一鞋不如一鞋

早兩日攞隻鞋去俾人車番，因為聖誕節旅行嗰陣發現隻左腳有啲爆線。間補鞋鋪大約一個月前幫襯過，係補番同一對鞋，都係爆線，不過係右腳。嗰次佢地做得唔錯，而且屋企附近我淨係知道呢間補鞋鋪，當然唔會揾過第二間啦。

入到去，得一個仔喺度。見佢擰轉咗面搞緊啲類似膠水嘅嘢，我就講咗聲「唔該」。其實人地忙緊，我都唔介意等一陣，點知佢頭都冇擰過嚟，就用好唔耐煩嘅語氣講：「有嘢就講啦！」一啲禮貌都冇，真係俾佢吹脹！算啦，我只係想補番隻鞋，禮貌嘅嘢，bonus嚟嘅啫。咁我就道明來意，話有隻鞋爆咗線想車番。仔聽完冇俾反應，直到搞掂手頭嘅嘢先擰番轉頭，攞起隻鞋睇咗一眼，跟住話：「四十蚊，六點嚟攞！」一個月前攞過另一隻鞋嚟車，當時只係收三十蚊，冇理由今次貴咁多啫，我有啲懷疑可能係個仔新嚟唔知價，就問佢係咪最近加咗價。佢又用嗰種好唔耐煩嘅語氣答番我：「係加咗價，咁你而家做唔做丫！」啲態度惡劣到呢，好似全區得佢一間補鞋鋪咁！事實上，我又真係唔知附近仲有冇其他補鞋鋪囉，咁唯有嗗聲吞咗佢，磅完水攞咗個號碼牌仔走人。其實我一直好懷疑究竟係咪加咗價，呢啲唔使開單嘅嘢，個仔落咗格都冇人知啦！

過咗幾粒鐘去攞鞋，除咗個仔，之前見過嘅另一位師傅都喺度。咁都好，如果隻鞋車得唔滿意，起碼都有得投訴先啦。果然俾我不幸言中，個仔完全係亂咁嚟。啲線步疏到離晒罩，原本車咗接近二十針嘅範圍，佢竟然五針就搞掂。而且爆開嘅兩邊又冇對番齊先車，結果車完都明顯睇得出係爆咗線。肉酸唔在講，好肯定一著上腳就會即刻爆過。咁我當然係唔收貨啦，咪同個師傅發爛渣囉。都算師傅有番啲商業道德，應承幫我做過。

再去攞鞋嘅時候，淨係得番師傅喺度，仔已經唔見咗，唔知係咪俾人炒咗呢？睇番隻鞋，手工回復再之前嗰次嘅水準，即刻收貨走人。

雖然單嘢最後完滿結束，不過無啦啦要行多次，又要受條仔氣，始終都係有啲唔順囉。仔手工差，絕對可以理解，如果唔係使鬼學師咩。但係自己搞唔掂嘅，就揾師傅出馬啦，冇理由搞到pat屎咁，都覺得個客會收貨啫。更難頂嘅係佢啲惡劣態度，簡直當正個客應份帶錢上門乞求佢補鞋咁。呢一代啲仔做嘢冇厘交帶，我當然唔會唔知，不過自從實施咗最低工資，情況又好似再差咗。鬼咩，而家度度都有最低工資，唔補鞋咪做茶仔、七仔、老麥囉，真係處處前景一片秀麗，博炒完全冇問題！諗番我地做仔嘅時候，唔好講話做得差，手腳慢啲都俾人鏟到反艇啦。唉，真係一鞋不如一鞋！

講到一鞋不如一鞋，又真係把幾火。對鞋著咗兩年就已經爆線，仲爆完右腳到左腳。記得09年7月喺智利海邊黃昏漫步，著緊嘅沙灘涼鞋忽然甩底。結果頂到返酒店，換番對Timberland就出去食晚飯。點知食完飯返到酒店，先發覺對鞋又甩埋底。兩對鞋相繼甩底，都算係史上最黑嘅一日嘞！因為行程緊密，第二朝一早就要飛去秘魯，唯有見步行步，步步為營，著住對甩底Timberland先啦。

第二日去到秘魯嘅Cusco，實在太多嘢睇嘞，根本就冇時間買鞋。最後要喺晚飯前先抽到十五分鐘，喺餐廳附近嘅一間運動用品店買咗對鞋。嗰度嘅運動鞋，選擇都唔算少，不過款式就麻麻地，而且價錢相當貴。卒之揀咗一對叫做VASQUE嘅牌子，款式好平實吓，價錢算係比較平，不過折番港紙都要千幾蚊，肯定貴過我對甩底Timberland。VASQUE呢個牌子我未聽過，既然喺嗰度賣到最平咁滯，當然唔會係名牌啦。秘魯嘅人均收入每月只有二千幾蚊，一對普通運動鞋就要成半個月人工，都咪話唔得人驚囉！

講番對Timberland，甩底絕對係非戰之罪，因為已經著咗超過十年。又因為夠舒服，平時又著，去旅行又著，結果咪搞到積勞成疾囉。記得嗰晚將對鞋放入酒店房嘅垃圾桶，真係好唔捨得，始終佢都陪我走過唔少難忘嘅艱苦旅程，包括00年去尼泊爾行山同03年喺東馬上神山。係呀，我個人比較念舊，就算係冇晒利用價值嘅嘢，好多時都唔忍心掉架！

當多數人都貪新忘舊，我反而覺得新不如舊。對VASQUE除咗冇咁舒服，款式亦太平實，所以平時唔會著，只係旅行先著，貪佢感覺上夠硬淨。點知著咗啱啱兩年，舊年7月去土耳其旅行，右腳已經爆咗線。跟著聖誕節喺印度，左腳又爆埋。不過咁，雖然對鞋唔係咁正，我都唔會輕易放棄佢。就係呢對鞋，喺10年陪我登上人生最高點，踏足4900米嘅南美高地，冇功都有勞啦！