2011年3月29日星期二

奇人義士

900大專失業者領綜援,4年增八成,學者:寧享「權利」換創意生活。琴日明報頭版標題就係咁講。內文提到過去兩年香港整體失業率回落,但係攞綜援嘅80後就多咗,當中擁有大專或以上學歷人士嘅比率亦增加咗。有學者話,咁係因為而家後生仔嘅心態改變咗,唔會好似老一輩咁覺得攞綜援係羞恥嘅事,反而會認為係公民權利。佢地要到啱心水嘅工先肯做,否則留番寶貴嘅時間,做自己愛做嘅好過。呢觀點其實冇乜新意,連我一介草民都諗到啦!

喺一個成熟嘅法治社會,事事有法可依,只要符合所有既定條件,任何人攞綜援都冇問題,根本就唔使覺得羞恥。計我話,攞綜援何止係公民權利呀,直頭係公民義務添啦。一來可以舒緩香港嘅貧富懸殊,亦令政府少咗本錢去搞官商勾結同利益輸送。事實上,如果有資格攞而唔攞,唔止自己辛苦,仲令到政府冇辦法制定合理嘅綜援水平同領取條件。不過學者提到80後寧願唔做,攞綜援嚟換取創意生活,我就唔係太明嘞。唔做同創意生活又有乜關係呢,如果話係寫意生活我就可以理解啫。

社運青年領綜援當全職義工。明報同版嘅另一段報導就令我茅塞頓開嘞。報導就提到某辮子鬍鬚飛,呢條友係近年社運界嘅大紅人,差唔多喺所有兵荒馬亂嘅場合都會見到佢。由之前嘅保衛天星鐘樓同皇后碼頭、反高鐵抗爭、到最近嘅瞓街事件,佢都係一馬當先。就算唔認得佢個樣都唔緊要,你地一定會認到佢條頸巾同馬尾辮。我呢X0後(或XO級)嘅老餅,自然係閱人無數,好似條友咁嘅奇人,都唔係見過好多個咋。講開奇人,又真係有感慨。以前有陳姣文呢隻性感小野貓,自從佢淡出咗之後,竟然嚟咗件噁心嘅肥膏(即係帶埋隻胡椒仔周圍搞事嗰件)。雖然話江山代有奇人出,不過就一蟹不如一蟹,單講娛樂成份已經跌到落負數。而家人個個都驚輻射污染,其實大家有冇諗過,香港三十年前可能已經有喇,如果唔係又點會奇人輩出呢?

哈哈,越扯越遠添,都係講番件鬍鬚飛。話佢係奇人,係基於兩樣。首先係佢嘅奇裝異服,當然啦,呢個只係我嘅老餅觀點,你地可以唔同意。不過條友一年四季都戴住條頸巾,連大熱天時都唔例外,唔通佢唔驚熱到條頸生瘡?仲有,條友乜都有佢份,唔通佢真係唔使返工?不過佢鑊鑊搞親乜抗爭都會悉心打扮,直頭好似時裝表演咁(呢方面就同陳姣文好相似嘞),如果佢冇做,又點會有咁多錢買靚衫呢,唔通佢其實係一個富二代?喺呢方面,段報導就提供咗答案嘞,原來條友係攞綜援架。咁就明白晒喇,唔怪得話綜援可以換取到創意生活啦。

不過諗吓諗吓,單身人士嘅綜援金每月只得$1890,我又真係好懷疑夠唔夠佢買衫嘞。如果係我,靠嗰千零蚊過活就實聽餓死都得,淨係食煙已經用咗超過一半,剩番嗰都唔夠我買酒啦。咁樣睇嚟,條友都只係賺錢(綜援)買花戴嗰隻。佢話自己咁嘅情況,可以當成係一個全職義工咁睇,佢只係將納稅人嘅錢(綜援)投放番落社會裏面。嘩,取之於民,用之於民,好高尚嘅情操呀!佢點止係義工呀,直頭係義士添啦!

其實我覺得佢咁好唔抵啫,鑊鑊都身先士卒,同條命博冇乜分別,但係一個月先得嗰雞碎咁多報酬。以佢投身社運嘅熱誠,年中無休絕對可以肯定,相信連去廁所都喺度諗緊橋,甚至發緊夢都掛住服務社群。以而家最低工資嘅計法(食飯時間當然要計埋),佢嘅年薪起碼值365x24x$28,即係每個月兩萬蚊。政府應該肯定呢類社運綜援義士嘅貢獻,將佢地嘅綜援金加到每月兩萬,唔係就隨時會抵觸最低工資法例。如果收入多咗,班友搞嘅時裝表演式抗爭就肯定會更有睇頭,細路上公民教育堂都上得特別有興趣啦。正府成日嘥錢搞埋晒「心繫家國」之類嘅廣告,細路點會鍾意睇嘅啫!

睇完呢單綜援義工嘅報導,真係令人良久無語。再睇埋同版另一篇報導,就更係感慨萬千添。話說有位葉先生,佢曾經係年薪過百萬嘅上市公司高層,幾年前做義工同戒毒青年踢波,意外跌倒撞傷咗後腦,一度變成植物人。作為家庭主婦嘅葉太唔止頓失依靠,仲要獨力照顧冇咗活動能力嘅丈夫同埋患有自閉症嘅仔,其中苦處可想而知。不過葉太並冇放棄,而佢先生嘅情況後來亦有好轉,雖然仲要坐輪椅,但係右手活動能力同說話能力都已經局部恢復。同樣都係義工,點解葉生一家會有咁嘅遭遇呢,唔通真係天冇眼,好人冇好報?不過葉生真係好堅強,雖然失去咗咁多,佢仍然話而家好快樂,因為可以同家人喺一齊!古人話「君子坦蕩蕩,小人長戚戚」,其實真係好有道理。快唔快樂原來唔一定要斤斤計較得與失,廣闊嘅胸襟至係關鍵所在。喺呢度,我要向葉生一家獻上誠心嘅祝福!




2011年3月27日星期日

加價熱潮

你怕!我怕!個個怕!
煙加!酒加!屋租加!
巴士加!的士加!多士芝士乜都加!
加!加!加!加!加!

知唔知上面嗰堆係乜?如果你知就大鑊喇,因為你已經係一個老餅!阿Sam嘅「加價熱潮」係收錄喺佢嘅「79夏日之歌集」專輯裏面,有成廿幾年歷史架喇!不過咁,就算而家聽番都唔會覺得out,仲應晒景添。

家陣人人都話通漲猛於虎,但係又有邊個比我呢煮飯男更清楚個中嘅苦況呢。話就話每年通帳只係幾個巴仙,不過以PK超市為例,我成日買嘅就起碼比舊年同期貴咗超過一成。其實PK超市都唔算太PK架喇,街市嘅價錢先加到嚇死人。以一袋三個蒜頭為例,舊年呢個時候仲係賣緊三蚊,而家就要賣到六蚊,足足貴咗一倍。當然啦,我唔會蒜頭當飯食,實際影響都唔算好大,魚蝦蟹海產先係真正重災區。早排連赤米(一種蝦仔)都賣到一百蚊斤,真係唔知乜世道。白蟹同大花竹就喺兩三年內貴咗一倍有多,而家已經好少買喇。事實上,有直頭貴到負擔唔起,好似龍蝦咁,最近就賣到成四百蚊斤,你話點會買得落手?冇辦法啦,唯有轉食十蚊三隻嘅重金屬帶子,係咪有損健康都唔考慮得咁多架喇,鬼叫我鍾意食海產咩!

聽魚佬講,海產係俾大陸佬搶到貴晒,佢地有錢又捨得食,香港人根本就冇招架之力。衣食住行都係基本生活需要,而家食者冇其魚,政府係咪應該企出嚟做呢?首先,政府可以立法禁止香港漁民將漁穫賣俾大陸佬,違例者一律判監十年。又或者向呢類交易徵收百分之三百懲罰性稅項,用有關收入成立一個海產價格穩定基金。作為短期紓困措施,政府應該即刻向有需要嘅市民發放每月六百蚊嘅海鮮津貼。如果庫房有盈餘,仲可以向全港市民派發一次過六千蚊嘅海鮮消費卷,咁就皆大歡喜嘞。

要做到食者有其魚,眼光當然要放遠,確保漁產供應穩定至為重要。為咗打無良擊魚販借供求關係吊高嚟賣,政府有必要介入。方法係擴充漁農署嘅編制,成立屬於政府嘅捕魚隊。漁穫可以參考市場水平,以半價賣俾有需要嘅市民。為咗防止有人轉售圖利,呢種行為應該列為刑事罪行。

最算做晒以上動作,都未必一定可以保證每一個香港市民都可以食到心儀嘅海鮮。長遠嚟講,政府應該俾決心,訂立海鮮最高售價,任何人以高於呢個價錢售賣海產即屬違法。至於海鮮最高售價嘅制訂,應該參考最低工資同綜援水平,確保香港最窮嘅一群都同樣享有食海鮮嘅權利。有人可能會有咁嘅疑問,到時會唔會因為無利可圖,令到冇人肯去捉魚同賣漁呢?其實呢個根本唔係問題,而係最理想嘅情況。到時由捉魚到賣魚都係政府一手包辦,售價完全唔受市場影響,可以因應經濟環境作出適當調整。例如通漲高企嘅時候,政府可以減價,甚至將海鮮免費派俾市民,自然人人受惠啦。同時政府又可以展示到對民生問題嘅承擔,民望肯定即刻升到爆晒燈,咁仲唔係一個雙贏局面?!

咪以為咁已經好理想,比理想更理想都仲有,就係將呢種模式推展到所有民生範疇。政府應該用立法手段控制一切民生項目嘅價格,如果做唔住或者冇人願意做嘅就由政府接手。而且政府仲要趁機吸納晒所有N失嘅老中青年,到時人人有做,又唔使俾無良僱主剝削。咁就人人都可以安居樂業,活得有尊嚴啦!

有人可能會問,政府究竟有冇足夠資源做咁多呢?呢個問題根本就係無中生有,冇咗奸商從中剝削,社會上嘅資源梗係用之不盡啦!提出呢個問題嘅人分明就係想轉移視線,為官商勾結護航!呢人直頭係奴才、共狗、五毛黨!

哈哈,原來將思維年輕化真係好過癮架,乜困難都可以迎刃而解,直頭正過索K揩天隊草呀!奉勸所有聽過「加價熱潮」嘅老餅,你地都要學吓我喇!




2011年3月26日星期六

戒煙中期報告

自從上次講話要戒煙,到而家已經過咗一個月。按原定計劃,新煙草稅生效之後就唔會再買煙。為咗保留番一靈活性,我嘅戒煙計劃係基於戒買唔戒食嘅原則。而且喺加價之前,我已經入定大量存貨,所以戒食根本就從來都冇定過確實日期。

而家睇番,我嘅戒煙計劃只係做到一半,即係「唔戒食」嗰部份。啱啱做咗個統計,自從煙仔加咗價之後,已經買咗28包,今年就總共買咗90包。同舊年比較番,今年煙仔嘅消耗量大致上冇乜改變,不過錢就燒多咗好多。

戒煙進程唔係太理想,主要係高估咗自己嘅決心同定力。事實上,戒煙頭幾日最難把持,因為停咗幾日再食番,頭嗰幾啖感覺特別強烈,飄飄欲仙咁,真係好過癮!好似之前嘅戒煙行動咁,其實食晒存貨之後已經停咗兩日,最後都係抵受唔住引誘,就算加咗價都照買。我嘅效率都算高架喇,即刻就定咗38婦女節做下一個戒煙日子。男人老狗做乜要喺婦女節戒煙?冇所謂啦,都只不過係想個最近嘅特別日子啫。題外話,點解有婦女節但係又冇麻甩節嘅呢,分明係性別歧視!

可能對婦女節真係冇乜投入感,嗰次戒煙行動直頭冇開始過。不過以我不屈不撓嘅性格,當然唔會咁易放棄啦,我嘅戒煙行動肯定會一浪接一浪!我已經諗定架喇,下一個目標係41愚人節。如果都係唔掂,仲有一連串吉日,44兒童節、清明節、復活節、51勞動節、佛誕、端午節、71回歸、中秋節、101國慶、重陽節、聖誕節、元旦,我總唔信喺兔年戒唔到煙!

當然,我都明白呢種戒煙方法其實有先天缺憾。事先定好咗一個日子,預咗以後冇得食,喺死線之前自然會食番夠本,結果就越踩越深。其實點止戒煙係咁,戒酒、戒賭、戒滾、或者減肥,都會有呢種情況。講真,世界上又點會有不勞而獲嘅呢,戒煙難我預咗架喇。總之呢,只要付出過努力,無論結果係點都唔使太介懷!


2011年3月24日星期四

垃圾

搜索枯腸,竟然一無所獲。最近都唔知係腦退化抑或係腦便秘,成日都諗唔到寫乜好。咁啱琴日又有個蒙面人走嚟留言,都費事諗得咁辛苦嘞,就一於寫佢啦!

其實寫垃圾都唔難,最難係要摷張垃圾相放喺篇度。大家都知啦,跟鴨仔團去旅行,時間好寶貴,冇理由對住堆垃圾都影餐飽啫。幾經辛苦,卒之俾我到一張,影嘅係一堆垃圾,張相本身又係垃圾,真係fit晒!

講到垃圾,如果係自己製造嘅,當然係要自己搞番掂,其實都冇乜好埋怨。最討厭就係嗰外來垃圾,日日都收到一大堆,真係不勝其煩!

今日就收到聯X財務打嚟嘅垃圾電話,竟然話係覆番我之前嘅查詢。呢咁嘅大耳窿,真係避都避唔切啦,我有乜理由會自己送上門啫,真係乜都敢死。早幾日揸打銀行嘅電話仲搞,我明明已經好老牛咁「喂」咗一聲架啦,個姐姐仔仲要稱呼我做「小姐」。我就話我唔係「小姐」啦,點知時間好似突然停頓咗咁,姐姐仔竟然隔咗幾秒先識講對唔住。我當然知道係個database搞錯咗,不過個姐姐仔完全唔識執生,真係唔趕客先怪啦。呢咁嘅垃圾電話,仲要鑊鑊都係喺我最忙嘅時候打嚟,直頭煩到想連電話都掟埋。

相對於垃圾電話,垃圾fax可能仲煩。嘥晒fax紙唔在講,最弊係好多時收垃圾收到冇晒紙,連緊要嘅fax都入唔到。好在我屋企冇fax機,少咗呢樣麻煩。不過以前喺公司就試過俾垃圾fax騷擾,真係唔知好嬲定好笑。話說以前有個舊同事,簡直係一個問題少女,借落周身債就玩失蹤,搞到大耳窿追債追到上公司。後來公司梗係炒咗佢啦,點知佢竟然玩報復,晚晚send幾十張垃圾fax返嚟。最搞係內容全部都係針對部門嘅男同事,話A君乸型、B君搞機、C君性無能、D君有性病、E君生愛滋,我都算最好彩架喇,只係俾佢話鹹濕。單擾攘咗成兩個禮拜,最後都係要報警先擺得平。

至於數量最多嘅,就肯定係垃圾電郵嘞,日日都收一大堆。好彩電郵有垃圾過濾功能,可以入到inbox嘅都只係極少數。不過就成日擔心會殺錯良民,次次都要喺個spam folder睇清楚先delete,其實都幾煩吓。真係唔明垃圾電郵有幾大實際效用,日日走嚟煩住晒,搞到神憎鬼厭,人地仲點會幫襯你啫!咁我當然明白,垃圾電郵以量取勝,其實成本好低,只要有極少數人落疊就掂。

不過最令人費解嘅,都算係垃圾留言嘞。我唔係講緊廣告留言,我係指好似琴日個蒙面人咁,走嚟講埋晒九唔搭八嘅。其實又唔係話對呢類垃圾留言好反感,只係唔明人為乜要咁做啫。友以蒙面人嘅身分出現,入嚟我個blog度講埋晒無厘頭,例如「9up」、「抽水」、「好差」之類,理據完全欠奉,又冇提出有針對性嘅反駁。我當然明白呢類人其實好幼稚,而且欠缺分析能力,不過佢地入得嚟留言,點都有目的啩。想表達意見?但係呢類留言根本就冇內容,又表達到乜呢。想令我唔開心?其實我都不知幾開心,有人送上門俾我插,要打發呢低能仔直頭係伊斯執啦。點都好啦,總之我一定係立於不敗之地,因為我擁有對留言嘅生殺大權。其實只要我覺得唔啱睇,㩒個制就可以delete咗佢。垃圾留言雖然係短,但係點都要打幾隻字,而我就只要㩒一個制就可以將佢地消滅,蝕底嘅一定係留言嗰人啦。不過咁,我暫時都未delete過垃圾留言(除咗廣告留言),一來係因為有機會俾我插吓人,但係最主要都係因為我尊重所有留言者!冇錯,入得嚟我個blog留言,就算係垃圾人我都會尊重!

2011年3月23日星期三

映衰晒

早排講到神棍蔥,話佢映衰晒香港鴨界。當時唔係好肯定應該用「映衰晒」抑或「影衰晒」,所以就上網摷吓,居然俾我摷到一單大紀元2001年嘅報導。本來我最討厭大紀元,佢地成日老作,仲離譜過爛生果。不過單報導又幾得意(如果係真嘅話),可以攞嚟講吓,以下係原文:

充闊追女仔穿煲 大罵映衰晒 追斬窮父少年玩自殺

【大紀元6月7日訊】「你冇本事就咪生我出來!」秀茂坪一名十五歲男生,為追女仔扮作富家子,卻因抓傷同學需見家長,老父到校自揭一家五口靠綜援維生。男生罵父「映衰晒」,昨晨持刀追斬老父不果,飲洗潔精危坐十五樓窗台,僵持一句鐘打消死念送院救治。

太陽報報導, 企圖自殺男童李×豪,十五歲,九七年和母親及一弟一妹(十三歲及十一歲)持單程證來港後,與六十六歲父親李×鴻同住秀茂坪二十二座一個僅百多呎單位。豪仔在順利邨一間中學讀中一,兩弟妹在區內讀小學,十七歲長姊仍留在國內讀書。豪父原為補鞋匠,但年前起因病動過多次手術喪失工作能力,一家現靠萬餘元綜援金過活。

數月前,豪仔瞞着父母犯錯,事件被妹妹揭發,他像瘋了般拿刀揮舞恐嚇妹妹稱:「你篤我背脊,我毀你容!」幸雙親制止才避過慘劇。

揮刀追斬不遂

豪父又稱,早前豪仔瞞着雙親拍拖,十分揮霍,經常為零用錢不夠用發脾氣,想不到他會為追女仔充「闊佬」。現決定將豪仔送到寄宿學校。豪父表示,豪仔由內地來港只有四年,因雙親無工作能力家境貧困,疑兒子對此感到自卑,念小學時仍保持純真,上中學時卻變得貪慕虛榮,恐怕自己是大陸仔,在校內遭人「睇唔起」,於是在同學及老師面前佯稱自己由台灣來港,又吹噓父親在旺角做生意,豪仔上周抓傷同學手臂,豪父周一往學校才知兒子一直「作大」,立即向校方解釋。豪仔知悉父親踢爆真相,前晚大發雷霆稱:「你做乜去學校,映衰晒,你又冇本事,做乜生我出來,我唔認你!」豪父見兒子口出狂言十分不滿,兩人發生激烈爭執。昨晨七時,豪母見豪仔賴床,拍醒他換衫返學,豪仔未理會。一小時後,豪仔走出露台執起一柄生果刀追斬父親大罵:「做乜要生我出來?」豪父急忙逃走,太太尾隨走到屋外報警,豪仔趁機反鎖屋內。

飲洗潔精企跳

警方及消防員到場後,赫見豪仔面向室內背向街,危坐十五樓住所窗邊企圖跳樓,立即張開氣墊及召喚談判專家到場,豪母亦在隔鄰單位游說,豪仔未為所動;雙方僵持一小時,豪仔突自行返回入屋,消防員游繩而下進入屋內,發現豪仔攤坐床上,查問後他承認曾飲洗潔精,立即將他送院救治,幸無大礙。豪仔就讀中學的副校長表示,豪仔讀書成績中等,不是問題學生,但他上星期曾與同學有衝突更動手抓傷人,校方發現他與同學相處出現問題,於是與豪仔父母見面,傾談關於豪仔個人成長問題。


可能好多人會覺得阿仔好唔掂,鍾意講大話、不孝、仲有暴力傾向添;而佢嘅父母就好慘,辛辛苦苦養大個仔,到頭來竟然俾佢追斬。不過我就唔係咁諗嘞,我更相信因果循環。阿仔搞成咁,唔通只係佢自己嘅問題,父母真係一責任都冇?

人地話子女係父母嘅一面鏡,我就覺得好有道理嘞。當然凡事都有例外,我講嘅係一般情況。我唔知道性格有冇得遺傳,就當冇,當細路開始嘅時候係張白紙。最後張白紙會變成點樣嘅一幅圖畫,就好睇父母畫乜上去。就算做父母嘅完全唔教仔,細路都會啟動佢地嘅自動模仿功能。成日喺電視同報紙都見到年老無依嘅老人家埋怨仔女唔理佢地,好似好慘咁;但係佢地又有冇檢討過,會唔會係自己嘅身教出咗問題呢?

只要打開報紙,差唔多日日都有家暴新聞,隔冇幾耐又會有單大大鑊嘅倫常慘變。喺印象中,起碼有過半數(極保守估計)嘅涉事家庭有呢情況:老夫少妻、老婆仔女喺大陸落嚟、攞緊綜援。唔係話要歧視某一類人,我只係講緊數字,雖然我嘅統計唔算好嚴謹。

事實上,好多低下階層嘅男人喺香港娶唔到老婆,一大把年紀先返大陸求其個。佢地又唔甘於淨係個伴,仲要有仔生,所以通常都會揀比較後生嘅女人。夫妻年齡相差三十歲以上嘅,真係比比皆是。聽個教中學嘅朋友講,佢學校有好多學生嘅老豆直頭做得佢地阿爺有餘。至於嗰女人,又做乜要嫁俾個三九唔識七嘅阿伯呢?當然係想嫁落香港,令到生活可以改善啦,唔通係同阿伯一見鍾情咩!呢種交易式婚姻,根本就存在住致命嘅先天缺憾。而且有男人仲要死充爛充,話自己喺香港住洋樓養番狗。而個女人落到嚟,先知道要住幾十呎嘅板間房,唔日日家嘈屋閉就有鬼啦。講真,可以將婚姻當成買賣嘅人,喺人格上已經好有問題。而建基於利益考量嘅婚姻,亦好難會有幸福嘅結局!

當然,人到中(或老)年又娶唔到老婆,的確係幾慘嘅,返大陸番個伴都可以理解。不過係咪要生仔就應該考慮清楚嘞,無謂將自己嘅悲情延續落去啫。生仔唔單係兩個人嘅事,幾吓抽插、十月懷胎又算得乜,阿仔嘅教養先最緊要,係長期嘅沉重承擔。人生仔之前,究竟有冇考慮過自己係咪有能力(或係咪願意)教養阿仔呢?話就話香港有綜援,養唔掂有政府幫手,但係教呢,唔通都要呢個責任推卸俾人地?

睇番上面單,究竟係咪做父母嘅唔識教仔呢?抑或係佢地自己嘅價值觀根本就有問題,所以先會教到阿仔咁呢?究竟佢地又為乜要生仔呢?為咗承傳?不過延續落去嘅,可能係一代又一代嘅悲劇!養兒防老?真係諗都咪諗啦,一來社會觀念改變咗,而家已經冇呢支歌仔唱;而且自己都冇責任感嘅話,又點會教得出個敬老養老嘅仔呢!唔好同我講話生仔係基本人權,阿仔自己冇得揀嚟唔嚟,如果冇能力令阿仔健康快樂咁成長,又係咪剝削佢嘅權利呢?所以阿仔講得啱架:「你冇本事就咪生我出來!」




2011年3月22日星期二

神沙

你地有冇被拒收神沙嘅經驗?我就試過嘞。話說幾年前,去街市豆腐檔買幾蚊銀芽,我俾嘅其中一蚊係五毫子銀加埋一兩毫子銀,其實都唔算散得好離譜啫,但係個豆腐佬就唔肯收。我當然明白個個都唔鍾意神沙,不過諗住佢打開門口做生意,冇理由有錢都唔收啫。就算唔肯收都冇乜所謂,講明咪得囉,最㷫嘅係個豆腐佬竟然縮手,結果散銀跌到一地都係。大家都知街市地下有幾邋遢,不過點都好,錢一定要執番嘅。呢個唔係幾多錢嘅問題,而係態度問題,每一毫子都係得來不易架。嬲起上嚟咪同個豆腐佬理論囉,我話根據香港法例,只要神沙夾埋唔超過兩蚊,佢唔可以唔收。拗到面紅耳熱都冇用,佢最後都係唔肯收,冇辦法啦,唔通報警咩。我用咗另一個方法懲罰佢,就係將佢列入黑名單,永遠唔再幫襯。嗰個街市有四個豆腐檔,我仲有大把選擇。唔知個豆腐佬係咪冇乜記性,之後每次經過佢個檔口,條友都擺出一副笑面迎人嘅姿態。不過我梗係唔搔佢啦,佢隔籬個豆腐檔一樣有嗰賣。條友唔肯收我幾毫子神沙,結果咪賺少我好多蚊囉!

嗰次之後,我的起心肝摷晒屋企神沙出嚟,原來有成廿幾蚊咁多。都係費事煩嘞,一次過攞去銀行存晒佢。銀行櫃位個哥哥仔見到我堆神沙,先係做咗個好古怪嘅表情,跟住一路數一路笑。原來神沙真係咁唔受歡迎,用嚟買冇人肯收,攞去銀行存又俾人歧視!

自問懶到出汁,出街一定唔會袋散子包,買找番嘅散子就袋住,返到屋企儲埋喺個兜度,結果就越儲越多。自從有咗八達通已經好好多,起碼搭車唔使再煩。後來有埋自動增值八達通,出街就直頭free過Carefree添。不過硬係有鋪頭要與民為敵,將價錢定到甩甩咳咳,仲要唔肯收八達通,擺明係歧視我呢懶人。講真,其實十四個九同十五蚊,對於顧客嚟講又有乜分別呢?所以我最鍾意十蚊店,冇晒零頭,最啱我呢懶人。不過最近屋企嗰間十蚊店都要行成二十分鐘,都係唔好搞我嘞。

最憎就係蝕本城,價錢冇個齊頭,又要唔收八達通。除非PK超市冇得賣,否則我一定唔會幫襯佢。其實價錢使乜定到咁甩咳啫,有round up,有round down,拉上補下,條數咪一樣?連街市檔口都用晒五毫子做單位啦,師奶阿伯咪一樣冇問題?至於唔收八達通,就真係好失敗嘞,分明係唔想做我呢懶人生意。雖然話八達通會抽佣,如果可以做多生意,條數一樣喺番度。

話時話,我又唔係抗拒所有神沙,外國神沙就會儲埋當旅遊紀念品。我又唔係話覺得外國嘅月亮圓,其實我都仲有一大堆港英時代嘅神沙,其中有個係男人頭嘅斗零,過多一百幾十年就發達喇!




2011年3月21日星期一

聯趣

五百里滇池,奔來眼底。披襟岸幘,喜茫茫空闊無邊!看:東驤神駿,西翥靈儀,北走蜿蜒,南翔縞素。高人韻士,何妨選勝登臨,趁蟹嶼螺洲,梳裹就風鬟霧鬢;更蘋天葦地,點綴些翠羽丹霞。莫孤負:四圍香稻,萬頃晴沙,九夏芙蓉,三春楊柳。
數千年往事,注到心頭。把酒淩虛,歎滾滾英雄誰在?想:漢習樓船,唐標鐵柱,宋揮玉斧,元跨革囊。偉烈豐功,費盡移山心力,盡珠簾畫棟,卷不及暮雨朝雲;便斷碣殘碑,都付與蒼煙落照。只贏得:幾杵疏鐘,半江漁火,兩行秋雁,一枕清霜。

上面嗰一大段文字係好出名嘅大觀樓長聯,唔知有冇人會認真咁逐個字睇晒佢呢?老實講,我自己就冇咁好心機嘞。而家搜索器真方便,只要喺網上摷到嘅,唔使睇清楚就可以攞嚟用。

咪以為對聯淨係老餅先鍾意,我就見過有高登仔開貼講對聯,反應都不知幾熱烈,真係估佢唔到。我一向覺得對聯只係遊戲文字,好考IQ,相對於詩詞歌賦,更適合我呢有文學恐懼症嘅人。

其實好細個已經接觸到對聯,因為以前屋企有貼春聯嘅習慣,年年都係嗰副「花開富貴唐天寶,竹報平安晉永和」。嗰時當然唔清楚對聯係乜,只知嗰兩句係好意頭嘅說話。而家再睇番,呢副春聯只不過係行貨,唔算係乜精品。

講到對聯,其實我都只係略知皮毛,淨係知道最講究對仗,即係上下聯喺字數、平仄、字或詞性方面都要相對。我對長聯冇乜興趣,因為好難比較到上下聯係咪對得工整,尤其是平仄。好似大觀樓長聯咁,成百幾二百字,對得嚟都蚊瞓啦。好彩我對平仄一竅不通,慳番好多麻煩。

有人鍾情長聯,我就比較喜歡短小精悍嗰。短當然易對,不過要對得好,一樣好講心思。見過一副一字聯,上下聯分別係「墨」同「泉」。用「白水」對「黑土」,我嘅評語都只有一個字,絕!我又試吓用個「硃」字嚟對,唔知得唔得呢?

另外有一副兩字聯,背後仲有個故事添。話說乾隆要考吓紀曉嵐,就攞咗出自論語嘅「色難」二字做上聯,仲話呢兩個字好難對。紀大學士隨口噏咗「容易」兩個字,跟住就冇晒下文。乾隆等得唔耐煩,忍唔住追問,紀大學士就話:已經對咗啦。「容易」對「色難」,當然無懈可擊,有埋故事背景,就更加過癮嘞。

又話說有一個太監想取笑紀大學士,就岀上聯「小翰林,穿冬衣,持夏扇,一部春秋曾讀否?」要佢對。上聯有齊「春夏秋冬」,的確唔易對,不過當然難唔到紀大學士,結果梗係個太監自討沒趣啦。原來紀大學士嘅下聯係:「老總管,生南方,來北地,那個東西還在麼?」,至於「東西」係指乜,相信唔使講到明啦。

呢類同對聯有關嘅故仔仲有好多,真係講足一年都講唔晒。雖然故仔好過癮,不過我就好懷疑佢地嘅真確性,可能有好多都係穿鑿附會,冇理由鑊鑊都同紀曉嵐或者解縉有關啫。以下有個故仔,講一個少年戲弄老師。至於個少年嘅身分,竟然有幾個唔同講法,有人話係紀曉嵐,有人話係解縉,又有人話係蒲松齡,真係唔知信邊個先啱。

個故仔好長,我就唔詳細講嘞。大致上話有個私塾老師揑死咗學生隻寵物雀,然後收埋喺塊磚頭後面,仲要好串咁喺上面貼咗張紙,寫住「細羽家禽磚後死」。個學生發現之後梗係嬲到爆炸啦,就用下聯「粗毛野獸石先生」回敬老師。唔記得講添,個老師姓石架。如果淨係睇副對聯,直頭係絕到無倫。不過睇埋成單,我就覺得好堆砌嘞,簡直好似古龍嘅武俠小說咁,先諗咗個結局,然後再砌番巧妙情節出嚟。

講開解縉,又有一副同佢有關嘅過癮對聯。話說有個恃老賣老嘅大臣,因為唔順少年得志嘅解縉,就岀咗條咁嘅上聯嚟揶揄佢:「二猿斷木深山中,小猴子豈敢對鋸?」。唔使講都知,呢個大臣梗係自己攞嚟衰啦,解縉嘅下聯係:「一馬陷足污泥內,老畜生怎能出蹄?」。呢副對聯抵死之處在於「鋸」同「蹄」都各有一個同音字,至於係邊兩個字我就唔講明嘞,你地自己諗吓啦。

講咗咁多個故仔,我都驚悶親大家,不如玩吓猜謎啦。下面嗰副對聯其實係一個燈謎,上下聯各打一個字,睇吓你地估唔估到?事先聲明,估中冇獎!

黑不是,白不是,紅黃更不是;和狐狼貓狗彷彿,既非家畜,又非野獸。
詩也有,詞也有,論語上也有;對東南西北模糊,雖是短品,也是妙文。

其實都好簡單架咋,雖然答案係一個謎,不過包保一猜即中!



2011年3月19日星期六

食鹽多過食米

「相信有常識嘅人都唔會做呢樣!」

究竟「呢樣」係乜呢?又係邊個咁大言不慚,話做「呢樣」嘅人冇常識呢?

周一鑊局長就係咁樣公開回應早兩日出現嘅搶鹽潮。如果唔係親眼喺電視新聞睇到,絕對唔敢相信有政府高官會用呢種態度對全港市民講。無可否認,周局長真係好有拮屎。試問喺芸芸高官政客之中,又有邊個可以做到「我口講我心」呢?當然啦,我對周局長嘅健康常識絕對唔懷疑,不過佢嘅政治常識就似乎貧乏咗喇。

喺民主社會,公眾至係真正老闆;而喺民粹社會,公眾就係俺尖聲悶嘅顧客。無論係老闆抑或顧客,都有一個共通點,就係「永遠是對的」。而家周局長竟然公開批評佢嘅老闆或顧客,唔怪得政府嘅民望會咁低啦!

至於我地呢小市民,講反而自由好多,唔使好似高官咁注意修辭技巧。就算有人覺得唔啱聽,最多都係話吓我抽水,對我真係一影響都冇。

講番早兩日嘅搶鹽潮,睇見人十斤廿斤咁買,好肯定食鹽多過我食米,佢地嘅傳統民間智慧當然唔可以忽視。會唔會食多鹽真係可以預防輻射感染呢,我就唔敢評論嘞。你地知啦,傳統民間智慧嘅,有時連現代科學都解析唔到架。好似西醫冇熱氣呢樣,不過都唔知幾多醫生有飲涼茶嘅習慣。周局長話人冇常識,對於民間智慧爆棚嘅普羅市民嚟講,點會唔覺得係一種侮辱?

不過咁,就算食鹽真係可以預防輻射感染,大量進食都會帶嚟其他健康問題,例如腎衰竭。長期超量攝取亦會危害心血管健康。世衛話每人每日唔應該攝取超過6克鹽,咁計法,十斤鹽足足夠一個人食成三年咁滯。事實上大多數人都唔會喺屋企食晒三餐,而且調味亦唔會淨係用鹽咁單調,梗會配合埋其他含鹽嘅醬料。計埋呢因數,十斤鹽隨時夠一個人食足十年。雖然話鹽唔會變壞,但係如果儲存不當,鹽擺得耐就會硬化,甚至變成岩鹽。到時就要好似高級西餐廳咁,刨鹽出嚟用。咁都算嘞,最唔理解嘅係炒到貴成十倍都照搶。仲要一邊搶,一邊鬧奸商坐地起價。大家都知道,貨品價格係由供求關係決定,有人肯出到十蚊買,人地冇理由照舊賣番一蚊啫。睇嚟人雖然有傳統民間智慧,但係生活智慧就欠奉嘞。當然啦,我咁講絕對冇問題,但係政府就一定唔講得。

政府叫人唔好輕信謠言,咁就大錯特錯啦。係人都知謠言止於智者,香港嘅民智一早已經成熟到可以一人一票普選特首,又點會有人誤信謠言呢?政府咁講法,只會令市民覺得政府有心抹黑佢地,唔嬲就有鬼啦。睇嚟政府真係冇乜人才,就等我教佢地一條緩兵之計啦。政府應該呼籲人冷靜,仲要大派定心丸,話必要時會開倉派鹽,每人派6斤,鹽價肯定即刻跌番落正常水平。

事實上,我頭先去PK超市買,就見到餐桌鹽嘅供應都不知幾充足,而且仲係賣緊個三一包,完全冇加過價。唔知嗰個「向地產商說不」嘅光頭仔有冇少少領悟呢,嗰趁火打劫嘅奸商,正正就係佢最信任嘅街坊鋪頭仔!

後記:
琴日(三月二十號)睇報紙,話內地繼搶鹽潮之後,又爆發退鹽潮,有人仲因為退唔到貨而向物價局投訴添。哈哈,我又睇吓香港會唔會發生咁嘅先!




2011年3月18日星期五

澳洲之寶

澳洲有三寶:烏蠅、肥婆、醉酒佬。

相對於東北三寶(人參、貂皮、烏拉草)同廣東三寶(陳皮、老薑、禾稈草),澳洲三寶當然係搞之作。不過就算係搞,都應該有根據先得。去過澳洲三次,肥婆同醉酒佬真係唔多覺。當然啦,去旅行係咁架喇,日頭掛住周圍影相,食完晚飯就返酒店覺覺豬,自然冇乜機會體察民情。至於烏蠅,頭兩次喺澳洲東岸,由Cairns去到Melbourne,都冇乜點見到。直到舊年玩澳洲中西部,先知道烏蠅穩佔三寶之首,絕唔係浪得虛名。

澳洲嘅烏蠅有幾恐怖,其實一早就聽舊同事講過。以前有兩隻馬都係喺澳洲飲過鹹水,佢地講嘅當然冇理由唔信。但係耳聞不如目睹,始終都要自己親身感受,先會知道實際上有幾得人驚。

講番舊年嘅澳洲之旅,首站係Perth,除咗比較熱,呢個成市都算幾舒服。但係日頭就不時有幾隻烏蠅喺身邊飛嚟飛去,感覺上有少少煩。當時已經諗,以澳洲一個咁先進嘅國家,竟然有烏蠅喺大城市當街騷擾遊客,實在唔可以接受。後來去到中部嘅大舊石(Uluru,舊稱Ayers Rock),先知道乜叫做大蛇疴尿,Perth嗰三幾隻烏蠅簡直係小兒科!

同Perth相比,大舊石熱好多,直頭係熱到人都融嗰隻。咁都算嘞,最難頂係烏蠅多到嚇人。其實附近一帶都係半沙漠,真係唔知烏蠅喺邊度嚟。據當地導遊講,有咁多烏蠅係因為畜牧業發達,原來烏蠅係喺牛屎爆出嚟架!導遊又講,其實烏蠅都冇乜害,因為佢地一都唔污糟。吓,咁都得?就算烏蠅身上冇乜菌,不過食屎大嘅就已經夠核突啦!

核突都算嘞,最惡頂嘅係烏蠅好黐人,又鍾意捐窿捐罅,專襲擊眼耳口鼻。而且烏蠅嘅數量又多到驚人,有網上報導話,澳洲嘅「蠅口」同人口比例係一兆比一,都唔知真定假。總之一出到戶外,烏蠅就嬲到成身都係,連行緊都照樣埋身。而且仲趕極都唔走,真係煩死人。

好彩喺當地可以買到一種連住塊紗網嘅烏蠅帽,都叫做可以保護到塊面。不過有辣有唔辣,隔住層紗網,睇點都會有影響,而且影相亦好唔方便。如果有烏蠅飛咗入紗網裏面就仲大鑊,因為變成困獸鬥,面上嘅窿窿會更容易受到攻擊。總之頂帽一戴咗就唔除得,因為再戴番嘅時候,點都會有一兩隻烏蠅跟埋入嚟。就算戴咗烏蠅帽,手手腳腳仍然係冇保護。如果著埋長袖衫褲,又會熱到跳舞,真係攞命!

去過咁多次旅行,都未試過有地方一去到就想走。如果要喺個度長住,真係人都會癲,甚至自殺都有可能。不過好奇怪,當地人通常都唔戴烏蠅帽,亦唔多見佢地趕烏蠅,好似完全冇咁。我覺得嗰度係人間地獄,但係當地人都不知幾悠然自得,真係難以理解!不過諗深一層,每個地方都有唔同嘅實際情況,外人未必可以完全理解,我地又係咪一定要將自己嘅價值觀強加於人地身上呢?





2011年3月17日星期四

盲目愛國?

早兩日睇校長篇鴻文「日本地震,我們學懂了甚麼」,見到有位匿名人留言,話反對盲目愛國主義,留言原文係咁嘅:
「如果有適當和合理的數據去支持,
提出疑問和質詢並不算是窩反,
盲目相信任何一方並不是愛國,
只會造就當權者懶惰和愚民,
能夠公正對政權提出監控才是真正為人民、國家好,
因為這些的思想下,
國家才會進步,
反對盲目愛國主義!」

其實我喺之前嘅留言就批評過某人最鍾意「窩反」,我唔敢肯定匿名人嘅留言係咪衝住呢點而嚟。不過係唔係都好,我都覺得佢提出嘅觀點好值得討論。

我唔係要反駁匿名人嘅觀點,其實啱啱相反,我絕對同意佢講嘅每一句。問題係,究竟香港又有幾多盲目愛國嘅人呢?我唔敢講話冇,不過就算有,點都唔夠盲目仇視中國嘅人多。

成日都見到批評中國嘅言論,真係多到鋪天蓋地。中肯嘅當然有,但係無的放矢嘅可能更多。有政客同傳媒專鬧中國,其實可以理解,因為咁做有市場。就係因為有班盲目仇視中國嘅人,所以友先鬧到欲罷不能。

話人盲目仇視中國,唔止因為佢地鬧得夠狠而又理據欠奉,更係因為佢地根本就恥為中國人。大家都知道,好多香港人到今時今日仲唔肯承認自己係中國人。有人甚至話攞住本特區護照去旅行,俾個中國國徽映衰晒。班友咁嘅態度好明顯係自欺欺人,而且對自己一好處都冇,唔係盲目係乜呢?

生為炎黃子孫我地冇得揀,不過國籍就絕對可以選擇,唔鍾意做中國人咪移民囉,日鬧夜鬧又有乜謂呢?當然啦,未必個個想走嘅都可以走到。對於呢人嚟講,盲目愛國可能仲好,因為個心會舒服。與其亂鬧一餐,不如用寶貴嘅時間嚟裝備自己,話唔定可以脫離中國嘅魔掌呢!

我自問一都唔算愛國,因為我冇打算為國家付出乜。為國捐軀肯定冇我份,食煙食到肺癌死就有可能。我份人好功利,冇作用嘅唔會做。我相信每人都有自己嘅崗位,做好本份已經可以。唔係人人都需要治國平天下,不過起碼要做到修身齊家。奉勸盲目仇視中國嘅人,唔好再浪費時間嘞,努力裝備自己,擴闊視野,咁先係對自己最有利!

2011年3月16日星期三

肥膏真相

都話件肥膏係為咗出風頭架啦,真係俾我講中晒!

琴日睇日月報,件肥膏竟然出現咗兩次,一次喺副刊,一次喺港聞版。喺副刊嘅係一篇訪問,佔咗成版咁滯,真係明星專訪都冇咁大篇幅。而港聞版報導嘅就勁搞笑嘞,居然係關於佢個仔嘅生日會。

話說上個禮拜日,件肥膏又帶埋個仔去遊行。可能佢覺得齋遊行已經冇乜新意,竟然即場喺政府總部門口幫個仔開生日會。佢都算有備而戰喇,仲帶咗兩個蛋糕去添。嗰兩個蛋糕就搞笑喇,一個寫住「不要楜椒」,而另一個就寫住「No more pepper」。真係蛋糕一出,誰與爭鋒,結果所有記者嘅鏡頭都集中晒喺佢兩母子身上,而其他遊行人士就冇人理。日月報個記者講得好好笑,話成個遊行俾佢地騎劫咗。

真係一百歲唔死都有新聞聽,原來搞生日會都算係公民教育堂。係嘅話就大鑊喇,香港有七百萬公民,如果個個都喺政府總部門口開生日會,政府嘅運作想唔癱瘓都幾難啦。阿媽同個仔慶祝生日,話係愛的教育都合理。不過橫睇掂睇,都唔覺件肥膏有幾愛個仔囉,試問對一件工具,又點可能會有愛呢?兩個蛋糕中英對照,似乎個女人想幫個仔上語文堂多。但係個仔驚魂未定就挖番胡椒出嚟講,直頭冇照顧到個細路嘅感受囉。又話要幫個仔上公民教育堂,點解唔寫「民主人權公義」呢喎。再唔係,用當日遊行嘅主題,「爭取全民退休保障」都好好啫。用到「胡椒」,擺明係想幫自己宣傳啦。

件肥膏都已經算到盡架喇,不過佢個仔始終太細,完全交唔到戲。個細路根本就唔知個遊行搞乜,淨係顧住同在場嘅其他小朋友玩,由「一二三紅綠燈」玩到「麻鷹捉雞仔」。乜公民教育堂啫,直頭係唱遊堂就真啦。最離譜嘅係連件肥膏自己都同小朋友玩埋一份,細路就話年少無知啫,佢自己冇理由唔知個遊行係為乜啩。成個遊行變咗佢兩母子嘅親子時間,仲要開埋私人記者招待會,都算喧賓奪主喇。

話件肥膏唔係為咗出風頭,我就真係打死都唔信,睇佢費盡心思騎劫個遊行就知啦。連胡椒蛋糕咁絕嘅橋都諗到,都咪話佢唔用心狼虎!呢個女人,橫睇掂睇都唔似社運人士,話佢似星媽就差唔多。做星媽就梗係威啦,不過聽聞好多前童星都話自己嘅童年唔快樂架。個細路啱啱九歲,睇嚟件肥膏都係高齡產子,應該好疼錫個仔先係格,點解會咁忍心利用個仔嚟幫自己出風頭嘅呢?如果搞到個仔有乜冬瓜豆腐,到時想再生又生唔出,咁就折墮啦!



2011年3月15日星期二

映。影

早兩日講到神棍蔥,話佢映衰晒香港鴨界。當時對於應該用「映衰晒」抑或「影衰晒」,其實都唔係好肯定。照理用「映衰晒」好似適合,因為「映」係動詞,而「影」通常只會當名詞用。為咗穩陣起見,我就喺Google摷過吓,不過結果就令人更加混亂。「映衰晒」到32,600個網頁,而「影衰晒」竟然有490,000個,多咗成十幾倍。我最後都係信自己多,用咗「映衰晒」。

其實中文裏面有好多同音字,字義有接近,有甚至連字型都好相似,真係好易搞錯。例如以下呢字,有時都唔知喺乜情況應該用邊個:
「遊」同「游」
「魚」同「漁」
「獲」同「穫」

好似「魚獲」、「魚穫」、「漁獲」、抑或「漁穫」,究竟邊個先啱呢?

至於最難搞嘅,我就覺得係「至」、「致」、同「緻」,用嘅時候真係完全冇信心。究竟係「至命」定「致命」,「興致」定「興緻」、「雅致」定「雅緻」,簡直完全搞唔清楚。

如果有唔肯定嘅情況,我通常都會喺Google摷吓,睇吓邊種用法最常見。但係有時搜尋結果真係令人啼笑皆非,例如「見仁見智」呢個成語,竟然就有以下嘅結果:
「見仁見智」有549,000個網頁
「見人見智」有5,110,000個網頁
「見人見志」有528,000個網頁

基於少數服從多數嘅原則,似乎「見人見智」先至正確。但係我記得以前先生教過,明明係「見仁見智」架噃。我當然明白語文係不斷演化,而約定俗成更係其中嘅法則。不過以「見仁見智」為例,呢個成語係有經典可引,又點可以立亂約定俗成呢?又講番少數服從多數,如果大多數人都係不求甚解,我地又係咪應該服從呢?睇怕呢個問題都係「見人見志」,唔會有一個肯定嘅答案。

其實而家中文輸入法都可以用關連詞,對於好似我呢咁嘅半文盲絕對係好大嘅幫助,真係唔明白點解仲會有咁多「見人見智」嘅人!




2011年3月13日星期日

每樣都有個價錢

琴日講開神棍蔥,真係有欲罷不能添,咁極品嘅經典,就算連續寫一個禮拜都肯定夠料。條友起碼創造咗兩項香港紀錄,甚至話係世界紀錄都有可能。

第一項紀錄係最低支持度。雖然唔敢肯定係咪前無古人後無來者,不過就算有都只係可以平佢嘅紀錄,因為根本就冇可能低過零支持。以我喺網上所見,全部評論都係插條神棍嘅,呢種情況真係前所未見。事實上,就算係癲狗、長毛、兩任突首、甚至係嗰件帶埋個仔周圍搞事嘅肥膏,都仲會有人撐,而神棍蔥竟然連一個粉絲都冇!

第二項紀錄係最低性價比。條友嘅肉金居然高達二十億,真係匪夷所思。呢個當然係天文數字,不過算唔算係紀錄都好難講。但係講到條友嘅質素,無論係外形、學識、抑或涵養,喺全港男性之中,極有可能屬於最差嗰1%。咁樣計起上嚟,佢賣嗰個絕對係無可超越嘅天價!當然啦,佢會唔會有我地睇唔到嘅卓越性能,就真係不得而知嘞。條友叫得做神棍,可能有不為人知嘅特長都話唔定,咁就要問米婆問吓小鹹鹹先知喇。

提到小鹹鹹,我又想講吓一個好奇怪嘅現象。有網民(相信係男網民)提出一個好有趣嘅問題,話以小鹹鹹咁驅風,究竟要收幾多肉金先肯上。估唔到大部份人都話冇得傾,就算幾多錢都唔肯制。對於咁嘅答案,我就懷疑人係口不對心嘞。

我相信每一樣都有個價錢,人亦唔例外。買唔買或者賣唔賣,只係睇個價錢合唔合理。而所謂價錢,亦唔係只限於金錢,總之喺交易中要付出嘅都算。講真,我就唔相信世界上有咁多無價之寶嘞。對於嗰條問題,我嘅答案好簡單,完全係睇有幾多肉金,具體上就係好似以下咁:

二十億:肯定𦧲飯應!
二億:同上
二千萬:都係𦧲飯應,但係心裏面有委屈就難免
二百萬:基本上會制,不過都要睇吓服務範圍
二十萬:多數唔會制,除非係好簡單嘅服務
二萬:No way!

唔知各位男網友又會唔會都有一個咁嘅價目表呢?



2011年3月12日星期六

入冊

入冊即係坐監,相信冇人會唔知。不過個中滋味係點,又有幾多人試過呢?自問係一等良民,監當然冇得坐,但係監獄就見識過吓。監獄陰森恐怖,而且仲有一陣怪味,要我坐監就真係人都會癲。呢碗皇家飯我就點都啃唔落架嘞,咁寶貴嘅社會資源應該留番俾以下幾位人士(或動植物),先至不枉我地每年交咁多稅!

膏太(或肥膏)
呢件肥膏成日帶埋個幾歲豆釘去示威(或搞事),我就覺得已經有虐兒成份嘞。嗰兵荒馬亂嘅環境,正常嘅八歲細路有乜可能會唔驚?而且個婆娘淨係顧住自己玩,竟然揼低個仔唔理。仲有,個仔中咗椒又唔肯第一時間幫佢治理,係都要等埋記者嚟影相。咁嘅行為,毫無疑問係疏忽照顧兒童啦,點解警察仲唔做架!

癲狗+長毛+大舊
呢三條友最鍾意掟,擾亂議事廳秩序,真係勁乞人憎。不過佢地又算好眼界,鑊鑊都爭少少掟唔中。鬼唔望鑊班友發雞盲,掟中高官,仲要係爆肛見紅嗰隻,到時就可以告佢地嚴重傷害他人身體啦。等班友試吓入冊通櫃桶嘅滋味,咁就真係大快人心嘞。獄警最緊要加多兩錢肉緊,通大力呀!

哨牙蔥
雖然條友單爭鏟官司同公眾利益冇乜關係,不過我最憎嘅就係佢。講起嚟有唔係好理性,憎佢嘅幾個原因都唔構成刑事罪行,不過就真係好想條友坐監。等我又數吓佢嘅三宗罪先。

貪心!條友刮咗小鹹鹹廿億都唔知足,仲想吞埋人地成副身家,真係大貪到離晒譜。如果安安份份,廿億都唔知夠佢食幾多世啦。話時話,廿億究竟有幾多個零我都唔係太清楚喎,不過我就知冥通銀行嘅銀紙都有好多個零,而且仲啱晒貪心鬼添。

無恥!其實貪心又唔係罪,不過條友就死都唔肯認爭鏟係為咗錢,仲要講到同小鹹鹹有真感情。而家當官白痴嘅咩,抵佢俾人狠批唔誠實。咁都算嘞,條友竟然核突到將小鹹鹹條姨媽底褲擺上檯,後來仲連老公豬錄影帶都出埋。人之中佢都算極品喇,講到無恥,直頭連嗰班民鼠政棍都唔係佢嗰皮。

妒忌!呢個至係我咁憎條友嘅主因。老實講,我真係好妒忌佢。條友要樣冇樣,要身材冇身材,要學識冇學識,佢究竟憑乜能耐可以收小鹹鹹廿億肉金?呢隻醜老鴨根本就一無是處,直頭映衰晒香港嘅鴨界。如果佢都值廿億,咁我咪起碼值一百億?點解結識到小鹹鹹嘅唔係我,而要係呢隻醜老鴨,我憎死佢呀!

不過咁,我而家條氣順番好多喇。早排睇壹仔,話佢已經窮途末路,而家只係苟延殘喘。條友揮霍無度,嗰廿億肉金已經所餘無幾。而且單官司對佢好不利,睇怕條友都要洗定個忽忽等入冊喇!





2011年3月11日星期五

蝗蟲天下

今日想同大家介紹一條近期喺youtube大熱嘅MV,叫做「蝗蟲天下」。條MV據聞係高登仔製作,首歌取材自陳奕迅嘅「富士山下」,而歌詞就俾人填過,用嚟唱衰中國大陸。

大家都知高登仔係乜人,本來我都唔敢得罪佢地,但係歌詞實在太過分嘞,真係忍唔住要講番幾句。我絕對唔係要幫大陸講好說話,事實上歌詞提到嘅部份衰亦唔係無中生有,問題係出喺態度上面。至於首詞點過份法,我又節錄幾句同大家分享吓。

「其實見這個國家 偷呃拐騙到家」
偷呃拐騙度度都有,並唔係中國嘅專利。如果話呢喺國內比較嚴重,我都唔會有異議。不過將部份人嘅不法行為入晒成個國家民族數,就係犯咗以偏概全嘅謬誤。好似我地唔可以因為班歌詞作者(高登眾巴打)寫咗首咁嘅詞,就話所有高登仔都係白痴。

「蟲國化名叫支那 一早醜遍東亞」
唔理「支那」一詞嘅起源係點,而家已經公認係對中國極度侮辱嘅叫法。除咗日本仔同部份台獨支持者會用呢個詞之外,基本上都冇乜其他人會咁叫法,而出自一班中國人嘅口就更係匪夷所思。班友當然唔認自己係中國人啦,不過佢地嘅列祖列宗係喇啩。我唔係愛國或者民族主義份子,但係我仲識得尊重我嘅祖先。班友要侮辱自己嘅列祖列宗係佢地嘅事,但係燒埋我嗰疊就真係佛都有火。而且仲拉埋「東亞」一齊講,好易令人聯想起日本侵華歷史。不過我又唔會叫佢地做漢奸,事實上日本仔亦冇可能咁嘅貨色幫佢地辦事。忽然有個諗法,班友會唔係喺石頭爆出嚟嘅呢,所以冇祖宗?

「一天一句普通話將我同化」
班友咁都覺得有問題,我只可以話佢地係井底之蛙。普通話係中國嘅法定語文,香港人絕對應該要識啦,如果班友唔識就真係蝕底喇。講到同化,根本就係人類社會嘅必然現象。如果班友有種嘅,咪同化番國內人囉。

「"如沒有中國關照 香港已經死了"」
呢句就切合現實嘞。就算唔講中央對香港嘅各種支持政策,淨係唔向香港供水都死得人啦。班友日日飲住東江水,唔知有冇覺得小便有唔暢順呢?大陸連水都有毒,隨時會飲到人腎結石架,唔好飲丫笨!

「誰都驚恐有天災 對匪國暴民又要捐送
這可算香港給中國的作用
財物盡獻奉害蟲 平民愈捐就愈窮」
班友之前講嗰,最多都係白痴、無恥、同無知啫,不過呢幾句就直頭係冇人性嘞。連天災都可以攞嚟借題發揮,更加令我相信佢地係石頭爆出嚟嘅。講到香港對中國嘅作用,又忍唔住要話班友無知嘞。香港係一國兩制嘅示範單位嚟架,對象係台灣呀,盲毛!仲有,香港人捐錢救災,會唔會愈捐就愈窮就唔知,不過可以幫到人,已經係一種心靈上嘅富足。班友肯定冇捐過啦,所以佢地係唔會體會到嘅。

「往日靠打拼
港英的繁華光景
再沒有保證」
真係笑死人,班友喺高登網打拼就叻啫,對於香港嘅繁榮,佢地又出過幾多力?講到尾都係掛住事頭婆啫,都幾念舊喎。睇番條片嘅留言,原來念舊嘅人仲有好多,其中一條最受到認同嘅就係話想英國繼續統治香港。其實好簡單啫,掛住事頭婆咪移民去英國囉,使鬼喺度日嘈夜嘈咩。哈哈,忽然諗起一個舊同事,情況真係有相似。條友日日喺度鬧,唔係話公司刻薄,就係話老闆PK,不過又唔見佢轉工喎,仲連老人牌都攞埋添。其實慳番啖氣暖吓肚好過啦,以佢嘅工作表現,唔俾人炒已經偷笑喇。唔知大家又有冇咁嘅同事呢?講得太明我就唔敢嘞,高登仔鬧人嘅功架我都略知一二,實在係招惹唔起。

其實我都諗到一個三贏嘅方案,就係英國即刻收容晒呢班友,唔好理乜計分方法嘞。對於英國,班友話晒都係前度海外子民,就算冇功都有勞。而且班友又誓死效忠,連正牌英國鬼都未必會啦,咁嘅子民真係去邊度呀。對於班友自己,可以親近到事頭婆,自然係死而無憾,連我都會慶幸佢地到個好歸宿。至於我地呢普通市民,就樂得耳根清靜。嘩,真係諗吓都開心呀!


2011年3月10日星期四

由疏忽照顧兒童講起

琴日講開有隻肥鼠乸帶埋隻老鼠仔去參加瞓街派對,結果混亂中隻老鼠仔中咗椒,搞到樂極生悲。同朋友傾開,個個都話隻肥鼠乸唔知點做人阿媽,竟然會帶埋條塞竇窿去咁危險嘅地方。有人仲提出一個觀點,話應該告佢疏忽照顧兒童,因為個細路肯定危險過單獨留喺屋企。

其實我對呢個講法有保留,講真好多親子活定都有一定危險性,例如帶細路去踩單車咁。而且喺電視見到,事發前隻肥鼠乸明明拖住條塞竇窿,又真係唔可以話佢疏忽照顧喎。事後佢仲高調反擊,將所有責任推晒落警方度添。

不過咁,所謂天網恢恢,疏而不漏,有人就篤爆隻肥鼠乸嘅前科。原來佢之前都試過帶埋條塞竇窿去反高鐵,可能係反得太high,連唔見咗個仔都唔知。卒之要問人借個大聲公嗌仔,而警察同示威人士仲聯手幫佢仔添。喺youtube上面有片為證,今次佢應該冇得抵賴啦。

帶埋個仔去反高鐵,但係就自己有自己玩,完全冇理到個仔,咁仲唔係疏忽照顧兒童?!唔知警方可唔可以用條片做證據,告到隻肥鼠乸甩褲呢?既然佢已經有前科,今次單就可以循同一方向推敲嘞。佢會唔會又係瞓到high晒,連個仔中咗椒都唔知呢?母愛有幾偉大,真係唔使講都知啦,草食動物為咗保護仔女,連獅子老虎都敢衝撞。當然,我絕對唔係話隻肥鼠乸應該同警方對抗。不過見到個仔有危險,幫佢擋椒就肯定係作為人母嘅本能反應,除非佢當時根本就唔喺個仔身邊啦。

本來以為呢單,稍為有獨立思考能力嘅人都會譴責隻肥鼠乸。不過琴日睇日月報副刊,呢個黃日月樂竟然力排眾議,狂插政府。以下係節錄自佢嘅專欄:
「萬人上街,警方誤傷孩子,局長回應說,帶孩子上街是教壞細路。枉我們還天真地相信,跟孩子身體力行參與社會,薪火相傳,是最珍貴的教育。」

如果呢係無知婦孺講嘅,我只會一笑置之。不過既然登得喺日月報,作為長期讀者,我又忍唔住要講番兩句嘞。首先,李局長話教壞細路,係針對班友強佔馬路嘅不法行為。唔知黃小姐係有心斷章取義,定係覺得呢種不法行為值得細路學習呢?至於薪火相傳云云,講就好似好動聽咁,其實只不過係將自己嘅意志強加於細路身上。究竟黃小姐知唔知道,而家個個提倡嘅係培養小朋友嘅獨立思考能力,作為家長嘅只應該從旁輔助,而唔係將細路當成填鴨。況且幾歲嘅豆釘,又有乜能力去分析究竟高鐵應唔應該起、財政預算案有乜不足之處、衝擊警方防線係咪暴力行為、強佔馬路算唔算違法?!帶細路去示威(或搞事),當然唔會令佢地了解事件嘅來龍去脈,而細路嘅模仿性最強,佢地學到嘅只會係嗰不法嘅暴力行為。黃小姐,我求吓你放過班細路啦!

我當然明白香港而家已經極度分化,對立陣營互相攻訐在所難免。不過喺一大是大非嘅關節上,例如法治咁啦,係絕對唔容許顛倒黑白嘅!對於反政府陣營嘅人士,可以隻字不提肥鼠乸單,但係如果要幫佢塗脂抹粉,咁就一定要譴責嘞!而家連所謂文化人都係咁是非不分,仲要喺號稱全港最有公信力嘅中文報紙寫專欄,你都咪話唔得人驚!真係世風日下,人心不古!



2011年3月9日星期三

碩鼠

琴日鬧完班瞓街老鼠,條氣都仲未順番晒,點知又俾另外一隻碩鼠激親。當然啦,用「碩鼠」只係為咗丟書包,如果講得直接,就係一隻肥鼠乸。

話說碩鼠帶埋隻小鼠去遊行,行完晒都仲意猶未盡,跟埋班瞓街老鼠佔據馬路。從電視新聞片段見到,佢拖住隻老鼠仔喺鼠群中漫步,都不知幾寫意。點知樂極生悲,後來警察清場,喺混亂中隻老鼠仔中咗胡椒噴霧,喊到阿媽都唔認得。單經傳媒廣泛報導,碩鼠即刻成為眾矢之的。後來李笑光局長更高調評擊碩鼠嘅行為,話係利用細路做政治抗爭工具。

班鼠輩從來都只有佢地鬧人嘅啫,而家俾人批評,唔嬲就勢係假啦。碩鼠就即刻反擊,佢話表達意見有問題咩?!仲話帶埋個仔去班鼠輩嘅瞓街party,係俾佢上公民教育堂喎。

聽到碩鼠嘅高論,我又真係忍唔住要講兩句嘞。首先我認同動物都有表達意見嘅權利,就算對勁討厭嘅老鼠亦要一視同仁。但係喺文明社會,表達意見一定要用合法嘅方式進行。班鼠輩佔據咗條馬路,點睇都係違法啦,阻街或者非法集會,是但一條都隨時可以入罪。難為碩鼠仲話係公民教育,計我話係流氓教育就真!

就算唔理誰是誰非,做阿媽嘅亦都考慮個細路嘅安全。喺咁兵荒馬亂嘅環境,如果有乜依郁,條塞竇窿根本就保護唔到自己,真係踩都俾人踩死啦。我絕對相信警方唔係有心要噴隻老鼠仔,但係一隻小鼠混喺成班鼠輩當中,睇唔到都係好正常嘅事。總之閒事莫理,險地莫企,想條命仔長就唔好搞咁多。

不過我最睇唔順眼嘅都唔係以上呢,話我鼠身攻擊都要講架嘞,就係隻碩鼠實在太樣衰!本來生得醜唔係佢嘅錯,但係佢絕對唔應該咁高調搏出風頭。睇見佢講嗰副嘴臉就真係把幾火,如果係人類,我會用八婆嚟形容,但係對於呢隻碩鼠,都唔知應該講乜好。

等我又俾建議隻碩鼠,如果要俾個仔上公民教育堂,帶佢去參加瞓街party就真係太細眉細眼嘞。佢應該即刻買兩張機票,帶埋條塞竇窿飛去利比亞,見識吓人地嘅茉莉花革命,咁先至可以擴闊眼界架嘛!

本來碩鼠係指殘民以自肥嘅貪官,不過呢樣喺香港已經唔多見,反而高舉民主義旗嘅碩鼠係就越嚟越多。呢鼠輩將民主據為己有,只有佢地先有資格講民主,其他持不同意見嘅都被打成反動派。從呢個角度睇,班民主碩鼠又同詩經講嘅嗰有乜分別呢?!

2011年3月8日星期二

瞓街老鼠

過街老鼠,人人喊打!呢句相信大家都聽過。但係有一種動物比過街老鼠更加乞人憎,你地又知唔知係乜?呢條問題當然係好無聊,睇見個標題都已經估到啦。冇錯,瞓街老鼠的確勁討厭,簡直係人人得而誅之!

話說星期日,有班疑似民鼠嘅動物,發起咗個「反財政預算案大遊行」。本來乜乜大遊行早就成為假日嘅大眾娛樂,已經見怪不怪。而且所有動物都有表達意見嘅權利,如果淨係乖乖地過吓街,本人絕唔會反對。不過桐油埕始終係裝桐油,如果唔搞破壞嘅,根本就唔係老鼠啦。

一如所料,班鼠輩果然嫌齋過街唔夠癮,仲要佔據埋成段德輔道中,玩集體瞓街。結果搞到中環交通大混亂,有巴士同電車乘客被迫中途落車。單是但台新聞都有報導,但係就居然唔訪問吓受影響嘅乘客,了解佢地有乜睇法。都話是但台是但架啦,佢地點敢得罪班瞓街老鼠啫,一陣班鼠輩走去電視城瞓覺,咁就大鑊嘞。唔知呢又算唔算自我審查呢?

後來警方清場,抬走班瞓街老鼠,條路先至通番。一如既往,班鼠輩事後都係譴責警方使用暴力,話佢地冇預先警告就用胡椒噴霧。真係鼠口長不出象牙,班友講都語無倫次嘅,警方嘅警告,佢地又有邊次聽得入耳呢?不過咁,其實我都唔贊成警方用胡椒噴霧架,最好就係出動警棍,當扑咁扑濕班鼠輩。據報喺混亂中,有一個八歲嘅塞竇窿中咗椒,而被拘捕嘅鼠輩之中,最細嘅竟然只得十二歲!究竟點解班友要帶埋細路上前線呢,唔通佢地冇擔心過小朋友嘅安全?其實佢地咁做都係基於安全理由,不過係自己嘅安全啫。咪好似喺恐怖主義盛行嘅地方,恐怖份子利用婦孺做擋箭牌一樣囉。所謂虎毒不食兒,估唔到班鼠輩會無良成咁,真係令人髮指!咪住,攞老虎嚟同班鼠輩比較,簡直係對百獸之王嘅莫大侮辱,我要收番「虎毒不食兒」呢句。

期間仲發生咗一段小插曲,瀉民連現任幫主桃君痕曾經勸諭班鼠輩移屍遮打花園繼續瞓,但係就冇人(或鼠)搔佢,真係瘀到爆!我都講過架啦,自從前任癲狗幫主反出之後,瀉民連嘅聲勢江河日下,摺埋只係遲早嘅問題。

講番班瞓街老鼠,佢地唔止喪心病狂,簡直係冇埋作為動物嘅本能添。因為就算係禽獸,都唔做埋損人不利己嘅,咁係天性使然。損人就唔使講啦,班鼠輩剝奪咗其他人使用道路嘅權利。如果有人等住去救命,咁就俾佢地害死啦。至於點解會不利己呢,又等我同大家分析吓。首先,瞓馬路好危險,隨時會俾人踩親,甚至俾車車死。咪以為車一定會停,如果遇著個酒後駕駛嘅司機,鼠輩就實聽變鼠餅都得嘞。而且馬路無險可守,一旦警方清場,話咁易就一網成擒啦。不過都難怪嘅,一班烏合鼠輩,又可以有乜高明嘅諗頭呢?不如等我點醒佢地啦。

如果要瞓,垃圾站先至係最佳選擇。一來,垃圾站係鼠輩最熟悉嘅地方,喺嗰度瞓一定會有賓至如歸嘅感覺。而且,一旦防治蟲鼠組嚟清場,班鼠輩可以即刻匿埋喺垃圾堆裏面,話唔出就唔出,想捉到佢地都幾難。最重要嘅一點係,如果班鼠瞓瞓吓見肚餓,嗰度有大把垃圾醫肚,絕對有利於佢地作長期抗爭。

班瞓街老鼠無勇無謀,又累人累物,真係唔死都冇用!如果話屯門瞓街男陀衰晒男人,咁呢班鼠輩就直頭係陀衰晒全世界嘅鼠類!咪以為所有鼠類都係討厭嘅動物,其實有都好可愛架,例如白老鼠、倉鼠、葵鼠、同龍貓等等。如果呢可愛嘅鼠類唔想受到牽連,就應該即刻同瞓街老鼠劃清界線,搞番個「全球鼠類反瞓街老鼠大遊行」!

2011年3月7日星期一

飲樣

前日(星期六)有個親戚娶老婆,夜晚喺深灣遊艇會擺酒。最怕一條友戇居居去飲宴場合,所以就約埋細佬同弟婦一齊喺銅鑼灣搭車入去。點知見到細佬,當堂俾佢嚇親,佢竟然著咗件披。講真而家去飲,個個都著得好casual,我就一向都係牛記笠記上陣,基本上同落街買餸冇乜分別。細佬話嗰度係高級地方,都係著番套西裝穩陣。其實我都有考慮到呢一點,原本諗住著條爛牛仔褲去,後來都係換番條冇穿窿嘅。一向好少著西裝,除咗因為嫌打呔麻煩,更主要係覺得自己著西裝唔係咁適合。

言歸正傳,嗰晚一入到宴會廳,就即刻暗叫一聲:大鑊嘞!主人家啱啱舉行緊雞尾酒會,現場衣香鬢影,女嘅高貴大方,男嘅衣冠楚楚,連嗰班影相嘅都斯文過我。但係都冇辦法,唔通即刻掉頭走咩,唯有頂硬上啦。

仲有一樣更弊嘅係,我從來未見過個新郎。喺婚宴上唔識得對新人,只有細個時跟老豆去飲先會發生架咋,今次真係戇居嘞。其實同個新郎係乜親戚關係,我都唔係好識得。我阿爺同佢阿嫲係兄妹,如果話佢係我表弟,又好似仲要再疏,唔知可唔可以叫做表表弟呢?而家係咁架喇,現實世界中嘅人際關係好疏離,反而喺虛擬嘅網絡世界,人與人嘅接觸就親密得多!

近年嘅婚宴,通常都會將對新人嘅大頭相擺喺當眼位置,方便盲毛賓客進行認人手續。不過前晚就冇呢樣,真係比較難搞。仲有,而家人又唔會好似以前咁,帶住個搶眼嘅新郎襟章。唯有周圍,睇吓有邊個著得最似酒樓部長啦。不過咁都唔係好可靠,因為單憑衣著,其實唔一定分得出邊個係新郎,邊個係伴郎。如果恭喜錯人,就真係瘀到爆啦。好彩最後見到姑婆(即係新郎阿嫲),由佢介紹,先至知道邊個係表表弟。

除咗衣著格格不入,個婚宴嘅氣氛亦令到我覺得好唔自在。通常去飲都會見到嘅,例如麻雀、啤牌、瓜子、大白兔奶糖等等,一樣都見唔到。又見唔到細路滿場飛,事實上,幾乎係一個細路都冇。新郎新娘都係喺外國長大,喺大型跨國財金機構做。賓客當中有好多鬼,就算唔係鬼,都多數係滿口英文嘅青年才俊,相信大部份係對新人嘅同事或者朋友。對於我呢草根階層,咁嘅場合實在太高級嘞,真係唔多習慣。

無可否認,香港以前係重英輕中。無論係鬼,抑或係飲鹹水大嘅人,都俾人覺得高級。本來諗住回歸之後,呢個情況會有改變。就算係駐港嘅跨國公司,都會本地化,甚至國內化。以前間公司有好多鬼,我自然知道鬼有英文方面嘅優勢,但係工作能力其實唔一定比本地人高。但係而家睇嚟,鬼同鹹水人嘅特殊圈子,依然係牢不可破。本地化,可能根本就冇發生過。淨係睇吓家長幾希望仔女可以入到英文中學,就知道好多香港人係乜心態。我唔敢話佢地係崇洋,不過大細超就實係架嘞。

以前去飲,最尾梗有餅仔同橙,而且多數都食唔晒。通常都會有人打包攞走,有時人仲會搜羅埋其他檯嗰。有人對於呢種做法好鄙視,覺得係中國人貪心嘅劣根性。我自己就唔同意呢種睇法嘞。食唔晒都係掉架啦,攞走又有乜問題,其實絕對係珍惜資源嘅做法。前晚嘅婚宴就有類似情況,不過唔係餅仔或者橙,而係玫瑰花。當晚每張檯都有個白玫瑰嘅插花擺設,散席嘅時候,有個鬼婆將玫瑰花打包攞走,而且仲連附近幾張檯嗰都搜刮埋,唔知又有冇人覺得佢貪心呢?我自己當然唔覺得啦,相信嗰鄙視人地打包餅仔同橙嘅人都唔會覺得。事實上,當鬼同人都做同一樣,好多人竟然會有唔同嘅觀感,真係唔知點解嘞!