前面椅背硬撼！其實我地都冇乜，話晒都係大車，架車仔就大鑊喇，撞到連個車頭都唔見咗。聽講話車仔個司機受咗重傷，不過就冇生命危險，都算係不幸中之大幸啦。

可能因為有外國遊客喺車禍受傷，有關方面比較重視，雖然唔係傷得好重，我都有幸被抬上白車，送咗去當地鄉村醫院嘅急症室。因為喺意外現場已經洗咗傷口，去到急症室就二話不說，即刻聯針，效率都算唔錯。跟住當地旅行社又派車嚟接我返首都第比利斯，送咗去間大醫院照磁力共振，認真唔話得。由發生意外到搞掂晒返酒店，足足用咗八粒鍾，真係撞唔死都攰死！當時行程剩番兩日，仲要負傷玩埋佢，都咪話唔辛苦！

雖然話當地醫護人員好盡責，不過佢地處理傷口嘅方法比較特別，我自己就唔係太適應到嘞。好似聯針咁，佢地完全唔用任何方式嘅麻醉。雖然我都幾忍得痛吓，不過其實我好怕痛，如果可以避免，最好就唔使痛啦。冇麻醉聯針真係唔講得笑，我要咬住嘴唇，雙手搲實床單，先可以忍住唔嗌出聲。諗起都覺得好笑，直頭好似粵語殘片裏面，女主角俾人強暴時嘅反應！仲有一樣離奇，佢地居然將保護傷口嘅紗布縫埋喺頭皮上面，絕對打風都打唔甩，夠晒穩陣！

真係禍不單行，頭頂已經搞到多咗舊，點知右手無名指又出事。其實行程開始冇耐，隻手指左側近指甲嘅地方已經有紅腫，㩒落仲有少少痛。呢樣以前都試過，通常過幾日就會自己好番，所以冇理佢。不過去到撞車嗰日，情況突然惡化咗，手指頭腫到變豬頭唔在講，仲輕輕掂吓都痛到彈起。領教過當地醫護人員聯針嘅手段，頭頂嗰舊都唔知點收科，嗰日喺醫院梗係唔敢叫佢地處理埋啦。

其實當時有諗過，返到香港就即刻去急症室，一次過搞掂晒兩樣。我好肯定，只要飛返香港之前，喺機場打電話俾入境處，話喺外國遇到交通意外，返到赤鱲角已經有架白車等緊送我去急症室。不過自己行得走得，冇理由咁樣浪費香港嘅醫療資源啫。最後都係返咗屋企先，然後即刻去附近嘅私家診所睇醫生。醫生話個頭應該冇大問題，過多幾日可以拆線，隻手指就係細菌感染，開咗七日抗生素俾我。

點知食咗四日藥，隻手指唔止冇好轉，反而腫得犀利咗，仲勁爆膿添。都咪話唔得人驚，點知會唔會係感染到抗藥性超級惡菌架。再拖落去，隨時可能要切手指，甚至死得人都話唔定添！咪喇，都係即刻打的去急症室，我始終都係對香港嘅公共醫療有信心！

去到急症室，喺分流處被評為「次緊急」（比「非緊急」嚴重少少），即係唔死得人，個心都定番。不過咁又意味住另一樣大鑊，就係漫長嘅等待！結果等咗四粒鐘先見到醫生，然後照Ｘ光同處理傷口（拆線、放膿）又用多兩粒鐘，呢程序當然都係要等啦。好搞笑，醫生見到我頭頂嗰舊紗布都話嘆為觀止，班護士仲圍晒埋嚟觀摩添。

之前都講過啦，我份人最怕痛，等到處理傷口嘅時候真係有少少驚。其實拆線以前都試過，印象中好似唔多痛。點知今次拆線就痛到飛起，仲搞到出血添，姑娘話係有肉連埋條線扯咗出嚟，好恐怖呀！不過更得人驚嘅仲喺後面，就係放膿嘞。姑娘話要喺手指一刀，先可以唧膿出嚟，所以要打麻醉針。喺手指一刀當然攞命啦，但係打麻醉針仲大鑊，我肯定唔制。呢家以前試過，要喺兩邊手指罅各拮一針，仲要篤到入骨，真係痛到入心入肺！就算姑娘幾次叫我考慮清楚，我都係決定唔打麻醉針。姑娘跟住手起刀落，咁就開咗一條幾mm嘅刀口，竟然一感覺都冇喎。原來皮膚下面嘅組織已經化晒膿，所以唔覺得痛。姑娘首先將見得到嘅膿唧晒出嚟，其實都唔算好重手，但係已經好痛吓。然後先係終極考驗，原來連其他紅腫地方下面嘅血水都要唧埋出嚟，重要係好大力先至唧得出。先前提過，嗰紅腫嘅地方連輕輕掂吓都痛到彈起，而家係咁用力㩒，真係痛到想嗌救命！結果搞咗好耐，原本腫到肥嘟嘟嘅手指就變番正常嘥屎，而手指皮膚冇咗膿血撐住，就撻到好似完事之後嘅避孕套咁，好得人驚！以為終於搞掂，總算死過番生啦，點知姑娘仲要喺個刀口插條管，唧藥水入去消毒，真係攞命！

講真，到而家我都唔知放棄麻醉呢個決定係啱定錯。唯一滿意嘅係雖然痛到想死，我都冇嗌過一聲。不過琴日去洗傷口，終於都失咗身。本來洗傷口梗有少少痛，根本唔係乜一回事。但係姑娘話有膿未清晒，幫我㩒多幾。雖然好痛，我都頂得住。佢又喺個傷口插枝針入去，我繼續忍！點知佢失驚無神用枝針喺裏面liu咗兩，結果痛到我嗌咗出嚟，雖然只係好細聲，都已經係千年道行一朝喪！死啦，今日仲要再去洗傷口添，救命呀！

除咗痛到嗌救命，仲有另一樣煩惱，就係傷口唔濕得水。個頭已經個幾禮拜冇洗過，雖然有用濕毛巾抹，不過都係痕到飛起！至於沖涼仲麻煩，要隻手指唔濕水真係超高難度！試過用保鮮紙包住隻手指，再用膠紙黐實，但係點都有少少入水。琴日特登買咗護理用嘅手指套，諗住會好啦。點知個傷口包紮得太大舊，而手指套又太fit，戴極都戴唔落。而家都唔知點算，唔通真係要買避孕套嚟保護隻手指？