繼續唔好搞我後面

之前講開「唔好搞我後面症候群」，即係啲人雖然認同厭惡性公共設有需要，但係就堅決反對設置喺自己屋企附近。

自從回歸以嚟，政府民望不斷下滑，施政困難重重，差唔多乜都有人反對。面對反對聲音，政府無計可施，唯有實行「壞孩子獎勵計劃」。但係咁只會令情況不斷惡化，形成一個惡性循環。試想吓，阿A嘈得大聲政府就投降，咁阿B有乜理由唔有樣學樣先，只有嘈得更厲害囉。

話時話，又唔係只有厭惡性嘅嘢先有人反對，一啲造福廣大市民嘅嘢都會有人唔like，只要佢地認為影響到自己。舉個例，政府揾地起公屋居屋，就往往遇到極大地區阻力嘞。加快增建資助房屋，等有需要嘅人可以上樓，應該已經係社會共識。但係好諷刺，最大阻力竟然都係嚟自社會本身。另外，要攞走少少好處，啲人一樣會大力反對，唔理社會上整體要付出幾大成本都係咁話。例如巴士路線重組，傾極都傾唔埋欄，就係因為地區勢力嘅阻撓。明明一班車得五個客，啲人都話唔取消得，咁巴士又點會有減價空間呢？

講到呢度，可能有人會話「針唔拮到肉就梗係唔知痛啦」。我又唔解釋住，不過就有兩單嘢想同大家分享吓。

話說N年前，嗰時仲係住喺新界。有日喺信箱發現兩張好多字嘅紙，睇清楚啲，原來係業委會發俾住戶嘅函件。內容話反對政府喺屋苑附近設立庇護工場，要求住戶簽完名交番去管理處。函件唔係一份問卷，因為淨係附有反對嘅回條。本人即刻簽名，不過註明贊成。講真，人地只係個樣生得有啲唔同，行動可能有些少不便，根本唔會危害到任何人。咁就叫人唔好死埋嚟，分明係赤裸裸嘅歧視啦，我就真係點都做唔出囉。影響樓價？我唔知會唔會，未必人人都好似業委會班友咁諗啫。公義唔係用把口噏吓就可以得到彰顯，要每個人都身體力行先得架！

另外一單係最近發生嘅事。我住嗰座大廈對正條馬路，馬路兩邊分別有同一機構嘅兩棟建築物。啲人成日要過馬路兩邊走，真係好唔方便，點解唔整番條天橋呢？果然，早排見到施緊工，起緊條行人天橋連接兩邊建築物嘅平台。但係臨近埋尾，工程突然停晒，仲封埋圍板添。有日喺樓下大堂見到張通告，原來有人向區議會投訴，話條天橋影響景觀，業委會就要求住戶表達意見。結果過咗成兩個月，工程先繼續番。講真，條天橋距離我座大廈二百幾呎，又有幾影響景觀呢？因為唔想見到遠處有條天橋，就唔肯與人方便，又好似自私咗少少囉！

人性本自私，個人利益永遠凌駕社會整體利益，人人都寸步不讓，呢個先係問題所在。我就希望聽日即刻有普選，最好係選到嗰啲口口聲聲話為民請命嘅扮民政客添。咁當然解決唔到問題，不過起碼可以俾香港人知道，普選並唔係一服起死回生嘅靈藥。香港人嘅心態一日唔改變，就算邊個做凸首都冇用囉！

Bhaktapur, Nepal

十評香港人之一：唔好搞我後面！

聲明：文中提及之「香港人」乃指部分香港人，本人絕無以偏概全之意。雖無確實數據支持，唯本人相信此等「香港人」絕非極少數。

政府申請擴建垃圾堆填區撥款，先有將軍澳居民強烈反對，連保皇黨都「順應民意」倒戈而觸礁。嚟緊輪到屯門同打鼓嶺嘅撥款審議，睇怕都係凶多吉少。屯門居民有樣學樣，又搞絕食抗爭。扮民議員唔使講，一定唔會拂逆民意，甚至連土皇帝都反對，你話係咪凍過水呢？

扮民議員會話政府唔理民意，闖關失敗係咎由自取。不過呢啲議員口中嘅「民意」，其實有乜嘢基礎呢？冇錯，嗰三區嘅居民一定係反對架嘞。但係如果問埋其他市民，結果又會係點呢？正如綠公胃所講，相信冇議員會認為唔需要有堆填區，其實絕大部分香港人都會認同啲厭惡性公共設施嘅存在必要。不過搞時搞，你搞第個好喇，千祈唔好搞到我！此之謂「唔好搞我後面症候群」。

「唔好搞我後面症候群」唔係香港獨有，亦唔係今日先出現，不過回歸之後特別嚴重，應該係同香港人嘅「維權」意識大大提高咗有關。舉幾個例，麗晶花園居民反對喺附近設置愛滋診所、梅窩居民反對正生書院遷入區內空置校舍、骨灰龕選址處處碰壁，相信大家一定唔會冇印象。講真，啲厭惡性公共設施冇人會鍾意，但你又唔搞得，我又唔搞得，咁究竟可以點收科呢？

以擴建堆填區單嘢為例，基本上只有三個「可行」方案。一，原區擴建。呢個方案最簡單，理論上阻力最細，所以政府揀咗。二，另覓新址。一來無中生有必然複雜好多，而且阻力肯定更大。揀有人住嘅地方，居民反對聲音實勁過原本嗰三區。揀冇人住嘅地方，基本配套有排搞，而且啲環保人士一定同你死過。三，放棄擴建。呢個方案嘅「可行」之處係反對聲音最少。不過現有堆填區就快爆滿，問題已經迫在眉睫，而家最需要嘅係實際行動。啲垃圾議員講乜嘢源頭減廢，只係乘機抽水，根本解唔到燃眉之急。

其實講嚟講去，都係原區擴建最實際。睇到呢度，應該已經有人懷疑我唔係住喺嗰幾區，所以先喺度講風涼話。冇錯，本人的確唔係嗰幾區嘅居民。不過我住嗰區都有啲極具厭惡性嘅公共設施，而且為數唔少添。如果唔係，隔籬區明明全部係豪宅，點解我住嗰區嘅樓價會平一大截先。

言歸正傳，話原區擴建最實際，係因為整體影響最少。佢地原本已經有堆填區，就算擴建咗，情況都唔會比而家更差啫。其實我都有少少懷疑，情況係咪好似啲居民講到咁惡劣呢？我細佬住喺康城（唔係法國嗰個），上佢屋企都聞唔到臭味。由佢屋企行去將軍澳站，沿路一樣聞唔到。我問過佢，佢話基本上冇乜。佢以前租開同一個屋苑，如果真係咁難頂，佢後來都唔會買啦。

有人話，要呢三個區承擔全港製造嘅垃圾好唔公平。咁我又反問一句，係咪要全港十八區都有垃圾堆填區先叫做公平呢？上面都講過，我嗰區亦有啲惡啃嘢啦，相信好多其他區都唔多唔少會有啲咁嘅嘢囉。又有人話，點解唔喺山頂都整啲厭惡性嘅嘢呢？嗱，呢啲就係仇富心態嘞。喺資本主義社會，有唔同階級係必然嘅事，如果夾硬將所有嘢拉勻，咁只會令人失去上進動力。如果喺豪宅區都整啲厭惡嘢，肯定會令樓價大跌，政府賣地收益亦會少好多，最終會影響埋低下階層嘅福利囉。講真啦，厭惡性設施嘅影響已經反映咗喺樓價，如果唔係有惡頂嘢，啲人邊有咁易上車先。自己上咗車就想將啲惡頂嘢踢走，過俾第個，咁係咪太著數咗啲呢？

補充：
講漏咗添，啲惡啃嘢始終都要有人啃，政府應該為受影響社區提供一啲補償，等啲居民條氣順番少少囉。

Garden Route, South Africa

Garden Route, South Africa

怪雞諜變

霸權主義國家特工，因為睇唔過眼所屬情報機關嘅嗱喳手段，毅然決定投奔自由國度，仲帶埋大量機密資料出走，誓要將有關方面嘅惡行公諸於世。為咗令人估佢唔到，特工冇揀到西方國家做落腳點，而係去咗一個惡名昭彰嘅竹幕城市同接頭人會合，實行佢嘅爆料計劃。

以上疑似間諜電影橋段，相信冇人估到會喺香港發生。不過作為荒謬之城，香港又有乜嘢會冇可能發生呢？

斯諾登單嘢相信大家都好清楚，喺呢度就唔再詳述嘞。不過事件揭示咗一啲既荒謬又搞笑嘅怪雞嘢，又不妨攞嚟講吓。

話說斯諾登身分曝光之前，外交評論員Steve Clemons喺華盛頓機場偷聽到幾個特工討論洩密事件，仲話要令洩密者同爆料記者「消失」添。哈哈，真係笑死人，美國特工係咪低能成咁呀，居然俾人偷聽到！如果中情局長最後因為單嘢引咎辭職，奧巴馬絕對應該考慮揾呢位評論員頂上囉。

同樣搞笑嘅仲有奧巴馬。單嘢其實喺習近平訪美之前已經爆咗出嚟，但係奧巴馬仍然將網絡安全議題擺上檯，高調批評中國黑客入侵美國政商機構。結果斯諾登喺習奧會期間再爆料，話美國黑客曾經多次攻擊中國網絡，公然摑咗奧巴馬一巴。究竟奧巴馬係欠缺應變能力，唔識轉個話題避重就輕，定係自信爆棚，以為可以隻手遮天？點都好啦，此人面皮之厚，都可謂舉世無匹囉！

美國人嘅反應亦相當出人意表。照理喺一個民主制度咁成熟、人權意識咁高漲嘅國度，對於政府大規模侵犯國民私隱，啲人冇理由可以容忍啫。事實係，美國人嘅反應竟然出奇咁冷淡。雖然有人喺白宮網站留言，要求特赦斯諾登，但係過咗好多日都集唔齊十萬個簽名。如果換轉單嘢喺香港發生，睇怕即刻五百萬人上街都有份。廿三條立法都係講吓啫，啲人就已經發晒癲嘞。香港人又知唔知，其實美國都有愛國法，而且比廿三條更辣添。只要你講錯一句嘢，隨時會未經審訊就俾人拉咗去屎塔那麼黑獄囉。咁點解美國人會容忍啲咁違反人權嘅法例呢？因為佢地願意為人身安全同社會穩定作出少少個人犧牲。有美國官方發言人為「稜鏡」辯護，話有關行動根本唔會對奉公守法嘅人有影響。廿三條壇嘢，港府都係咁講，點解又會冇人buy呢？香港人，如果要學美國佬，咁唔該你地就學足全套啦！

唔止美國人反應冷淡，香港人最初對單嘢亦唔多關心。平時將人權公義掛喺嘴邊嘅扮民政客，竟然冇一個走出嚟評論吓美國政府嘅做法。直到斯諾登再爆料，話香港亦係美國黑客嘅攻擊對象，長毛先帶埋班嘍囉操去美國領事館做場show。瘦田冇人耕，耕開有人爭，幾個建制派議員不甘示弱，跟住亦喺垃圾會開show。頭二啖湯都俾人飲晒，啲後知後覺嘅扮民議員先識跟風，咁就執輸啦。不過有幾個平時最多嘢講嘅扮民政客，豬如李柱男同人渣傑之流，到今時今日都仲未表過態，你話係咪好奇怪呢？其實一啲都唔怪，呢班友根本就唔敢得罪美國佬，唔通佢地唔驚下次入境美國，喺機場俾人通櫃咩。而且我相信如果香港將來有乜依郁，班友會第一時間走去美國囉，所以俾個尿兜佢地做膽都唔敢講美國佬半句壞話啦！

不過咁，啲扮民政棍又點會放過任何可以抽水嘅機會呢？斯諾登離開香港之後，何俊男就即刻走出嚟認屎認屁，又話代表人地，又話同人慶祝生日，講到不知幾friend咁。都算嘞，佢要黐人啲金糠係佢嘅事。最頂唔順係條友竟然學人玩爆料，話有代表政府嘅神秘中間人接觸過斯諾登，質疑中央介入香港事務，破壞一國兩制。雖然後來證實佢只係狗噏，但係就即時俾咗美國佬一個狂插香港嘅口實。講真，就算北京真係有派人游說斯諾登離開香港又點，咁做都只係屬於外交手段啫，點算介入香港事務呢，除非係派人夾佢走啦。其實斯諾登選擇離開香港，當然衡量過個中利害，對香港嚟講亦係最理想嘅事態發展。何俊男條狗屎狀棍無啦啦走出嚟噏三噏四，我只可以贈佢八個字：成事不足、敗事有餘！

至於港府係咪有心放生斯諾登，我就唔評論嘞。總之揸正手續嚟做，基本上係立於不敗之地。不過美國佬要轉移視線，自然會諉過於人，香港被插可謂在所難免。哈哈，插咪插囉，萬大有阿爺撐住，你慌插得死？！單嘢唔止揭示美國佬有幾霸道、無賴、同傲慢，更俾世人睇到美國司法機關有幾兒戲。美國佬指吓自己個鼻就要港府幫佢拉人，但係就連疑犯嘅全名都搞唔清楚，護照號碼又冇提供。更甚者，個疑犯都走咗九世，有關方面先通知港府話佢本護照已經被註銷。港府要求澄清一啲資料，美國佬就睬你都傻。事後仲質疑港府點解要咁多資料，話喺電視認樣拉人咪得囉。嘩，唔係兒戲得咁緊要啩！講真，咁嘅畸屎，幫你係人情，唔幫係道理囉！

話時話，斯諾登條友又真係幾頂癮，陰啲陰啲咁爆料，長爆長有，直頭好睇過連續劇。佢又爆美國佬連盟友都監聽埋，激到德國肥默扎扎跳，仲話要當面質問奧巴馬添。如果大家以為美國佬會眾叛親離，等住睇六國大封相，咁就大失所望嘞。肥默喺G8峰會見到奧巴馬，咪一樣笑面迎人，當乜都冇發生過。單嘢最多只係令美國政府尷尬吓，根本唔會有乜實質影響。話明係惡霸，又點會咁易俾你打得殘先！

惡霸究竟有幾惡，睇番幾日前發生嘅一單嘢就知嘞。話說玻璃維亞總統訪問完鵝羅斯，返歸途中取道歐洲加油。點知西葡意法等國唔俾總統專機進入領空，搞到人地差啲油盡機枯，最後被迫降落維也納。奧地利警方仲上機搜查，證實斯諾登唔喺機上先肯放行。單嘢好明顯係美國佬喺背後指使，玻璃總統呢鑊簡直俾人踩到上頭殼頂囉。講真，美國佬只係「懷疑」伊拉克擁有大殺傷力武器就打到人地冚包散，而家搜吓機咁小事，濕濕碎啦。講開又講，如果嗰架係鵝國總統專機，你估同樣情況會唔會發生呢？所以單嘢又一次印證咗一句名言：弱國無外交！

想像吓，如果香港仍然係英國殖民地，又或者97後獨立咗，咁斯諾登單嘢會發展成點呢？好肯定，香港會做小乖乖，將斯諾登交番俾美國。又或者更可能嘅係，斯諾登根本唔會揀香港做落腳點。人權公義、司法獨立？你諗都咪諗呀！抗拒香港回歸嘅香港人，你地幾時先肯醒呢？！

Vardzia, Georgia

Vardzia, Georgia

開眼盲人

「43萬香港人，你找到自己嗎？」

無意中喺網上見到以上標題，即刻覺得好唔舒服，因為本人有5%機會俾人強姦咗。唔明？本人明明冇去遊行，如果夾硬將我都計埋喺裏面，咁仲唔係強姦？！都係唔明？咁就要聽我分析吓喇。

民陣公布今年71遊行有43萬人參與，警方話高峰期有6.6萬，而兩位港大學者（鍾庭耀、葉兆輝）嘅數字就分別係9.3萬同10.3萬。基於存在主觀政治立場，民陣同警方嘅數字都未必信得過，本人傾向相信兩位學者嘅統計。就當佢有10萬，即係話民陣報大咗33萬。以香港人口700萬計，明明冇去遊行又被屈去咗嘅機會就係33萬／690萬，接近5%。

琴晚是但台新聞就提到民陣同其他單位公布嘅數字存在極大差距，報導咗各有關單位嘅統計方法，仲有參與統計嘅學者接受方問。其中鐘庭耀同警方都係喺軍器廠街做統計，得出嘅數字分別係6.7萬同6.6萬，竟然出奇咁接近。鐘庭耀再做電話調查，根據中途加入同離隊比率作出調整，而警方就冇做呢樣嘢，所以最終數字差距大咗。葉兆輝就用咗唔同嘅統計方法，喺呢度就唔詳述嘞，反正人地講得清清楚楚。而一向唔肯公開點做統計嘅民陣，今次都提供咗資料。佢地話係點算銅鑼灣、灣仔、同金鐘嘅平均人數，再乘番1.5。至於1.5呢個參數究竟點得出嚟，佢地就只係話過往一直都係咁做，冇再進一步解析。是但台又問到喺嗰3個統計地點得到嘅數字，民陣竟然話唔可以公開。吓，呢啲統計數字都算係機密，唔公開得？咁樣提供資料，真係令人失笑（或爆笑）。難為班友仲成日插政府黑箱作業，其實佢地自己先係黑中之黑囉！

跟住就係葉兆輝接受訪問，佢話啲政治團體成日誇大遊行人數，意圖增加政治本錢，但係佢地背棄咗誠信同互相尊重，其實係虛耗緊香港嘅本錢就真。葉生又話數字多少唔係重點，最緊要係能夠解析到，同埋經得起驗證。

聽完葉生一席話，本人即刻對香港學者有啲改觀。呢幾年，香港啲所謂「學者」見到風頭火勢，紛紛調整策略，總之係政府嘅就插，冇人敢逆「民意」講番一兩句公道說話。久而久之，喺本人心目中，「學者」幾乎已經等同「牆頭草」。好似葉生咁敢言、咁有吉屎嘅學者真係近年少見，本人喺度俾100個like佢！

不過睇怕葉生呢幾日一定俾人插爆，如果佢有飛屎卜，肯定會受到洗版式轟炸添。香港實在有太多既盲目又是非不分嘅人，總之唔like就插，根本唔會同你講道理。好似民陣咁，遊行人數作到狗咁大，既解析唔到計算方法，又唔肯公開原始數據接受驗證，但係仍然有大把人信，你吹咩！咁係因為啲人已經俾人洗晒腦，冇晒獨立思考能力，唔識從多角度分析事物。

講到洗腦，除咗民陣之流，啲淨係識譁眾取寵嘅爛傳媒都要負好大責任。有啲新聞媒體報導71遊行，標題只係用民陣公布嘅43萬。呢種只求吸引眼球而罔顧資訊可信性嘅做法，根本就係違背傳媒道德。就係呢啲偽民主派同埋爛傳媒，喺香港散布用普世價值包裝嘅糖衣毒藥，製造咗一大班ABC眼撐到大一大、唯獨心眼不明嘅開眼盲人，真係唔得佢死！

Arequipa, Peru

個腦裝乜？

六四當晚睇電視新聞，豬聯會話有十五萬人參加維園燭光晚會，警方就話有五萬四千人。兩個數字爭咁遠，你會信邊個多啲？我就覺得兩方面嘅估計都未必可靠，不過相信警方嘅數字會比較接近現實。香港嘅所謂民主派，為求達到政治目的，從來都不擇手段，六四七一嘅遊行集會人數，鑊鑊都作大作到離晒罩，根本就信唔過。睇番部分媒體（豬如爛生果同大紀猿）嘅網上報導，竟然淨係引述豬聯會嘅數字，而冇提及警方嘅數字，完全視讀者知情權為無物。呢啲咁嘅媒體，恐怕比豬聯會更唔可信。

講真，我都預咗豬聯會實會作大，估唔到嘅反而係班友竟然咁克制，只係作大三倍咁少囉。今年天公造美，不停落狗屎雨，啲人個個擔晒遮，根本唔可以企（或坐）得太密，要填滿維園草地話都冇咁易。而且雨遮嘅面積比人頭大得多，由高處望落去真係好墟撼。豬聯會豬公呢鑊簡直捉到鹿唔識脫角，就算作夠五十萬都有人信啦！

鏡頭一轉去到銅鑼灣，見到學民屍潮班細路玩緊街站，仲同警察發生齟齬。雖然班友都係搞事，但係反而冇豬聯會豬公咁令人厭惡。始終佢地仲係細，而且涉世未深，行事有啲衝動，但係唔會有太多利益計算。我地都係過來人，亦曾經有過熱血激情，自然明白有赤子之心並唔係壞事。班細路搞事得嚟讀書又掂，實在不忍深責。不過奉勸佢地，而家世道唔同晒，啲人已經冇以前咁單純，年輕人都要擦亮眼，認清楚邊個係拐子佬。

鏡頭一轉又去到西環，見到有人玩緊BBQ。原來係一個叫做「香肛人優先」嘅「政治」組織，為咗抗衡豬聯會壟斷搞嘅燒烤晚會，話要合法燒五星旗喎。現場所見，除咗一個燒烤爐，就只得小雞三幾隻。再睇真啲，原來係幾件疑似MK仔同援交妹嘅物體，霎時令人倒抽一口涼氣。同樣都係仔妹，點解會同學民屍潮嗰班爭咁遠嘅呢？呢幾件嘢三尖八角、甩皮甩骨、樣衰格賤、望之不似人形，好難唔令人聯想到嗰啲讀書唔成、成日周圍撩事鬥非嘅童黨囉。所謂五星旗仲搞笑，原來係幾塊有星星通花嘅火腿片，班友簡直係食飽飯冇嘢做。哈哈，唔通佢地真係諗住食完火腿，順便喺中X辦門口大解？除咗無聊，班友仲死蠢添。想要搶人地客，結果自己拍烏蠅，真係瘀到爆。

見班友咁死蠢，本人就上去佢地嘅飛屎卜睇吓，話唔定會發現更多笑料。果然不出所料，成個網頁都係腦殘人士講埋晒啲白痴嘢。首先，班友開宗明義話香港人唔係中國人喎。腦殘人士最明顯嘅特徵係冇邏輯思維，講嘢自相矛盾。香港係中國領土，全名係中華人民共和國香港特別行政區。除非擁有外國國籍，而又放棄咗中國國籍，否則香港人必然係中國人，無論你自己認唔認都好。班友又有冇問過父母（或祖父母）係咪中國人呢，唔通佢地以為自己係石頭爆出嚟嘅？仲有，班友又憑乜咁講呢，佢地有冇問過其他香港人先？所以班友根本唔可以代表香港人，佢地只可以代表香肛人囉！另外，班友又擅自篡改香港嘅語文政策，話「香港的法定語言為英語及粵語」。喺「香港政府一站通」網站，有關語文部分係咁講：「香港的法定語文是中文和英文」。有少少常識嘅人都知道，中文同粵語並唔對等。究竟係班友連咁嘅常識都冇，定係佢地以為本土派大晒，連基本法都唔使跟？哈哈，究竟班友個腦裝乜嘅呢，唔通就係相中嗰啲？！

腦殘都未算恐怖，集體腦殘先得人驚。「香肛人優先」嘅飛屎卜有兩萬幾個likes，假設有半數仲在學，咁都咪話唔大鑊。香港推行融合教育，腦殘一樣入讀主流學校，一班有一件都死得人啦。如果你係中文老師，有件腦殘話文言文、白話文、唐詩宋詞元曲都唔係香港法定語文，佢有權唔讀，你會點做呢？

Horse dung, Nepal

投我以木瓜

選擇題：如果有人揾個木瓜掟你，你會點應對呢？以下答案三選一：

(一) 報之以瓊琚　－　送番塊美玉俾對方講和，咁最合乎中國人息事寧人、以和為貴、以德報怨嘅性格。
(二) 報之以番茄　－　以牙還牙、以眼還眼，用同等殺傷力嘅番茄掟番對方。
(三) 報之以榴槤　－　十倍奉還，成個榴槤（當然連埋殼）兜頭兜面車埋去。如果冇榴槤，用大樹菠蘿都得。

揀(一)表示你心存仁厚，但係因住好心冇好報。揀(二) 代表你好講原則，事事要求公平公正。不過原則唔值錢，雖然未必使捱餓，但係發達實冇份。揀(三)你就醒喇，簡直係王者之材呀！點解？睇吓以下單實例你地就明架嘞。

話說N年前，㗎仔挑起太平洋戰爭，失驚無神偷襲珍珠港。美國佬似乎早有預感，一早調走太平洋艦隊嘅主力航母，留番啲廢銅爛鐵任㗎仔炸。結果美國參戰，請㗎仔食咗兩粒原子蛋。雖然話係一報還一報，但係以破壞力而言，相去何止十倍。

太平洋戰爭自此結束，美國成為大贏家，仲收咗日本做藩屬國。話時話，我最唔鍾意聽到「抗戰勝利」呢四個字，因為中國根本冇贏過。「勝利」云云，只不過係自欺欺人。如果真係戰勝國，有乜理由會全無話事權，連被侵佔嘅領土都收唔番？事實上，㗎仔亦從冇就侵華暴行誠心道歉。中國人以勝利者自居，㗎仔只會竊笑、恥笑、繼而會心微笑囉。

言歸正傳，咪以為硬食兩粒原子蛋，㗎仔就會憎死美國佬。事實啱啱相反，自從戰敗，㗎仔搖身（或尾）一變，變成一條忠誠的狗，對美國佬言聽計從。不過對日本呢隻看守遠東門戶嘅柴犬，作為主人嘅美國似乎唔係好有愛心，竟然縱容駐沖繩美軍姦淫當地民女。所謂狗都有火，一隻叫做橋下切嘅柴犬就走出嚟吠咗兩嘢，建議駐沖繩美軍如果有生理需要，可以考慮光顧當地色情服務。仲同場加插一番偉論，話戰時嘅慰安婦制度係有必要性。小橋偉論一出，中韓等國立即譁然，齊聲抗議。美國佬見柴犬倒米，隨時影響拉攏南韓圍堵中國嘅如意算盤，所以亦速速出言譴責。

其實小橋都未算吠，只係胡胡咗兩聲啫，點都估唔到主人會咁大反應。不過忠犬即係忠犬，最識睇主人眉頭眼額，見到主人唔like，小橋就即刻撲出嚟搖尾乞憐，承認侮辱咗主人嘅高尚品格。但係對於慰安婦言論，小橋就立時展現柴犬嘅堅忍特質，拒絕收回。

講真，我又睇唔出小橋嘅言論對美國佬有幾侮辱。美國大兵鍾意叫雞就係人都知架啦，如果唔係灣仔點會咁旺先。小橋只係建議班友做番佢地做慣嘅嘢啫，咁又何錯之有呢？而佢嘅慰安婦言論就真係冇人性嘞！哈哈，簡直九唔搭八，狗又點會有人性呢？本人誠心認錯，決定收回之前嗰句。只可以話，小橋講得出啲咁嘅嘢，真係連狗都不如！

如果㗎仔只係徵召本土㗎妹做慰安婦，咁小橋點講都得，因為呢啲係佢地嘅內政，外人不宜干涉。但係佢地強迫中韓婦女做性奴，咁根本就係強姦、輪姦！事實上，強姦都未能夠滿足㗎仔嘅獸慾，班友仲要玩埋先姦後殺、殺完再姦添！小橋嘅言論亦暗示侵略戰爭有必要性，條友根本就唔當中韓民眾（唔單止婦女）係人。佢事後只選擇向美國道歉，亦正正說明咗呢一點。相信日本一眾右翼分子嘅心態都係一樣，只會敬畏降伏佢地嘅美國佬，而對所謂戰勝國嘅中韓，根本就唔使尊重。

呢個柴犬故事說明咗一個千古不易嘅道理，就係「勝者為王」，拳頭夠硬先至唔使仰人鼻息。講到呢度，可能有人會以為我同國內班主戰憤青冇乜分別。咁就錯嘞，要十倍奉還俾人，都要自己夠實力先得，中國而家仲未係時候囉。而且打狗都要睇主人面，㗎仔有美國佬撐腰，實在不宜輕舉妄動。中國而家最需要嘅係韜光養晦，相信呢個亦係中國領導人自改革開放以來嘅方針。美國佬當然睇到呢點，所以先千方百計圍堵中國，唔俾中國有機會休養生息，威脅到佢嘅王者地位。

所謂「人不為己，天誅地滅」，站喺佢地嘅立場，美國佬咁做絕對冇錯。我最唔明係點解會有咁多中國人（包括香港人）幫美國佬拖，係都要搞到中國立立亂。中國人呀中國人，唔通你地真係要見到中國亂過伊拉克同敘利亞先安樂？至於唔認自己係中國人嘅香港人，中國亂到九彩對你地可能無關痛癢，因為你地唔知乜嘢叫做「覆巢之下無完卵」，但係到你地知道嘅時候就太遲架喇！如果咁討厭中國就學陳X誠移民去美國啦，唔好喺度搞亂檔喇！

木瓜

Gemstone Museum, Rio de Janeiro, Brazil

Fresh market, Yerevan, Armenia

Jackfruit tree (大樹菠蘿), Zanzibar, Tanzania

點解唔可以愛國？

今日問個白痴問題，有冇邊個國家嘅公民會對「愛國」呢個詞極度反感嘅呢？問題問得白痴，答案亦非常反智：「有，就係中國（當然包括香港）！」

好很奇怪，今年豬聯會嘅六四晚會口號竟然係「愛國愛民，香港精神」。唔得，繼續講之前要澄清吓先，否則實俾人鏟到反艇。本人都好希望中國政府可以從新評價六四，好想中國進行改革，但係就絕對唔認同豬聯會嘅方針。唔通班友真係唔知「揠苗助長」點解？言歸正傳，豬聯會嘅全名係「香港市民豬援愛國民主運動聯合會」，同句口號夾到漏晒油，本來一啲都唔奇怪，奇就奇在出自李乜人把口囉。條友愛國？我就打死都唔信嘞！不過更很奇怪都仲有，句口號竟然俾人鏟到飛起，反對聲音中港兩邊都有。最後豬聯會怕影響入場率，決定取消呢句口號。

究竟點解「愛國」會咁趕客呢，等我又分析吓先。

「愛」好簡單，唔使多講。「國」亦唔複雜，就係土地加上人民。喺「愛國」嘅含義，「國」仲包括埋血脈同文化嘅承傳，但係並唔包括政權。中國幾千年歷史，經歷眾多朝代，換過無數制度同統治者。不過對於中國人嚟講，中國始終得一個。政權只係客觀歷史，而「愛國」就係一種源自相連血脈同文化承傳嘅主觀情懷，其實兩者並無衝突。例如，我地唔會因為紂王嘅暴政而唔愛中國。如果你覺得中共統治層不得民心，可以話佢地竊國，可以要求佢地落台，咁正正表示你愛國。但係因為中共當政就話唔可以愛國，就真係荒謬絕倫囉！

究竟點解咁荒謬嘅嘢都會發生呢？咁就要分開中港兩邊睇嘞。

首先睇吓內地，反對「愛國」嘅代表人物係「天安門母親」丁子霖。引述明報報導，佢話「愛國」已被政權曲解為「愛黨」，認為豬聯會用「愛國」一詞「愚蠢」、「莫名其妙」，要求豬聯會「需要好好反思」。丁老太憶子成狂，自從六四事件，佢嘅人生就俾仇恨完全佔據，毫無理性可言。人地發表同佢立場有異嘅言論，佢話冇人性。人地唔表態亦唔得，都係冇人性。而家連人地點樣理解「愛國」都要管，專橫霸道到冇人有，直迫江娘娘當年嘅風範。雖然丁老太嘅遭遇值得同情，但係咁唔表示佢可以將發癲行為合理化。其實此人可以不理，豬聯會就此投降，真係令人失望。

至於香港，荒謬嘅嘢日日有，而家再多一件都好正常。香港人有身分認同障礙，都已經唔係新聞，冇人挺身反「愛國」先怪啦。有人揸住本BNO就當正自己係英國人，香港只係旅居之地，遲早有一日會返祖家。有人身在曹營心在漢，逢親示威遊行都不忘帶埋枝龍獅旗，日日期盼香港回歸英國。有人甚至喺白宮網頁留言，要求美國出兵解放香港添。哈哈，其實我都唔敢肯定架，班友去留言嗰個會唔會係白宮痔瘡膏嘅網頁呢？總之好多香港人根本就唔認自己係中國人，而且仲憎死班大陸哩添，要佢地嗌嗰句「愛國愛民」口號，又真係強人所難嘅。如果真係要愛，班友都只會愛英國同國囉。再唔係，愛日本都得。㗎仔有型，㗎妹又索，班蝗蟲點會有得比先！

講到尾，愛唔愛國自己絕對做得主，呢樣嘢冇得迫。不過要生活喺一個自己極度唔鍾意嘅國家，咁又好辛苦啫，何苦呢？如果真係咁唔愛，不如考慮吓分手啦！

天山軍營, 新疆

巴音布魯克, 新疆

巴音布魯克, 新疆

巴音布魯克, 新疆

珍珠灘瀑布, 九寨溝, 四川

五彩池, 九寨溝, 四川

長空棧道, 華山, 陝西

八達嶺長城, 北京

玉龍雪山, 麗江, 雲南

蛇年說蛇

蛇年伊始，喺度同大家拜個年，恭喜發財！

話時話，五月粽都就嚟有得食，而家先拜年又好似遲咗啲。不過古語有云「十月都係拜年時」，法定拜年時限都只係大約過咗一半啫，唔緊要啦！

本來仲諗住講番啲有蛇字嘅祝福語句，但係搜索枯腸，竟然連一句都諗唔到。事實上，中國人對蛇有偏見，有個蛇字嘅成語或俗語絕大多數都帶負面意義。例如蛇蠍心腸、佛口蛇心、畫蛇添足、蛇鼠一窩、蛇頭鼠眼、死蛇爛鱔，多到不能盡錄，總之冇一樣係好嘢。

我當然明白，蛇會咬人，令人產生恐懼絕對正常。但係老虎都會咬人，點解山君又冇俾中國人妖魔化，仲得到極度尊崇呢？如果係由畏而生敬，咁點解蛇又得唔到同等待遇呢？一句講晒，呢啲咪歧視囉！

睇番世界各地其他古文明，蛇被視為神祇化身嘅例子絕對唔少。東南亞好多地方都有蛇廟，印度有蛇節，古埃及法老王嘅頭飾有條眼鏡蛇，瑪雅文化裏面嘅羽蛇神更係至高無上。至於西方文明，咪以為鬼佬怕啲核突嘢，蛇就唔會有任何位置。喺希臘神話裏面，蛇擁有神奇治病能力，而醫神嘅法器就係一枝蛇杖。無獨有偶，相傳摩西都鍾意玩蛇，而且都有枝蛇杖，可以治療蛇咬。時至今日，蛇仍然係西方醫學象徵，好似雞珍打骰嘅世衛，徽號都有一條蛇。

唯獨喺中國，蛇一直受到貶抑，真係百思不得其解。相傳中國人始祖，女媧同伏羲都係人頭蛇身嘅物體。而中國人尊崇嘅龍，亦極有可能係由蛇脫胎而生。與其叫龍的傳人，不如話中國人係蛇的傳人，咁可能更加貼切。不過中國人硬係要尊龍而貶蛇，對比番龍B同蛇B嘅出生率已經可見一斑。其實，咁係咪有啲數典忘祖呢？

我就相信龍蛇本為一體，蛇年說蛇更係百無禁忌。既然摷唔到有蛇字嘅祝福語句，咁唯有以蛇代龍，絕對冇不敬之意。喺度祝大家蛇年行蛇運，日日蛇精虎猛、蛇馬精神！好似我咁有關節問題嘅朋友，祝你地蛇行虎步、健步如飛！仲係單身嘅朋友，祝你地跨鳳乘蛇，今年揾到另一半！想嫁（或娶）個有錢人嘅朋友，祝你地所願得償，早日攀蛇附鳳！仲喺職場拼搏緊嘅朋友，祝你地鯉躍蛇門、步步高升！總之一句講晒，祝大家蛇有蛇路、路路暢通！

Amazon forest, Manaus, Brazil

Douz, Tunisia

Statue of Ramesses II, Abu Simbel, Egypt

Feathered Serpent, Chichen Itza, Mexico

The Brazen Serpent, Mount Nebo, Jordan

百變頸枕

搭飛機成日見到人用吹氣頸枕，好似好過癮咁。但係我就唔會用嘞，一來箍實條頸唔舒服，而且面料唔透氣，隨時焗到出晒汗，就算做咗絨面都係咁話。

最近跟鴨仔團送咗個頸枕，呢個就唔同嘞，冇晒以上缺點，因為唔係吹氣嗰隻。個頸枕用咗透氣面料，裏面係細細粒嘅發泡膠珠，感覺好柔軟、好舒服。不過咁，我嘅評語只有五個字：得物無所用！

個頸枕摺唔埋，去旅行當然唔會帶件咁bulky嘅嘢。而且件嘢喺屋企又用唔着，咁仲唔係得物無所用？總之屋企又多咗件雞肋贈品啦。

講真，個頸枕都算幾精美，揼咗佢又好似嘥啲。咁唯有搜索枯腸，諗吓件嘢仲有冇留低嘅價值啦。哈哈，卒之俾我諗到喇，就係用佢嚟玩變身（見圖）！

齊天大聖有七十二變，我就覺得少咗啲嘞，有件道具幫手，起碼都要做到百變啦。雖然而家只得六種變化，不過以本人嘅創意，要諗多九十四種都只係時間問題啫。無聊？我認架！哈哈，古人都講啦：不作無聊之事，何遣有涯之生！

頸枕

大長今

鹹蛋超人

Spartan

Miffy

波霸

籮霸

剪影情人橋

本人縱橫影圈幾十年……哈哈，我當然唔係打牌打到思覺失調，以為自己做咗大明星！其實「影」係指攝影，而「縱橫」就係橫衝直撞、毫無章法嘅意思。冇錯，本人影咗幾十年相，一向都係有拍無類、見乜影乜，總之亂影一通啦。雖然話有拍無類，但係有啲題材就完全冇接觸過，因為本人只係去旅行先會影相。例如人體寫真，試問跟鴨仔團又點會有機會影到呢？哈哈，除非係日本仔最鍾意嘅採花團啦！

話時話，有一種唔算好特別嘅題材，本人都係甚少影，而且就算影咗，效果滿意嘅亦少之又少。影呢種題材，唔需要乜嘢特別技術或高級器材，難度一啲都唔高，相機用auto mode就搞掂。之所以少影，係因為跟團旅行好少會遇到適合嘅場景。聰明嘅你相信已經估到，我講緊嘅係剪影。

剪影一定係逆光拍攝，主體嚴重曝光不足會令表面細節消失，得番個輪廓。想有滿意效果，主體最好係輪廓分明、線條唔過於呆板，如果能夠帶有美感、動感、或趣味性就更好嘞。而且暗部（主體同前景）不宜有太大片死黑，光部（背景）亦不宜有太大片死白。如果暗部面積太大，最好能夠保留番適度細節。同理，光部面積太大容易流於單調，如果真係細節欠奉，起碼都應該喺色調上有啲變化。講到呢度，大家可能已經暗笑緊在下冇料扮四條。其實我只係講出一個初學者嘅體會，同埋解釋番點解會咁難遇到適合嘅場景啫。嚴格啲嚟講，本人連初學者都未算，因為我根本就冇學過攝影。至於啲大師級人馬，自然能化腐朽為神奇，完全唔會受呢啲限制啦。

基於上述條件，如果以戶外環境嚟講，最適合拍剪影應該係日出或日落時分。不過鴨仔團甚少會安排睇日出日落，一來避免啲團友披星戴月咁辛苦，亦唔想延誤用餐時間。如果安排得睇日出或日落，咁嗰個一定係當地旅遊指定動作，而有關景點就必然係人山人海。叫得做鴨仔團，自然係樣樣都趕，絕對唔會安排團友早幾粒鐘去霸定靚位。通常去到景點都已經插針唔入，莫講話影靚相，就算見得到個太陽都要劏雞還神啦。本來以剪影嚟講，人絕對係極佳素材。但係如果人頭湧湧，影出嚟疊埋晒變成一大pat黑影，咁就唔影好過影囉。

啱啱聖誕假去咗緬甸，行程包括喺曼德勒嘅情人橋睇日落。事前做過吓功課，知道嗰度最出名係黃昏剪影，初時仲擔心會唔會又只係影到人頭添。好在去到當地，落車一睇，條橋成1.2公里咁長，完全唔使同人爭位，鐘意點影就點影。哈哈，終於影到覺得滿意嘅剪影喇！

話時話，大家有冇對呢幾張相嘅紀實性有些少懷疑呢？哈哈，唔使懷疑嘞，啲相全部都執過架！所謂「相不執不發」，我所有相都會執過先發上網嘅囉。就好似有啲女士一樣，唔化妝係絕對唔會出街見人架。當然啦，如果本身天生麗質，就算唔塗脂抹粉都唔會失禮人。不過天賦唔係人人都有，如果先天不足，用人工方法補救吓亦無傷大雅啫。講真，其實本人已經好克制架喇，雖然啲相有執過，但係都只屬於化妝程度，仲未算整容囉！

補充：
加咗幾張相嘅原片，等大家睇吓化妝前同化妝後嘅分別。

U Bein Bridge, Mandalay, Myanmar

U Bein Bridge, Mandalay, Myanmar

U Bein Bridge, Mandalay, Myanmar

Original version of photo #1

Original version of photo #2

Original version of photo #3

水土不服

去旅行最麻煩係乜？對於我嚟講，肯定係水土不服。自問有少少潔癖，絕對唔係去到邊痾到邊嘅人。除非十萬火急，否則大單嘢一定會喺酒店房解決。好彩我個唔係玻璃肚，而係效率奇高嘅多功能有機堆肥桶，所以喺飲食方面，本人一向都係百無禁忌。點知三十年道行一朝喪，兩個禮拜前喺緬甸竟然水土不服，搞到行程最尾幾日冇晒mood。

出事唔係食咗污糟嘢，而係當地食物實在太肥膩。嗰啲團餐，碟碟餸都油淋淋，而且餐前例牌有薯片或者蝦片之類嘅油炸小食，仲要無限量供應添。本人恃住內置功能強勁嘅環保堆肥桶，自然係有殺錯冇放過啦。頭幾日都仲好地地，直至有晚食咗個用油浸住嘅「蜜糖雞」，第二日起身就覺得飽飽滯滯，連早餐都冇胃口食。跟住全日肚脹脹，仲感覺到堆肥桶裏面不斷有氣體產生，谷到鬼死咁唔舒服。經驗話俾我知，雖然個肚谷到爆咁滯，但係絕對唔可以靜雞雞放氣減壓，否則隨時會一褲都係。結果忍足成日，頂到食完晚飯返酒店，入房就第一時間衝去廁所排污。先係排咗好多糊仔狀嘅便便，跟住係大量氣體。過咗一陣，見再冇乜動靜先敢做善後清潔。點知啱啱搞掂，褲都未著番，肚仔又作動嘞，唯有將之前嘅排污程序再重複一次。如是者，最後排咗三次先排得清。

有別於一般由食錯嘢引起嘅腹瀉，呢次完全冇攪肚痛，而且啲便便同氣體亦唔算十分惡臭難當，所以相信唔係食物中毒，而係食得太多肥膩嘢，諗住排清晒第二朝瞓醒應該就會冇事。點知事與願違，第二朝瞓醒，仍然係嗰種脹爆嘅感覺。咪講笑，即刻衝入廁所減壓先。至於事後會唔會令同房一路刷牙一路嘔，咁就唔理得咁多喇。

雖然之後每餐都食得好少，而且主要係食白飯，脹爆情況仍然維持咗四日，要返到香港先冇事。個團只不過玩八日，結果有一半時間肚仔唔舒服，都咪話唔掃興。而且仲搞到我破埋戒，要喺公廁做大事添。

話說有一日下晝去到大金塔（Shwedagon Pagoda），領隊喺售票大堂話有需要嘅就去咗先，入到景點就冇廁所架喇。其實食完午飯，個肚已經脹到想爆，我自己都驚捱唔到返酒店，咁咪入廁所視察吓，就算唔掂都冇乜損失啫。又真係估佢唔到，雖然大金塔萬七咁多遊客，但係個廁所竟然相當乾淨，好過仰光國際機場九千幾倍。而且廁格尚算寬敞，有地方俾我掛背囊。題外話，以前大陸啲廁勁污糟，我真係試過孭住個大背囊做大事囉。言歸正傳，個廁所都有不足之處，就係廁格裏面冇廁紙。本人萬一要喺公廁開大，一定會消耗大量廁紙。首先要抹乾淨塊廁板，不過單用廁紙就抹得乾淨，講出嚟都冇人信啦。用廁紙抹，極其量只可以抹乾塊廁板，跟住仲要鋪起碼四層廁紙先坐得落去囉。廁格冇廁紙，而我自己隨身又只係得一包迷你紙巾，咁冇辦法嘞，唯有坐唔知幾多年冇坐過嘅無影櫈啦。結果又係經過三輪大爆發先排得清，真係坐都坐到腳軟。排完污，玩都玩得輕鬆好多。

不過輕鬆狀態只係維持兩粒鐘，未到晚飯時間個肚仔已經勁作怪。嗰日仲要係喺街食，跟住先返酒店，慘！返到酒店，仲要等領隊慢慢分房，而我嘅團號又排到最後咁滯，大鑊！本人一向好守規矩，但亦明白「辦大事不拘小節」嘅道理。喺咁危急嘅情況，唯有厚住面皮打尖，叫領隊俾鎖匙我先。上到房，衝入廁所，啱啱趕得切喺大爆發臨界點同馬桶嚟個終極結合，真係遲一分鐘都死得人！

講開又講，本人肚仔一向聽話，除咗食完辣嘢一定會有反應，絕少連續幾日扭計。對上一次嚴重水土不服，已經係三十年前嘅事喇。

話說82年一條友返大陸玩，由西南開始，玩咗兩個月先去到新疆。本人一早有晒心理準備，喺大陸預咗要大菌食細菌，總之眼不見為乾淨，根本唔驚得咁多。事實上，喺湖南四川，食涼粉冷麵仲多過食飯，肚仔都完全頂得住。點知一入到新疆就出事嘞，痾足成個禮拜。不過唔係因為食物唔乾淨，嚴格嚟講，係自己攞嚟衰。

由第一站吐魯番開始，已經覺得新疆係美食天堂。因為除咗唔使再捱本人最討厭嘅豬肉，嗰度有勁好食嘅烤羊肉串。喺和靜就創咗個紀錄，一口氣消滅咗31串，到而家都仲回味無窮。睇到呢度，大家都應該估到，本人出事係因為「多吃壞肚皮」。不過你地一定估唔到，食到出事嘅，根本唔係烤羊肉，而係最最最健康嘅生果。

新疆盛產瓜果，其中又以哈密瓜同葡萄最出名。葡萄都算嘞，始終唔係乜嘢特別嘢。哈密瓜就唔同喇，喺嗰個年代嘅香港，絕對算係貴價生果。當年本人係一個清貧學生，老實講，呢啲高貴嘢根本就食唔起。一去到吐魯番，見到啲哈密瓜堆到成座山仔咁，而且又賣得平，豈有不大察特察之理呢？唔知乜水話「日啖荔枝三百顆，不辭長作嶺南人」，我當然冇咁誇張，只要每日食兩三個，就覺得不枉千里迢迢去到新疆咁遠囉。

事實上，第一日去到吐魯番就食咗兩個哈密瓜同大量葡萄。跟住日日如是，除非冇得賣，每日都keep住消滅起碼兩個哈密瓜同一公斤葡萄。亦係由第一日開始，每日都keep住起碼去四次廁所（肚瀉嗰隻），足足持續咗一個禮拜。我就硬係唔信，個肚仔會敵唔過區區哈密瓜囉。果然，過咗一個禮拜，肚仔適應咗就冇事嘞。

本來呢，旅行遇著水土不服真係好唔方便。不過嗰時已經喺大陸玩咗兩個月，習慣晒去到邊痾到邊，大不了咪喺路邊解決囉。而且嗰時大陸根本冇坐廁，反而仲少咗啲顧忌添。如果換轉係今日，唔使講，我一定會選擇忍口。

不過講番轉頭，見到堆到山仔咁高嘅哈密瓜又真係好難忍口囉。大家咪恥笑我住，冇錯，喺今日嚟講，哈密瓜根本唔係乜嘢矜貴嘢。但係你地有所不知嘞，當年我喺新疆食嘅，係白肉哈密瓜，同而家喺香港買到嘅紅肉貨色可以話係天壤雲泥。白肉哈密瓜冇咁爽脆，不過就超甜多汁、香味濃郁，跑贏紅肉貨色九條街。都唔知點解，咁好食嘅哈密瓜，喺香港竟然從來未見過有得賣。喺今日，哈密瓜已經唔再係高不可攀嘅嘢，但係就完全提唔我嘅興趣。講得老土啲，曾經滄海難為水呀！

Bagan, Myanmar

Mandalay Hill, Mandalay, Myanmar

Shwedagon Pagoda, Yangon, Myanmar

烏魯木齊, 新疆

十月懷胎

閉關三個禮拜，今日終於可以出關喇，因為我個私伙麻雀game嘅phase 1已經完成咗。所謂phase 1，係指流程部分，即係由洗牌開始，跟住摸牌、打牌、上牌、碰牌、槓牌、食糊、到最後計番，全部都搞掂晒。

唔係賣花讚花香，小弟嘅麻雀game比坊間產品更有彈性，可以提供到更多唔同選項。例如，用家可以自己揀由幾番起糊同最大打到幾番、可以選擇打唔打花、打唔打jackpot、可以揀傳統香港麻雀或者加入咗台灣牌元素嘅混合模式，甚至連每種牌幾多番都可以自訂添。為咗方便數牌，打咗出地下嘅牌又可以用唔同排序顯示。如果連排好嚟數都嫌太麻煩，仲可以㩒一個掣就睇到每一隻牌剩番幾多隻，唔使好似坊間啲麻雀game咁，數牌數到頭暈眼花。

當然啦，呢啲只係花巧嘢，並唔係一個麻雀game嘅核心部分。其實最難做係AI嗰part，即係點樣令到電腦識打牌。如果以需要花嘅時間嚟計，而家做咗嘅連十分一都唔知有未。不過作為一個programmer，見到自己嘅產品已經出咗個雛型，點都會覺得好興奮囉。就好似大肚婆走去照超聲波，個胎照出嚟明明似舊叉燒多過似人，但係就完全唔會影響到女人將為人母嘅喜悅。哈哈，而家本人嘅心情就係咁嘞！

講真，如果要同市面上嘅麻雀game比，鄙人嘅手作仔淨係graphics同animation已經輸九條街啦。不過咁，嚴人寬己係人類嘅天性，幫自己嘅出品打分自然會鬆手好多。又好似啲女人咁，明明生咗舊叉燒出嚟，都會覺得自己生嗰舊係世上最可愛、最美味嘅叉燒囉。

講返轉頭，雖然話最難搞嘅AI部分仲未開始做，但係咁並唔表示電腦只有捱打冇還手。而家電腦就好似初學打牌嘅人咁，有得上就上、有得碰就碰、冇黐冇搭嘅就打，基本上冇策略可言。不過如果手風順，一樣會有糊食囉。要靠運氣先有糊食就梗係唔掂啦，我嘅目標係要令電腦做到攻守俱備，仲要識睇牌路添。咁當然唔易做，而且，就算做到都會出現另一個問題。如果電腦變得太聰明，打親都贏，咁我自己就唔過癮啦。其實女人都係一樣，既希望阿仔聰明伶俐，但係又擔心如果佢太精叻就會唔聽教，下下駁嘴駁舌棧激死自己。

事實係，搞呢壇嘢真係有啲似十月懷胎，既辛苦又期待。話時話，十個月搞唔搞得掂，其實連我自己都唔知架。如果最後變咗石胎，又或者生出嚟嘅係鈍胎，咁就嘥心機捱眼瞓啦！

基本排序

另類排序

另類排序

一眼睇晒

加入台灣牌元素

電腦都有糊食

求人不如求己

上回講到Recax無啦啦reset咗我喺雀王會館嘅積分，雖然經過多番交涉，仍然徒勞無功。對方明明理據欠奉，不過就手握生殺大權，完全冇佢辦法。今次真係秀才遇著兵，有理說不清。啲咁樣對待客戶嘅公司，本人當然唔會用佢地嘅產品啦，所以唔會再玩雀王會館架喇。

不過冇得打又有啲手痕，咪諗住食回頭草，玩番Yahoo麻雀囉。點知摷極都摷唔到，原來呢隻game已經冇咗，簡直係屋漏兼逢夜雨呀！

谷鬼氣，市面啲麻雀game又唔係寫得好，仲要揾極都揾唔個啱玩嘅，真係自己寫過個冇咁嬲啦。哈哈，一於就咁決定，等我自己寫番個私伙麻雀game先！

要做就要做到最好，一定要針對市面啲麻雀game嘅弱點，做得比佢地優勝。初步構思已經有咗，主要係針對以下幾方面。

首先，啲麻雀game嘅人工智能實在做得太差，電腦淨係識得顧住自己副牌，完全唔理出面乜嘢環境。舉個例，明明已經最後一隻牌，竟然有安全牌唔打，係都要打隻高危牌俾人食。諸如此類嘅屎章例子實在太多，真係講極都講唔晒。而且，電腦牌路千篇一律，好容易俾人睇通。喺我個私伙麻雀game，就希望電腦可以做到攻守兼備，仲要有唔同類型，例如強攻型、防守型、當然亦會有神經刀啦。

另外，我會為打咗出地下嘅牌提供不同排序，仲可以隨時轉換添。排序會有三種選擇，分別係跟時序、分開邊個打出再跟時序、同埋跟牌序。咁樣數牌就易得多啦，哈哈！

最後，使唔使由電腦幫我砌好副牌都有得揀。我打慣花章，最憎電腦幫我砌到副牌整整齊齊囉。

哈哈，咁就絕對係我理想中麻雀game嘞！唉，不過講就易，做起上嚟肯定難過登天，真係諗吓都想死呀！今日搞咗成日，都只係做咗張麻雀檯嘅layout，都唔知會唔會寫到老夫駕鶴西征都未寫完囉！