毛詩

毛詩，當然唔係指詩經啦，識鬼咩！我想講嘅係以下呢首詩：

暮色蒼茫看勁松
亂雲飛渡仍從容
天生一個仙人洞
無限風光在險峰

首詩係毛伯伯吟詠廬山嘅名作， 可謂無人不識。如果問我覺得呢首詩寫得好唔好，我嘅答案只有一個字：正！如果問我點好法，我又真係唔識講喎，唯有以O嘴回應啦。

毛伯伯讀扑扑齋出身，對中國古典文學有高深造詣。記得聽個大學同學仔講過，毛伯伯曾經入圍過諾貝爾文學獎遴選，去到最後階段先出局。雖然唔知真定假，不過佢嘅文學修養就絕對無容置疑囉。所以佢話「秦皇漢武，略輸文采；唐宗宋祖，稍遜風騷」同「數風流人物，還看今朝」，雖然係囂咗啲，有失文人謙遜之道，不過又真係吹佢唔脹喎。講開又講，其實我鍾意「沁園春」仲多啲添。

講番首廬山詩，我最喜歡係開頭兩句。不過我所以會知道呢首詩，完全係因為最後嗰兩句。幾十年前已經聽人講過，話呢兩句至係主旨所在，其實吟詠廬山只係幌子，「淫詠」江娘娘先係真正目的。至於點「淫」法，大家都係成年人，應該唔使我講到明啦。

嗰時都只係得個講字，直到近年先有人提出證據，話其實嗰兩句係脫胎自清代色情小說「花蔭露」第三回嘅開篇詩頭兩句：天生一個神仙洞，無限風光在玉峰。 講到似層層咁，又真係不由你不信囉。不過後來又有人反駁，話「花蔭露」喺2000年先至首次出現，根本係托古人之名嘅偽作，目的係要誣衊偉大舵手。究竟誰是誰非，我就完全冇嗌啲牙嘞。

話時話，嗰兩句詩又真係好易令人想入非非，切合晒現代人嘅淫謔風格。至於毛伯伯嗰陣，甚至更早嘅清代，係咪已經興啲咁嘅嘢，我對中國古典色情文學全無涉獵，當然唔敢妄下斷語啦。不過話呢兩句係用嚟「淫詠」江娘娘，我就覺得有個疑點嘞。對於「神仙洞」，我自然唔會有任何意見，但係「險峰」云云，就簡直係無中生有囉！至於首詩係旨在「吟詠」定「淫詠」，大家自己判斷啦！

睇咗咁耐，各位又有冇發覺呢篇嘢言之無物、講完等如冇講呢？哈哈，冇錯，其實以上一大堆文字可以不理，因為呢篇係我「詩情畫意」系列嘅頭砲，啲相先至係重點囉！

Dochula Pass, Bhutan

Matopo Hills National Park, Zimbabwe

Halong Bay, Vietnam

Dhaulagiri (from Poon Hill), Nepal

逃學威蟲

我知有啲人睇報紙淨係留意頭版嘅大單嘢，對啲細細段嘅花邊新聞不屑一顧。我就啱啱相反，覺得啲中港大事真係睇到人好悶，而啲花邊新聞有時都幾得意，往往仲小中見大、發人深思添。早兩日喺明報就睇到單咁嘅嘢：

奧巴馬代撰請假信

男童曠課聽演講

【明報專訊】美國一名小學五年級男生，為聽總統奧巴馬演講而曠課。但他不用擔心如何向老師解釋，因為奧巴馬已為他親自撰寫請假信，「特赦」他逃學一天。

老師原諒男童

11歲的沙利文（Tyler Sullivan）上周五特地曠課，跟隨身為退伍軍人的父親到明尼蘇達州一工廠，聽奧巴馬演說。他說：「我當時就坐在首排貴賓席，我很興奮。我走上前跟奧巴馬握手並說聲『你好！』，他笑對我說：『你肯定是曠課吧！』」奧巴馬其後叫人拿來印有白宮標誌的紙和筆，為沙利文寫請假信——「阿克森（Ackerson）老師，請原諒沙利文，他和我一起」，並附上親筆簽名。

沙利文把奧巴馬的親筆請假信用相架鑲起，準備今天帶回校炫耀一下，並給阿克森老師看，「讓他明白我上周五缺課的原因」。

每日郵報

報導冇提到美國人對單嘢嘅反應係點，不過以我推測，應該係讚多彈少囉。我又無聊到上網摷吓，果然不出所料，大部分評語都係正面嘅，主要係話單嘢好溫情同奧巴馬夠親民。咁都有少數踩嘅，不過就冇乜點子可言，相信係共和黨粉屎所為。唔知有幾多香港人留意過呢單新聞，如果有嘅話，佢地又會點睇呢？我估反應都係同啲美國人一樣，以叫好居多。無疑，以公關角度嚟睇，奧巴馬的確係做得好漂亮。不過又有冇人發覺，其實故事背後仲有好多值得思考嘅地方呢？

每個人都有自己嘅本份，按各人唔同位置，都有應該做同唔應該做嘅嘢。咁11歲嘅細路應該做乜呢？我可以好肯定咁講，係返學，而絕對唔係逃學去聽總統演講！一來，返學係個細路要遵守嘅紀律。而且，以佢嘅年紀，總統嘅演講亦冇可能聽得明。咁點解做老豆嘅，要帶個思維根本未成熟到可以理解政治嘅細路去聽奧巴馬演講呢？之唔係因為香港人成日掛喺嘴邊嘅「薪火相傳」囉，自己係民主黨粉屎，就想個仔都係一樣。就好似香港各大小示威遊行，都有家長鍾意帶埋啲仔女參加，話係「公民教育」喎。但係佢地有冇諗過，究竟班細路從中可以學到啲乜呢？班豆釘淨係見到啲大人喺度抬棺材、撒溪錢、掟飯盒、爬鐵馬，當然覺得好過癮啦。至於佢地明唔明白班大人做呢啲嘢背後嘅理念，咁就真係天曉得嘞。班大人根本就冇俾過機會啲細路自由選擇，究竟咁又算唔算違反人權呢？

至於奧巴馬，雖然人人讚好，不過我對佢嘅做法就真係不敢苟同嘞。試想吓，如果華仔發現有小粉屎因出席佢嘅簽名會而逃學，佢會點做呢？我相信一定唔會係幫個細路寫信求情囉。如果係華仔都仲好啲，因為就算佢親筆寫求情信，阿sir都唔會感到有任何壓力。而總統嘅求情信就唔同嘞，會俾人覺得
以大壓小，有干預阿sir處理事件之嫌。可能有人會話，喺美國呢啲有真民主嘅地方，阿sir完全可以唔賣總統帳。不過實際上又會係點呢？唔理奧巴馬有冇干預嘅意圖，都一樣會造成干預嘅後果。如果阿sir係民主黨粉屎，當然會賣總統帳。就算係共和黨粉屎，亦唔敢唔賣，否則隨時會俾人亂扣帽子，話阿sir因為政見問題攞個學生嚟開刀。指鹿為馬、借題發揮嘅人，真係無處不在囉。

單嘢表面上睇嚟係一個平凡小學生嘅灰姑娘式奇遇，既得意又溫馨。主角得到總統嘅親筆簽名信，開心到將封信用相架鑲起，要攞返學校威俾啲同學仔睇。本來可以令人開心嘅都係好事，不過又有冇人諗過，單嘢對當事人，甚或其他細路，會有啲乜嘢影響同啟示呢？影響好肯定，個細路會成為民主黨嘅鐵粉。至於啟示，就係佢會明白到，只要有猛人撐腰，就算做錯嘢都唔使受罰。好明顯，咁係違反咗文明社會嘅核心價值。不過呢樣的確係現實世界運作嘅潛規則，俾班細路早啲認識，又真係有百利而無一害喎。

究竟奧巴馬係咪做咗一個錯誤示範，就留番俾大家自己判斷嘞！

Millipede, Great Zimbabwe, Zimbabwe

蛇齋餅粽？

真係撞鬼，前日買完餸返屋企，竟然同我最討厭嘅狀棍黨狹路相逢。離遠已經聽到鬼殺咁嘈嘅錄音廣播，話狀棍黨乜乜物物。行近啲睇吓，原來係毛掹淨個婆娘帶埋一班嘍囉喺度派傳單，宣傳緊狀棍黨下星期喺區內搞嘅一個活動。佢話下禮拜一會有人幫街坊免費剪髮，叫人唔知幾點鐘喺某某街嘅大笨象銀行門口集合。

聽落又幾吸引喎，最衰我上個禮拜啱啱飛完髮啦。不過諗吓，所謂一啖砂糖一啖屎，內裏肯定隱藏住一啲惡啃嘢嘅。首先，都唔知班友揾啲乜人嚟剪，如果剪個頭鬼五馬六咪弊。而且，飛個髮起碼要半粒鐘，隨時一路剪一路要接受思想教育，真係煩都煩死啦。無謂為咗慳嗰一百幾十而搞到自己啫，呢啲咁嘅小恩小惠，我絕對唔會希罕囉！

講開小恩小惠，我忽然又記起一單嘢嘞。舊年狀棍黨區選失利，黨灰梁渣傑就曾經狠批建制派用「蛇齋餅粽」呢啲小恩小惠籠絡街坊，結果引嚟廣泛譴責。雖然條友事後公開道歉，不過明眼人都睇得出，佢嘅所謂道歉只係礙於形勢，其實一啲誠意都冇。條友唔肯為區選失利負責，得罪咗選民又只係敷衍了事，根本同曾凸首對以權謀私指控嘅處理手法完全冇分別。難為狀棍黨班友，一方面鬧爆曾凸首，而另一方面又對梁黨灰處處包容。持呢種雙重標準、對人唔對事嘅態度，竟然敢自誇話要捍衛香港嘅公義同法治，你話係咪笑死人呢？！

「蛇齋餅粽」言猶在耳，而家狀棍黨居然自己都玩埋一份，搞啲乜嘢免費剪髮，唔通呢啲唔係籠絡選民嘅小恩小惠？九月就係垃圾會選舉嘞，如果話呢單嘢唔係為咗爭取選民支持，我真係打死都唔信囉。毛小姐係黨內重量級人馬，佢搞壇咁嘅嘢，梁黨灰冇理由唔知啫。條友狠狠咁打倒昨日的我，究竟係覺悟前非、從善如流，定係見利忘義、隨波逐流呢？經過毛小姐身邊嗰陣，我就有少少衝動，想問清楚佢地嘅立場。不過我最後都係掂行掂過，冇問到。一來我份人比較有品，從來唔會踩人場。話時話，嗰度喺我屋企附近，好似係我主場先啱喎。算啦，遠來是客，就當我讓吓佢囉。而且佢成班嘍囉喺度，我又驚講咗啲唔啱聽嘅嘢會俾人打。大家知啦，犯民中人要捍衛嘅言論自由只係適用於自己友架咋。法國思想家伏爾泰嗰句名言，打死我都唔信班友有聽過囉。

忽然又諗起另一壇嘢，其實狀棍黨為目標選民提供非物質性服務根本早有前科，肥婆文單嘢就係鐵一般嘅例證。咪屈我呀，我絕對冇無意話條肥婆利用所提供嘅專業性服務誘使有關選民投票俾佢。原來狀棍黨一直都冇轉過軚，只不過班友向選民提供嘅利益係無形嘅高級專業性服務啫。又好似港豬澳大橋單嘢，狀棍黨義助阿婆打官司。阿婆年邁識淺（事主自己講架），對於啲狀棍high到爆嘅法律性觀點，當然係欲拒無從啦。你估係「蛇齋餅粽」咩，而家講緊法律喎，我地呢啲不知法治為何物嘅蟻民又點會識呢？事實上，班藍血貴族根本不屑用「蛇齋餅粽」呢啲cheap招，睇吓梁黨灰舊年區選之後發表偉論嗰陣嘅態度就知啦。嗰種不屑嘅語氣同鄙夷嘅神情完全發自內心，如果唔係真正藍血貴族，就算演技精湛如偉仔，都冇可能裝得出嚟囉。

咪住，既然狀棍黨一貫作風係出手高貴而華麗，絕對唔會攞啲「蛇齋餅粽」式嘅cheap嘢出嚟見人，咁嗰個免費剪髮活動，自然唔會揾啲街坊髮型屋嘅飛髮佬幫手啦。起碼都會係喺中環或老尖打躉嘅專業髮型師，話唔定仲會有Kim Robinson呢啲神級hairstylist添，咁唔去咪走寶？唔得，等我認真考慮吓先！

Barber shop, Phuntsholing, Bhutan