凍冰冰嘅眾多生平第一次

呢幾日又凍番，救命呀！雖然香港凍極都係10度上下，不過就已經搞到我朝早唔願起身，夜晚唔想沖涼。其實後生嗰時唔算怕凍，起碼唔覺得香港嘅冬天好難頂。記得有一年成年都沖凍水涼，嗰年最凍都試過10度以下。當然，如果凍到會落雪，咁又係另一回事啦。

生平第一次見到落雪係82年喺新疆，嗰時只係八月中，吐魯番同烏魯木齊仲仍然好熱，但係天山上面已經落雪。嗰次原本只係去天池玩，完全冇諗過要上山，所以只係著住一件薄如蟬翼嘅短袖T恤。不過喺天池撞到一班HKU學生，臨時決定同佢地一齊上博格達峰雪線，求其租咗件羽絨背心就頂硬上，仲喺山上住咗一晚添。雖然從來未試過咁凍，但係都勉強頂得住。其實嗰次算唔算落雪都好難講，因為只係疏疏落落嘅雪粉，同我想像中嘅落雪根本係兩回事。估唔到，真正嘅鵝毛大雪，喺十日後竟然俾我見到。

按照原本計畫，玩完天池就會落南疆，逐站玩到落喀什。不過喺庫爾勒聽到人講話巴音布魯克好正，所以又臨時更改行程。巴音布魯克位於天山上嘅一片盆地，嗰度水草豐盛，據聞係中國第二大草原。由庫爾勒去巴音布魯克，首先要到和靜，然後再搭兩日長途車，所以前後用咗三日。由和靜開始，車程主要都係上山路，行行吓仲落起大雪添。其中有一段因為路面情況惡劣，所有乘客都要落車，我就趁機喺路邊堆咗生平第一個雪人。雖然由於時間所限，個雪人只係侏儒版，但係對於未見過雪（雪櫃嗰啲唔算）嘅我，已經覺得好滿足。至於之前喺博格達峰，雪線以上嘅全部都係冰，所以冇得玩堆雪人。

去到巴音布魯克，雖然冇落雪，但係就好大風，感覺上真係好凍。因為冇預到會去啲咁凍嘅地方，帶嘅全部都係薄衫，就算著晒上身都仍然覺得好寒，最難頂係啲外露嘅地方，好似耳仔、頸、同埋對手。唯有即刻走去買咗頂羊皮帽，加埋之前喺庫爾勒嘅一對勞工手套，都叫做頂得吓，雖然上身其實唔係好夠暖。

有樣嘢好奇怪，我著一條牛仔褲都冇問題，但係啲本地人當時已經著緊四條長褲（一條面褲加三條虧佬褲），真係誇張到爆！聽聞嗰度最凍可以去到零下三十幾度，咁啲人冬天係咪要著十條褲呢，就算著得落都行唔到路啦。等我仲以為當地人已經習慣晒，一定比我地啲南方人捱得凍添。

過咗兩三年，唔知邊個同事抽起條筋，話過年想凍吓，要去杭州北京玩。吸取咗上次嘅教訓，今次準備就好充足，厚衫、毛毛帽、頸巾、皮手套呢啲當然不在話下，仲連耳套同leg warmer都出埋添。嗰年華東大雪，杭州完全變咗白色世界，雖然我地去到之後已經冇再落雪，不過有啲地方積雪仍然有膝頭咁深。見到咁多雪，但係就冇再低能到玩堆雪人，始終已經成熟咗唔少。嗰時玩嘅係另一樣更過癮嘅嘢，生平第一次雪戰。因為唔係新雪，所以有少少硬，俾人掟中都幾係嘢架。仲有一樣更甘，就係啲雪跌咗落條頸，嗰種感受真係好攞命！

跟住去到北京，雖然冇落雪，但係昆明湖就凍到結晒冰。生平第一次踏冰而行（溜冰場嗰啲唔算），對腳竟然唔覺得特別凍，亦冇想像中咁跣。其實喺市內有冇雪都冇乜所謂，我最希望係見到長城鋪晒雪。因為長城之前喺夏天去過，感覺唔係太特別，如果有雪應該會靚好多。可惜事與願違，去到八達嶺真係有啲失望，唔止雪都冇滴，周圍仲枯枯黃黃，而且又大風，差啲吹到變人乾。不過都算有啲收穫，因為嗰日生平第一次感受到零下16度低溫。雖然聽起上嚟好係好凍，但係實際上又唔算好難頂，可能係由於有太陽啦。反而另一日喺北京市內，就經歷咗生平第一次凍到由心震出嚟嘅感覺。嗰日氣溫其實唔算好低，大致徘徊喺兩度左右，不過就好大霧，濕度好高。到而家仲記得好清楚，透骨嘅寒意慢慢咁滲入嚟，就算著咗幾多衫都擋唔住。

之後都有去啲凍嘅地方玩，雪亦見過唔少，但係點都冇北京嗰次咁難頂。當然啦，大家可以話我見識少，根本未去過啲真正凍嘅地方。事實係，嗰啲郁吓都零下三四十度嘅地方（例如中國東北），我就絕對唔敢見識囉！哈哈，夏蟲不可語冰，我認架！

博格達峰, 天山, 新疆

雪人, 巴音布魯克, 新疆

巴音布魯克, 新疆

西湖, 杭州, 浙江

昆明湖, 頤和園, 北京

長城, 八達嶺, 北京