撞鬼

係咪覺得今日張相好熟口熟面呢？冇錯，張相基本上係之前嗰篇chok相其中之一。係就係，唔係就唔係，點解會話「基本上係」呢？想知點解，大家就要坐定定，聽我娓娓道來喇。

其實上篇嗰張相曾經執過……哈哈，咁講真係好多餘，我所有相都執過先出街架啦！特別強調「執過」，係因為除咗光暗色調減噪呢啲基本嘢，仲做咗啲結構上嘅改動，執走咗一啲嘢。

話說幾十年前去八仙嶺行山，途經一間荒廢村屋，覺得幾有懷舊feel，就喺門口影咗張相留念。當時影完就走，冇諗過要入去探險，因為呢類廢屋，肯定會成為行山人士解決三急嘅地方。

啲相晒咗出嚟，第一時間就喺晒相鋪睇，效果都相當滿意。揭吓揭吓，揭到去廢屋嗰張，竟然發現下巴有幾條類似血痕嘅嘢，一張俊臉立時變得詭異非常！當時反應係：有冇搞錯，晒成咁都得？！即刻摷番張底片睇吓，當堂嚇到傻咗，原來連底片都有！再睇清楚，啲「血痕」呈瘀紅色，總共有五條。無論喺顏色或形態上，都十足十俾人用手搲出嚟咁，真係好得人驚囉！當時就諗，會唔會係有「人」唔鍾意我喺佢屋企門口影相呢？

整啲咁嘢出嚟，幾十年前當然無計可施，唯有收埋張相喺櫃桶底啦。到而家呢個數碼年代，用Photoshop消滅區區幾條血痕簡直係依斯執，張相終於可以重見天日嘞。

睇住張相，自然又諗番起當年行山所見。雖然嗰帶已經了無人煙，但係山墳沿途都見到唔少，相信係附近村民最後安身之所。既然唔係搬到冇雷公咁遠，得閒返舊居行吓都係「人」之常情啫。咁啱見到有不速之客喺屋企門口擺款影相，用另類方法下逐客令都唔出奇。間廢屋伶伶仃仃，左右唔見有其他鄰居，睇嚟屋主並唔係好客之「人」囉。

哈哈，情節同「凶兆」有啲相似，唔知咁算唔算係撞鬼呢？雖然有過疑似撞鬼經歷，其實我係唔多信鬼神之說架。不過唔信唔代表唔怕，尤其是去到陌生地方。以前返大陸出差，一返到酒店房就會開晒所有燈，就算瞓覺都唔會熄囉。咁當然係唔環保，不過鬼叫我怕黑咩！話時話，好彩本人光撐撐都瞓得著啫！

講到怕黑，可能係因為有過童年陰影。咁又要講吓一單陳年舊事嘞。

話說九十幾年前，本人只得幾歲。嗰時屋企有個執人地嘅古老衣櫃，其中一邊櫃門鑲咗塊全身鏡。有晚半夜起身交水費，只係開著一盞昏暗嘅檯燈照明。交完水費，經過衣櫃前面，好自然咁停低照一照，點知咁就照出事嘞。

鏡中所見，除咗自己之外，竟然仲有另外一個「人」！佢企咗喺我左後方，係一個著住工人褲、比我更細嘅細路。屋企無啦啦出現咗個陌生「人」已經夠怪架啦，不過有樣嘢仲怪，佢塊面冇眼耳口鼻架！如果遇到咁嘢畸屎，唔知大家會有乜反應呢？

我當時覺得好奇怪，擰轉頭睇吓，根本唔見有其他「人」。再望吓塊鏡，淨係得番我自己，咁咪上床繼續瞓囉。嗰時又真係唔識驚喎，可能係因為嗰個「人」嘅樣完全唔恐怖啦。佢冇眼耳口鼻，塊面凹凹凸凸，就好似一個菠蘿包咁。對一個幾歲嘅細路嚟講，又真係冇乜驚嚇效果啫。如果係啲青面獠牙、或者條脷泵到落肚臍嘅鬼樣，話唔定會嚇到我瀨屎囉。哈哈，嗰時啱啱交完水費，想瀨尿都唔得啦！

後來再大啲，對「鬼」嘅認知多咗，諗番起單嘢先識驚，而且越諗越驚添。又再後來，本人已經唔信鬼神之說，就算再諗起都唔會當係乜嘢一回事。不過單嘢始終解析唔到，而影響亦持續到今時今日。自從後來識驚之後，我喺光線唔充足嘅環境係絕對唔會照鏡架！話時話，我都聽過好多人講，話夜晚唔好照鏡，否則隨時會見到啲唔想見嘅嘢囉。

有時都覺得好矛盾，我明明唔信有鬼，但係又會驚撞鬼。夜晚完全唔照鏡當然冇可能，所以本人一早就諗定對策。常言道：人怕鬼三分，鬼怕人七分。萬一見到啲唔想見嘅嘢，我會大喝：Ｘ！死Ｘ開啦！說明一下，兩個「Ｘ」係分別代表唔同嘅字。好彩，本人一直未有機會使出呢招殺手鐧！Touch wood！

八仙嶺