The Armadillo Den: 1月 2012

2012年1月31日星期二

群龍賀歲

首先喺度拜個遲年，祝大家龍年好景、豬籠入水、發過豬頭！仲有，日日龍精虎猛、龍行虎步、龍騰虎躍、龍吟虎嘯，威過石黑龍、勁過王小虎！

過年去咗非洲中南部旅行，諗住可以避吓寒。返到嚟先知道，原來早排真係寒流襲港，凍到甩肺。哈哈，都算逃過一劫，唔使喺屋企凍死！

不過喺非洲過年一啲氣氛都冇，對於中國人嚟講難免有少少唔過癮。所以我一早帶定件印咗飛龍圖案嘅T恤，預咗喺年初一著，算係聊勝於無啦。

本來諗住除咗我件飛龍T恤，都唔會見到其他應節嘅龍形物體。點知出乎意料，啲非洲龍族竟然好似有所感應，通通走晒出嚟贈興。

平時喺香港難得一見嘅石龍子（skink）、水巨蜥（water monitor）、同鱷魚，新年嗰幾日就見到好多。大家可能有疑問，點解水巨蜥同鱷魚都會同龍扯上關係。我當然唔係亂噏當秘笈啦，水巨蜥有個別號，叫做五爪金龍。至於鱷魚，龍嘅稱號更係源遠流長，古時已經叫做鼉龍或者豬婆龍。

除咗上述野生龍族，有兩種龍形物體亦不時出現，就係人龍同車龍。非洲人做嘢比較慢，喺啲出入境口岸，冇人龍先怪啦。至於車龍嘅出現，唔係因為當地交通繁忙，而係啲警察鍾意玩查車。三四粒鐘車程，竟然可以有七八個road block，想冇車龍都難啦。當然，啲落後國家係咁架喇。

非洲好多國家曾經淪為歐洲列強殖民地，黑人受到極之唔公平嘅對待。就以啱啱去過嘅津巴布韋為例，喺大城市裏面，以前有啲地區淨係白人先可以住，甚至有啲街道根本唔俾黑人行入去添。所謂勝者為王敗者為寇，唔夠人打自然要任人魚肉，本來都唔怪得邊個。不過有樣嘢好諷刺，嗰啲佔人土地、沒人為奴嘅白人，正正就係世界民主先驅。

後來列強喺非洲嘅殖民地紛紛獨立，黑人終於可以當家作主，有番作為人嘅尊嚴。不過民主似乎唔係乜嘢起死回生嘅靈丹妙藥，起碼喺非洲嚟講，就只係一服令人頭腦發熱嘅春藥。喺好多非洲國家，自從黑人政府上台，貪污濫權、效率低落、治安不靖等等問題反而嚴重惡化。對於一啲迷信民主可以解決一切問題嘅人嚟講，呢個都算係不解之謎喇。

今次去嗰幾個國家（津巴布韋、贊比亞、博茨瓦納）都好啲，警察只係設路障留難吓啲司機，乘機收買路錢。而喺城市，治安都算可以。南非先至大鑊，兩個字講晒：亂龍！哈哈，又係龍！

Chobe National Park, Botswana

Skink, Chobe National Park, Botswana

Water monitor, Chobe National Park, Botswana

Crocodile, Chobe National Park, Botswana

2012年1月19日星期四

食者有其鮑

兔年真惡頂，投資損手爛腳唔在講，仲要生活所需樣樣都狂加，真係搞到冇啖好食！冇啖好食係因為我學咗歐豬五國，實行節約開支政策，其他方面已經減無可減，唯有喺伙食費用開刀。事實上，11年嘅伙食開支就足足比10年減咗兩成。當然啦，仲有飯開已經唔敢埋怨架喇，不過粗茶淡飯食足成年，餐團年飯（我自己煮嗰餐）食得好少少都無可厚非啫。所以琴日就特登走去大昌，諗住年尾豪一次咁多，買罐車輪鮑整番個每年團年飯嘅必備菜式，冬菇海參炆鮑魚。

點知去到大昌，一睇個價錢牌就即刻嚇到傻咗，以前買開嘅1.5頭車輪鮑，一罐竟然要$928！呢幾年買親車輪鮑，我都會揀大昌，因為一定唔會有假嘢。對上一次買係09年尾，嗰時做緊超筍特價$399。呢個價真係好筍，08年佢地都賣緊$480，而07年喺華潤買過，反而仲貴啲，要$538。見佢咁抵，嗰次就掃清晒佢地鋪頭嘅存貨，買咗五罐。不過幾個月之前已經食晒，所以今年團年要買過。

點知車輪鮑兩年之間竟然貴咗一倍有多，都咪話唔得人驚！莫講話九百幾蚊遠超我嘅負擔能力，加幅亦令人難以接受。所以最後都係買唔落手，轉咗買隻做緊超筍特價嘅蚊型南非湯鮑（飲食行內叫罐頭鮑魚做湯鮑），12頭嘅星嘜鮑，$328一罐。

以湯鮑嚟講，墨西哥嘅車輪鮑當然正，不過南非出品都唔錯，一定唔會差過澳洲貨。反而以乾鮑聞名於世嘅日本，湯鮑就未必都係咁正，不過就賣得好貴。幾年前貪新鮮，喺安記買咗罐日本吉品湯鮑試吓，嗰時都要賣$650。但係食落就一般，肯定及唔上車輪鮑，細隻好多都算嘞，最主要係鮑魚味唔夠濃。

講番隻星嘜鮑，雖然我以前未食過，不過見佢做緊超筍特價，都買咗兩罐試吓。返到屋企將其中一罐連罐煲三粒鐘，一打開就聞到好香嘅鮑魚味，果然冇買錯。咪講笑，即刻連飯都唔煮住，趁大昌仲未收鋪，走去掃埋佢地嗰幾罐存貨。

我超鍾意食鮑魚，一罐湯鮑真係唔多夠喉，所以通常會買多幾隻新鮮南非孔雀鮑一齊炆，效果都相當唔錯。炆鮑魚其實唔算難，只係工序比較多啲。我會先用蒜茸乾蔥薑片爆一爆啲鮑魚，跟住濽酒，再用上湯蠔油老抽冰糖慢火炆兩粒鐘。最後放埋冬菇同海參，再炆多半粒鐘就可以用生粉埋芡，倒落預先準備好用嚟墊底嘅蒜茸炒豆苗就得嘞。

當然啦，我呢啲只係家庭式製作，連街坊酒樓嘅出品都尚且不如。如果我敢話好味，恐怕會俾人恥笑囉。至於鮑魚可以好味成點，我就真係想像唔到嘞。鮑魚要整得好食，唔只要有上乘嘅材料，仲要有出色嘅廚藝。眾所周知，鮑魚之中當然以乾鮑最好。而芸芸鮑魚名廚之中，又以阿一地位最尊崇。聽一個從事金融行業嘅中學同學講，有客曾經請佢去富臨食阿一鮑魚，真係正到無倫，可以稱得上天下之美味。但係價錢亦貴到無倫，要過萬蚊一隻！我都知溏心鮑魚正，有人請就話冇所謂啫，如果要我用個幾月人工食一餐，真係殺咗我好過啦！

唉，有時諗落都覺得好灰，想食到自己鍾意食嘅嘢，其實只係好卑微嘅願望啫，點解會咁難實現嘅呢？溏心乾鮑已經係諗都唔敢諗嘞，而家連湯鮑都貴到食唔起，想唔灰都唔得啦。講真又好唔公平囉，有人買唔起樓，政府就用公帑資助佢地置業。而我呢啲食唔起鮑魚嘅香港公民，點解政府又唔幫吓呢？所以我強烈要求政府推出食者有其鮑計劃，資助我地呢啲窮人食鮑魚，仲要係溏心乾鮑添！可能有人會覺得我無理取鬧，冇鮑魚食都唔使死啫。咁我又反問一句，大家又有冇見過任何人因為買唔起樓而燒炭呢？又可能有人會質疑我太貪心，點解湯鮑都唔肯收貨，一定要政府資助食乾鮑。大家可能仲記得紅灣半島，呢個海景居屋王嘅出現，就係因為社會上有咁嘅觀點：點解窮人唔可以擁有無敵海景居所！而舊年喺一片要求復建居屋聲中，又有某大狀政黨建議政府用幾塊臨海地王起資助房屋。咁我要求政府資助食乾鮑，究竟算唔算太大貪，大家自己判斷啦！

冬菇海參炆鮑魚（星嘜鮑＆孔雀鮑）

星嘜鮑

冬菇海參炆鮑魚（車輪鮑＆孔雀鮑）

車輪鮑

孔雀鮑

吉品湯鮑

2012年1月16日星期一

我冷血之唔該死遠啲

注意：如果有人睇完想鬧我冷血嘅就可以慳番嘞，因為我一早已經自插咗！

琴日睇日月報，鋪天蓋地都係台灣大選嘅消息。呢個肯定係近期最熱門嘅話題，不過我自己又唔係有乜嘢真知灼見，都係費事獻醜嘞。而喺一個唔顯眼嘅位置，就見到一單相信唔會有太多人留意嘅新聞。攞呢單嘢嚟講，都應該會係獨家評論喇啩。

話說有個男人爭落人十幾萬賭債，就走咗去一個朋友屋企暫住，避吓風頭。點知佢趁友人入醫院大修，竟然喺人地屋企燒炭自殺。直到友人同佢失去聯絡，覺得有啲唔妥，先至揭發呢單嘢。

一個人搞到要自殺，背後梗有佢嘅原因，而作為路人甲，我本來亦唔應該評論啲乜嘢。所以我想講嘅唔係佢因乜要燒炭，而係點解佢要喺朋友屋企自殺。佢喺走投無路嘅時候得到人地收容，呢位朋友都算唔話得啦。而家搞到人地屋企變成兇宅，假如佢泉下有知，又於心何忍呢？如果呢位朋友係住喺公屋都好啲，話唔定可以申請調遷。最弊人地住嘅係私人屋苑，俾佢咁樣一搞，樓價肯定即刻大跌兩三成，隨時唔見咗幾十萬。如果層樓係租嘅，咁個業主就更無辜嘞，真係喊都無謂，唯有眼淚在心裏流啦。

類似事件其實發生過唔少，有人走去朋友屋企跳樓，又有人不惜長途跋涉，特登去到冇雷公咁遠嘅屋邨尋死。唔知幾時開始，啲人又鍾意租某知名小築燒炭，害到經營者雞毛鴨血。

咪以為喺自己屋企尋死就影響唔到其他人，其實咁都隨時會連累無辜。跳樓責死人，都唔係未試過啦。開煤氣更危險，因為有機會引起大爆炸。而燒炭就仲大鑊，隨時會搞到火燭，危害難以估計。就算唔係真係想死，都一樣會害人。早排就有條友玩企跳，結果間接導致一個差人跌死。

人死咗自然係一了百了，但係如果因為自己嘅解脫而連累無辜，咁就係造孽啦！我唔係話要譴責任何人，事實上，譴責死咗嘅人亦唔會有任何意義。

其實有乜咁大不了，點解啲人一定要了結自己嘅生命呢？嗰啲為咗啖氣、或者因為感情問題自殺嘅先最無謂，佢地需要嘅唔係死，而係時間！就算真係非死不可，亦唔好俾自己嘅痛苦變成其他人嘅不幸，要死唔該死遠啲！

Old cemetery, Gevas, Turkey

2012年1月14日星期六

方便冇煩惱？

忽然急尿，點算好呢？問嚟都多餘嘅，當然係即刻去廁所啦！但係如果附近冇廁所，咁又點算好呢？

對於女士嚟講，以上問題我就唔識幫佢地解決嘞。至於麻甩佬就容易好多，基本上唔算太難搞。如果喺荒山野嶺就最簡單，因為度度都係廁所。就算身處通衢大道亦冇乜難度，求其揾個有牆嘅地方面壁就掂。哈哈，做男人真好，方便冇煩惱！

不過咁，以上結論亦有一個例外情況。如果你有咁嘅榮幸（或不幸），貴為保家衛國嘅戰士，就千祈咪亂咁方便嘞，否則唔止煩惱，仲隨時會惹禍上身添！

話說有幾個花旗大兵，執勤時忽然急尿，喺急不擇地嘅情況下方便，竟然痾咗落幾個塔脷斑嘅屍體度。唔知點解，麻甩佬痾尿都有人影，條片仲俾人放埋上youtube添。結果唔止喺花旗國外引起廣泛譴責，連國務輕欺拉你都鬧埋一份，仲話一定要追究有關大兵嘅責任。

呢單嘢我喺報紙睇到，報導中仲有一張條片嘅screen capture，不過喺幾位大兵嘅重要部位就打咗格仔。本來我對單嘢唔係咁有興趣，不過因為冇見過大蛇痾尿，喺好奇心驅使下，就上網摷吓，睇吓揾唔揾到啲uncensored嘅版本。總算皇天不負有心人，喺網上幾經轉折，卒之俾我揾到。不過睇完先呻笨，我連老花鏡都出埋，竟然完全見唔到我想睇嘅嘢。又話啲鬼佬好勁，原來係呃人架！

雖然條片冇料到，不過啲留言就反而有啲啟發性。我地成日叫人痾督尿照吓，原來真係有道理架，千祈咪睇小中國嘅民間智慧呀！幾個大兵嘅尿，就好似一塊魔鏡咁，反映出留言者嘅心態。條片有萬幾條留言，我當然冇可能睇得晒。事實上，我只係睇咗一頁，所以我嘅分析絕對講唔上全面。而家又唔係做學術研究，冇需要咁認真啫，唔啱睇就當我廢噏啦。

喺我睇咗嘅留言當中，差唔多全部都係支持嗰幾位花旗大兵。其中有啲留言好激，有人話日日痾屎落可X經，又有人話用可X經嚟抿屎。只有以下呢條比較理性，而且有啲內容：

After all of the things that we actually helped with in this country (Schools, Jobs, Funding etc.) a 1 minute video by some 19 year-olds completely destroyed it... Not all Marines are like this, but the few that are ruined the image of the United States. Theres no arguing with this comment, it’s the fucking truth

原來花旗佬打殘阿褲汗係為咗幫佢地，呢個觀點同我一向嘅理解簡直南轅北轍。我初初睇到，仲以為係自己啲英文屎，曲解咗條留言添。不過諗深一層，又係喎，唔炸到班友冚包散，又點幫到人地重建呢？！我咁講係有根據架，喺倚天屠龍記裏面，張無忌醫番殘廢多年嘅余岱岩之前，就要先捏碎晒佢啲骨，然後再搽療傷聖藥黑玉斷續膏。至於軍事行動導致大量平民傷亡，當然亦無損花旗國嘅正義形象。郁民都講過啦，喺所有為公義而戰嘅群眾運動裏面，社會都要付出代價囉。而且炸死啲不知民主為何物嘅化外賤民，令到阿褲汗可以進化成一個民主公義人權法治乜都齊嘅文明國度，根本就係花旗國賣大包，免費幫佢地大換血。但係世人竟然忘記咗花旗國嘅狼虎用心（弊嘞，又打錯添，係良苦用心至真），因為啲雞毛蒜皮嘅小事就喺度嘈生晒，又難怪有啲網民睇唔過眼嘅。

睇完有關留言，連我自己都獲益良多，對單嘢有咗全新嘅理解。喺嗰幾位花旗大兵長大嘅國度，空氣同水源都洋溢住人權公義，佢地嘅尿自然亦充滿民主養份。能夠受到佢地嘅楊枝甘露滋潤，對於嗰幾個死鬼塔脷斑嚟講，根本就係幾生修來嘅造化，旁人真係恨都恨唔到呀！

常言道施比受更有福，但係嗰幾位花旗大兵嘅無私奉獻，反而換嚟世人唾罵，直頭係冇天理啦！唉，做隻畜牲仲好啲，鐘意幾時痾都得，喺邊度痾又唔會有人干涉。或者嗰幾位花旗大兵應該為自己打算吓，唔好淨係顧住幫人，不妨考慮吓即刻投胎做畜牲，起碼唔使受到咁唔公平嘅對待先啦！

相片說明：
第一張相係堅嘅，我真係喺度方便緊。而喺其他相片裏面，主角都係方便緊，不過就絕非本人。

Amsterdam, Netherlands

South Island, New Zealand

Delhi, India

Taktsang Palphug Monastery, Bhutan

2012年1月13日星期五

聽雨

少年聽雨歌樓上，紅燭昏羅帳。壯年聽雨客舟中，江闊雲低斷雁叫西風。
而今聽雨僧廬下，鬢已星星也。悲歡離合總無情，一任階前點滴到天明。

早幾日校長留言時引咗蔣捷嘅虞美人（聽雨）其中兩句，令我忽然諗起一位故人。

已經係九十幾年前嘅事，嗰時我仲好後生，得廿幾歲。有日同一個同事傾開偈，佢問我知唔知道蔣捷嘅聽雨，仲話呢首係佢最鍾意嘅詞。咁我當然係唔知啦，中學中文科冇教過嘅詩詞，有乜可能會知呢？再講，蔣捷又唔算好出名。換轉係李煜嘅詞，就算冇教過，我都識得兩三首囉。所以當時覺得好奇怪，唔明點解佢會識，佢細我兩三年，照理都唔會讀過呢首詞啫。

至於首詞本身，嗰時亦唔係太識欣賞，淨係覺得佢幾押韻。同係虞美人，當時梗係喜歡李煜嗰首啦。話時話，傷春悲秋嘅嘢，我到而家都鍾意架。

不過今日再睇番，先覺得蔣捷首虞美人都係咁正。喺文字方面，作者嘅功力絕對無容置疑。押韻唔在講，將上、中、下三字扣入少年、壯年、同老年，直頭巧妙到巔毫！而且寥寥數十字，就講出由少年到老年嘅心境變化，真係高呀！

最正係可以令人產生共鳴，當然啦，要好似我呢啲風燭殘年嘅老人家先體會到囉。少年留連酒廊聽歌、壯年返工途中喺天星小輪聽walkman、而家乜都睇化晒，匿喺板間房等Dr. Dylan播歌，我嘅歷程簡直同首詞講嘅如出一轍呀！

呢首詞同苦瓜（唔係陳奕迅首歌）有啲相似，都係上咗年紀先識欣賞。而家諗番又奇怪嘞，上面提及嗰位同事，當年都只係二十出頭，真係唔明佢點解會鍾意呢首詞。佢97前移咗民去加拿大，之後就冇再聯絡，近況係點我完全唔清楚。幾年前聽另一位舊同事講，話佢已經肥到隻豬咁，應該係生活得相當幸福。忽然又有個疑問，唔知佢而家仲係咪咁鍾意呢首詞呢？

Uluru, Australia

Ngorongoro, Tanzania

2012年1月11日星期三

一鞋不如一鞋

早兩日攞隻鞋去俾人車番，因為聖誕節旅行嗰陣發現隻左腳有啲爆線。間補鞋鋪大約一個月前幫襯過，係補番同一對鞋，都係爆線，不過係右腳。嗰次佢地做得唔錯，而且屋企附近我淨係知道呢間補鞋鋪，當然唔會揾過第二間啦。

入到去，得一個仔喺度。見佢擰轉咗面搞緊啲類似膠水嘅嘢，我就講咗聲「唔該」。其實人地忙緊，我都唔介意等一陣，點知佢頭都冇擰過嚟，就用好唔耐煩嘅語氣講：「有嘢就講啦！」一啲禮貌都冇，真係俾佢吹脹！算啦，我只係想補番隻鞋，禮貌嘅嘢，bonus嚟嘅啫。咁我就道明來意，話有隻鞋爆咗線想車番。仔聽完冇俾反應，直到搞掂手頭嘅嘢先擰番轉頭，攞起隻鞋睇咗一眼，跟住話：「四十蚊，六點嚟攞！」一個月前攞過另一隻鞋嚟車，當時只係收三十蚊，冇理由今次貴咁多啫，我有啲懷疑可能係個仔新嚟唔知價，就問佢係咪最近加咗價。佢又用嗰種好唔耐煩嘅語氣答番我：「係加咗價，咁你而家做唔做丫！」啲態度惡劣到呢，好似全區得佢一間補鞋鋪咁！事實上，我又真係唔知附近仲有冇其他補鞋鋪囉，咁唯有嗗聲吞咗佢，磅完水攞咗個號碼牌仔走人。其實我一直好懷疑究竟係咪加咗價，呢啲唔使開單嘅嘢，個仔落咗格都冇人知啦！

過咗幾粒鐘去攞鞋，除咗個仔，之前見過嘅另一位師傅都喺度。咁都好，如果隻鞋車得唔滿意，起碼都有得投訴先啦。果然俾我不幸言中，個仔完全係亂咁嚟。啲線步疏到離晒罩，原本車咗接近二十針嘅範圍，佢竟然五針就搞掂。而且爆開嘅兩邊又冇對番齊先車，結果車完都明顯睇得出係爆咗線。肉酸唔在講，好肯定一著上腳就會即刻爆過。咁我當然係唔收貨啦，咪同個師傅發爛渣囉。都算師傅有番啲商業道德，應承幫我做過。

再去攞鞋嘅時候，淨係得番師傅喺度，仔已經唔見咗，唔知係咪俾人炒咗呢？睇番隻鞋，手工回復再之前嗰次嘅水準，即刻收貨走人。

雖然單嘢最後完滿結束，不過無啦啦要行多次，又要受條仔氣，始終都係有啲唔順囉。仔手工差，絕對可以理解，如果唔係使鬼學師咩。但係自己搞唔掂嘅，就揾師傅出馬啦，冇理由搞到pat屎咁，都覺得個客會收貨啫。更難頂嘅係佢啲惡劣態度，簡直當正個客應份帶錢上門乞求佢補鞋咁。呢一代啲仔做嘢冇厘交帶，我當然唔會唔知，不過自從實施咗最低工資，情況又好似再差咗。鬼咩，而家度度都有最低工資，唔補鞋咪做茶仔、七仔、老麥囉，真係處處前景一片秀麗，博炒完全冇問題！諗番我地做仔嘅時候，唔好講話做得差，手腳慢啲都俾人鏟到反艇啦。唉，真係一鞋不如一鞋！

講到一鞋不如一鞋，又真係把幾火。對鞋著咗兩年就已經爆線，仲爆完右腳到左腳。記得09年7月喺智利海邊黃昏漫步，著緊嘅沙灘涼鞋忽然甩底。結果頂到返酒店，換番對Timberland就出去食晚飯。點知食完飯返到酒店，先發覺對鞋又甩埋底。兩對鞋相繼甩底，都算係史上最黑嘅一日嘞！因為行程緊密，第二朝一早就要飛去秘魯，唯有見步行步，步步為營，著住對甩底Timberland先啦。

第二日去到秘魯嘅Cusco，實在太多嘢睇嘞，根本就冇時間買鞋。最後要喺晚飯前先抽到十五分鐘，喺餐廳附近嘅一間運動用品店買咗對鞋。嗰度嘅運動鞋，選擇都唔算少，不過款式就麻麻地，而且價錢相當貴。卒之揀咗一對叫做VASQUE嘅牌子，款式好平實吓，價錢算係比較平，不過折番港紙都要千幾蚊，肯定貴過我對甩底Timberland。VASQUE呢個牌子我未聽過，既然喺嗰度賣到最平咁滯，當然唔會係名牌啦。秘魯嘅人均收入每月只有二千幾蚊，一對普通運動鞋就要成半個月人工，都咪話唔得人驚囉！

講番對Timberland，甩底絕對係非戰之罪，因為已經著咗超過十年。又因為夠舒服，平時又著，去旅行又著，結果咪搞到積勞成疾囉。記得嗰晚將對鞋放入酒店房嘅垃圾桶，真係好唔捨得，始終佢都陪我走過唔少難忘嘅艱苦旅程，包括00年去尼泊爾行山同03年喺東馬上神山。係呀，我個人比較念舊，就算係冇晒利用價值嘅嘢，好多時都唔忍心掉架！

當多數人都貪新忘舊，我反而覺得新不如舊。對VASQUE除咗冇咁舒服，款式亦太平實，所以平時唔會著，只係旅行先著，貪佢感覺上夠硬淨。點知著咗啱啱兩年，舊年7月去土耳其旅行，右腳已經爆咗線。跟著聖誕節喺印度，左腳又爆埋。不過咁，雖然對鞋唔係咁正，我都唔會輕易放棄佢。就係呢對鞋，喺10年陪我登上人生最高點，踏足4900米嘅南美高地，冇功都有勞啦！

2012年1月9日星期一

熱氣球之旅

琴日喺報紙睇到一單好得人驚嘅新聞，十一個人喺紐西蘭南島遇到熱汽球意外，全部死晒。話說熱氣球降落時撞到架空電纜，然後著火焚燒，結果駕駛員同所有乘客（五對夫婦）無一倖免。話得人驚係因為熱氣球我都玩過兩次，不過就完全唔知道原來係要揾命博。

第一次玩熱氣球係喺土耳其奇石區（Cappadocia），而第二次就係喺肯雅瑪莎瑪拉草原（Maasai Mara）。玩熱氣球一來係貪新鮮，而且用鳥瞰角度睇奇岩怪石同野生動物，亦會有好特別嘅觀感。

事實上，坐熱氣球（其實係企）真係好過癮，同搭飛機完全唔同，係真正漂浮喺半空嘅感覺。雖然好玩，但係都幾辛苦吓架，因為要神咁早摸黑出發。熱氣球一定要喺日出前升空，如果太陽曬熱咗地面，氣流就會變得唔穩定，影響飛行安全。去到起飛地點，聽完一輪講解，又要等個熱氣球吹脹，真係少啲耐性都唔掂。雖然冇覺好瞓，不過喺半空睇日出又真係好正囉。

起飛過程一啲都唔簡單，淨係吹脹個氣球已經好考功夫，一唔小心就會連氣球都燒埋。飛行過程大約四十分鐘，跟住駕駛員就會揾地方降落。而家諗起先識驚，土耳其嗰次，降落地點又係有好多架空電纜，真係隨時死咗都唔知乜事。再諗番，其實肯雅嗰次都唔好得幾多。如果降落地點附近有獅子老虎，咁咪要變成猛獸嘅早餐？！又如果氣球跌咗落河，就實聽餵鱷魚都得嘞！

好彩，兩次降落都無驚無險。降落之後，等埋架早餐車嚟到，就可以享用高貴嘅香檳早餐嘞。不過啲食物就真係好失望囉，只係三文治之類嘅粗嘢，配香檳又點喎，就算有82年嘅罅Fit都冇用啦。哼，等我仲以為會有黑海魚子醬添！

咪話我大貪，事實上，玩熱氣球真係好貴囉。土耳其嗰次要千幾蚊，肯雅嗰次仲貴，要三千幾蚊，直頭係一個短線團嘅價錢！本來舊年喺坦桑尼亞都想玩多次，不過價錢實在太貴，要成四千幾，最後都係唔捨得。之前嗰兩次仲係用緊菲林機，大部分相都影到鬆郁朦，所以咪成日心思思想嚟多次囉。而家爆單咁得人驚嘅意外出嚟，睇怕以後都可死咗條心喇！

Balloon inflation, Cappadocia, Turkey

Balloon ride, Cappadocia, Turkey

The pilot, Cappadocia, Turkey

We got our certificates, Cappadocia, Turkey

Balloon ride, Maasai Mara, Kenya

Zebras, Maasai Mara, Kenya

Deflated balloon, Maasai Mara, Kenya

Champagne breakfast, Maasai Mara, Kenya

2012年1月7日星期六

母狗與公羊

去一次旅行真係好煩，舟車勞頓唔在講，事前事後都仲有好多嘢要執。出發前要執行李，返到屋企要執相，十幾日嘅旅行，前前後後起碼要忙足一個月。

啱啱去完印度同不丹，開始搞緊啲相，當中有幾張影咗啲狗同羊，又令我諗起一副幾有趣嘅對聯。

曲禮一篇無母狗
春秋三傳有公羊

副對聯對得好工整，而且背後仲有個故事添。我個人比較懶，費事自己打，就喺網上摷咗以下資料：

据《巧对录》载，清初苏州有一个叫韩慕庐的秀才，在某家私塾当先生时，这家主人虽然识字不多但却喜卖弄，故经常替韩慕庐上课，以炫耀自己的学问。有一天，这家的主人替韩慕庐教学生读《礼记》中的《曲礼》一篇时，竟将“临财毋苟得”一句，读成了“临财母狗得”。此时正巧一位饱学之士由学堂窗前经过，错以为是韩慕庐读的，感到好笑后，就在窗外高声诵出“曲礼一篇无母狗”的上联借以嘲笑。坐在堂下的韩慕庐一听，知道是冲他来的，于是立即应声对出“春秋三传有公羊”的下联。那人听后，方知韩慕庐先生不是凡俗之辈，于是登门求见。二人见面一谈，才知念“母狗”者不是韩慕庐。“曲礼一篇无母狗；春秋三传有公羊”之联，堪称妙对。对句由纠正“毋苟”为“母狗”的错误出联，韩慕庐以《春秋》三传（指解释《春秋》的《左传》、《公羊传》、《毂梁传》）中的《公羊传》为对，对语熨帖，极富风趣。那位学士将错就错地利用飞白的修辞方法将“母狗”直接替代了“毋苟”，下联则以“公羊”对“母狗”更是妙语惊人。

其實副對聯有若干唔同版本，不過都係以「公羊」對「母狗」。而相關故事亦有唔同講法，有說對對雙方係考官同考生，又有版本話主角係王安石（或鄭板橋）同私塾老師。究竟邊個版本先至正確，咁就真係無從蹊考嘞。不過我反而會諗，世上邊會有啲咁巧合嘅嘢，而又會有啲才思咁敏捷嘅人可以即刻對得出下聯呢？所以我懷疑成單嘢都係老作嘅，其實係有人先擬咗副對聯，然後至砌番個故仔出嚟。

事實上，中國人真係好鍾意造假，淨係睇吓啲娛樂新聞同名人軼事就可見一斑。穿鑿附會嘅情況多不勝數，甚至憑空捏造都敢死，最後又俾人以訛傳訛，搞到莫衷一是。

可能咁講唔係太公平，啲西人亦唔見得好誠實。就睇吓啲西方傳媒，連得過普立茲獎嘅都爆出造假醜聞。或者應該咁講，造假根本就係人類嘅天性，完全無分種族國界！

Lobeysa, Bhutan

Padmaja Naidu Himalayan Zoological Park, Darjeeling, India

2012年1月5日星期四

聖誕玩邊科

聖誕玩邊科？當然唔係去啲失身派對啦，呢家嘢都係比較啱細路多啲。再講，我呢啲老餅都已經失無可失啦！

其實都好無聊吓，連續兩年聖誕都玩自拍，仲要係喺啲九唔搭八嘅地方添。前年喺坦桑尼亞，舊年喺印度，除咗酒店有棵聖誕樹，基本上全無聖誕氣氛可言。話時話，用掛喺聖誕樹嘅波波玩自拍又真係有些少創意架！

喺印度都好啲，聖誕嗰日由大吉嶺去錫金，沿途可以見到雪山，算係過咗個白色聖誕，雖然比較遙遠咗啲。坦桑尼亞嗰次就真係完全冇聖誕feel嘞，喺塞倫蓋蒂草原，除咗禽獸就乜都冇。

講到同聖誕最有關係嘅地方，我諗都應該係馬槽教堂嘞。不過去嘅時候係夏天，熱到人都融，完全聯想唔到聖誕節。

都唔知點解，自從升呢做咗老餅之後，聖誕節無論係喺香港過，抑或係去咗旅行，都硬係覺得冇乜氣氛。莫講話屋企唔會有任何聖誕佈置，甚至連燈飾都費事去睇添。唔知其他老人家係咪都係咁嘅呢？