烏合之眾

622公投有78萬香港人投票支持「公民提名」，本人一啲都唔意外。主辦單位當然認為空前成功，話數字說明咗港人對「真普選」嘅強烈訴求喎，究竟事實係咪咁呢？

78萬呢個數字肯定存在相當水分。票數只有極小部分係嚟自實體票站，要喺網上或手機投票出術，真係話都冇咁易。只靠身分證號碼同電話號碼把關，投票人年齡check唔到，身分證號碼係咪合成嘅又check唔到，你想點玩都得啦。而家連小學雞都有手機，咁啱啲未夠秤（未滿18歲）嘅細路又係比較激嘅一群，你估佢地會唔會乖到唔投票？根據網上資料，香港流動電話數目差唔多係全港人口兩倍。好似啲的士佬咁，五六部手機一字排開，如果要投票，你又會唔會相信佢地誠實到只係投一次？仲有，只要屋企有一個佔中粉屎，亦好可能會冚家「被投票」。水分有幾多真係好難講，如果話有五成都唔出奇，不過點都唔會係主辦單位講嘅微不足道囉。

71遊行，主辦單位話最少有51萬人參與，比舊年多一萬。警方就話高峰期有9.86萬，而「港大民研」同港大學者葉兆輝嘅數字分別係17.2萬同12.2萬。民陣年年作到狗咁大，呢個已經係不爭嘅事實，本來唔需要再攞出嚟講。本人奇怪嘅反而係點解班友今年會咁克制，作得51萬咁少囉。

622公投都有78萬人表咗態，佢地冇理由唔行晒出嚟瞓身支持啫。當然啦，可能有部分人琴日要返工，又可能有部分人不良於行唔能夠參與。不過另一方面睇，有大量622冇得投票嘅人（例如未夠秤或非香港永久居民）補充，而且71遊行涵蓋嘅議題更廣，人數點都冇可能得咁少囉。由此可見，622公投嘅水分可能比我想像更嚴重。究竟主辦單位喺622公投有冇作data，因為冇實質證據，本人就不予置評嘞。

講真，承接622公投嘅聲勢，民陣起碼要作到80至100萬先算「合理」。而家只係作得51萬，相信係政治上嘅折衷。根據往績推斷，如果遊行人數有40萬，班友一定敢作夠100萬。按合理推測，實際遊行人數一定好少，可能連20萬都唔夠，所以民陣都唔敢作得太大。

不過點都好，遊行人數一定唔可以少過50萬。首先，今年有東北發展爭議、622公投、一國兩制白皮書等大單嘢催谷，如果公布嘅數字竟然少過舊年，民陣無異政治自殺。再者，50萬呢個數字亦別具意義，說明咗當前形勢可以同2003年香港嘅歷史性黑暗時刻相提並論。民陣將舊年71遊行人數由43萬「修正」為50萬，顯然亦有考慮咗其中歷史意義。幾理想丫，舊年50萬，今年51萬，更上一層樓。跟住出年52萬，後年53萬，每年加一萬，有排先到700萬啦，簡直長玩長有呀。

其實民陣年年老作，真係鬧佢都嫌嘥氣。不過班友細眉細眼，全無大家龜獸風範，咁就唔批評吓唔得嘞。啲數字刀斧痕跡咁明顯，可謂「司馬昭之心，路人皆見」，欺瞞公眾嘅意圖已經無從掩飾。講真，班友嘅狼子野心，俾我地呢啲路人甲乙丙見到根本就冇所謂，只要班同路人見唔到就得啦。古人講得好，「量小非君子，無毒不丈夫」，又唔係第一次造數，點解唔索性造大啲呢？今年作到80萬，出年作夠100萬，要信嘅人仍然會信。就算作到超過香港人口都冇問題，因為有大量反共自由人湧落嚟參與囉，只要求其俾個解釋，熱愛民主嘅香港人一樣會相信。又要作大，又要畏首畏尾，搞到啲數字咁expected，可謂欲蓋彌彰！

所以話呢，民陣班友只不過係烏合之眾，腦筋同啲小爬蟲差唔多，實在難成大器！

National Museum of Anthropology, Mexico City, Mexico

偽行者

呢排忙於睇戲，希望有朝一日可以學人寫吓影評，都冇乜點留意時事添。早兩日聽個friend發牢騷，話有幾個風燭殘年嘅老餅同事要求早走，要去行「毅行者」喎。本人即時反應係：有冇搞錯，唔通真係壽星公吊頸？雖然早排涼番啲啫，不過「毅行者」對體能要求極高，絕對唔係人人玩得起囉。自問行得走得兼捱得，年輕力壯嗰時都未敢玩「毅行者」啦，班老餅就算坐定定都隨時會蒙主寵召，佢地憑乜嘢學人玩先！

聽個friend講埋落去，先知道係個完全唔美麗嘅誤會，原來佢嗰幾個老餅同事要喺辦公時間去參加嘅係「毅行爭普選」。話說佢地校長發咗個衣貓俾所有同事，話自己同陳日軍行埋咗，感覺相當良好，叫啲同事自己決定去唔去行喎。有得跟陳日軍佢老人家出巡，班老餅都唔知恨咗幾耐啦，等放學先去咪俾人飲晒頭啖湯？！書可以唔教住，有得近身擦陳老鞋就千祈咪走雞囉！哈哈，果然係薑越老越辣！

今勻實在背得緊要，居然唔知有「毅行爭普選」呢單嘢，會唔會真係同「毅行者」有關呢，即刻孤高吓先。果然有料到，第一條就係爛生果題為「澄清與『毅行爭普選』無關 樂施會：『毅行者』三字已註冊」嘅新聞。報導仲列出幾條網民留言，都係一致鬧爆樂施會。本人真係唔明，人地喺自己地頭澄清一啲可能會引起誤解嘅嘢啫，咁都有問題？

打個比喻，你開咗間小店賣有機蔬菜，艱苦經營多年，鋪頭喺區內已經薄有名聲。最近有大財團喺隔籬街開咗間凍肉鋪，掛晒一個二個羊頭出嚟，至於裏面賣嘅係乜嘢肉，明眼人當然心知肚明。你賣菜，佢賣肉，可謂河水不犯井水，本來可以相安無事。偏偏間凍肉鋪改到個名同你鋪頭好接近，搞到日日有街坊問你係咪改變咗經營方針，同大財團合作賣埋肉。你覺得好煩，索性貼張告示出嚟澄清。點知咁就出事嘞，全港18區嗜血嗜肉嘅民眾蜂擁而至，喺你鋪頭掟屎掟尿，你話係咪無莽之災呢？

言歸正傳，爛生果記者向來獨具穢眼，唔想見嘅嘢佢地會自動睇唔到，有關網民留言會唔會都係選擇性節錄嘅呢？上樂施會嘅飛屎卜查證吓，竟然極目所見都係攻擊留言。不過咁，又唔可以話我冤枉咗爛生果。如果要客觀反映民意，點解佢地又唔上埋「香討」睇吓呢？

睇番啲「網民留言」，傳遞嘅信息主要有兩個：以後唔捐錢俾樂施會同硬撐陳大輸機。講開又講，熱愛民主嘅香港人，留言當然唔會少得粗言穢語啦。其中好多留言完全將啲嘢倒轉晒嚟講，簡直令人啼笑皆非，例如以下呢條：

Joey Yu：樞機所帶出的是真正毅行者所擁有的氣節，貴機構只配註冊「偽行者」為用，也不配再主辦「毅行者」。

樂施會唔埋堆，班友就話人地連從來唔牽涉政治嘅老本行都唔配搞，咁霸道都得？！即係話，你唔瞓身支持佢地定義嘅民主，咁你就冇資格教書、冇資格做醫生、冇資格做律師、甚至連做雞做鴨都冇資格添。如果呢啲就係香港人要爭取嘅民主，咁我寧願呢世都見唔到普選囉！

至於話陳大輸機「帶出的是真正毅行者所擁有的氣節」，簡直係對「毅行者」嘅終極侮辱，真係睇到人噴飯兼嘔奶！陳大輸機，「偽行者」先係你嘅真正稱號！本人絕對唔會好似香港啲民主派人士咁係又鬧唔係又鬧，我講得出自然有證據。

首先，我想問吓大家，喺陳大輸機身居要職嘅神聖帝國，最高元首係咪由國民一人一票普選出嚟嘅呢？咁當然唔係啦，係由一眾輸機煮教提名互選嘅。哈哈，咁又同香港凸首選舉嘅提委會、選委會有乜分別呢？有，香港嘅提委會同選委會唔多唔少都有啲民意基礎，雖然絕對講唔上人人均衡參與。而喺神聖帝國，重要職位基本上係由自上而下嘅委任制產生。再由輸機團互選最高元首，實際上係一個塘水滾塘魚嘅小圈子遊戲，連丁屎咁多民主成分都冇囉！仲有，神聖帝國嘅女性子民從來冇得擔任重要職位，性別歧視嚴重過巴基斯坦。據聞舊年先出現第一位女性煮教，距離男女平權呢個民主社會基本要求仲有十萬九千光年咁遠！

喺自己地頭嘅神聖帝國都冇出過一分力促進民主，陳大輸機反而走嚟香港爭取普選，你話佢係咪面皮厚到無倫呢，一個「偽」當之無愧啦！

唔使講到西方神聖帝國咁遙遠，我地又睇吓一單本地嘢。早前政府推行校本條例，要求學校成立法團校董會，當中要有教師、家長、校友代表，以提高學校運作嘅民主度同透明度。呢樣嘢一定會有好多人唔認同，但係點都估唔到，反對得最激嘅竟然陳大輸機佢老人家。佢仲同政府打官司，最後當然係輸埋啦。講開又講，連神嘅意旨都唔可以左右法庭裁決，呢啲先係真正嘅司法獨立囉！

講真，成立法團校董會人人可以反對，唯獨陳大輸機唔反對得。教師、家長、校友都係學校持份者，俾佢地有機會參與學校管理，正正就係民主嘅體現，試問不遺餘力為港人爭取民主嘅陳大輸機又有乜理由反對呢？哈哈，俾你估得到就唔係神人啦！

神人嘅腦部結構果然異乎常人，陳大輸機嘅反對理由係咁做會削弱神聖團體嘅辦學理念喎。哈哈，神話連篇，唔輸官司就有鬼啦！辦學團體有6個校董位，再加一個由佢地委任嘅「獨立人士」，自己友已經有7票，其他街外人就算想搞破壞，聯合起嚟最多都係得3票，根本就搞唔到乜嘢花樣。對於學校管理，嗰3個「街外人」校董極其量都只係得個知字囉。削弱辦學理念云云，究竟從何說起呢？咪住，唔通神聖團體嘅辦學理念竟然有啲乜嘢不可告人之秘，一俾人知道就會見光死？本人就唔多作猜測嘞，大家自己諗吓啦！

由以上兩單事例可見，陳大輸機平時就大義凜然咁替港人爭取民主，但係一牽涉到自身利益就睬你都有味，丁屎咁多都唔肯放俾你班友。呢種表裏不一、神口蛇心嘅人，叫佢做「偽行者」已經算客氣啦！乜都做戲咁做，但係啲戲又屎到爆，又唔肯俾多兩錢誠意。如果佢有啲誠意，好似拜苦路咁擔住個十字架行，起碼都可以叫做「藝行者」囉，哈哈！

順帶一提，雖然十分鄙夷陳大輸機嘅為人，不過我都覺得佢講過一句好啱聽嘅嘢，就係佢話要退回辦學權。都唔知乜嘢理由，政府竟然要用公帑資助啲神聖團體傳道！尤其是有陳大輸機呢啲咁嘅人，政府出雞佢出豉油都仲要咁多阿吱阿咗，真係忍得佢都食得屎囉！好可惜，陳大輸機最後都係口爽爽大隻講，冇退回辦學權。言而無信，再記佢一個大過！

Annapurna Trek, Nepal

Police on wheels, Seoul, South Korea

馬年第一砲

天下盡多不平怪事，世上豈缺可惡賤人！馬年第一砲，當然係要鬧啦！冇錯，本扑宗旨從來都係：笑罵天下怪事，怒插世上賤人！

一時技癢，又喺度作對添，哈哈！不過實在作得唔好，還望多多包涵！

過年去咗澳洲，返嚟喺電視見到政府台班公務員搞事，真係睇到眼火爆。話說廣播處長接受是但台訪問，政府台班嘍囉就高舉大紅揮春棟晒喺後面示威。唔俾面老細都唔緊要嘞，最攞命係班友竟然自暴其短，將自己極其低B嘅真面目展示人前。何以低B？咁就要睇吓啲揮春寫乜喇。

其中一副揮春寫住「馬上有大樓」五隻大字。之前新廣播大樓撥款申請被否決，睇怕再闖關都係凶多吉少。通過咗又點，都仲要招標，跟住先慢慢起，冇十年八載都唔使諗囉。就算去紙紮鋪訂造，都起碼要等兩三日先有得燒啦。「馬上有大樓」云云，唔通班友當咗自己係大胃高拍飛？！哈哈，班友谷精上腦，「馬上馬上風」就有佢地份！

低B唔係罪，而係一種先天缺憾，本來應該寄予同情。不過班友既自私又無恥，唔插爆佢地都對唔住天地良心囉。講真，政府台因乜需要一座超豪廣播大樓先。好明顯，班友係想大幅擴張政府台架構。如果真係成事，就算政府想鏟除佢地都有心無力啦。以後要搞私有化，又貴到冇人買得起。咁班友嘅鐵飯碗就可以即刻增值，升呢變成金飯碗嘞。班友慷納稅人之慨以保自己飯碗，直頭係自私兼無恥，絕對人人得而誅之！

哈哈，鬧完班廢柴真係成身舒服晒！之前作完對，而家又有雅興吟埋詩添，整番兩首（一首五絕，一首七絕）應吓節先：

北斗七星高
汎舟越洪濤
揮手自茲去
水寒風似刀

愁雲慘澹萬里凝
夜雨聞鈴腸斷聲
年年戰骨埋荒外
杜鵑啼血猿哀鳴

以上句句都係好詩嚟架！哈哈，常言道「妻不如妾，妾不如偷」，偷番嚟嘅當然係好嘢啦！睇唔出有邊忽應節？唔緊要，下回自有分解。

最後一定要提吓張相，因為絕對係應節之作。大年初一，旅遊巴喺屎塔曼尼亞田野極速飛馳。忽然見到遠處樹下有個白點，即刻開袋，攞相機，打開鏡頭蓋，zoom埋去，對焦，㩒掣。整套動作乾淨俐落、一氣呵成，仲影得好清晰添（影得好唔好當然係另一回事），快槍手當之無愧！

哈哈，爭啲唔記得最緊要嗰樣添，恭喜發財！祝大家日日龍馬精神、事事一馬當先、鑊鑊馬到功成！

Tasmania, Australia

聽金一席話：論新聞自由

你想油過間屋，但係你個賓賓話佢習慣咗原本隻顏色，唔准你改。佢仲影低屋內實景，而且記錄埋日常工作範圍，單方面制訂一份「家務約章」。總之冇佢同意，間屋任何嘢都唔郁得，你亦唔可以叫佢做約章冇包括嘅工作。有個咁嘅賓賓，你會點處理呢？

喧賓奪主、冇大冇細，係正常人都會即刻兜咗佢啦！不過賓賓話唔炒得、輿論話唔炒得、連垃圾議員都話唔炒得，你話係咪荒謬絕倫呢？！

荒謬？都未算！由明報員工同垃圾議員攜手演出嘅一齣「捍衛新聞自由大龍鳳」仲荒謬呀！

明報員工反對換老總，其實都唔難理解。商業機構嘅高層人事變動，通常都會引發連串地震。員工驚飯碗不保，當然唔想老闆搞啲咁嘅嘢啦。唔想還唔想，但係老闆要撤換高層，作為員工又可以點做呢？向老闆表達不滿當然可以，甚至集體扎馬向老闆施壓都得。員工士氣同歸屬感對商業機構至為重要，老闆冇可能會唔考慮。如果老闆一意孤行，員工只得兩個選擇，一係接受現實，一係劈砲唔撈。如果員工集體劈砲，隨時會對機構造成致命打擊，老闆亦要為自己嘅決定付出沉重代價。

作為明報長期讀者，本人絕對歡迎撤換總編輯呢個決定。明報員工要同張曉卿撐，我亦唔會反對，因為呢啲始終係佢地嘅內部糾紛。但係明明從自身利益出發，明報員工竟然拉埋新聞自由嚟講，我就好睇唔過眼嘞。新老總都未上任，班友就認定人地會妨礙新聞自由，分明係無的放矢囉！

班友仲揾埋「明報舊生會」（明報前員工）同一眾垃圾議員幫拖，簡直不知所謂。前度員工可以干涉商業機構嘅人事任命，真係聞所未聞囉。而且明報前員工極有可能幫緊明報嘅競爭對手做嘢，佢地介入絕對有利益衝突之嫌。班垃圾議員高調幫拖就更離譜，分明係政治勢力干預傳媒自主。唔知邊啲人先係踐踏緊新聞自由呢？！

講開垃圾議員，又順便插吓人渣傑呢件垃圾中嘅垃圾先。條友提出嘅「捍衛編輯採訪獨立自主」動議，既冇針對性，又冇約束力，簡直空泛如無物。就算放個屁都仲實質啲，起碼可以聞到臭味先啦。條人渣話有傳凸首有政治任務，要整頓傳媒。呢啲所謂傳聞都可以攞嚟做呈堂證供，條友真係弗上腦囉！佢又話相信明報單嘢係同中央想控制政改討論有關。講真，如果中央要整頓傳媒，爛生果有乜理有仲可以撐到今日先。如果明報換總編輯都可以係中央干預香港新聞自由嘅證據，咁大公文匯商報呢啲立場咁鮮明嘅報紙又算係乜呢？條友分明係借題發揮，乘機呃吓政治本錢啫。夠薑就學吓人地德國，動議將替共產黨護航列作違法行為。話時話，有傳條友係佢老豆同隻狗乸私通嘅副產品喎，唔知大家信唔信呢？

又講番明報員工，班友早前喺報社門口默站5.5分鐘抗議，仲手持明報歷年關於64燭光晚會同71遊行嘅報導。佢地話5.5分鐘係代表明報創刊55年喎。居然提到明報嘅歷史，班友簡直自暴其短！

明報嘅編採方針有冇變過，最清楚一定係啲長期讀者。我開始睇明報嗰時，可能好多明報記者仔都仲未出世囉。近年明報立場越見偏頗，淨係睇吓每年64燭光晚會同71遊行嘅報導就可見一斑。標題只採用主辦單位作大作到離晒罩嘅數字，唔通班友敢話呢啲數字比中立學者提供嘅更可靠？分明係譁眾取寵啦，咁好明顯已經偏離咗金庸創辦明報時嘅方針。仲有，金庸最注重副刊質素，但係早排明報副刊竟然出現咗一篇造謠文章，抹黑本地超市長期售賣大陸造假食品。選擇專欄作家只考慮政治取向，而唔理佢地質素如何，唔通咁就係體現新聞自由？又等我地睇吓金庸對新聞自由有乜見解，以下係節錄自張圭陽「金庸與明報」一書：

「本書出版前筆者見到金庸，請教“新聞自由”之事。金庸：“新聞自由係指政府當局不可干預傳媒而言，並非涉及傳媒主事人與工作人員之關係，後者僅為雇員關係，屬於勞資關係。在英國，各大報章在選舉時均支持不同政黨，如《每日郵報》Daily Mail、《每日快報》Daily Express等傳統上支持保守黨，《每日鏡報》Daily Mirror傳統上支持工黨，報紙的總編輯、主筆、記者等無發表不同政見的‘自由’。報業大王梅鐸收購倫敦《泰晤士報》Times後，該報立論必須全聽老板的話，資深總編輯Robert Evans意見不同，即被解雇，全無‘新聞自由’可言。”」

事實就係咁。試想吓，如果壹傳媒有個編輯忽然short咗，猛咁同肥佬黎唱反調，肥佬黎有乜可能會唔炒佢先。

明報撤換總編輯，好明顯係因為佢偏離咗老闆嘅辦報方針。新聞自由云云，只不過係某啲人用嚟蒙騙公眾嘅一個虛詞囉！

Shwedagon Pagoda, Yangon, Myanmar

當大學雞遇上超難小一入學題

上回講到一條超難「小一入學題」，後來證實原來係網民惡搞，只可以話得啖笑。不過揾資料時就發現咗另一單嘢，雖然係2012年舊料，都想攞嚟同大家分享吓。

話說有報紙做咗個專題，蒐集咗11條「超難」小一面試題（見下圖），再揾20隻大學雞試做，發現最深嗰題只得一隻答啱。都係嗰句，如果想知道自己有冇小一入學程度，咁就唔好睇埋落去住，試吓識唔識做先啦！

講真，以我地嗰代嘅標準嚟講，呢啲題目又的確係超難。尤其是我呢啲鄉下仔，五六歲嗰時根本就同一舊飯冇分別，咁嘅試題肯定一條都唔識答囉。好彩嗰時間小學冇入學試，話知你係蘿底橙定地底泥都照收，所以本人先有書讀咋。

雖然話時代已經唔同咗，而家啲細路都不知幾精靈，呢啲試題難唔難得到佢地都仲係好難講。不過連大學雞都唔識答就真係誇張咗啲，等我呢個ex-大學生都試吓先。

8, 10, 11, 12中，哪一個數字是不同的？為甚麼？（全部答對）
8或11都得，呢條冇乜難度。

哥哥有6粒糖，弟弟生日送給他2粒糖，媽媽之後再送5粒糖給哥哥，問哥哥有多少粒糖？（3隻答錯）
咁簡單嘅加減數，竟然都有3隻大學雞答錯？！其實呢條連我自己都答唔到，因為題目本身就有ambiguity。究竟「弟弟生日送給他2粒糖」係指弟弟送咗2粒糖俾哥哥，定係哥哥送咗2粒糖俾弟弟呢？

鉛筆4元，間尺7元，橡皮膠5元，你有10元，可以一起買哪兩種？（全部答對）
如果咁都答得錯，唔止冇天理，直頭係冇人性添啦！

如果你媽媽給你10顆糖，2張糖紙可以換1顆糖，間最後你最多可以吃多少顆糖？（19隻答錯）
正確答案係19粒。20隻大學雞只得1隻答啱，除咗話「世風日下，人心不古」，真係唔知可以點講嘞。等我仲以為而家呢代好古惑添，估唔到啲大學雞竟然會咁老實，簡直係擔屎唔識轉膊囉！換番嚟嘅糖都有糖紙，可以再用嚟換糖，冇乜理由會諗唔到呀！

＿RASS，可否加一個英文字，變成一個你認識的字？（4隻答錯）
呢條題目都有4隻大學雞答錯，又真係好奇怪吓。相信標準答案係「BRASS」或「GRASS」，尤其是「GRASS」呢個字咁淺，讀到大學冇理由會唔識啫。不過咁，本人一樣「答錯」呢題，因為我嘅答案係「HARASS」或「EMBARRASS」。條題目問「可否加一個英文字」，而「B」同「G」都只係英文字母，根本唔算英文字。本人答案就唔同嘞，「HA」同「EMBAR」分別都有意思，而且可以喺字典查到，絕對符合題目要求。哈哈，唔知嗰4隻答錯（或唔識答）嘅大學雞，係咪都因為正確理解題目反而答唔到呢？

Kid, could you share with me what is your favorite animal ?（1隻答錯）
呢條問題對幼稚雞嚟講可能深咗啲，不過大學雞冇可能唔識答囉！哈哈，如果中二都未識齊26個英文字母，咁上到大學唔識答呢條問題都好正常啫！呢啲都係無謂深究嘞，我反而想講吓條題目本身。香港人念念不忘事頭婆恩典，對前朝風物更係推崇備至。有人甚至高舉龍獅旗闖入駐港解放軍總部，冒死爭取香港逆向回歸添。不過條題目竟然用咗「favorite」呢個美式串法，而唔係英式嘅「favourite」，咁會唔會太傷害香港人嘅感情呢？仲有，「could you share with me what is your favorite animal」喺文法上有冇問題呢？作為學校出嘅試題，係咪用「could you share with me what your favorite animal is」會比較好呢？話時話，其實有冇需要搞到咁複雜先，點解唔直接問「what is your favorite animal」呢？講真，我自己都唔敢肯定架，希望有英語人可以指點吓！

小朋友不該在圖書館做甚麼事？（全部答對）
哈哈，我答「瀨屎」或「瀨尿」都應該唔會錯啩！

有甚麼食物對牙齒有益？（4隻答錯）
PK嘞，呢條唔識答添！不過咁，如果臨場應考，唔識都要撞架啦。我會答「牛奶」囉，高鈣食物，斷估點都有啲譜啩！本來我都冇資格恥笑人地，不過篇報導話有隻大學雞嘅答案竟然係「牙膏」，真係要忍得住笑都幾難囉！哈哈，唔通隻大學雞就係因為食得牙膏太多，所以先搞到咁低B？！

甚麼車輛只可以在香港區行駛？（4隻答錯）
電車？應該係喇啩！

香港的機場在哪裏？（1隻答錯）
呢條我識，係「赤鱲角」。不過如果要書寫作答就唔掂嘞，因為我唔識寫個「鱲」字！唔知答「大嶼山」得唔得呢，個「嶼」字我識寫喎。

超級市場和街市的分別？（1隻答錯）
超市乾淨企理，貨品選擇多而且陳列整齊，買得多仲可以送貨，俾錢碌卡又得，嘟八達通都得，夠晒方便。街市污糟邋遢，經過濕貨區成日會俾人潑濕腳，俾錢只可以用現金，而神沙仲拒收添，唔係咁customer-friendly囉。本人諗嘢簡單直接，以上答案係從普羅顧客嘅角度出發。但係以而家啲大學雞嘅思維，佢地當然會有唔同答法啦。哈哈，等我估吓先，會唔會係咁呢？超市係地產霸權，係無良奸商，最鍾意揾顧客笨。街市商販係良心經營者，佢地擺檔唔係為咗賺錢，而只係想服務市民。正因為佢地當啲街坊係朋友，所以絕對唔會揾顧客笨。

經人肉測試，除咗本身有問題嘅若干題目，本人應該都冇答錯。就算係嗰條靠撞嘅「食物」問題，我都相當有信心架。對比番報紙做嘅大學雞測試，正確率100%嘅竟然只得3條，仲要都係淺到連幼稚雞都唔會答錯嘅題目添。無疑，對四五歲嘅細路嚟講，有部分題目可能真係比較深。不過做咗廿年人、讀咗十幾年書嘅大學雞，竟然都會俾呢啲題目考起，咁就真係講唔過去嘞。

究竟係咪高等教育普及化拉低晒大學生嘅水平呢？抑或，會唔會因為呢一代都喺溫室成長，過份嘅保護令到佢地學唔到一般生活常識呢？點都好啦，對一個老餅旁觀者嚟講，只可以話得啖笑囉！

來源：「SUN熱辣：升小面試題考起大學生」

小一入學題？

連續鏟咗日月報幾鑊，不過都仲未諗住換畫。始終睇咗咁多年，點都有啲感情囉。尤其是去屎坑，冇佢陪住真係覺得好空虛架！

早兩日睇日月報又發現咗一單過癮嘢，明明唔係教育版，不過就登咗一段英文。段嘢最尾仲有咁嘅一行中文：聖方濟各小一入學題（見下圖）。如果想知道自己有冇小一英文程度，咁就唔好睇埋落去住，試吓解答呢條問題先啦！

雖然自問英文好屎吓，但係斷估都有band 2學校中三程度囉。小一入學題？簡直不屑一顧啦！唔係喎，橫掂都要等運到，試吓都冇壞啫。點知睇清楚，當堂俾佢嚇親。唔係啩，小一入學題？！可以好肯定，就算中一嗰時，我連條題目問乜都未睇得明囉，莫講話要答啦！不過咁都好，有番少少挑戰性。

初初主攻頭兩句，真係俾佢考起，竟然完全冇頭緒添。太抽象喇，都係轉攻第三個空格。食得嘅，應該會實質啲啩。弊嘞，仲係諗唔到。都係唔好再嘥時間，跳去最後嗰個空格先。12345，bingo！

雖然只用5秒就攻破最尾嗰個空格，但係頭尾總共用咗成兩分鐘先答到呢條題目。相信好多人考試都係咁，鍾意順住次序答題，遇到kick手題目又死咬住，唔肯跳過做下一題，結果搞到答唔晒份卷。呢個係性格問題，唔關答題技巧事。

言歸正傳，究竟用兩分鐘答呢條問題係唔係太慢呢，會唔會連小學都唔收呢？話時話，都唔記得當年報讀小一使唔使考試添。仲有，其實嗰時幼稚園有冇教過英文呢，真係一啲都諗唔起喎。唯一有印象係小學（定係中學呢？）有課書教過「A man and a pan」，比起而家啲小一入學題，嗰時嘅英文課程簡直低B到無倫！不過咁，呢條小一入學題又真係深咗啲，相信唔係所有幼稚雞都識答囉。

啲人成日話香港貧富懸殊有幾嚴重，不過如果有個乜乜係數量度香港學生嘅英文程度差距，我諗一定勁過堅尼係數啫。聽個教書嘅朋友講，佢學校有啲中二生，連A至Z都未識得齊囉。我當時又唔好意思問，究竟嗰啲學生點解可以由中一升上中二嘅呢？但係另一方面，香港有啲細路英文就勁到無倫。我成日搭都聽到啲四五歲嘅豆釘（當然唔係鬼仔啦）同啲賓賓對答，英文都不知幾流利，而且發音仲好準添，肯定唔係賓賓教嘅。呢條小一入學題，真係未必難得到佢地囉。

雖然我好肯定個答案唔會錯，不過都睇埋相關報導內容。話說記者喺網上見到呢條「小一入學題」，佢自己用咗五分鐘先答得出（哈哈，仲屎過我！），覺得會唔會太難咗啲，所以就揾有關小學校長確認吓。最後證實單嘢同嗰間小學無關，純粹係網民惡搞。

上網摷過，其實呢條IQ題已經流傳甚廣，仲有好多唔同嘅變奏添。咁究竟係邊個喺度造謠生事呢？講明話係「聖方濟各小一入學題」嘅網頁都摷到幾個，其中以名為「我哋唔政經」嘅飛屎卜最早post出嚟，暫時嫌疑最大。都唔知啲友乜嘢心態，無聊就上鹹網打發時間啦！搞埋晒啲咁嘅嘢，等我仲以為自己啲英文連小學雞都不如添！

苟且無為＋卑鄙無恥＝日月無光

早排講到某關姓阿毛喺日月報副刊造謠生事，抹黑本地超市長期售賣大陸黑心食品。本人素來嫉惡如仇，當然唔會放過呢條阿毛啦。除咗喺拙扑勁鏟，早幾日（15號）仲寫咗封信去日月報投訴佢添。估唔到日月報反應都算幾快，當晚已經收到佢地回覆，內容如下：

「謝謝 閣下對本的關心及支持，來函己轉交關麗珊女士。除非有事實上的錯誤及法律問題，否則明報編輯部一般不會刪改專欄作者的文章。再一次感謝 閣下對本報的關心及提供寶貴意見。
順祝 新年快樂
明報編輯部」

真係火都嚟埋，竟然用寥寥數字打發一位真心提意見嘅長期讀者，仲要答得咁行添！枉我連日閉關，不飲不食、不眠不休先寫成封信！

回覆中提及「除非有事實上的錯誤及法律問題……」，然則日月報覺得關阿毛講緊嘅係事實？完全唔考慮一般常識，咁如果呢條阿毛話自己識白日飛昇，日月報都會照登？尊重作者嘅表達自由當然應該，不過咁絕對唔可以作為編採部門偷懶或護短嘅擋箭牌。假使文章明顯背離常理，甚至蹟近造謠，傳媒係咪都應該為尊重作者而罔顧社會責任呢？

如果真係有咁嘅情況（例如關阿毛呢個畸屎），編採部應該同作者溝通吓先囉。文章一旦出咗街，其實對作者同傳媒本身嘅聲譽都有負面影響。如果只係出於無知，作者極可能會主動撤回文章，咁就皆大歡喜啦。如果作者堅持唔肯修改，編採部就要決定係咪採納嘞。咪住，唔通日月報班友睇都唔睇就攞篇文去排版，抑或連佢地自己都係好似關阿毛咁無知？

另外，編採部主事者亦有責任嚴選有質素嘅作家。求其阿豬阿狗阿毛，只要識打幾隻中文字就可以叫做作家而且得到認可，咁本人都夠資格喺日月報寫副刊啦！睇嚟喺日月報編採部做真係唔錯，高層無為而治，基層無為而作，完全唔使帶個腦返工，筍呀！

至於關阿毛，佢係始作俑者，當然不可不提。自從日月報轉交咗我封信，到而家已經超過四日，佢冇可能未睇囉。不過一如所料，佢並冇作出回應。首先，睇番關阿毛過往嘅文章，佢應該唔會有向別人承認錯誤嘅器量。而且，就算唔想認錯，以佢嘅智慧，亦絕冇可能反駁到信中論點囉。所以，唔回應係佢嘅唯一選擇。

本人啱啱上佢飛屎卜睇過，一篇喺本月５號貼出嘅毒番薯文章，到而家仲喺度。文章有幾條留言，不妨攞嚟同大家分享吓：

羅XX：現今世代的悲哀~~假食物其實可以賺多幾多啫?比您賺多五倍又如何?好的蕃薯卻被糟蹋了,這些奸商真折福!
Cathy Kxxx：啲糖水簡直好似被賜死！
James Lxxxx：嚇死人
Jennifer Lxx：好恐怖呢。

哈哈，果然有無知婦孺俾關阿毛呃咗！鬼咩，上網唔帶腦，唔俾人呃都冇天理啦！話時話，其實第一條留言都幾有意思架，如果稍為改動吓：現今世代的悲哀~~造假文章其實可以呃多幾多稿費啫?比您呃多五倍又如何?好的蕃薯卻被糟蹋了,這關阿毛真折福!

本人比較厚道，原本傾向相信關阿毛只係無知。但係到而家仲留番篇文喺度害人，咁就足以證明呢條阿毛唔一定係無知，不過就肯定係無良同無恥！大家可能會覺得我太武斷，話唔定阿毛早幾日得到急病去咗賣鹹鴨蛋呢。哈哈，如果係咁就天有眼啦！可惜唔係，佢啱啱先貼咗篇文上飛屎卜。我好肯定佢仲健在，或者咁講，起碼對手仲打到字。不過呢啲人咁黑心，遲早實會有報應囉！

既然得到呢個結論，咁我信中提及嘅其中一個疑點就解釋到嘞。關阿毛冇向有關當局舉報，係因為佢根本唔想將件事搞大。就算全港99%人知道佢造假，但係只要有1%死硬（或死蠢）粉屎相信佢，佢都已經可以生存到。如果單嘢搞大咗，始終都會水落石出，到時連嗰1%粉屎都留失埋，咁就真係食榖種嘞。所以無論關阿毛當初有冇懷疑過啲番薯係黑心貨，佢都唔會舉報嗰間「無良超市」。喺自己專欄「揭發」咪好囉，既投粉屎所好，又可以呃稿費。

睇番香港現實環境，呢種策略正係好多人嘅生存之道，絕唔係關阿毛獨有。無論政客、作家、時事評論員、傳媒、甚至學者都係，只要得到足夠支持度就可以生存，其他人點睇根本就唔使理。社會責任、道德操守呢啲咁虛無縹緲嘅嘢，既唔可以當飯食，又缺乏目標針對性，自然唔會考慮啦。哈哈，越講越遠添！

言歸正傳。對於日月報編採部嚟講，一個普通讀者提出嘅意見，真係睬你都有味啦。對於關阿毛嚟講，一個非粉屎提出嘅質疑，就更加係睬你都生臭狐囉。編採部門苟且無為，合作夥伴卑鄙無恥，日月報正係漸漸背棄光明，逐步走向黑暗，實在令人慨歎！

Twyfelfontein, Namibia

Etosha National Park, Namibia

日暗月殘

致編採部主事者：

本人為貴報長期讀者，素喜貴報作風務實、立場持平、編採嚴謹。唯貴報近年漸有偏離當初辦報方針之勢，尤以副刊為甚。現今之副刊版，非但聲音一元化，且文章質素良莠不齊，劣品屢現。猶如目睹親友走入歧途，本人深感痛惜！

舉一實例，貴報副刊D5版於本月九日刊登關麗珊女士題為「紫心和黑心」之文章。此等「大紀元式」文字竟現明報，實令本人錯愕萬分！

文章敘述作者於本地超市購得大陸生產之紫心番薯，唯烹調時發現顏色有異，遂認定為經染色之黑心食品。作者指出該等番薯於超市「長賣長有」，更以「毒藥」及「劇毒」等字眼形容「染料」之顏色。

染色紫心番薯並非新鮮事物，早於數年前已傳遍坊間，致使食安中心作出跟進，並發表報告，內容（節錄）如下：

「就市面懷疑有紫心番薯及黃花魚被添加入染色料一事，食環署己採取特別行動巡查全港多個零售地點，包括各街市攤檔，並抽取了多個紫心番薯和黃花魚樣本化驗。

化驗結果顯示所有的紫心番薯都含有一種名為「花青素」的紫色色素。花青素是一種天然色素，存在於紫心番薯中，並無證據顯示番薯內的色素是外來添加的。其實，「花青素」還自然存在於多種供食用的水果及蔬菜中，例如紫心番薯、葡萄、紅椰菜和漿果，一般的食用對人體無害。處理紫心番薯時出現色滲問題，只是自然現象，在蔬果類食物中十分普遍，不用擔心。」

作者之無知實令人震驚不已，且未經查證即認定所購之番薯乃黑心食品並於專欄發表，其輕率態度更絕不可取。食品安全乃港人極度關注之議題，超市長期售賣大陸生產之黑心食品，政府監管當局竟懵然不知，此乃何等嚴重之指控！正值本港反中、反政府、反霸權情緒高漲之際，此文自能吸引讀者，唯其為害亦更深。

此外，文章亦存若干疑點。首先，作者認定番薯之紫色乃來自「劇毒」般恐怖之染料，唯仍繼續食用，實有悖於常理。再者，購得黑心食品，作者竟不向有關當局舉報，反而選擇於專欄「揭發」。此舉實令人費解，難道作者不欲將無良商人繩之於法？本人無意猜測此文之描述是否真確、或作者是否別有用心。唯肯定者，此文乃公民教育之反面教材。

此等譁眾取寵、蹟近造謠抹黑之文章，貴報竟予以採納，實令人極度失望。由於文章並未提及有關生產商及超市之名，貴報及作者均得以避開法律責任，唯社會責任竟可置諸不顧？雖曰謠言止於智者，唯文章刊登於號稱「公信第一」之報章，「可信度」自有別於一般網上訛傳。若有讀者受文章誤導，貴報編採部實難辭其咎！

譁眾取寵之伎倆，眾多本地中文報章早已優為之。貴報若跟風，實為「以己之短攻人之長」，非但徒勞，更無異自毀長城，置貴報引以為傲之「公信力」於不顧。望貴報能秉承往昔務實、持平、嚴謹之作風，以「是其是非其非」之態度進行編採，並多容納不同聲音。貴報重奪「公信第一」之銜，實乃本人樂見之事。

最後，煩請轉寄此信予關麗珊女士。謝謝！

明報長期讀者


以上係本人拼盡九牛二虎之力寫嘅投訴信，啱啱寄咗出去。

日月報立場近年越嚟越偏頗，尤其是副刊，直頭俾啲民主聖鬥士攻佔晒。班友日日喺度大放厥詞，真係睇到眼火爆。早兩日講開有個低Ｂ婆娘喺日月報副刊造謠，本人勁鏟之餘，仲話考慮緊寫信去投訴添。其實只係齋噏嘅啫，寫信咁麻煩，如果真係要寫，幾年前已經寫咗啦。點知有網友留言話支持我去信投訴，搞到騎虎難下添，唯有頂硬上啦。今次真係頭痕嘞，用口語鬧人我就叻啫，要正正經經寫投訴信，識鬼咩！

Jodhpur, India

Jaisalmer, India

低Ｂ列傳之：黑心阿毛

日月報最近撤換總編輯，引嚟一眾正義之士（包括妓協、學者、垃圾議員）質疑，認為咁做係向中共投誠。本人一向客觀持平，當然唔會好似班友咁未審先判。其實換老總都唔一定係壞事啫，話唔定可以為日月報帶嚟一番新氣象呢。

曾經喺拙扑講過，日月報副刊已經淪為重災區，簡直係滿目蒼夷。鬼咩，揾埋晒啲低Ｂ婆娘（如黃Ｘ樂、陳Ｘ姿、關Ｘ珊之流）寫嘢，早排仲加埋李Ｘ玲隻癲雞乸添。搞到副刊版群癡粥粥（咦，好似用錯別字喎，係咪「群雌粥粥」先啱呢？），真係吾不欲觀之矣囉。希望個新老總可以清理門戶，掃晒呢班垃圾婆娘去堆填區啦。

一眾低Ｂ婆娘之中，又以關Ｘ珊最冇料到。此豬（弊嘞，又打錯添，應該係「此姝」）行文無甚見地，而且文筆平庸之極，完全吾明點解可以喺日月報長寫長有。早幾日佢又大發妙論（或謬論），講述自己買到大陸黑心食品嘅經歷，真係睇到唔知好嬲定好笑。以下係節錄自佢嗰篇題為「紫心和黑心」嘅文章：

「……最近到超市買番薯…… 標籤寫紫心薯，種植地是江永縣，收購加工企業在東完市，沒有寫明加工的意思是染色。番薯皮正常，但去皮時，看見番薯有紫色染料滲出來，連刀都變紫色。 相信加工廠將米黃色番薯染成深紫色，也許是注射染料的。 我浸洗番薯多遍，多次倒去變成紫色的水，才拿去煮。 煮成糖水後，連薑都染成紫色，糖水更是深紫色。我在超市常見這種紫心薯，長賣長有，應該不會食死人。 為免浪費食物，我吃了番薯，倒掉糖水，飲那種紫色水不見得有益健康……食物跟我們的健康息息相關，製假藥和假食物的奸商同樣黑心。我為深紫色糖水拍照放上fb，有留言指像被賜死的(藥酒) ，那紫色真像毒藥。 我對加工染料充滿好奇，到底怎樣的染料才可將番薯染成劇毒似的紫色呢？」

紫心番薯我喺Ｐ街超市都買過，全部都係洗乾淨晒再斬頭斬尾，呢啲咪加工囉。關小姐都唔用個腦（如果佢有嘅話）諗吓，就認定人地嘅加工係染色。既然認定番薯嘅紫色係來自染料，又講到顏色好似毒藥咁恐怖，但係就仍然食落肚，真係非正常人可以做得出囉。

紫心番薯糖水我都整過，煲出嚟嗰隻深紫色真係好誘人，見到都流晒口水。條婆娘喺度大驚小怪，係因為佢自己無知啫。其實好多純天然食物，例如紫心番薯、紅菜頭、桑葚，根本就係會勁甩色，呢樣係普通常識嚟囉。舊年我就喺科索沃食過樹上摘嘅新鮮桑葚，結果成隻手染到紅晒，好似鮮血咁，都唔知幾辛苦先洗得甩。又當條婆娘冇食過桑葚，但係紅菜頭夠普通喇啩，喺自助餐嘅salad bar成日會出現，佢冇理由未見過啫。紅菜頭切開咗，滲出嚟嘅水呈深紅色。而羅宋湯嘅紅色，亦係由呢種嘢嗰度得嚟。唔通咁又表示紅菜頭加咗染料？

事實上，染色紫心番薯已經傳咗好幾年，連食安中心都跟進過，以下係節錄自佢地嘅報告：

「化驗結果顯示所有的紫心番薯都含有一種名為「花青素」的紫色色素。花青素是一種天然色素，存在於紫心番薯中，並無證據顯示番薯內的色素是外來添加的。其實，「花青素」還自然存在於多種供食用的水果及蔬菜中，例如紫心番薯、葡萄、紅椰菜和漿果，一般的食用對人體無害。處理紫心番薯時出現色滲問題，只是自然現象，在蔬果類食物中十分普遍，不用擔心。」

無知唔可怕，無知又扮醒先至攞命囉。完全唔求證就話人賣黑心食品，分明係老屈啦。仲要喺報紙專欄寫埋出嚟，咁直頭係散布謠言添。如果喺大陸，條婆娘真係監都有得坐。啱啱上網摷吓，原來佢篇拙文歸類咗入日月報網上版嘅「通識教育」一欄，簡直誤人子弟呀！本人正認真考慮緊，係咪要寫信去日月報投訴呢？

除咗呢啲，對於關小姐處理事件嘅態度，本人亦十分睇唔過眼。條婆娘成日懶有批判精神，講到自己幾咁有公民意識。但係買到黑心貨，佢竟然冇諗過要懲治啲無良奸商，淨係識寫埋晒啲九唔搭八嘢呃稿費。如果啲紫心番薯係由黃肉番薯染色，有關超市肯定已經違反咗商品說明條例。而且根據《食物內染色料規例》，可用於食物嘅染色料亦有嚴格限制。用嗰啲睇嚟好似毒藥嘅深紫色染料，話唔定已經觸犯埋相關法例。作為一個負責任嘅公民，關小姐應該向有關當局舉報囉。就算唔舉報，佢亦應該公開嗰間售賣黑心貨嘅超市，等其他人可以防範。當然啦，咁要基於一個大前提，就係關小姐真心相信啲番薯係黑心染色貨。

而家佢淨係寫咗單嘢出嚟，客觀效果係令讀者覺得大陸紫心番薯都係黑心貨，進一步打擊香港人對大陸食品安全同政府監管嘅信心。究竟呢個係咪佢嘅真正意圖呢？佢既唔舉報，又唔公開有關超市，究竟係咪根本就知道啲紫心番薯冇問題呢？究竟邊個先係黑心呢？呢一連串問題我就冇答案嘞，留番俾大家自己判斷啦。

忽然有啲好奇，唔知關小姐係點樣嘅呢？睇佢啲文章，無論係文筆定內涵，水平都同時下成日出書嗰啲模差唔多。佢會唔會好似猿狸鳴咁，都係一個獻身公義嘅美少女呢？即刻上網摷吓先……

Ｘ！嚇得我吖，原來係條阿毛嚟架！

後記：
啱啱睇完日月報副刊，兩分鐘搞掂。而家群雌之中，我淨係睇屈穎妍，真係覺得佢越嚟越啱睇。至於林燕妮姐姐，so sorry，我對啲懶靚懶高貴嘅女人冇乜好感！

致校長：
雲在青天水在瓶……瓶中清水化為雲霧，雖然摸不到、捉不住，其實從未消失，只是換了另一種形態！

Georgia

紫心番薯糖水

焗紫心番薯

Mulberry, Patriarchal Monastery, Peje, Kosovo

火都嚟埋

本來諗住寫吓近期大熱嘅路姆西，點知琴日接連發生兩單嘢，搞到火都嚟埋，咁冇辦法嘞，粗口神獸都要讓路。

話說琴日買完餸返屋企，入到電梯大堂，見到部啱啱閂緊門。以本人身手，要飛撲㩒番開佢絕對唔難。不過見裏面有人，費事阻到人地啦。結果過咗成兩分鐘先有另一部到，期間又多咗個男人等。入到，都冇乜留意個男人㩒咗邊層，總之係低啲，即係阻住我返屋企煮飯啦。

去到六樓部停咗，個男人冇乜反應，望吓排掣，見仲有兩個著住燈。呢個情況，如果唔係有人喺外面亂㩒掣，就係有人要上樓，通常以前者居多。門打開，有個女人帶住兩個大約四至六歲嘅豆釘入嚟。唔使審，一定係日本人。啲架婆無所事事，最鍾意就係玩串門，成日喺同一座大廈上上落落，阻住晒個地球轉。

講番單嘢，見條架婆㩒咗八樓，真係唔多高興，又阻住我煮飯。點知啱啱閂埋門，部都未開始郁，件男豆釘又㩒咗個掣。奇怪嘞，唔通佢地唔係一家人？到咗七樓，門打開，但係男豆釘冇出，條架婆跟手㩒掣閂門。我心諗：咁都得，係咪玩嘢呀！原來更玩嘢都仲有，門啱啱閂埋，件女豆釘又㩒咗另一個掣。

到咗八樓，架婆冚家出晒，剩番我同個男人，但係排掣仲有三個著咗燈。除咗我嗰層，仲有十樓同十一樓。我想取消番女豆釘㩒嗰層，但係唔肯定個男人㩒咗邊層，咁咪直接問佢囉。男人用普通話答我，話係十樓。佢跟手取消埋十一樓，臨出仲好有禮貌咁say goodbye添。

條死架婆，真係想揾隻路姆西掟佢！見到兩件PK豆釘玩竟然唔阻止，又冇取消番佢地亂㩒嘅樓層。就算佢唔知㩒錯咗可以取消，但係阻礙到其他人，起碼都應該表示吓歉意啩。條死架婆好似乜都冇發生過咁，唔通當咗部係佢冚家嘅私人遊樂場？香港人成日話日本仔質素有幾高，其實係見得少佢地啲虛偽嘢囉。

講開又講，香港人都好冇家教，細路玩我就遇過唔少，只係未見過家長一齊玩啫。有一次同個七八歲嘅豆釘同上樓，佢㩒咗低我四層。上到佢嗰層，門打開咗，條PK仔竟然㩒晒我對落嗰三層先出。真係P佢個K，唔通佢唔驚會俾人打？！

言歸正傳，返到入屋，飯都唔煮住，即刻開電腦。話說喺街市菜檔見到啲一舊舊好似番薯咁嘅嘢，菜佬話係雪蓮果，仲講到不知幾有益添。舊嘢橫睇掂睇都冇忽似生果，咪諗住上網摷吓佢乜料囉。點知一開IE，竟然要我揀啲乜嘢選項，原來無啦啦自動幫我upgrade咗去IE11。心諗，今次PK嘞！

果然，又見到我最討厭嘅tabs，仲要係冇得disable添。都算嘞，只係討厭啫，其實唔係好大影響。最大鑊係次次upgrade親，必定有啲用開嘅嘢唔work囉，尤其係Google旗下產品。入去Blogger睇吓，一登入就已經彈個error message出嚟（見下圖）。跟住試埋統計資料、留言、新文章，全部都有同樣問題。

上網摷吓，原來好多人已經提出過呢樣嘢，但係就揾唔到解決方法。無計可施之下，唯有釜底抽薪，uninstall咗個upgrade，revert番去IE10啦。結果討厭嘅tabs就冇咗嘞，但係Blogger嘅問題仍然存在，真係俾佢玩謝！講真，Microsoft次次出親新嘢都劣評如潮，好心班友就檢討吓啦！

後記：
啱啱去過校長嗰邊……唔知講乜嘢好，唯有送上無言慰問！

Garni, Armenia

撞鬼

係咪覺得今日張相好熟口熟面呢？冇錯，張相基本上係之前嗰篇chok相其中之一。係就係，唔係就唔係，點解會話「基本上係」呢？想知點解，大家就要坐定定，聽我娓娓道來喇。

其實上篇嗰張相曾經執過……哈哈，咁講真係好多餘，我所有相都執過先出街架啦！特別強調「執過」，係因為除咗光暗色調減噪呢啲基本嘢，仲做咗啲結構上嘅改動，執走咗一啲嘢。

話說幾十年前去八仙嶺行山，途經一間荒廢村屋，覺得幾有懷舊feel，就喺門口影咗張相留念。當時影完就走，冇諗過要入去探險，因為呢類廢屋，肯定會成為行山人士解決三急嘅地方。

啲相晒咗出嚟，第一時間就喺晒相鋪睇，效果都相當滿意。揭吓揭吓，揭到去廢屋嗰張，竟然發現下巴有幾條類似血痕嘅嘢，一張俊臉立時變得詭異非常！當時反應係：有冇搞錯，晒成咁都得？！即刻摷番張底片睇吓，當堂嚇到傻咗，原來連底片都有！再睇清楚，啲「血痕」呈瘀紅色，總共有五條。無論喺顏色或形態上，都十足十俾人用手搲出嚟咁，真係好得人驚囉！當時就諗，會唔會係有「人」唔鍾意我喺佢屋企門口影相呢？

整啲咁嘢出嚟，幾十年前當然無計可施，唯有收埋張相喺櫃桶底啦。到而家呢個數碼年代，用Photoshop消滅區區幾條血痕簡直係依斯執，張相終於可以重見天日嘞。

睇住張相，自然又諗番起當年行山所見。雖然嗰帶已經了無人煙，但係山墳沿途都見到唔少，相信係附近村民最後安身之所。既然唔係搬到冇雷公咁遠，得閒返舊居行吓都係「人」之常情啫。咁啱見到有不速之客喺屋企門口擺款影相，用另類方法下逐客令都唔出奇。間廢屋伶伶仃仃，左右唔見有其他鄰居，睇嚟屋主並唔係好客之「人」囉。

哈哈，情節同「凶兆」有啲相似，唔知咁算唔算係撞鬼呢？雖然有過疑似撞鬼經歷，其實我係唔多信鬼神之說架。不過唔信唔代表唔怕，尤其是去到陌生地方。以前返大陸出差，一返到酒店房就會開晒所有燈，就算瞓覺都唔會熄囉。咁當然係唔環保，不過鬼叫我怕黑咩！話時話，好彩本人光撐撐都瞓得著啫！

講到怕黑，可能係因為有過童年陰影。咁又要講吓一單陳年舊事嘞。

話說九十幾年前，本人只得幾歲。嗰時屋企有個執人地嘅古老衣櫃，其中一邊櫃門鑲咗塊全身鏡。有晚半夜起身交水費，只係開著一盞昏暗嘅檯燈照明。交完水費，經過衣櫃前面，好自然咁停低照一照，點知咁就照出事嘞。

鏡中所見，除咗自己之外，竟然仲有另外一個「人」！佢企咗喺我左後方，係一個著住工人褲、比我更細嘅細路。屋企無啦啦出現咗個陌生「人」已經夠怪架啦，不過有樣嘢仲怪，佢塊面冇眼耳口鼻架！如果遇到咁嘢畸屎，唔知大家會有乜反應呢？

我當時覺得好奇怪，擰轉頭睇吓，根本唔見有其他「人」。再望吓塊鏡，淨係得番我自己，咁咪上床繼續瞓囉。嗰時又真係唔識驚喎，可能係因為嗰個「人」嘅樣完全唔恐怖啦。佢冇眼耳口鼻，塊面凹凹凸凸，就好似一個菠蘿包咁。對一個幾歲嘅細路嚟講，又真係冇乜驚嚇效果啫。如果係啲青面獠牙、或者條脷泵到落肚臍嘅鬼樣，話唔定會嚇到我瀨屎囉。哈哈，嗰時啱啱交完水費，想瀨尿都唔得啦！

後來再大啲，對「鬼」嘅認知多咗，諗番起單嘢先識驚，而且越諗越驚添。又再後來，本人已經唔信鬼神之說，就算再諗起都唔會當係乜嘢一回事。不過單嘢始終解析唔到，而影響亦持續到今時今日。自從後來識驚之後，我喺光線唔充足嘅環境係絕對唔會照鏡架！話時話，我都聽過好多人講，話夜晚唔好照鏡，否則隨時會見到啲唔想見嘅嘢囉。

有時都覺得好矛盾，我明明唔信有鬼，但係又會驚撞鬼。夜晚完全唔照鏡當然冇可能，所以本人一早就諗定對策。常言道：人怕鬼三分，鬼怕人七分。萬一見到啲唔想見嘅嘢，我會大喝：Ｘ！死Ｘ開啦！說明一下，兩個「Ｘ」係分別代表唔同嘅字。好彩，本人一直未有機會使出呢招殺手鐧！Touch wood！

八仙嶺

再chok

唉，好人真係唔易做！

為咗提醒大家飲酒要有節制，小弟不惜以貓樣示人，親身示範酒過三巡會發生啲乜嘢。經此一役，多年嚟苦心經營嘅斯文靚仔形象可謂蕩然無存！為咗挽救跌到落谷底嘅形象，本人唯有摷番幾十年前嘅chok相出嚟，希望可以中和番先前啲貓相造成嘅負面影響。

都係唔講咁多嘞，睇相啦！

Honningsvag, Norway

西湖, 杭州, 浙江

大圍

南丫島

南丫島

八仙嶺

八仙嶺

酒過三巡

上回講到保安阿頭出於一片好心，勸喻年輕女士唔好飲咁多酒，以免俾色狼有機可乘。點知好心著雷劈，自己反而受到圍攻。有三條阿毛飛撲而出，唔單止批評佢干預女性自主權，仲屈佢鼓勵色狼強姦貓女添。貓女者，貓咗之女人也。

呢三條阿毛，對醉姦嘅認知好可能仲係停留喺粵語殘片時代，以為就係好似林蛟灌醉羅艷卿嘅情節咁簡單。如果未見識過香港嘅劈場，就唔該佢地唔好咁多廢噏啦！

本人縱橫酒界幾十年，深明「酒能亂性」呢個道理。雖然嚴重到酒後亂性（亂咁發生性行為）未必人人都會，但係影響自制同判斷能力就肯定架嘞。講到酒後失態，本人的確見過唔少。

有幾個酒友平時都不知幾man，但係就試過飲大兩杯喊到flea flat，完全收唔到聲。搞到我手足無措，都知應該安慰定係恥笑佢地好。酒精會削弱自制能力，令人將抑壓喺心底嘅情緒釋放出嚟。喊吓當然好小事，如果係第啲嘢，就有可能會好大鑊囉。

有時啲女仔飲到high咗，會無啦啦對異性做出一啲親暱或富挑逗性嘅舉動。俾女擒上身同坐大髀，本人就試過唔少嘞。如果你以為咁係因為啲女對你有意思，就隨時會出事嘞。呢啲畸屎，其實十次有十一次都係啲女貪玩啫。套用網上名句：認真你就輸鳥！不過當判斷力受酒精影響，男方可能會誤以為女方嘅舉動係一種邀請。如果男方係食得唔好嘥嘅人，又或者本身對對方有意思，而女方又貓到神智不清，咁酒後餘興就肯定係爆房啦。當條女酒醒，咪又多咗一單醉姦囉！

少劈酒嘅朋友未必相信，但係酒過三巡，真係乜嘢都可以發生。有一次，成班同事食晚飯，已經劈到天昏地暗日月無光。唔知邊個覺得未夠皮，飯後仲要拉隊上其中一位女同事（Ｔ）屋企再劈。酒過三巡，忽然有人發現，Ｔ竟然同一個平時冇乜兩嘴嘅男同事打緊車輪。點解會發生啲咁嘅嘢就無從稽考嘞，不過可以好肯定佢地兩個唔會有路，因為男主角條女（後來做埋老婆）當時都在場。酒再過三巡，Ｔ又被發現打緊車輪，不過對手係另一位女同事（Ｍ）。事態發展又係莫名其妙，因為Ｔ同Ｍ都肯定唔係les囉。Ｔ係無男不歡嗰隻，而Ｍ條仔都係公司同事，不過佢冇參與我地嗰次盛會。

其實上述事件我都係第二日喺公司睇到啲相先知道，據影相嗰位男同事（Ｂ）講，本人一早就貓咗囉。本來睇到啲相都覺得好好笑，不過突然諗到一啲嘢，我就用凌厲嘅眼神望住Ｂ，然後問佢：「你有冇影埋……」見到Ｂ陰陰嘴咁笑，我都心知不妙。果然，佢跟住講：「你自己睇埋落去啦。」

當晚發生嘅嘢真係全無印象，不過事後返到屋企，發現個肚花晒，我都估到一定係俾人搞過。到睇見啲相，再加埋Ｂ嘅講解，真相終於大白。原來本人貓咗之後，攤屍咁瞓咗喺度，點知竟然引嚟幾個女子垂涎。佢地夾手夾腳將我㩒住，由Ｔ出手，用唇膏喺我塊面化妝。條衰婆意猶未盡，跟住仲扯高我件衫，喺我心口寫字添。但係咁都未能夠滿足佢嘅獸慾，個死婆就再下一城，攻破埋我嘅褲鍊防線，喺我肚腩畫公仔。然後越畫越低，連我條超低腰白底褲仔都俾佢畫到變晒紅色咁滯。

睇完相，我又狠狠咁睥咗Ｂ一眼。條友見我眼神不善，就連忙補鑊，話見到Ｔ將枝唇膏伸埋入我條底褲裏面畫，佢自己都驚會出事喎。真係聽到火都嚟埋，呢條雞蟲有乜淫亂場面未見過，連佢都覺得會出事，當時情況梗係好危急啦，佢竟然仲掛住影相，完全冇諗過要幫我解圍。正當我要鏟佢鑊甘，條友居然先發制人，話見我當時識得笑，以為我好enjoy喎。我再睥佢一眼，然後揭開本相簿睇吓，跟住同佢講：「你返埋位做嘢啦！」係喎，我當時真係笑住咁俾人搞喎，但係點解會一啲印象都冇嘅呢？！

話時話，呢單嘢我又唔係好介意。始終，男人唔會有貞操名節呢類包袱。如果換轉，俾人咁搞嘅係女人，肯定唔可以當乜都冇發生過囉。講真，如果飲到貓晒嘅係女人，又點會只係俾人畫吓公仔咁簡單呢？仲有，咪以為熟人就唔會搞你。High到阿媽都唔認得嘅時候，仲邊會理得你係新相識定老相好先！

所謂「匹夫無罪，懷璧其罪」，身懷奇寶自然會招人覬覦。呢個係千古不變嘅定律，糾纏喺誰是誰非只會令人錯失焦點。真係好奇怪，港女一方面以為自己有寶，覺得身邊個個男人都打緊佢地主意，但係另一方面，佢地又成日飲到爛醉如泥，好似完全唔驚俾人執死豬咁。可能港女對中國古諺不甚了了，但係英文應該識喇啩，「don't leave your valuables unattended」冇理由未聽過啫。講到尾，色狼唔一定有樣認，所以女性飲酒要量力而為，時時保持清醒至係保豬嘅不二法門囉！

各位女網友咪插住，「港女」係指具備某啲性格特質嘅香港女性，本人絕無以偏概全之意！舉個例，文首提及嗰三條阿毛就庶幾近矣。哈哈，又講錯嘢添，嗰三條係「港毛」先啱！

另外要澄清一點，本人唔係話醉姦案件中嘅女性一方都要負上若干責任。不過，將涉事男方一律打成十惡不赦嘅淫魔又係咪絕對公平呢？事實上，因為男人身懷「攻擊性武器」，一旦出事就往往百辭莫辯。無可否認，的確有啲賤男會設局灌醉、甚至落藥，以圖迷姦目標女子。但係本人傾向相信，更多畸屎係喺「互動」情況下發生囉。

正如上文提到，酒過三巡，男男女女都可會做出一啲不尋常舉動。受酒精影響，無論男女都有可能會俾錯同收錯signal囉。如果其中一方醉到不省人事，唔俾對方夾去爆房先怪啦。而且之前都提過，貓到冇晒意識並唔表示會全無反應，好似我俾人搞緊都識得笑，班友見到仲以為我好enjoy添。如果咁嘅畸屎發生喺女性身上，男方見到條女唔止唔反抗，仲笑住受搞，有乜理由會覺得自己係強姦緊對方先！

仲有，咪以為發生呢類醉姦事件，蝕底嘅只有女方，其實男方可能仲冤枉呀。以為只係開場友誼波啫，點知無啦啦變成強姦，結果留埋案底，一生前途就係咁先嘞。當然啦，如果有Ｋ仔咁靚仔都仲可以喺演藝界發展，但係移民就唔使諗囉。

小飲怡情，大飲亂性，所以無分男女，酒呢家嘢都係飲得節制啲好。話時話，其實保安阿頭真係應該勸喻埋男士唔好飲咁多酒囉，咁就唔使俾班阿毛插啦。

Georgian Wine

男又得

女又得

羅漢坐蓮

車輪戰

車輪混戰

人為刀俎

我為魚肉

飲醉就可以俾你姦？

本人自問缺點一大籮，多到講唔晒。至於優點，雖然只係寥寥可數，不過就好實在。例如，我衰咗一定會認，絕唔會砌詞狡辯，更唔會諉過於人。

上回提到本人試過N次唔見銀包、電話、同公事包，都係飲到貓晒留低咗喺的士，結果只有一次攞得番。啲人拾遺不報當然唔啱，不過本人冇保管好自己嘅財物，亦係難辭其咎。事實上，班豬朋酒友都提醒過我好多次，叫我要適可而止，唔好鑊鑊飲到貓晒囉。當然啦，我可以講，飲到貓晒係我嘅事，咁唔代表啲人執咗我個銀包可以據為己有啫。我仲可以反咬班豬朋酒友冇義氣添，明知我貓咗都唔送我返屋企，由得我自己搭的士。哈哈，咁樣衰嘅嘢本人梗係做唔出啦，否則餘生睇怕都要「舉杯邀明月，對影成三人」囉！

不過咁，香港幾樣衰嘅人都有，我地又不妨睇番一單幾個月前嘅舊聞。保安阿頭回應記者就今年首季強姦案件激增嘅提問，話「所有個案都涉及友姦，部分個案是受害人飲得很多酒後發生的，所以我會勸喻年輕女士不應飲得太多」。此言一出，大群雌性動物即刻飛撲而至，咬住保安阿頭唔放，誓要咬到佢人頭落地。不良傳媒亦唔放過抽水機會，大肆渲染之餘，更任意扭曲保安阿頭嘅言論。例如爛生果就即刻出咗一篇題為「強姦案多賴少女飲酒 『飲醉就可以俾你姦？』」嘅報導，揾嚟兩位婦女界發言人大放厥詞。

爛生果絕非浪得虛名，一個「爛」字正正就係此報向來堅持嘅宗旨。保安阿頭只係引述實際統計數字，從而提醒番年輕女性點先可以保障自己嘅人身安全啫，標題中嘅「賴」字又從何說起呢？統計數字係客觀事實，雖然強姦數字飆升亦有可能係因為受害人事後報案嘅畸屎多咗，不過友姦同醉姦問題相當嚴重，確實係不容忽視嘅題目。如果要問責任誰屬，咁就真係一匹布咁長嘞。我絕對唔敢講被姦女子都要負上丁屎咁多責任，不過如果受害人可以提高佢地嘅自我保護意識，呢類強姦案肯定會少啲囉。正如警訊成日教人「財不可露眼」，唔通咁又係警方將保安責任卸俾市民大眾？除非爛生果證明到強姦數字飆升係因為保安當局辦事不力，否則用個「賴」就係老屈囉！

至於「飲醉就可以俾你姦？」就更係無厘頭中之無厘頭。或者呢句只係受訪婦女界發言人嘅白痴言論，但係爛生果喺標題中冇特別講明，當然可以理解為報紙嘅立場。究竟呢句嘢有乜咁白痴？好簡單，我又反問一句：如果你貓到不省人事，又點可以確保自己唔會俾人姦呢？你唔係無厘頭到期望所有男人都係正人君子啩！仲有，護苗基金夠成日教啲細路俾人侵犯時要識得講「唔好」啦，唔通咁又代表「冇講唔好就可以俾你侵犯？」此報記者同編輯連咁低B嘅標題都可以用，真係非一個「爛」字可以形容囉！

嗰兩位受訪嘅婦女界發言人，又係笑死人冇命賠。某會社婦女事務發言人尿銀鳳反問保安阿頭：「人哋飲醉酒，你就可以強姦人？」佢又話：「任何有公德心的人，發現有人飲醉酒，都應該是照顧她，而不是乘人之危。黎棟國咁講係鼓勵強姦犯乘人之危，好得意，男士酒後犯罪就係求情理由，相反女士飲酒被侵犯就係咎由自取。」

首先，本人忍唔住要俾鳳姐一個溫馨提示：地球太危險喇，絕對唔適合你架，都係即刻返去巴魯坦星啦！正常地球人都知道人類有好有壞，要防範壞人係基本常識，咁絕唔表示我地容忍、認同、或鼓勵犯罪行為囉。至於好人應該係點，歷任道德重整會會長都講過九千幾次，根本就唔需要佢再喺度重複。可能因為鳳姐係外星新移民，唔係咁熟識地球語，佢亦對保安阿頭嘅言論作出咗錯誤理解。本人話晒都用咗地球語幾十年，但係就點都睇唔出保安阿頭嘅言論有邊忽係「鼓勵強姦犯乘人之危」囉。至於「男士酒後犯罪就係求情理由」，咁就要睇法官受唔受嘞，根本同保安阿頭都完全唔啦更。而保安阿頭「勸喻年輕女士不應飲得太多」係咪就等同佢認為「女士飲酒被侵犯就係咎由自取」呢？從字面上理解，我可以話一定唔係。「咎由自取」係「自作自受」咁解，意指當事人自己要為惡果負上相當程度甚至全部責任，而保安阿頭嘅勸喻根本就唔帶有咁嘅意思。事實上，與其廢噏一餐，例如強烈譴責啲無良色狼、或者提醒男士們強姦係嚴重罪行，勸喻女性咪蝕底肯定嚟得更實際囉。可能基於腦電波波段差異，鳳姐對人類嘅語言同思維都唔係太理解，都係無謂同佢計較咁多嘞。

至於另一位受訪者，某大學性別研究部兼任講師狐露西對保安阿頭就有咁嘅批評：「佢咁講係等同限制女性生活自由，甚至對男女平等意識的一個蔑視。佢需要解釋同道歉。」

同鳳姐一樣，露西姐嘅語文程度都係極其低劣。保安阿頭用嘅係「勸喻」二字，根本就冇「要求」或「指示」嘅意思，你覺得唔啱聽咪當佢發噏瘋囉。「限制女性生活自由」云云，直頭係無限上綱啦。至於「對男女平等意識的一個蔑視」呢個講法，就更係可笑添。哈哈，係咪要保安阿頭勸喻埋男性都唔好飲咁多酒先算係尊重男女平等意識呢？事實上，基於男女生理有別，絕大部分強姦受害人都係女性。而家保安阿頭建議女性用一個簡單、直接、有效嘅方法保護自己，都唔知條婆娘有乜好嘈。

講真，以香港現今情況，要大幅減少強姦案件，根本唔係保安部門可以做得到。強姦係嚴重罪行，相信喺香港唔會有男人唔知囉。而香港警隊以效率見稱，類似印度嘅執法不力問題亦唔存在。歸根究底，要令情況得以改善，就要從個人操守同正確認識兩性關係方面入手。方法只有一個，就係教育。枉露西姐係教育工作者，而且仲係大學性別研究部講師添，都唔知佢有冇檢討吓，究竟自己喺兩性教育方面作出過乜嘢貢獻，點解到今時今日仲會有咁多友姦同醉姦呢？明明連自己本份都未做好，條婆娘仲有時間撲出嚟廢噏，真係……哈哈，本人一時腦閉塞，諗唔到可以點俾評語露西姐添！

另外仲有一位阿姐級人馬都評論過呢單嘢，雖然冇乜嶄新觀點，本人都想攞出嚟講吓。知名「學者」兼垃圾會議員黃迫暈女士對保安阿頭有咁嘅批評：「黎棟國的言論，反映他的性別偏見，有指責受害人的意識形態，隱含女人被強姦是咎由自取的錯誤思維，也助長男士不尊重女性的性自主權。」

迫暈姐嘅觀點同之前講過嘅兩位婦女界發言人其實冇乜大分別，本人就唔另作評論嘞。我只係想講，貴為垃圾會直選議員都可以低B成咁，選佢出嚟嘅九龍西選民真係……弊嘞，又諗唔到點講添！

上述三位婆娘都只係識撲出嚟抽水，佢地嘅騎呢言論唔止無助減少強姦罪案，仲可能會有反效果添。如果保安當局真係俾佢地嚇窒，以後淨係講埋晒啲所謂「政治正確」嘅廢話，而唔敢向公眾提供有效嘅自保資訊，咁最終損失嘅會係邊個呢？又或者，香港女仔受晒佢地嗰套，覺得自由（或自主）大過天，而唔考慮吓貓到不省人事有乜風險，咁最終受害嘅又會係邊個呢？

不過咁，我又唔係話保安阿頭嘅言論完全冇問題。佢只「勸喻年輕女士不應飲得太多」就真係有年齡歧視之嫌嘞，咁講會引起不必要嘅猜想，覺得佢暗示緊上咗年紀嘅女士就算貓到攤晒屍都唔會有人執死雞，叫一眾大嬸阿毛情何以堪呢？！其實講少兩個字就皆大歡喜啦，保安阿頭嘅政治敏感度真係爭咗少少囉！忽然諗到，上述三位婆娘反應咁激，真正原因可能係俾保安阿頭插中死穴喎。哈哈，崩口人忌崩口碗呀！

Vodka Get

Black Russian

Sangiovese Rose

十評香港人之三：誠實排行榜

聲明：文中提及之「香港人」乃指部分香港人，本人絕無以偏概全之意。雖無確實數據支持，唯本人相信此等「香港人」絕非極少數。

啱啱先睇番早幾日報紙，又發現一單都幾有趣嘅花邊新聞。話說《讀者文摘》喺全球16個城市做咗個跌錢測試，睇吓有幾多人拾金不昧，然後整咗個「誠實排行榜」出嚟。個測試好簡單，喺鬧市地下留低總共12個內有折合港弊$370現金同埋失主聯絡資料嘅銀包，再統計番有幾多執到銀包嘅人會聯絡失主。接受測試嘅城市分別係：
　阿姆斯特丹（荷蘭）
　柏林（德國）
　孟買（印度）
　布加勒斯特（羅馬尼亞）
　布達佩斯（匈牙利）
　赫爾辛基（芬蘭）
　里斯本（葡萄牙）
　倫敦（英國）
　盧布爾雅那（斯洛文尼亞）
　馬德里（西班牙）
　莫斯科（俄羅斯）
　紐約（美國）
　布拉格（捷克）
　里約熱內盧（巴西）
　華沙（波蘭）
　蘇黎世（瑞士）

如果係我就唔會搞啲咁無聊嘅嘢嘞，唔使測試都知，最誠實頭3位梗係紐約、倫敦、同蘇黎世啦。美國係舉世公認嘅正義代表，國民質素當然無容置疑。英國人出晒名有紳士風度，斷估都唔會cheap到將人地嘅失物據為己有啩。而瑞士係富翁天堂，啲人根本唔會稀罕嗰區區幾百蚊囉。

要估包尾3位亦絕無難度，唔使審，一定係孟買、里約熱內盧、同莫斯科。論貪錢程度，印度人比中國人更甚，如果佢地認咗第二，恐怕只有猶太人敢認第一。南美諸國亂到七彩，里約更係惡名遠播，誠實當然冇佢份啦。莫斯科治安都好差，本人仲可以做見證添。我地成團人浩浩蕩蕩，喺大街大巷竟然會有人走埋嚟搶嘢，都咪話唔得人驚囉。

相信好多香港人都係咁諗，以人民質素而言，北美同西北歐肯定位居世界前列。跟住輪到南歐、東歐，然後係亞太、中東，包尾嘅實係南美、南亞、同非洲。當中亦有個別例外，好似澳紐同日本，普遍認為可以同歐美睇齊。講穿其實好簡單，一般人會將膚色深淺同經濟發展程度作為人民質素嘅指標。

我地又睇吓嗰個跌錢測試，結果究竟係咪符合一般預期呢？

根據嗰篇報導，排行榜首位係赫爾辛基。呢個賽果都唔算意外，因為北歐人一向都係擔屎唔偷食。而倫敦只係喺中游位置，咁就令人有啲失望嘞。最跌眼鏡嘅係蘇黎世，竟然名列尾四。忽然明白，地靈唔表示人傑，發財唔一定立品囉。更估佢唔到嘅都仲有，孟買居然排第二，只係輸咗個馬鼻俾赫爾辛基。對於呢個結果，本人用咗半粒鐘都諗唔到合理解釋，咁唯有不予置評啦。

除咗部分賽果令人意外，本人亦有啲唔明，作為一個國際大都會，點解香港會冇份測試呢？唔通經過16年「大陸化」，香港已經從西人嘅視野消失咗？

點都好啦，香港做咗滄海遺豬，始終令人有啲心癢癢。自問非一般無聊，又等我估吓如果喺香港進行呢個測試，結果會係點先。

我估香港嘅交還數目會係1，同里斯本並列倒數第一。本人絕對唔係無的放矢，呢個估算係有實際數據支持架。本人試過N次唔見銀包、電話、同公事包，多數都係飲到貓晒留低咗喺的士，結果只有一次攞得番。我班豬朋酒友都有唔少類似經驗，尤其是唔見電話，尋回率基本上係0囉。

話香港人質素普遍有幾高，其實只係班政棍投其所好，氹啲無知細路啫。難得啲人又咁冇自知之明，連咁嘅謊言都信到十足。真係好希望《讀者文摘》可以喺香港搞一次跌錢測試，等香港人認清自己嘅真面目。

越諗越唔順，香港冇理由冇份啫，即管喺網上摷吓，果然有料到。根據星島日報一篇題為「港人拾金不昧排尾二」嘅報導，原來《讀者文摘》喺香港都曾經做過類似測試。以下係節錄自有關報導：

「原來在香港丟掉一個銀包﹐只有三成機會可失而復得﹐機會率竟低致十四個國家或地區中的倒數第二﹗」

「原來一向視香港為競爭對手的新加坡﹐該國國民的誠實度﹐亦是香港人拍馬都追唔上﹐在新加坡遺失錢包﹐歸回率竟可高達90﹪﹐比香港高出兩倍。」

「總括來講﹐北歐人最誠實﹐美國、加拿大、澳洲、印度人的銀包歸回率也接近七成﹐算是誠實的國家。在亞洲﹐除新加坡外﹐日本、韓國人的表現也不俗。」

原來兩次測試嘅結果非常吻合，都係北歐人最誠實，而印度人亦相當唔錯。至於香港排尾二，亦係本人意料之中。不過歸還率有三成咁高，我就有啲意外嘞。哈哈，如果香港人睇到呢篇報導，唔知佢地又會有乜反應呢？

呢樣我就估到嘞，香港人一定會話而家通街都係「自由人」，啲銀包梗係俾佢地執晒。香港人更會趁勢反擊，批評「強國人」唔止搞到香港亂七八糟，仲影響埋香港嘅國際聲譽添。當香港人知道單新聞其實係2001年嘅舊料，嗰時根本未有自由行，佢地就會即刻改口，話拾遺不報嘅全部都係由大陸落嚟嘅劣質新移民囉。

咪當本人吹水唔抹嘴，其實以上推論係參考香港人喺思辨模式，再經精密分析所得出嘅結果。話「香港人」唔係「中國人」、連「X你老母」都唔算係粗口、用暴力手段阻止異見者發言竟然可以講成係民主公義嘅體現，香港人仲有乜嘢會噏唔出呢？！冇錯，香港人就係咁架嘞，明明邏輯思維欠奉又要強詞奪理，到詞窮理屈就顛倒黑白、指鹿為馬，咁唔係自欺欺人係乜？！香港人連對自己都唔誠實，喺「誠實排行榜」唔使包尾都冇天理啦！

誠實排行榜

Red-light District, Amsterdam, Netherlands

Berlin Wall, Berlin, Germany

Parliament House, Budapest, Hungary

Sibelius Park, Helsinki, Finland

Lisbon, Portugal

London Tower, London, UK

Ljubljana, Slovenia

Madrid, Spain

Cosmonauts Obelisk, Moscow, Russia

New York, USA

Old Town Square, Prague, Czech Republic

Rio de Janeiro, Brazil

Old Town Square, Warsaw, Poland