游Ｘ西，你收皮啦！

游蕙禎，Ｘ西二字你絕對當之無愧呀！你真係面皮厚過西皮，竟然敢公然歪曲基本法，對住香港700萬市民話「158條提到，根據終審法院嘅要求，人大只可以解釋涉及中央人民政府或者中央與地區關係。就人大釋法嘅事，我地會繼續跟進，絕對唔會令佢不了了之。」你係咪當阿爺會好似你條Ｘ西咁蠢，搬石頭揼自己隻腳？事實上，基本法158條內容同你講嘅啱啱相反。有關條文講得好清晰，喺某啲情況下（審理案件時需要對本法關於中央人民政府管理的事務或中央和香港特別行政區關係的條款進行解釋），香港終審法院唔可以自把自為，需要尋求人大釋法。158條只係約束香港法院，對於人大幾時釋法同透過乜嘢途徑啟動釋法係完全冇限制架，蠢貨！你會講出啲咁不知所謂嘅嘢，可能性只有3個：

1）你根本冇睇過基本法158條原文，人講乜你信乜。

2）你係文盲，連條文中咁簡單嘅中文或英文都睇唔明。

3）你明知158條講乜，但係就故意歪曲條文含義，意圖蒙騙一眾冇睇過158條原文、人講乜佢地信乜嘅盲毛。

無論係因為以上邊一點，你條Ｘ西都冇資格做議員啦。仲上訴？唔通你嫌堂費輸得未夠甘？可能有人會照顧你某方面嘅需要啦，我唔知。不過上到法庭提出你嗰啲所謂理據，我驚連法官都會俾你笑死囉！你嫌仲未出夠醜？

游Ｘ西，扑嘢你就叻啫，做議員根本就未夠班囉，速速收皮啦！快啲收埋你塊西皮，咪搞到香港臭晒呀！

附：基本法158條中英原文

第一百五十八條
本法的解釋權屬於全國人民代表大會常務委員會。

全國人民代表大會常務委員會授權香港特別行政區法院在審理案件時對本法關於香港特別行政區自治範圍內的條款自行解釋。

香港特別行政區法院在審理案件時對本法的其他條款也可解釋。但如香港特別行政區法院在審理案件時需要對本法關於中央人民政府管理的事務或中央和香港特別行政區關係的條款進行解釋，而該條款的解釋又影響到案件的判決，在對該案件作出不可上訴的終局判決前，應由香港特別行政區終審法院請全國人民代表大會常務委員會對有關條款作出解釋。如全國人民代表大會常務委員會作出解釋，香港特別行政區法院在引用該條款時，應以全國人民代表大會常務委員會的解釋為準。但在此以前作出的判決不受影響。

全國人民代表大會常務委員會在對本法進行解釋前，徵詢其所屬的香港特別行政區基本法委員會的意見。

Article 158
The power of interpretation of this Law shall be vested in the Standing Committee of the National People's Congress.

The Standing Committee of the National People's Congress shall authorize the courts of the Hong Kong Special Administrative Region to interpret on their own, in adjudicating cases, the provisions of this Law which are within the limits of the autonomy of the Region.

The courts of the Hong Kong Special Administrative Region may also interpret other provisions of this Law in adjudicating cases. However, if the courts of the Region, in adjudicating cases, need to interpret the provisions of this Law concerning affairs which are the responsibility of the Central People's Government, or concerning the relationship between the Central Authorities and the Region, and if such interpretation will affect the judgments on the cases, the courts of the Region shall, before making their final judgments which are not appealable, seek an interpretation of the relevant provisions from the Standing Committee of the National People's Congress through the Court of Final Appeal of the Region. When the Standing Committee makes an interpretation of the provisions concerned, the courts of the Region, in applying those provisions, shall follow the interpretation of the Standing Committee. However, judgments previously rendered shall not be affected.

The Standing Committee of the National People's Congress shall consult its Committee for the Basic Law of the Hong Kong Special Administrative Region before giving an interpretation of this Law.

Pokhara, Nepal

大鑊

曾焯文《粵辭正典》之一出解放軍就大鑊？ | 本土新聞

daai6wok6大鑊。古代酷刑，引申為大事不好。

［例］香港民族黨（二零一六）《獨立！》〈冇軍隊點獨立？中國一出解放軍就大鑊啦！〉一個地區獨立不一定需要軍隊，香港地處亞洲優勢位置，有天然深水港、鄰近東亞國家，極具經濟戰略優勢，而且香港有自己貨幣、聯繫匯率，更有健全的金融制度，香港的國際金融中心地位與其他知名的金融城市齊名。最近的巴拿馬文件更反映了中國黨官透過香港轉移資產及避稅，事實就是，香港才是當代中國的命脈，中國靠香港多於香港靠中國，香港人要獨立是絕對有籌碼的。

無無聊聊上Google摷下「大鑊」，無意中喺一個本土網派站見到以上呢篇文。作者都算用心狼虎喇，連解釋廣東俗語都要拉埋港獨嚟講。睇完之後真係啼笑皆非，唔明點解有人可以發表啲咁白痴嘅嘢。即刻刮下作者乜料先，以下係呢位作者喺維基嘅條目：

曾焯文（Chapman Chen），《本土新聞》翻譯主管，香港自治運動發起人之一。早年就讀香港中文大學英文系，後來於同校取得翻譯碩士和香港城市大學文學博士，曾任教包括香港理工大學、嶺南大學、銘傳大學等各家大學，更曾在東芬蘭大學從事翻譯研究計劃五年。曾經擔任法庭傳譯主任。

原來條友係「學者」嚟架，仲係中大校友添。真係好唔舒服，忽然覺得自己個大學學位勁跌watt囉！算啦，其實見到呢幾年中大學生嘅所作所為，我都唔係咁想提自己係中大校友。弊嘞，話唔講又講咗添！

言歸正傳，「學者」似乎只係引述香港民族黨嘅言論，不過條友攞得嚟做教材，當然可以理解為同意其中觀點。其實我成日覺得香港啲所謂學者好低B，啲港獨派學者就更係低B中嘅低B。就以上面嗰段「大鑊」文字為例，幾乎句句都出事，簡直係挑戰人類智慧。想知究竟班港獨派有幾低B就繼續睇落去啦，我會逐點擊破班友嘅謬論：

一個地區獨立不一定需要軍隊
冇錯，不過大前提係得到宗主國同意。唔通班港獨豬咁勁，收到風知道阿爺會俾香港獨立？

有天然深水港
天然深水港要嚟托咩！香港轉口航運已經逐漸萎縮，而且主要服務華南地區，如果阿爺封殺埋，天然深水港仲有乜用？有，用嚟養魚，連鯨魚咁大都養到囉。哈哈，仲有，可以租俾菲律賓、越南、印度、日本呢啲中國死敵做海軍基地！

香港有自己貨幣、聯繫匯率
如果香港宣布獨立，你又試下攞啲港紙去換美金，睇下人地換唔換俾你？留返嚟抆屎啦！

國際金融中心地位與其他知名的金融城市齊名
就算香港可以喺阿爺唔同意嘅情況之下獨立，資金同人才都會大舉撤走。仲國際金融中心？學Bkk咁成為國際人肉市場就有份！

香港才是當代中國的命脈
嘩，命脈呀！原來中國冇咗香港會亡國呀！哈哈，香港建國之後記住吞拼埋中國喎，到時想點樣凌辱班蝗蟲都得啦！

中國靠香港多於香港靠中國，香港人要獨立是絕對有籌碼的
所謂人蠢冇藥醫，蠢係絕症。原本以為班港獨豬會低B一世，不過睇埋以上結論，我反而覺得班友有救喎，因為精神病係有得醫架！既然講到中國冇咗香港唔得，阿爺有乜理由會俾香港獨立先，班友竟然覺得呢樣係香港獨立嘅籌碼，你話唔係精神錯亂係乜！

呢班港獨豬都算級品喇，拋頭顱灑熱血嘅嘢俾佢地攪到兒戲過細路玩煮飯仔。班友當然難成氣候，不過得人驚嘅係佢地嗰套竟然會有咁多年輕人buy。根據學苑早排嘅調查，港大有超過六成學生支持港獨，相信其他院校嘅情況都係差唔多。唔通精神病都會傳染？你話得唔得人驚？！！更得人驚嘅都仲有，再過多廿年，當啲老餅退晒落嚟，今日喺度痴人說夢嘅小朋友就會成為社會主流，相信未到2047已經唔使再爭拗乜嘢港人治港，因為到時係不折不扣嘅痴人自講。香港只會有一種聲音，唔係港獨，而係癲佬正傳裏面嘅名句「有殺冇賠！」呢啲就係真正嘅大鑊嘞！

秘製七彩炒飯

十年：語文篇

見到電影「十年」咁成功，唔止普羅大眾讚好，更得到專業人士肯定，連金像獎最佳電影都攞埋，本人亦有樣學樣，嘗試預測十年後香港喺唔同方面會出現乜嘢變化。話說十年後香港已經獨立，終於可以實現港人治港，唔使日日港人自講……咪插住！恥笑我癡人說夢？如果「十年」嘅情節真係有可能發生，咁我嘅預測又點解冇可能實現先！

由於一男子因數，前朝處處與民為敵，事事倒行逆施。立國之初，香港可謂百廢待興。當然啦，事有先後緩急，對於將本土理念寫入國策嘅第一任政府，去中國化自然係首要任務。呢樣嘢台灣嘅阿扁總統幾十年前已經搞過，仲搞得好成功添。

去中國化，首先要從語文入手。人每日都要講嘢寫嘢，如果港人嘅語文仍然保留住中國元素，對國民身分認同絕對冇好處。語文本土化，其實一啲都唔新鮮。早於十幾年前，本土派先烈毛姑姑同飯桶威已經提出要禁絕嗰啲帶有中國特色嘅用語。例如，「空調」唔講得，一定要用「冷氣」。本土派始祖「香肛人優先」亦一早就講過「香港的法定語言為英語及粵語」。但係點解佢地嘅綱領會用文巢巢嘅標準北方書面語寫出嚟呢，咁就值得商榷嘞。仲有，用「粵語」二字亦有問題，唔通佢地唔知「粵」係廣東（中國嘅一個省）咁解？畢竟，「香肛人優先」只係一班九唔搭八嘅疑似MK仔同援交妹，我地都係無謂深究囉。而第一屆香港政府就唔同嘞，雖然都係本土派，不過人地係以大學生為骨幹嘅本土派，除咗有理念，仲好有學識添。所以廣東話（或粵語）已經正名為「香港話」，同英文一齊成為香港嘅法定語文。

學校唔會再教「中國歷史」、「中國語文」、或者「中國文學」，只有「香港歷史」、「香港語文」、同埋「香港文學」。咁當然係好事，以歷史科為例，由幾千年縮到得返百幾年，啲學生都不知舒服幾多。但係講到香港語文同香港文學，問題又嚟嘞。以香港話寫嘅書籍文獻一向唔多，稱得上文學作品嘅更係少之又少。摷嚟摷去，都只係得一篇適合做教材，就係高登神文「男人唔可以窮」。所以立國之初，無論大中小學雞，讀嚟讀去都只係一篇「男人唔可以窮」。咁對學生嚟講當然亦係好事，因為多咗時間做自己鍾意做嘅嘢，例如溝女啦、溝仔啦、打飛機啦……香港學生真係從來未試過咁幸福囉。

題外話，本人雖然一早就喺網上用香港話寫嘢（可能比班本土派更早），不過就未有因此受到推崇，反而要鋃鐺入獄，罪名係「反本土」。咪當我講笑，中國有「反革命罪」，獨立後嘅香港當然有「反本土罪」啦！算啦，我受！如果告我一條更嚴重嘅「叛國罪」咪仲PK！

言歸正傳，自從全面推行香港話教育之後，有關當局就發現咗個問題。同一個字，啲人都會有幾個唔同寫法。例如「嘅」字，有人會寫成「既」，仲有人索性用英文「ge」代替添。再舉多個例，「（唔／吾）（使／駛／洗）（俾／比）（返／番／翻）我」，咁簡單嘅一句，竟然有多達36種常見寫法。有人就提出要搞返個「香港話正字運動」，不過未進行深入研究就俾人否決咗，原因有二。其一，香港仲未立國就已經引發大規模嘅老餅逃亡潮，香港再冇「老學究」呢樣嘢，想正都冇人識正。其二，如果尋根究底，必然會發現香港話（粵語）有啲字其實比現代常用嘅中文字更古老，正字有復闢中國文化之嫌，絕唔符合香港基本國策。既然唔正得，唯有詐睇唔到啦。比較亂啲啫，又唔會死人嘅。不過換個角度睇，香港文壇從來未試過咁精彩、咁多樣化，可謂百家爭鳴、百花齊放！

雖然話唔理，但係單嘢就喺政府裏面引發咗另一番更大鑊嘅討論，就係應唔應該廢除中文字。講到底，中文字有幾千年歷史，絕非本土產物。平時講嘢就冇問題，不過要寫出嚟嘅話，只要係有本土意識嘅人都會覺得好唔舒服。其實廢唔廢除中文字根本唔需要討論，因為所有閣員都認為有必要廢除，引起激辯係究竟要點執行。

有哈日閣員第一時間提出用日語取代香港話嘅位置，仲建議由杜如瘋出任語文改革委員會主席一職。呢個辦法當然好，一來國民去日本濕平會方便好多，唔使雞同鴨講。而且合乎港日世代有好嘅國策添。事實上，日本係第一個同香港建交嘅國家。而香港除咗公開表態支持日本擁有釣魚台主權，仲高度評價日治時期日本人對香港作出嘅貢獻。辦法雖然係好，不過呢個建議好快就觸礁。因為日語仲殘留若干漢字，有閣員驚會勾起國民嘅不快回憶。

跟住有人提出香港話拼音化。具體做法可以參考韓國或越南，一係自創一套拼音字符，一係就用拉丁拼音。事實上，呢兩個國家棄用漢字，正正就係主權嘅體現。所以香港話拼音化正合香港國策。有哈韓閣員即刻舉腳贊成，仲話唔使搞乜嘢自創嘞，直接借用韓語拼音字符就得。咁香港人學韓文會易啲，去韓國濕平自然都方便啲啦。有持異見嘅閣員即刻拍檯反對，話香港係國際金融中心（哈哈，到時仲係先算啦），就算拼都應該用拉丁拼音，點都冇理由用嗰啲蟲唔似蟲屎唔似屎嘅泡菜字符。結果內閣立時分成兩派，大家互不相讓，差啲演變成集體武鬥。

最後總統大人大力拍檯，嚟個一掌定音。佢話香港作為國際金融中心，根本唔使搞乜嘢香港話拼音，不如直接廢除香港話，只用英文。佢又話香港話源自廣東，如果唔廢除，香港始終都係擺脫唔到同中國嘅關係。佢仲舉咗新加坡做例，話人地全民英語對白，都不知幾掂。點知有唔識相嘅閣員竟然提出質疑，話前朝要語文老師考基準試，又請埋啲鬼佬鬼婆教英文，但係都唔見香港學生英文有幾好。就算學校轉晒用鬼佬鬼婆教都係行唔通，一來本地教師肯定同你死過，而且成本亦太高。仲有，學校始終提供唔到一個全天候英語環境，學生放學返屋企就唔再會有講英文嘅動力。

面對閣員嘅質疑，總統大人不慌不忙咁拋出佢嘅偉大構想：英文老師入屋計畫。當然唔係話要每家人都請個鬼佬或鬼婆長駐屋企教英文啦。其實個計畫好簡單，就係用居留權吸引啲識英文嘅外傭嚟香港做嘢。咁又真係得喎，大家都見得多啦，嗰啲屋企有姐姐（外傭）嘅細路，有邊個唔係一開口就英文先。當然啦，為咗確保啲外傭唔會教壞細路，參與居留權計畫嘅外傭要先通過英文基準試。眾所周知，啲賓賓個個都英文嘞嘞聲，所以佢地可以獲得豁免。如果有人請唔起外傭，政府會提供資助。計過條數，點都平過請啲鬼佬鬼婆教英文囉。

結果過咗幾年，所有香港人英文都講到嘞嘞聲，不過有啲奇怪口音就在所難免嘞。至此，香港話亦完成咗佢嘅歷史任務。雖然香港已經好似新加坡一樣，做到全民英語對白，但係咁並冇為經濟帶嚟轉機，國際金融中心嘅地位始終都係保唔住。

話說香港獨立前，中資已經大舉撤離。獨立後，香港再唔係進入中國市場嘅門戶，外資亦紛紛撤走。當年香港人豪言話唔要經濟發展，如今果然應驗咗。加上幾年間政府搞咗幾次全民乜乜全民物物，前朝留低嘅外匯儲備已經散盡，庫房空空如也。雖然失業率高企，政府只能講一句愛莫能助。

好彩第一任總統有先見之明，將香港打造成英語港，令香港可以發展出一種新產業：家庭傭工輸出。繼菲印泰之後，香港正式成為亞洲另一家傭輸出國。因為香港人比較白淨，受歡迎程度竟然遠超一眾菲印泰前輩。所謂行行出狀元，香港人終於可以威番鑊喇！最唔抵係啲賓賓，教識香港人講英文，點知連個飯碗都俾人搶埋，唯有嘆一句：好人冇好報！

Lalibela, Ethiopia

Lalibela, Ethiopia

點解新加坡得香港唔得？

同係彈丸之地，點解新加坡作為一個獨立國家可以咁成功而香港就冇條件獨立呢？原因有三：

１）當初係大馬自願放棄新加坡
２）新加坡冇民主
３）新加坡有李光耀

想搞港獨嘅朋友，你地可以繼續宣揚你地嘅港獨理念，不過就唔好再攞新加坡做例子，話點解新加坡得香港唔得，否則只會自暴其短，俾世人見到你地有幾幼稚無知。至於以上三點，我就唔多作解釋嘞，咁顯淺嘅道理，智力正常嘅人都應該會明白。

講開又講，李光耀真係一代政治巨人，只係掌管小小鼻屎國，兩個字：嘥料！講開又再講，當年中大生抗議校方向李光耀頒授榮譽博士學位，我只可以贈佢地六個字：夏蟲不可語冰！

網上圖片

書生造反

幾十年前聽過一個故仔，至於係咪真有其事就無從稽考嘞。話說當年珍妹出咗本噴血寫真集，某大學有班宿生即刻夾錢買咗一本，然後輪流傳閱。有日某宿生攞到本寫真集，正準備向珍妹升旗致敬，點知揭揭吓，竟然發現中間有兩頁黐埋咗。喺好奇心驅使下，該宿生連飛飛都唔打，轉而研究係乜嘢物質有咁強嘅粘連力。至於該項研究最終有冇成果同埋事發地點係邊間大學宿舍就不得而知嘞。

時光飛逝，珍妹亦已由美少女升格為阿嬋級，相信今日嘅大學生冇可能會再對佢想入飛飛。忽然有啲好奇，究竟而家啲大學生有飛飛之想嘅時候會揾乜嘢幫手呢？哈哈，真係包保你諗爆十個頭都諗唔到囉，原來係口水多過浪嘅大學生刊物呀！

港大學生刊物「學苑」九月號發表咗包括七篇文章嘅「香港民主獨立」專題，俾愛國報紙狠批「鼓吹」港獨，不過當事人就堅稱有關專題只係「探討」港獨嘅可行性。至於係「鼓吹」定「探討」，大家不妨睇吓以下節錄自「【香港民主獨立】這時代的吶喊 」嘅文字，然後自行判斷：

我們這一代人除非放棄香港民主夙願，否則，此時此刻，必須突破港獨禁區，一併主張民主與獨立，吶喊：「香港民主獨立」；這港獨立場已無關民族自決，而是香港民主唯一能殺出的血路。……以上說的不是天馬行空，雖然現在大多數香港人都不支持獨立，但所持理由基本上只有一個：香港沒有客觀經濟條件獨立。……當香港人意識到自己的利益受損，文化被腐蝕，長久以來的民主願望破滅，又有什麼不可能？幾個人有港獨意識自然無所作為，但當香港大部份人都有港獨意識，又會生出一條怎樣的路？

我自己就覺得係「鼓吹」囉，唔知大家又點睇呢？作者喺度自說自話，除咗強行將爭取民主同港獨畫上等號，仲粗暴扭曲其他人嘅意願。大多數港人都唔支持獨立，就係只因為「香港沒有客觀經濟條件獨立」咁簡單？可能作者係石頭爆出嚟，所以不知根為何物，不過我相信好多香港人都好似我咁，認同自己係中國人，根本唔會想另起爐灶搞個香港國出嚟。聲明一點，我係土生土長嘅香港人，唔好亂扣我蝗蟲帽子！

據聞有人咁樣回應愛國報嘅指謫：「而家講吓都唔得？！」得，因為香港有言論自由，所以我插到你高潮迭起都一樣得！

至於其他文章，有一篇係從資源（水同能源）層面出發，探討港獨嘅可行性，見：「【香港民主獨立】談資源　看港獨 」

作者將香港同星加坡比較，再輔以大量數據，結論係只要大幅擴建集水區，再新建海水化淡廠，香港嘅食水就可以自給自足。而用以生產電能嘅燃料就可以從同中國唔係咁啱key嘅印度輸入。

老實講，啲數據我真係冇心機同佢慢慢研究，就當條數計得啱啦。不過香港全年降雨量並唔平均，而且近年天氣反常，好多時都係一次過落好多雨，結果要排洪，另一方面，又可能會好耐都唔落雨。如果主要靠水塘蓄水，根本就保證唔到水源嘅穩定性。而海水化淡既唔環保，成本亦太高，並唔適宜大量使用。就算香港可以獨立，國民都肯定冇啖好食，如果要捱埋貴水，必然會即刻要求再回歸囉。仲有，無論係擴建集水區抑或建造海水化淡廠，都會涉及大量基建，究竟呢啲工程要喺幾時開始做呢？如果獨立咗先開始，係咪要香港國民捱幾年制水呢？如果早幾年開始……哈哈，根本就冇得早幾年開始，基於有東江水嘅穩定供應，特區政府絕對冇可能會推出呢啲工程囉！

另一篇文章係從軍政角度探討港獨嘅可行性，見：「【香港民主獨立】談軍政　看港獨」

作者以星加坡兵力做基礎，輔以大量數據，推算出港獨軍可以點組成。再煞有介事咁描繪港獨軍同駐港解放軍嘅戰況，然後幻想解放軍被殲滅之後，點樣對抗南下嘅中國大軍。最後得出一個結論，就係冇得撼。作者仲未放棄，再諗出勾結國內分裂勢力（藏獨、疆獨、台獨）同外國蠻夷（英國、美國），不過結論都係冇得諗。

哈哈，呢篇文章仲無聊，差啲俾佢笑Q死添！作者嘥咁多時間揾數據同諗戰略，唔通而家讀大學真係咁舒服，竟然得閒到搞埋晒啲咁嘅白痴嘢？攞700萬嚟做基數計算港獨軍兵力，睇嚟作者真係白痴到以為所有香港人都想獨立囉！不如嚟個全民皆兵啦，到時有700萬兵力，隨時可以解放埋啲藏獨、疆獨、台獨盟友添呀！話組軍就組軍，話打仗就打仗，完全唔明點解大學生都可以咁頭腦簡單。軍人要經嚴格訓練，軍隊要有武器裝備，都唔知點可以無啦啦變支港獨軍出嚟。咪住，唔通作者諗住要大家揭竿起義？弊嘞，我屋企冇晾衫竹喎，點算呢？哈哈，又即刻俾我諗到添，有樣嘢叫做「雨傘革命」呀，大家齊齊攞住把遮去扑濕啲解放軍啦！

呢幾篇文章根本就經唔起邏輯驗證，只係啲小朋友嘅YY（大陸網絡用語，意指精神上的自慰）之作！如果話啲學生搞港獨，未免太抬舉佢地囉！

啲友真係身在福中不知福，喺香港明明做乜都得，講乜都冇事，仲要怨三怨四，搞埋晒啲損人不利己嘅嘢！你又試吓喺美國公開提出三藩市獨立，再探討埋同伊拉克和阿凡達伊斯蘭國結盟嘅可行性吖，包保你即刻人間蒸發呀！又或者，你喺美國唔覺意講咗啲敏感字眼，又咁啱俾人聽到，你都會一身蟻囉！就算冇俾啲路人甲乙丙聽到都一樣會出事，因為美國政府會竊聽你架！

呢班溫室小花小草根本就難成大事，而家竟然學人搞革命添，咪講笑啦！好似嗰件黃之蜂咁，擦損少少就鬼殺咁嘈。有啲細路仲得人驚，俾人抬走就嚇到喊晒叫阿媽，俾人揼一嘢就向傳媒哭訴，中兩嘢胡椒噴霧就攤晒屍。咁點搞革命呀，戰場係槍林彈雨、血肉橫飛架，你當喺中環搞嘉年華咩！

連做飯都未識，仲講乜嘢造反吖，繼續做你地嘅鍵盤戰士啦！一路打鍵盤，一路打飛飛，再打個冷震，你地就會得到革命成功嘅快感架喇！

Serengeti, Tanzania

致佔中人士

如果你受現場氣氛感染，覺得好high好好玩……我會勸你適可而止，玩夠就好返屋企，以免樂極生悲！

如果你參與佔中只係想表達自己嘅訴求……我會理解同尊重，其實你嘅訴求人人都已經聽到，係時候收手喇！

如果你話佔中係為全港市民爭取民主公義……我會婉拒你嘅好意，我好清楚自己想要啲乜嘢，唔使其他人順便幫我爭取埋！

如果你覺得你嘅自由可以凌駕其他人嘅自由、你嘅意願比其他人嘅意願更值得尊重……我會好鄙視你，因為你開口埋口講民主，但係就連最基本嘅民主概念都冇！

如果你相信抗爭行動可以迫使中央收回人大嘅決定……我會好同情你，因為你實在太天真，注定一世俾人呃！

如果你明白抗爭行動唔可以迫使中央收回人大嘅決定，但係仍然選擇繼續抗爭……我會覺得你好唔理智、好自私，你只係為咗啖氣，而完全唔理咁做會對全香港造成乜嘢傷害！

如果你預咗犧牲，甘願燃燒自己照亮香港民主路……我會敬佩你嘅捨身精神，雖然我仍然唔認同你嘅做法！願你一路走好！

如果你認為民主就係一切……我會借用「阿婆金句」作回應：「你唔使食飯，其他人要食飯架！」

後記：

原本只有七個「如果」，最尾嗰個係後加嘅。明明已經上咗床覺覺豬，忽然諗起喺電視新聞睇到要去政總返工嘅嗰位阿婆，忍唔住即刻彈起身加埋落去。

阿婆好嘢！我俾一億個like你！

Madrid, Spain

致佔中三子及教協決策者

致佔中三子：

本人絕對唔認同你地嘅理念同抗爭手段，亦從來冇授權你地代表我！唔該你地唔好成日扮晒民意代言人，唔係所有香港人都支持你地架！

你地強佔公眾地方，破壞香港安寧，咁做唔止違法，亦剝奪咗其他人使用有關地方嘅權利，對住喺附近嘅街坊更造成嚴重滋擾。呢樣嘢唔可以同民主拉埋嚟講，唔該你地查吓有邊啲民主國家可以任你鍾意佔邊忽就佔邊忽先啦！

因為你地違法在先，警方多番勸喻無效先採取行動驅散非法集結嘅群眾，咁係維護法紀，試問何錯之有？本人絕對支持警方依例執法！你地譴責警方使用大殺傷力武器(lethal weapon)，分明係屈得就屈，唔屈得都照屈。請問警方使用催淚氣體殺傷咗你地幾多位佔中義士呢？參考番你地推崇備至嘅歐美民主國家，使用催淚氣體已經唔算係乜嘢武力，唔好話俾我知你地未見過人地嘅警察將啲示威者當豬咁拖、當狗咁扑囉！話警方使用大殺傷力武器，你地而家當咗自己係小布薯？！

你地承認「公民抗命」唔可已迫使中央改變立場，而家又要求CY落台，話咁會解決到好多問題。究竟你地係思覺失調定腦積屎？就算CY辭職，由林鄭頂上，都根本冇可能俾到你地要求嘅「真普選」，跟住你地係咪又要林鄭落台呢？其實，你地嘅真正目的係咪只想搞到香港進入無政府狀態？

你地呢班屎一樣嘅人，搞埋晒啲屎一樣嘅嘢，根本就幫唔到香港人爭取民主。你地只會令香港越嚟越亂、越嚟越分化，迫我地呢班向來奉公守法、以和為貴嘅香港人企出嚟向你地大聲say no。琴日旺角就有駕駛者懷疑因為要取回道路使用權，駕車駛過被示威者強佔嘅馬路而造成混亂。有朝一日，香港變成泰國翻版，絕對係你地一手做成！

搞到香港冇啖好食，相信除咗你地幾條P街，根本就冇人得益。你地班支持者腦筍未生埋以至受人蒙騙，咁都可以話係咎由自取。我地呢班奉公守法嘅香港人先無辜，明明唔支持你地嘅做法，但係就要承擔埋你地造成嘅惡果。按合理推測，香港起碼有四成人唔認同你地嘅違法行為，而你地就將全港市民拉晒落水，當成政治籌碼，咁究竟算係乜叉民主？唔好講乜嘢官逼民反，全世界所有恐怖分子都係用呢個藉口為自己開脫架啦！其實你班P街根本同恐怖分子冇分別！


致教協決策者：

你地呼籲全港教師罷課，將政治鬥爭帶入校園，本人十分反感！

如果你地淨係呼籲大專院校教師罷課，本人都唔會出聲，畢竟大專學生已經成年，佢地應該有能力判別教師罷課係咪適當。而家你地連啲中小學雞都搞埋，本人就絕對唔同意！如果你地認為中小學雞已經成熟到可以理解複雜嘅政治鬥爭，點解你地唔順便幫佢地爭取埋選舉投票權呢？

而家絕大部分國家都將合法投票年齡定喺18歲，咁係因為青少年思想未夠成熟，而且涉世未深，容易受人唆擺同操控。作為專業教育人員，你地冇理由連咁都唔知啫！而家你地將班中小學雞拉埋落水，分明係想利用啲細路做人盾啦！

「我睇開陳奕迅演唱會, 你無啦啦叫我去睇林峰！」以上曾經傳頌一時嘅民主金句，唔知你地仲有冇印象呢？學生原本上開化學堂，而家無啦啦迫佢地聽公民教育，你地唔覺得有問題咩？！仲有，教書嘅最鍾意跟團旅行，你地應該好清楚行程一定要跟足行程表，雖然先後次序或可斟酌。如果要改行程，無論係旅行社抑或團友提出，都一定要全體團友同意先可以。同樣道理，你地要將化學堂改為公民教育課，事先亦應該徵得所有學生同家長同意。你地冇問過學生同家長就罷課，根本就係粗暴剝奪學生正常上課嘅權利，亦好有可能違背部分家長嘅意願。口口聲聲話爭取民主，但係就完全唔尊重別人嘅選擇權利，究竟你地仲有冇資格為人師表呢？！

如果有教師因為任何原因唔想授課，就應該循正當程序攞事假。而家民主白色恐怖氣氛瀰漫，相信校方唔會唔批，亦唔敢秋後算帳。你地硬係要搞埋啲學生，利用佢地做掩護，真係是可忍熟不可忍！

作為教師，你地應該幫助學生培養獨立思考能力，而唔係夾硬將自己認為正確嘅嘢塞晒俾佢地。今日教出一班只要自己認為正確就去做而完全唔顧別人感受、唔理後果嘅學生，你地遲早都會自嘗惡果。有朝一日，當你地俾自己一手訓練出嘅紅小兵文革式批鬥，我會食住花生睇得好開心囉！


後記：

今日去買餸，經過燒臘檔忽然想食叉燒，點知唔覺意俾我聽到啲「消失的民意」。叉燒佬一路斬一路同隔離油雞佬講：「班友搞到香港立立亂，嚇到班有錢佬撤資你地就知死！」入到街市，發現檔販都如常營業，竟然唔見有人響應罷市。經過魚檔又有嘢聽，魚佬同對面菜佬講：「警察一早就應該拉晒班帶頭搞事嘅XX啦，而家姑息養奸嘞！」咁就證明唔係只得我一個反對佔中啦。但係好奇怪，傳媒只係集中報導佔中人士嘅訴求，間中加插少少建制派政客嘅另類言論，而民間嘅反對聲音竟然一啲都聽唔到。連專做自由人生意、受影響最大嘅旺角藥房老闆都話支持佔中，真係估佢唔到囉！究竟係啲傳媒喺民主白色恐怖氣氛下唔敢得罪班佔中大帝，定係啲前線記者同編輯受為主觀使命感驅使而filter晒所有反對聲音呢？

言歸正傳，一行出街市，後頸忽然有啲濕濕地嘅感覺。弊嘞，唔通俾和平鴿空襲？抑或係有人喺後面向我放飛劍？跟住就聽到天雷滾滾，蠶豆大嘅雨點紛紛灑落。我心諗，好吖，既然相持不下，就等老天爺做個裁決，睇吓邊個會俾雷劈。究竟俾天收嘅會係助紂為虐嘅香港警察，定係捍衛民主嘅佔中義士呢？

哈哈，其實雷公劈邊個都好，基於香港民主派「公我贏字你輸」嘅遊戲規則，責任都係落喺香港政府度囉！劈死警察當然係佢地罪有應得，如果劈死佔中義士，就一定會入埋政府數，因為係政府迫佢地走去佔中架！香港民主派最叻就係自欺欺人，真係雷公都劈佢地唔醒！

Cow dung, Udaipur, India

Pigeon dung, Udaipur, India

姐姐餵你

早幾日睇港姐決賽，其中有個問答環節真係俾佢笑死。

眾佳麗要回答一條問題：最想同邊位藝人流落冰天雪地？（類似啦，exact wording唔記得喇）

有位佳麗揀咗Bosco，仲話要同佢喺冰天雪地打番個火辣辣嘅邊爐添。

話明係「流落」，仲有閒情逸致打邊爐？而家你當去度假？打個電話就可以叫人速遞頂級和牛同生猛松葉蟹？

講到「流落冰天雪地」，我第一時間就諗起「天與地」。黃宗澤瘦蜢蜢，要嚟有叉用咩！係揀都揀阿叻啦，雖然係冇咁嫩滑，不過勝在夠多肉囉！

另一位佳麗一樣咁搞嘢，佢揀咗王祖藍。呢位佳麗話想祖藍扮企鵝，咁就可以玩餵企鵝喎。

佢咁講係咪唔太尊重人，我就不予置評嘞，反正啲司儀都從來唔尊重一眾候選佳麗架啦。不過想餵企鵝就起碼要捉到魚先得囉，都唔知呢位姐姐揾啲乜嘢嚟餵。

哈哈，又即刻俾我諗到嘞，以下係本人為該佳麗同祖藍設計嘅對白：

佳麗：「祖藍乖，唔好食手指啦，姐姐餵你食奶奶！」
祖藍：「奶奶正呀！祖藍好乖架，食完奶奶餵番姐姐食蕉蕉！」

Udaipur, India

100年，兩次世界大戰（下）

一戰過咗100年，地球仍然唔係安全嘅地方。今日，雖然再爆發世界大戰嘅機會微乎其微，不過地緣紛爭就從無間斷。敘利亞未亂完，隔籬伊拉克又爆發內戰。仲無啦啦爆咗個伊拉克和阿凡達伊斯蘭國出嚟，將國際恐怖主義推向另一巔峰。遠少少，以色列同哈馬斯亦喺加沙打到飛起。聽聞雙方啱啱傾掂數停火，不過「和平」狀態可以維持幾耐就真係天曉得嘞。再遠少少，烏克蘭局勢都唔太樂觀。早排仲有隻馬航客機喺烏克蘭東部被擊落添，真係死得人多囉。啲人係要打生打死，本來唔關我地呢啲第三世界人民事，但係搞到累埋街坊就唔好啦。差啲講漏咗，非洲仲有個名為博科性地嘅神聖組織。班友專門強搶年輕貌美嘅異教徒女子，聖戰性戰同時進行。

人類好鬥而且鍾愛使用暴力，應該係天性使然。其實唔使講到咁遠，就算喺公認為福地嘅香港，都有好多人覺得安樂日子過得太冇意義。啲友飽暖思暴力，係要搞到香港立立亂先有滿足感。喺垃圾會掟吓嘢當然唔夠皮，班大帝仲要強佔核心商業區，嚟個肉石俱焚一鑊熟。

人類好鬥已經係不爭嘅事實，不過有啲人硬係鍾意用搞破壞嘅方式嚟體現好鬥精神，咁就真係自己攞嚟衰嘞。好似泰國嘅紅黃衫軍之爭，根本就係置國民整體利益於不顧。結果好啦，搞到俾軍人乘機奪權嘞。原本泰國嘅民主制度係咪合乎國際標準我唔知，但係而家軍人掌權就肯定全無民主可言攞。你都咪話，可能咁樣至係皆大歡喜嘅結局，因為對於紅黃衫軍嚟講，一拍兩散有乜所謂，最緊要係唔可以俾對方得勢。

話時話，其實想鬥餐死嘅都唔一定要搞破壞啫，聰明人就會將佢地嘅好鬥精神發揮得有益有建設性，最近打完嘅世界杯就係一個好例子嘞。世界杯係足球界嘅世界大戰，雖然唔用真槍實彈，不過激烈程度就同真係打仗差唔多。而且就算冇份參與，啲人一樣會全情投入。以香港人為例，關心世界杯肯定多過伊拉克內戰或者以巴互片囉。

話世界杯有益有建設性，可以分開幾方面睇。首先，對於主辦國家，呢個係展示國家軟實力同推廣國家形象嘅好機會，相關行業（例如旅遊業）亦會大有得益。雖然巴西今次搞得唔好，但係如果佢地肯痛定思痛，咁都未嘗唔係一個好開始。其次，對於某啲行業，世界杯亦帶嚟可觀嘅收入。又以香港為例，開賭嘅當然唔使講，連酒吧茶仔都多咗好多生意囉。最後，對於廣大球迷嚟講，世界杯亦提供咗一個宣洩渠道。平日累積埋嘅怨氣睇波時可以一鑊過爆晒出嚟，唔使谷到心理不平衡，要周圍搞破壞發洩。

講真，本人對足球絕對冇研究之至，今屆世界杯一場都冇睇。不過有單新聞我都知，某哨牙蘇喺賽事中竟然咬咗對方球員一嘢，結果被罰停賽。喺球場上使用暴力絕唔少見，但係咁樣出口傷人就真係罕有嘞，聽講話條友仲有前科添。

自從人類由馬騮進化到甩咗條尾，把口除咗食嘢就係鬧人，邊仲會用嚟咬人架。哨牙蘇單嘢只有一個合理解釋，就係返祖現象。人類好鬥而且鍾愛使用暴力，極可能係因為基因中仍然殘留某啲野獸特質囉。哈哈，唔知我分析得夠唔夠科學呢？

Maracana Stadium, Rio de Janeiro, Brazil

Maracana Stadium, Rio de Janeiro, Brazil

Maracana Stadium, Rio de Janeiro, Brazil

Pele's footprints, Maracana Stadium, Rio de Janeiro, Brazil

100年，兩次世界大戰（上）

100年前，奧匈帝國王儲費迪南大公喺薩拉熱窩遇刺身亡，觸發第一次世界大戰。本人對一戰絕對冇研究之至，想講都冇得講。不過我相信冰凍三尺非一日之寒，就算冇呢單刺殺事件，班友遲早都係會打到七彩囉。

薩拉熱窩，聽個名已經唔係好嘢。「薩拉」同「撒拉」同音，即係屎尿齊發。一隻燒熱咗嘅大鑊，仲要喺上面痾屎痾尿，咁直頭係人間地獄啦。舊年有機會親臨呢個一戰名城，真係估佢唔到，薩拉熱窩竟然係一個山明水秀、古意盎然、盛產美女嘅好地方。本人到過嘅地方都唔算太少，咁靚嘅城市就好少見，絕對可以排喺我嘅城市排行榜頭五位。

雖然同一戰爆發有莫大關係，不過薩拉熱窩喺一戰期間並冇受到大規模破壞。到20年前爆發波黑戰爭，薩拉熱窩終於難逃一劫。92年，佔波黑地區人口44%嘅波斯尼亞人唔理佔人口33%嘅塞爾維亞人反對，舉行獨立公投。結果塞爾維亞人杯葛投票，議案以大比數通過。波斯尼亞隨即宣布脫離南斯拉夫獨立，亦好快得到歐美西方國家承認。講開又講，其實呢單嘢同克里米亞獨立公投好相似，不過西方民主社會嘅反應就啱啱相反，簡直雙重標準到冇朋友。唔係盟友嘅就支持分拆上市，到時就可以收編獨立出嚟嘅新國家。如果係盟友就要保持領土完整嘞，咁先可以保留己方實力。支持民族自決云云，原來只係一個美麗嘅誤會。奧巴馬早排就出晒口術，講到明唔想見到蘇格蘭獨立。人地根本唔介意展示俾全世界睇自己有幾虛偽，慘得過仲有大把第三世界人民（包括香港人）盲目相信佢係正義朋友，你吹咩！

言歸正傳，波黑宣布獨立，由於種族宗教分歧，區內塞爾維亞人亦決定另起爐灶，成立塞族共和國，因而引發波黑內戰。作為波斯尼亞人嘅政治文化中心，薩拉熱窩自然首當其衝，成為塞族人攻擊目標。塞軍喺薩拉熱窩市區周邊山上布兵，開始咗為期三年幾嘅圍城。直到後來北約大規模軍事介入，呢場內戰先結束。

喺薩拉熱窩，參觀過一間「希望隧道」(Tunnel of Hope)博物館。話說圍城期間，四面環山嘅薩拉熱窩完全與世隔絕，各種物資極其短缺，居民過住暗無天日嘅生活。據博物館講解員講，塞軍甚至喺市內水源落毒添。後來有波斯尼亞人諗到挖一條隧道，由市郊通往當時聯合國維和部隊駐紮嘅薩拉熱窩機場，以解決物資補給問題。只用簡單工具，不分晝夜係咁掘，結果用咗4個月完成呢條800米長嘅隧道。期間既要避開塞軍耳目，又要解決各種技術問題（例如嚴重滲水問題同點樣棄置挖出嚟嘅泥土等等），難度可能不下於我地嘅高鐵工程囉。就係因為有呢條隧道，薩拉熱窩市民先可以捱到內戰結束。

時至今日，薩拉熱窩已經成為旅遊熱點，不過對於當地人，戰爭陰影似乎仲係揮之不去。市內好多建築物，牆身仍見纍纍彈痕。市民亦唔見得已經忘記當年傷痛，好似嗰位希望隧道博物館講解員，就完全冇掩飾自己對塞爾維亞人嘅憎恨。

嗰位講解員仲極力推薦一套有關波黑戰爭嘅電影，等我地可以對當年塞軍嘅暴行有多啲認識。套戲叫做《In the Land of Blood and Honey》，港譯《波斯尼亞的羅密歐與茱麗葉》，係畢嫂嘅自編自導處女作。我地嘅隨團導遊（阿爾巴尼亞人）真係唔話得，第二日就已經買咗套戲隻碟喺旅遊巴放。不過有畫冇聲（其實係好細聲），電視螢幕又細，根本唔知佢做緊乜，淨係覺得攝影唔錯。結果睇咗一陣就決定放棄，都係揾周公傾吓實際啲。

返到香港，第一時間上IMDb摷吓，原來畢嫂呢套處女作劣評如潮，評分低到得4.2，即刻冇晒興趣。而且，相信評分已經俾好多反戰人士嘅感情分拉高咗，否則可能連3分都冇添。所以話呢，就算你有幾偉大嘅情操、幾明確嘅目標、幾堅定嘅決心，如果本身條件不足，到頭來都係敗事有餘。可能有人會話，畢嫂第一次做導演，表現差係好正常嘅事。咁我又唔同意嘞，姜文首執導筒就技驚四座啦，呢個根本就係資質問題。其實畢嫂應該發揮佢嘅專長，繼續做番個靚靚花瓶，咁先係大眾之福囉。

講開又講，戲名譯做《波斯尼亞的羅密歐與茱麗葉》，簡直又長又臭，而且分明係炒作鄭天后某首名曲，手法絕不高明。本人就覺得大陸直譯做《血與蜜之地》好好多囉。難為毛姑姑同飯桶威之流仲講到香港電影譯名幾有水準，呢兩條友根本就係自暴其短。哈哈，越講越遠添！

最後想講吓圍城其間薩拉熱窩人遇到嘅一個兩難問題，又係喺希望隧道博物館聽到嘅。話說當時出街係一件好危險嘅事，因為好多地方都有塞族狙擊手喺高處埋伏，見人就放冷槍。所以迫不得已要落街嘅話，人人都會以100米9秒9嘅速度走過啲危險地帶。咁落街攞水就出現兩難嘞，究竟每次攞幾多至好呢？攞多自然走得慢，中槍機會必定大好多。攞得少就要落多幾次街，中伏可能一樣會大增。如果當時身處薩拉熱窩，你又會點抉擇呢？

Sarajevo, Bosnia

Sarajevo, Bosnia

Sarajevo, Bosnia

Sarajevo, Bosnia

Sarajevo, Bosnia

Tunnel of Hope, Sarajevo, Bosnia

你當喺酒店叫room service？

星期日揭開明報副刊，見到大大張相影住一碟類似意粉嘅物體，上面鋪咗幾隻開邊中蝦同幾條幼蘆筍，睇落都幾吸引。睇吓標題，原來係蕎麥麵。再睇埋內文，開頭幾句竟然係「全城抗命，新聞令人食不下嚥，雖然算是打了勝利的一仗，依然沒有食慾，也沒有時間和心情做 ...」，即刻火都嚟埋，乜叉食慾都冇晒。眼角一瞄，見到作者個名係「饒雙宜」，完全未聽過，可能係時下啲所謂（或不知所謂）嘅「新文化人」啦。

呢啲新文化人，特徵係辭不達意、思路紊亂，寫嘢唔係言之無物內容空泛，就係邏輯犯駁廢話連篇。好似上面提到嘅「饒雙宜」呢類人，一方面話689唔可以代表香港人，而另一方面又大模屍樣代表全港市民發聲，都唔知係乜嘢邏輯。「全城抗命」云云，唔通佢真係咁肯定所有人都係企喺佢地嗰邊？其他人我唔知，起碼本人就唔係嘞。無啦啦「被代表」，你話㷫唔㷫吖？所謂「己所不欲勿施於人」，呢件「饒雙宜」都算厚顏無恥囉。

提起「全城抗命」，又即刻虛火上升添。明明係公然破壞香港法治，竟然會有咁多人拍爛手掌，都唔知啲人乜嘢心態。最惡頂係嗰條人渣傑，居然批評警方清場冇道理，因為班學生承諾咗8點鐘會撤離喎。首先，連呢啲咁嘅承諾都相信，條人渣係咪幼稚咗啲呢？如果到8點仲有人賴死唔走（可能性極高），勢必癱瘓中環交通，到時條人渣又肯唔肯負責先。事實上警方已經好克制，多番勸喻無效先採取行動囉。要記住，係班學生違法在先，佢地俾人拉，只可以話咎由自取。仲有，違法就係違法，唔可以話設定一個時限就當冇事。舉個例，如果有色魔對受害人承諾只係姦佢兩分鐘，咁係咪可以作為抗辯理由呢？枉條人渣仲話係大律師，我話佢係法律界之恥就真。學吳志森話齋，真係「沒有最無恥，只有更無恥」呀！哈哈，話時話，莫非吳某覺得自己好有恥？

睇見班學生預演佔中，真係唔知好嬲定好笑。嬲，唔止因為班友公然破壞香港法治，更係因為佢地顛倒黑白混淆視聽。首先，班友投訴警方濫用暴力。真係懷疑佢地係讀書定讀屎片，究竟知唔知暴力呢兩個字點解。睇吓啲西方民主國家嘅警察，當啲示威者狗咁扑，呢啲就係暴力嘞。香港啲細路唔係電視汁撈飯嘅咩，都唔明點解連丁屎咁多國際事野都冇。而家資訊透明，警方點樣清場大家有目共睹。事實係班友唔肯自己行，仲手繞手攤晒屍，警察先要合力抬佢地走。莫講話暴力，咁根本連武力都唔算，只可以話係勞力囉。香港警察全世界最斯文，真係有少少國際常識嘅人都知啦。幾年前拉隊嚟香港搞嘢嘅暴力韓農，就曾經盛讚香港警察夠溫柔，唔知大家仲記唔記得呢？

咁都算嘞，某學聯發言人事後竟然批評警方清場時手忙腳亂，質疑如果有一萬人佔中，警方根本應付唔嚟。明明係惡人先告狀，難為條友可以講到面不紅耳不熱。如果唔係慌死整親班友，搞到要執仔咁執，警方使鬼搞咁耐咩。講真，我都唔係太滿意警方嘅表現，對班瞓街老鼠有冇必要咁溫柔先。至於質疑一萬人佔中警方會處理唔到，更證明條友幼稚無知，都唔明佢點解會考到入大學。如果發生大型騷亂，你以為警察仲會溫柔到逐件慢慢執？就算唔出動解放軍，都起碼會派出防暴隊啦，到時香港就真正可以同國際接軌嘞。計我話，要處理啲阻街垃圾，最好就係用大型鏟車一鑊過鏟晒去堆填區，使鬼搞咁多嘢咩！

至於笑，好簡單，因為班友實在太搞笑。班友俾人抬走，你估佢地會嗌啲乜嘢口號？會唔會係呢句經典對白呢：「今日拉咗一個乜乜乜，仲有千千萬萬個乜乜乜！」有冇人咁講我唔知，不過就有小朋友搞笑到嗌「阿媽」囉。又怕痕又怕痛，呢啲溫室小花小草就唔好學人搞社運啦。所謂「出得嚟行，預咗要還」，淫民力量班爛仔雖然都係X街，不過起碼冇咁失禮人先啦。更搞笑嘅都仲有，班友俾人拉咗，半夜三更見肚餓就話要食嘢，唔即刻應酬佢地就投訴。哈哈，而家你當喺酒店叫room service？

據聞喺大陸打靶，被槍決者家人要俾番子彈費。我就覺得香港應該仿效吓，監獄實行食宿收費制。就算唔賺，起碼都要收番成本先啦。如果他日有大批佔中人士被拉入冊，納稅人就要養埋佢地，我自己就覺得好唔抵囉！

The Royal Cancun Hotel, Cancun, Mexico

The Royal Cancun Hotel, Cancun, Mexico

Vivanta by Taj Hari Mahal Hotel, Jodhpur, India

Jetwing Blue Hotel, Negambo, Sri Lanka

Palace Hotel, Lost City, South Africa

烏合之眾

622公投有78萬香港人投票支持「公民提名」，本人一啲都唔意外。主辦單位當然認為空前成功，話數字說明咗港人對「真普選」嘅強烈訴求喎，究竟事實係咪咁呢？

78萬呢個數字肯定存在相當水分。票數只有極小部分係嚟自實體票站，要喺網上或手機投票出術，真係話都冇咁易。只靠身分證號碼同電話號碼把關，投票人年齡check唔到，身分證號碼係咪合成嘅又check唔到，你想點玩都得啦。而家連小學雞都有手機，咁啱啲未夠秤（未滿18歲）嘅細路又係比較激嘅一群，你估佢地會唔會乖到唔投票？根據網上資料，香港流動電話數目差唔多係全港人口兩倍。好似啲的士佬咁，五六部手機一字排開，如果要投票，你又會唔會相信佢地誠實到只係投一次？仲有，只要屋企有一個佔中粉屎，亦好可能會冚家「被投票」。水分有幾多真係好難講，如果話有五成都唔出奇，不過點都唔會係主辦單位講嘅微不足道囉。

71遊行，主辦單位話最少有51萬人參與，比舊年多一萬。警方就話高峰期有9.86萬，而「港大民研」同港大學者葉兆輝嘅數字分別係17.2萬同12.2萬。民陣年年作到狗咁大，呢個已經係不爭嘅事實，本來唔需要再攞出嚟講。本人奇怪嘅反而係點解班友今年會咁克制，作得51萬咁少囉。

622公投都有78萬人表咗態，佢地冇理由唔行晒出嚟瞓身支持啫。當然啦，可能有部分人琴日要返工，又可能有部分人不良於行唔能夠參與。不過另一方面睇，有大量622冇得投票嘅人（例如未夠秤或非香港永久居民）補充，而且71遊行涵蓋嘅議題更廣，人數點都冇可能得咁少囉。由此可見，622公投嘅水分可能比我想像更嚴重。究竟主辦單位喺622公投有冇作data，因為冇實質證據，本人就不予置評嘞。

講真，承接622公投嘅聲勢，民陣起碼要作到80至100萬先算「合理」。而家只係作得51萬，相信係政治上嘅折衷。根據往績推斷，如果遊行人數有40萬，班友一定敢作夠100萬。按合理推測，實際遊行人數一定好少，可能連20萬都唔夠，所以民陣都唔敢作得太大。

不過點都好，遊行人數一定唔可以少過50萬。首先，今年有東北發展爭議、622公投、一國兩制白皮書等大單嘢催谷，如果公布嘅數字竟然少過舊年，民陣無異政治自殺。再者，50萬呢個數字亦別具意義，說明咗當前形勢可以同2003年香港嘅歷史性黑暗時刻相提並論。民陣將舊年71遊行人數由43萬「修正」為50萬，顯然亦有考慮咗其中歷史意義。幾理想丫，舊年50萬，今年51萬，更上一層樓。跟住出年52萬，後年53萬，每年加一萬，有排先到700萬啦，簡直長玩長有呀。

其實民陣年年老作，真係鬧佢都嫌嘥氣。不過班友細眉細眼，全無大家龜獸風範，咁就唔批評吓唔得嘞。啲數字刀斧痕跡咁明顯，可謂「司馬昭之心，路人皆見」，欺瞞公眾嘅意圖已經無從掩飾。講真，班友嘅狼子野心，俾我地呢啲路人甲乙丙見到根本就冇所謂，只要班同路人見唔到就得啦。古人講得好，「量小非君子，無毒不丈夫」，又唔係第一次造數，點解唔索性造大啲呢？今年作到80萬，出年作夠100萬，要信嘅人仍然會信。就算作到超過香港人口都冇問題，因為有大量反共自由人湧落嚟參與囉，只要求其俾個解釋，熱愛民主嘅香港人一樣會相信。又要作大，又要畏首畏尾，搞到啲數字咁expected，可謂欲蓋彌彰！

所以話呢，民陣班友只不過係烏合之眾，腦筋同啲小爬蟲差唔多，實在難成大器！

National Museum of Anthropology, Mexico City, Mexico

偽行者

呢排忙於睇戲，希望有朝一日可以學人寫吓影評，都冇乜點留意時事添。早兩日聽個friend發牢騷，話有幾個風燭殘年嘅老餅同事要求早走，要去行「毅行者」喎。本人即時反應係：有冇搞錯，唔通真係壽星公吊頸？雖然早排涼番啲啫，不過「毅行者」對體能要求極高，絕對唔係人人玩得起囉。自問行得走得兼捱得，年輕力壯嗰時都未敢玩「毅行者」啦，班老餅就算坐定定都隨時會蒙主寵召，佢地憑乜嘢學人玩先！

聽個friend講埋落去，先知道係個完全唔美麗嘅誤會，原來佢嗰幾個老餅同事要喺辦公時間去參加嘅係「毅行爭普選」。話說佢地校長發咗個衣貓俾所有同事，話自己同陳日軍行埋咗，感覺相當良好，叫啲同事自己決定去唔去行喎。有得跟陳日軍佢老人家出巡，班老餅都唔知恨咗幾耐啦，等放學先去咪俾人飲晒頭啖湯？！書可以唔教住，有得近身擦陳老鞋就千祈咪走雞囉！哈哈，果然係薑越老越辣！

今勻實在背得緊要，居然唔知有「毅行爭普選」呢單嘢，會唔會真係同「毅行者」有關呢，即刻孤高吓先。果然有料到，第一條就係爛生果題為「澄清與『毅行爭普選』無關 樂施會：『毅行者』三字已註冊」嘅新聞。報導仲列出幾條網民留言，都係一致鬧爆樂施會。本人真係唔明，人地喺自己地頭澄清一啲可能會引起誤解嘅嘢啫，咁都有問題？

打個比喻，你開咗間小店賣有機蔬菜，艱苦經營多年，鋪頭喺區內已經薄有名聲。最近有大財團喺隔籬街開咗間凍肉鋪，掛晒一個二個羊頭出嚟，至於裏面賣嘅係乜嘢肉，明眼人當然心知肚明。你賣菜，佢賣肉，可謂河水不犯井水，本來可以相安無事。偏偏間凍肉鋪改到個名同你鋪頭好接近，搞到日日有街坊問你係咪改變咗經營方針，同大財團合作賣埋肉。你覺得好煩，索性貼張告示出嚟澄清。點知咁就出事嘞，全港18區嗜血嗜肉嘅民眾蜂擁而至，喺你鋪頭掟屎掟尿，你話係咪無莽之災呢？

言歸正傳，爛生果記者向來獨具穢眼，唔想見嘅嘢佢地會自動睇唔到，有關網民留言會唔會都係選擇性節錄嘅呢？上樂施會嘅飛屎卜查證吓，竟然極目所見都係攻擊留言。不過咁，又唔可以話我冤枉咗爛生果。如果要客觀反映民意，點解佢地又唔上埋「香討」睇吓呢？

睇番啲「網民留言」，傳遞嘅信息主要有兩個：以後唔捐錢俾樂施會同硬撐陳大輸機。講開又講，熱愛民主嘅香港人，留言當然唔會少得粗言穢語啦。其中好多留言完全將啲嘢倒轉晒嚟講，簡直令人啼笑皆非，例如以下呢條：

Joey Yu：樞機所帶出的是真正毅行者所擁有的氣節，貴機構只配註冊「偽行者」為用，也不配再主辦「毅行者」。

樂施會唔埋堆，班友就話人地連從來唔牽涉政治嘅老本行都唔配搞，咁霸道都得？！即係話，你唔瞓身支持佢地定義嘅民主，咁你就冇資格教書、冇資格做醫生、冇資格做律師、甚至連做雞做鴨都冇資格添。如果呢啲就係香港人要爭取嘅民主，咁我寧願呢世都見唔到普選囉！

至於話陳大輸機「帶出的是真正毅行者所擁有的氣節」，簡直係對「毅行者」嘅終極侮辱，真係睇到人噴飯兼嘔奶！陳大輸機，「偽行者」先係你嘅真正稱號！本人絕對唔會好似香港啲民主派人士咁係又鬧唔係又鬧，我講得出自然有證據。

首先，我想問吓大家，喺陳大輸機身居要職嘅神聖帝國，最高元首係咪由國民一人一票普選出嚟嘅呢？咁當然唔係啦，係由一眾輸機煮教提名互選嘅。哈哈，咁又同香港凸首選舉嘅提委會、選委會有乜分別呢？有，香港嘅提委會同選委會唔多唔少都有啲民意基礎，雖然絕對講唔上人人均衡參與。而喺神聖帝國，重要職位基本上係由自上而下嘅委任制產生。再由輸機團互選最高元首，實際上係一個塘水滾塘魚嘅小圈子遊戲，連丁屎咁多民主成分都冇囉！仲有，神聖帝國嘅女性子民從來冇得擔任重要職位，性別歧視嚴重過巴基斯坦。據聞舊年先出現第一位女性煮教，距離男女平權呢個民主社會基本要求仲有十萬九千光年咁遠！

喺自己地頭嘅神聖帝國都冇出過一分力促進民主，陳大輸機反而走嚟香港爭取普選，你話佢係咪面皮厚到無倫呢，一個「偽」當之無愧啦！

唔使講到西方神聖帝國咁遙遠，我地又睇吓一單本地嘢。早前政府推行校本條例，要求學校成立法團校董會，當中要有教師、家長、校友代表，以提高學校運作嘅民主度同透明度。呢樣嘢一定會有好多人唔認同，但係點都估唔到，反對得最激嘅竟然陳大輸機佢老人家。佢仲同政府打官司，最後當然係輸埋啦。講開又講，連神嘅意旨都唔可以左右法庭裁決，呢啲先係真正嘅司法獨立囉！

講真，成立法團校董會人人可以反對，唯獨陳大輸機唔反對得。教師、家長、校友都係學校持份者，俾佢地有機會參與學校管理，正正就係民主嘅體現，試問不遺餘力為港人爭取民主嘅陳大輸機又有乜理由反對呢？哈哈，俾你估得到就唔係神人啦！

神人嘅腦部結構果然異乎常人，陳大輸機嘅反對理由係咁做會削弱神聖團體嘅辦學理念喎。哈哈，神話連篇，唔輸官司就有鬼啦！辦學團體有6個校董位，再加一個由佢地委任嘅「獨立人士」，自己友已經有7票，其他街外人就算想搞破壞，聯合起嚟最多都係得3票，根本就搞唔到乜嘢花樣。對於學校管理，嗰3個「街外人」校董極其量都只係得個知字囉。削弱辦學理念云云，究竟從何說起呢？咪住，唔通神聖團體嘅辦學理念竟然有啲乜嘢不可告人之秘，一俾人知道就會見光死？本人就唔多作猜測嘞，大家自己諗吓啦！

由以上兩單事例可見，陳大輸機平時就大義凜然咁替港人爭取民主，但係一牽涉到自身利益就睬你都有味，丁屎咁多都唔肯放俾你班友。呢種表裏不一、神口蛇心嘅人，叫佢做「偽行者」已經算客氣啦！乜都做戲咁做，但係啲戲又屎到爆，又唔肯俾多兩錢誠意。如果佢有啲誠意，好似拜苦路咁擔住個十字架行，起碼都可以叫做「藝行者」囉，哈哈！

順帶一提，雖然十分鄙夷陳大輸機嘅為人，不過我都覺得佢講過一句好啱聽嘅嘢，就係佢話要退回辦學權。都唔知乜嘢理由，政府竟然要用公帑資助啲神聖團體傳道！尤其是有陳大輸機呢啲咁嘅人，政府出雞佢出豉油都仲要咁多阿吱阿咗，真係忍得佢都食得屎囉！好可惜，陳大輸機最後都係口爽爽大隻講，冇退回辦學權。言而無信，再記佢一個大過！

Annapurna Trek, Nepal

Police on wheels, Seoul, South Korea

馬年第一砲

天下盡多不平怪事，世上豈缺可惡賤人！馬年第一砲，當然係要鬧啦！冇錯，本扑宗旨從來都係：笑罵天下怪事，怒插世上賤人！

一時技癢，又喺度作對添，哈哈！不過實在作得唔好，還望多多包涵！

過年去咗澳洲，返嚟喺電視見到政府台班公務員搞事，真係睇到眼火爆。話說廣播處長接受是但台訪問，政府台班嘍囉就高舉大紅揮春棟晒喺後面示威。唔俾面老細都唔緊要嘞，最攞命係班友竟然自暴其短，將自己極其低B嘅真面目展示人前。何以低B？咁就要睇吓啲揮春寫乜喇。

其中一副揮春寫住「馬上有大樓」五隻大字。之前新廣播大樓撥款申請被否決，睇怕再闖關都係凶多吉少。通過咗又點，都仲要招標，跟住先慢慢起，冇十年八載都唔使諗囉。就算去紙紮鋪訂造，都起碼要等兩三日先有得燒啦。「馬上有大樓」云云，唔通班友當咗自己係大胃高拍飛？！哈哈，班友谷精上腦，「馬上馬上風」就有佢地份！

低B唔係罪，而係一種先天缺憾，本來應該寄予同情。不過班友既自私又無恥，唔插爆佢地都對唔住天地良心囉。講真，政府台因乜需要一座超豪廣播大樓先。好明顯，班友係想大幅擴張政府台架構。如果真係成事，就算政府想鏟除佢地都有心無力啦。以後要搞私有化，又貴到冇人買得起。咁班友嘅鐵飯碗就可以即刻增值，升呢變成金飯碗嘞。班友慷納稅人之慨以保自己飯碗，直頭係自私兼無恥，絕對人人得而誅之！

哈哈，鬧完班廢柴真係成身舒服晒！之前作完對，而家又有雅興吟埋詩添，整番兩首（一首五絕，一首七絕）應吓節先：

北斗七星高
汎舟越洪濤
揮手自茲去
水寒風似刀

愁雲慘澹萬里凝
夜雨聞鈴腸斷聲
年年戰骨埋荒外
杜鵑啼血猿哀鳴

以上句句都係好詩嚟架！哈哈，常言道「妻不如妾，妾不如偷」，偷番嚟嘅當然係好嘢啦！睇唔出有邊忽應節？唔緊要，下回自有分解。

最後一定要提吓張相，因為絕對係應節之作。大年初一，旅遊巴喺屎塔曼尼亞田野極速飛馳。忽然見到遠處樹下有個白點，即刻開袋，攞相機，打開鏡頭蓋，zoom埋去，對焦，㩒掣。整套動作乾淨俐落、一氣呵成，仲影得好清晰添（影得好唔好當然係另一回事），快槍手當之無愧！

哈哈，爭啲唔記得最緊要嗰樣添，恭喜發財！祝大家日日龍馬精神、事事一馬當先、鑊鑊馬到功成！

Tasmania, Australia

聽金一席話：論新聞自由

你想油過間屋，但係你個賓賓話佢習慣咗原本隻顏色，唔准你改。佢仲影低屋內實景，而且記錄埋日常工作範圍，單方面制訂一份「家務約章」。總之冇佢同意，間屋任何嘢都唔郁得，你亦唔可以叫佢做約章冇包括嘅工作。有個咁嘅賓賓，你會點處理呢？

喧賓奪主、冇大冇細，係正常人都會即刻兜咗佢啦！不過賓賓話唔炒得、輿論話唔炒得、連垃圾議員都話唔炒得，你話係咪荒謬絕倫呢？！

荒謬？都未算！由明報員工同垃圾議員攜手演出嘅一齣「捍衛新聞自由大龍鳳」仲荒謬呀！

明報員工反對換老總，其實都唔難理解。商業機構嘅高層人事變動，通常都會引發連串地震。員工驚飯碗不保，當然唔想老闆搞啲咁嘅嘢啦。唔想還唔想，但係老闆要撤換高層，作為員工又可以點做呢？向老闆表達不滿當然可以，甚至集體扎馬向老闆施壓都得。員工士氣同歸屬感對商業機構至為重要，老闆冇可能會唔考慮。如果老闆一意孤行，員工只得兩個選擇，一係接受現實，一係劈砲唔撈。如果員工集體劈砲，隨時會對機構造成致命打擊，老闆亦要為自己嘅決定付出沉重代價。

作為明報長期讀者，本人絕對歡迎撤換總編輯呢個決定。明報員工要同張曉卿撐，我亦唔會反對，因為呢啲始終係佢地嘅內部糾紛。但係明明從自身利益出發，明報員工竟然拉埋新聞自由嚟講，我就好睇唔過眼嘞。新老總都未上任，班友就認定人地會妨礙新聞自由，分明係無的放矢囉！

班友仲揾埋「明報舊生會」（明報前員工）同一眾垃圾議員幫拖，簡直不知所謂。前度員工可以干涉商業機構嘅人事任命，真係聞所未聞囉。而且明報前員工極有可能幫緊明報嘅競爭對手做嘢，佢地介入絕對有利益衝突之嫌。班垃圾議員高調幫拖就更離譜，分明係政治勢力干預傳媒自主。唔知邊啲人先係踐踏緊新聞自由呢？！

講開垃圾議員，又順便插吓人渣傑呢件垃圾中嘅垃圾先。條友提出嘅「捍衛編輯採訪獨立自主」動議，既冇針對性，又冇約束力，簡直空泛如無物。就算放個屁都仲實質啲，起碼可以聞到臭味先啦。條人渣話有傳凸首有政治任務，要整頓傳媒。呢啲所謂傳聞都可以攞嚟做呈堂證供，條友真係弗上腦囉！佢又話相信明報單嘢係同中央想控制政改討論有關。講真，如果中央要整頓傳媒，爛生果有乜理有仲可以撐到今日先。如果明報換總編輯都可以係中央干預香港新聞自由嘅證據，咁大公文匯商報呢啲立場咁鮮明嘅報紙又算係乜呢？條友分明係借題發揮，乘機呃吓政治本錢啫。夠薑就學吓人地德國，動議將替共產黨護航列作違法行為。話時話，有傳條友係佢老豆同隻狗乸私通嘅副產品喎，唔知大家信唔信呢？

又講番明報員工，班友早前喺報社門口默站5.5分鐘抗議，仲手持明報歷年關於64燭光晚會同71遊行嘅報導。佢地話5.5分鐘係代表明報創刊55年喎。居然提到明報嘅歷史，班友簡直自暴其短！

明報嘅編採方針有冇變過，最清楚一定係啲長期讀者。我開始睇明報嗰時，可能好多明報記者仔都仲未出世囉。近年明報立場越見偏頗，淨係睇吓每年64燭光晚會同71遊行嘅報導就可見一斑。標題只採用主辦單位作大作到離晒罩嘅數字，唔通班友敢話呢啲數字比中立學者提供嘅更可靠？分明係譁眾取寵啦，咁好明顯已經偏離咗金庸創辦明報時嘅方針。仲有，金庸最注重副刊質素，但係早排明報副刊竟然出現咗一篇造謠文章，抹黑本地超市長期售賣大陸造假食品。選擇專欄作家只考慮政治取向，而唔理佢地質素如何，唔通咁就係體現新聞自由？又等我地睇吓金庸對新聞自由有乜見解，以下係節錄自張圭陽「金庸與明報」一書：

「本書出版前筆者見到金庸，請教“新聞自由”之事。金庸：“新聞自由係指政府當局不可干預傳媒而言，並非涉及傳媒主事人與工作人員之關係，後者僅為雇員關係，屬於勞資關係。在英國，各大報章在選舉時均支持不同政黨，如《每日郵報》Daily Mail、《每日快報》Daily Express等傳統上支持保守黨，《每日鏡報》Daily Mirror傳統上支持工黨，報紙的總編輯、主筆、記者等無發表不同政見的‘自由’。報業大王梅鐸收購倫敦《泰晤士報》Times後，該報立論必須全聽老板的話，資深總編輯Robert Evans意見不同，即被解雇，全無‘新聞自由’可言。”」

事實就係咁。試想吓，如果壹傳媒有個編輯忽然short咗，猛咁同肥佬黎唱反調，肥佬黎有乜可能會唔炒佢先。

明報撤換總編輯，好明顯係因為佢偏離咗老闆嘅辦報方針。新聞自由云云，只不過係某啲人用嚟蒙騙公眾嘅一個虛詞囉！

Shwedagon Pagoda, Yangon, Myanmar

當大學雞遇上超難小一入學題

上回講到一條超難「小一入學題」，後來證實原來係網民惡搞，只可以話得啖笑。不過揾資料時就發現咗另一單嘢，雖然係2012年舊料，都想攞嚟同大家分享吓。

話說有報紙做咗個專題，蒐集咗11條「超難」小一面試題（見下圖），再揾20隻大學雞試做，發現最深嗰題只得一隻答啱。都係嗰句，如果想知道自己有冇小一入學程度，咁就唔好睇埋落去住，試吓識唔識做先啦！

講真，以我地嗰代嘅標準嚟講，呢啲題目又的確係超難。尤其是我呢啲鄉下仔，五六歲嗰時根本就同一舊飯冇分別，咁嘅試題肯定一條都唔識答囉。好彩嗰時間小學冇入學試，話知你係蘿底橙定地底泥都照收，所以本人先有書讀咋。

雖然話時代已經唔同咗，而家啲細路都不知幾精靈，呢啲試題難唔難得到佢地都仲係好難講。不過連大學雞都唔識答就真係誇張咗啲，等我呢個ex-大學生都試吓先。

8, 10, 11, 12中，哪一個數字是不同的？為甚麼？（全部答對）
8或11都得，呢條冇乜難度。

哥哥有6粒糖，弟弟生日送給他2粒糖，媽媽之後再送5粒糖給哥哥，問哥哥有多少粒糖？（3隻答錯）
咁簡單嘅加減數，竟然都有3隻大學雞答錯？！其實呢條連我自己都答唔到，因為題目本身就有ambiguity。究竟「弟弟生日送給他2粒糖」係指弟弟送咗2粒糖俾哥哥，定係哥哥送咗2粒糖俾弟弟呢？

鉛筆4元，間尺7元，橡皮膠5元，你有10元，可以一起買哪兩種？（全部答對）
如果咁都答得錯，唔止冇天理，直頭係冇人性添啦！

如果你媽媽給你10顆糖，2張糖紙可以換1顆糖，間最後你最多可以吃多少顆糖？（19隻答錯）
正確答案係19粒。20隻大學雞只得1隻答啱，除咗話「世風日下，人心不古」，真係唔知可以點講嘞。等我仲以為而家呢代好古惑添，估唔到啲大學雞竟然會咁老實，簡直係擔屎唔識轉膊囉！換番嚟嘅糖都有糖紙，可以再用嚟換糖，冇乜理由會諗唔到呀！

＿RASS，可否加一個英文字，變成一個你認識的字？（4隻答錯）
呢條題目都有4隻大學雞答錯，又真係好奇怪吓。相信標準答案係「BRASS」或「GRASS」，尤其是「GRASS」呢個字咁淺，讀到大學冇理由會唔識啫。不過咁，本人一樣「答錯」呢題，因為我嘅答案係「HARASS」或「EMBARRASS」。條題目問「可否加一個英文字」，而「B」同「G」都只係英文字母，根本唔算英文字。本人答案就唔同嘞，「HA」同「EMBAR」分別都有意思，而且可以喺字典查到，絕對符合題目要求。哈哈，唔知嗰4隻答錯（或唔識答）嘅大學雞，係咪都因為正確理解題目反而答唔到呢？

Kid, could you share with me what is your favorite animal ?（1隻答錯）
呢條問題對幼稚雞嚟講可能深咗啲，不過大學雞冇可能唔識答囉！哈哈，如果中二都未識齊26個英文字母，咁上到大學唔識答呢條問題都好正常啫！呢啲都係無謂深究嘞，我反而想講吓條題目本身。香港人念念不忘事頭婆恩典，對前朝風物更係推崇備至。有人甚至高舉龍獅旗闖入駐港解放軍總部，冒死爭取香港逆向回歸添。不過條題目竟然用咗「favorite」呢個美式串法，而唔係英式嘅「favourite」，咁會唔會太傷害香港人嘅感情呢？仲有，「could you share with me what is your favorite animal」喺文法上有冇問題呢？作為學校出嘅試題，係咪用「could you share with me what your favorite animal is」會比較好呢？話時話，其實有冇需要搞到咁複雜先，點解唔直接問「what is your favorite animal」呢？講真，我自己都唔敢肯定架，希望有英語人可以指點吓！

小朋友不該在圖書館做甚麼事？（全部答對）
哈哈，我答「瀨屎」或「瀨尿」都應該唔會錯啩！

有甚麼食物對牙齒有益？（4隻答錯）
PK嘞，呢條唔識答添！不過咁，如果臨場應考，唔識都要撞架啦。我會答「牛奶」囉，高鈣食物，斷估點都有啲譜啩！本來我都冇資格恥笑人地，不過篇報導話有隻大學雞嘅答案竟然係「牙膏」，真係要忍得住笑都幾難囉！哈哈，唔通隻大學雞就係因為食得牙膏太多，所以先搞到咁低B？！

甚麼車輛只可以在香港區行駛？（4隻答錯）
電車？應該係喇啩！

香港的機場在哪裏？（1隻答錯）
呢條我識，係「赤鱲角」。不過如果要書寫作答就唔掂嘞，因為我唔識寫個「鱲」字！唔知答「大嶼山」得唔得呢，個「嶼」字我識寫喎。

超級市場和街市的分別？（1隻答錯）
超市乾淨企理，貨品選擇多而且陳列整齊，買得多仲可以送貨，俾錢碌卡又得，嘟八達通都得，夠晒方便。街市污糟邋遢，經過濕貨區成日會俾人潑濕腳，俾錢只可以用現金，而神沙仲拒收添，唔係咁customer-friendly囉。本人諗嘢簡單直接，以上答案係從普羅顧客嘅角度出發。但係以而家啲大學雞嘅思維，佢地當然會有唔同答法啦。哈哈，等我估吓先，會唔會係咁呢？超市係地產霸權，係無良奸商，最鍾意揾顧客笨。街市商販係良心經營者，佢地擺檔唔係為咗賺錢，而只係想服務市民。正因為佢地當啲街坊係朋友，所以絕對唔會揾顧客笨。

經人肉測試，除咗本身有問題嘅若干題目，本人應該都冇答錯。就算係嗰條靠撞嘅「食物」問題，我都相當有信心架。對比番報紙做嘅大學雞測試，正確率100%嘅竟然只得3條，仲要都係淺到連幼稚雞都唔會答錯嘅題目添。無疑，對四五歲嘅細路嚟講，有部分題目可能真係比較深。不過做咗廿年人、讀咗十幾年書嘅大學雞，竟然都會俾呢啲題目考起，咁就真係講唔過去嘞。

究竟係咪高等教育普及化拉低晒大學生嘅水平呢？抑或，會唔會因為呢一代都喺溫室成長，過份嘅保護令到佢地學唔到一般生活常識呢？點都好啦，對一個老餅旁觀者嚟講，只可以話得啖笑囉！

來源：「SUN熱辣：升小面試題考起大學生」

小一入學題？

連續鏟咗日月報幾鑊，不過都仲未諗住換畫。始終睇咗咁多年，點都有啲感情囉。尤其是去屎坑，冇佢陪住真係覺得好空虛架！

早兩日睇日月報又發現咗一單過癮嘢，明明唔係教育版，不過就登咗一段英文。段嘢最尾仲有咁嘅一行中文：聖方濟各小一入學題（見下圖）。如果想知道自己有冇小一英文程度，咁就唔好睇埋落去住，試吓解答呢條問題先啦！

雖然自問英文好屎吓，但係斷估都有band 2學校中三程度囉。小一入學題？簡直不屑一顧啦！唔係喎，橫掂都要等運到，試吓都冇壞啫。點知睇清楚，當堂俾佢嚇親。唔係啩，小一入學題？！可以好肯定，就算中一嗰時，我連條題目問乜都未睇得明囉，莫講話要答啦！不過咁都好，有番少少挑戰性。

初初主攻頭兩句，真係俾佢考起，竟然完全冇頭緒添。太抽象喇，都係轉攻第三個空格。食得嘅，應該會實質啲啩。弊嘞，仲係諗唔到。都係唔好再嘥時間，跳去最後嗰個空格先。12345，bingo！

雖然只用5秒就攻破最尾嗰個空格，但係頭尾總共用咗成兩分鐘先答到呢條題目。相信好多人考試都係咁，鍾意順住次序答題，遇到kick手題目又死咬住，唔肯跳過做下一題，結果搞到答唔晒份卷。呢個係性格問題，唔關答題技巧事。

言歸正傳，究竟用兩分鐘答呢條問題係唔係太慢呢，會唔會連小學都唔收呢？話時話，都唔記得當年報讀小一使唔使考試添。仲有，其實嗰時幼稚園有冇教過英文呢，真係一啲都諗唔起喎。唯一有印象係小學（定係中學呢？）有課書教過「A man and a pan」，比起而家啲小一入學題，嗰時嘅英文課程簡直低B到無倫！不過咁，呢條小一入學題又真係深咗啲，相信唔係所有幼稚雞都識答囉。

啲人成日話香港貧富懸殊有幾嚴重，不過如果有個乜乜係數量度香港學生嘅英文程度差距，我諗一定勁過堅尼係數啫。聽個教書嘅朋友講，佢學校有啲中二生，連A至Z都未識得齊囉。我當時又唔好意思問，究竟嗰啲學生點解可以由中一升上中二嘅呢？但係另一方面，香港有啲細路英文就勁到無倫。我成日搭都聽到啲四五歲嘅豆釘（當然唔係鬼仔啦）同啲賓賓對答，英文都不知幾流利，而且發音仲好準添，肯定唔係賓賓教嘅。呢條小一入學題，真係未必難得到佢地囉。

雖然我好肯定個答案唔會錯，不過都睇埋相關報導內容。話說記者喺網上見到呢條「小一入學題」，佢自己用咗五分鐘先答得出（哈哈，仲屎過我！），覺得會唔會太難咗啲，所以就揾有關小學校長確認吓。最後證實單嘢同嗰間小學無關，純粹係網民惡搞。

上網摷過，其實呢條IQ題已經流傳甚廣，仲有好多唔同嘅變奏添。咁究竟係邊個喺度造謠生事呢？講明話係「聖方濟各小一入學題」嘅網頁都摷到幾個，其中以名為「我哋唔政經」嘅飛屎卜最早post出嚟，暫時嫌疑最大。都唔知啲友乜嘢心態，無聊就上鹹網打發時間啦！搞埋晒啲咁嘅嘢，等我仲以為自己啲英文連小學雞都不如添！

苟且無為＋卑鄙無恥＝日月無光

早排講到某關姓阿毛喺日月報副刊造謠生事，抹黑本地超市長期售賣大陸黑心食品。本人素來嫉惡如仇，當然唔會放過呢條阿毛啦。除咗喺拙扑勁鏟，早幾日（15號）仲寫咗封信去日月報投訴佢添。估唔到日月報反應都算幾快，當晚已經收到佢地回覆，內容如下：

「謝謝 閣下對本的關心及支持，來函己轉交關麗珊女士。除非有事實上的錯誤及法律問題，否則明報編輯部一般不會刪改專欄作者的文章。再一次感謝 閣下對本報的關心及提供寶貴意見。
順祝 新年快樂
明報編輯部」

真係火都嚟埋，竟然用寥寥數字打發一位真心提意見嘅長期讀者，仲要答得咁行添！枉我連日閉關，不飲不食、不眠不休先寫成封信！

回覆中提及「除非有事實上的錯誤及法律問題……」，然則日月報覺得關阿毛講緊嘅係事實？完全唔考慮一般常識，咁如果呢條阿毛話自己識白日飛昇，日月報都會照登？尊重作者嘅表達自由當然應該，不過咁絕對唔可以作為編採部門偷懶或護短嘅擋箭牌。假使文章明顯背離常理，甚至蹟近造謠，傳媒係咪都應該為尊重作者而罔顧社會責任呢？

如果真係有咁嘅情況（例如關阿毛呢個畸屎），編採部應該同作者溝通吓先囉。文章一旦出咗街，其實對作者同傳媒本身嘅聲譽都有負面影響。如果只係出於無知，作者極可能會主動撤回文章，咁就皆大歡喜啦。如果作者堅持唔肯修改，編採部就要決定係咪採納嘞。咪住，唔通日月報班友睇都唔睇就攞篇文去排版，抑或連佢地自己都係好似關阿毛咁無知？

另外，編採部主事者亦有責任嚴選有質素嘅作家。求其阿豬阿狗阿毛，只要識打幾隻中文字就可以叫做作家而且得到認可，咁本人都夠資格喺日月報寫副刊啦！睇嚟喺日月報編採部做真係唔錯，高層無為而治，基層無為而作，完全唔使帶個腦返工，筍呀！

至於關阿毛，佢係始作俑者，當然不可不提。自從日月報轉交咗我封信，到而家已經超過四日，佢冇可能未睇囉。不過一如所料，佢並冇作出回應。首先，睇番關阿毛過往嘅文章，佢應該唔會有向別人承認錯誤嘅器量。而且，就算唔想認錯，以佢嘅智慧，亦絕冇可能反駁到信中論點囉。所以，唔回應係佢嘅唯一選擇。

本人啱啱上佢飛屎卜睇過，一篇喺本月５號貼出嘅毒番薯文章，到而家仲喺度。文章有幾條留言，不妨攞嚟同大家分享吓：

羅XX：現今世代的悲哀~~假食物其實可以賺多幾多啫?比您賺多五倍又如何?好的蕃薯卻被糟蹋了,這些奸商真折福!
Cathy Kxxx：啲糖水簡直好似被賜死！
James Lxxxx：嚇死人
Jennifer Lxx：好恐怖呢。

哈哈，果然有無知婦孺俾關阿毛呃咗！鬼咩，上網唔帶腦，唔俾人呃都冇天理啦！話時話，其實第一條留言都幾有意思架，如果稍為改動吓：現今世代的悲哀~~造假文章其實可以呃多幾多稿費啫?比您呃多五倍又如何?好的蕃薯卻被糟蹋了,這關阿毛真折福!

本人比較厚道，原本傾向相信關阿毛只係無知。但係到而家仲留番篇文喺度害人，咁就足以證明呢條阿毛唔一定係無知，不過就肯定係無良同無恥！大家可能會覺得我太武斷，話唔定阿毛早幾日得到急病去咗賣鹹鴨蛋呢。哈哈，如果係咁就天有眼啦！可惜唔係，佢啱啱先貼咗篇文上飛屎卜。我好肯定佢仲健在，或者咁講，起碼對手仲打到字。不過呢啲人咁黑心，遲早實會有報應囉！

既然得到呢個結論，咁我信中提及嘅其中一個疑點就解釋到嘞。關阿毛冇向有關當局舉報，係因為佢根本唔想將件事搞大。就算全港99%人知道佢造假，但係只要有1%死硬（或死蠢）粉屎相信佢，佢都已經可以生存到。如果單嘢搞大咗，始終都會水落石出，到時連嗰1%粉屎都留失埋，咁就真係食榖種嘞。所以無論關阿毛當初有冇懷疑過啲番薯係黑心貨，佢都唔會舉報嗰間「無良超市」。喺自己專欄「揭發」咪好囉，既投粉屎所好，又可以呃稿費。

睇番香港現實環境，呢種策略正係好多人嘅生存之道，絕唔係關阿毛獨有。無論政客、作家、時事評論員、傳媒、甚至學者都係，只要得到足夠支持度就可以生存，其他人點睇根本就唔使理。社會責任、道德操守呢啲咁虛無縹緲嘅嘢，既唔可以當飯食，又缺乏目標針對性，自然唔會考慮啦。哈哈，越講越遠添！

言歸正傳。對於日月報編採部嚟講，一個普通讀者提出嘅意見，真係睬你都有味啦。對於關阿毛嚟講，一個非粉屎提出嘅質疑，就更加係睬你都生臭狐囉。編採部門苟且無為，合作夥伴卑鄙無恥，日月報正係漸漸背棄光明，逐步走向黑暗，實在令人慨歎！

Twyfelfontein, Namibia

Etosha National Park, Namibia

日暗月殘

致編採部主事者：

本人為貴報長期讀者，素喜貴報作風務實、立場持平、編採嚴謹。唯貴報近年漸有偏離當初辦報方針之勢，尤以副刊為甚。現今之副刊版，非但聲音一元化，且文章質素良莠不齊，劣品屢現。猶如目睹親友走入歧途，本人深感痛惜！

舉一實例，貴報副刊D5版於本月九日刊登關麗珊女士題為「紫心和黑心」之文章。此等「大紀元式」文字竟現明報，實令本人錯愕萬分！

文章敘述作者於本地超市購得大陸生產之紫心番薯，唯烹調時發現顏色有異，遂認定為經染色之黑心食品。作者指出該等番薯於超市「長賣長有」，更以「毒藥」及「劇毒」等字眼形容「染料」之顏色。

染色紫心番薯並非新鮮事物，早於數年前已傳遍坊間，致使食安中心作出跟進，並發表報告，內容（節錄）如下：

「就市面懷疑有紫心番薯及黃花魚被添加入染色料一事，食環署己採取特別行動巡查全港多個零售地點，包括各街市攤檔，並抽取了多個紫心番薯和黃花魚樣本化驗。

化驗結果顯示所有的紫心番薯都含有一種名為「花青素」的紫色色素。花青素是一種天然色素，存在於紫心番薯中，並無證據顯示番薯內的色素是外來添加的。其實，「花青素」還自然存在於多種供食用的水果及蔬菜中，例如紫心番薯、葡萄、紅椰菜和漿果，一般的食用對人體無害。處理紫心番薯時出現色滲問題，只是自然現象，在蔬果類食物中十分普遍，不用擔心。」

作者之無知實令人震驚不已，且未經查證即認定所購之番薯乃黑心食品並於專欄發表，其輕率態度更絕不可取。食品安全乃港人極度關注之議題，超市長期售賣大陸生產之黑心食品，政府監管當局竟懵然不知，此乃何等嚴重之指控！正值本港反中、反政府、反霸權情緒高漲之際，此文自能吸引讀者，唯其為害亦更深。

此外，文章亦存若干疑點。首先，作者認定番薯之紫色乃來自「劇毒」般恐怖之染料，唯仍繼續食用，實有悖於常理。再者，購得黑心食品，作者竟不向有關當局舉報，反而選擇於專欄「揭發」。此舉實令人費解，難道作者不欲將無良商人繩之於法？本人無意猜測此文之描述是否真確、或作者是否別有用心。唯肯定者，此文乃公民教育之反面教材。

此等譁眾取寵、蹟近造謠抹黑之文章，貴報竟予以採納，實令人極度失望。由於文章並未提及有關生產商及超市之名，貴報及作者均得以避開法律責任，唯社會責任竟可置諸不顧？雖曰謠言止於智者，唯文章刊登於號稱「公信第一」之報章，「可信度」自有別於一般網上訛傳。若有讀者受文章誤導，貴報編採部實難辭其咎！

譁眾取寵之伎倆，眾多本地中文報章早已優為之。貴報若跟風，實為「以己之短攻人之長」，非但徒勞，更無異自毀長城，置貴報引以為傲之「公信力」於不顧。望貴報能秉承往昔務實、持平、嚴謹之作風，以「是其是非其非」之態度進行編採，並多容納不同聲音。貴報重奪「公信第一」之銜，實乃本人樂見之事。

最後，煩請轉寄此信予關麗珊女士。謝謝！

明報長期讀者


以上係本人拼盡九牛二虎之力寫嘅投訴信，啱啱寄咗出去。

日月報立場近年越嚟越偏頗，尤其是副刊，直頭俾啲民主聖鬥士攻佔晒。班友日日喺度大放厥詞，真係睇到眼火爆。早兩日講開有個低Ｂ婆娘喺日月報副刊造謠，本人勁鏟之餘，仲話考慮緊寫信去投訴添。其實只係齋噏嘅啫，寫信咁麻煩，如果真係要寫，幾年前已經寫咗啦。點知有網友留言話支持我去信投訴，搞到騎虎難下添，唯有頂硬上啦。今次真係頭痕嘞，用口語鬧人我就叻啫，要正正經經寫投訴信，識鬼咩！

Jodhpur, India

Jaisalmer, India

低Ｂ列傳之：黑心阿毛

日月報最近撤換總編輯，引嚟一眾正義之士（包括妓協、學者、垃圾議員）質疑，認為咁做係向中共投誠。本人一向客觀持平，當然唔會好似班友咁未審先判。其實換老總都唔一定係壞事啫，話唔定可以為日月報帶嚟一番新氣象呢。

曾經喺拙扑講過，日月報副刊已經淪為重災區，簡直係滿目蒼夷。鬼咩，揾埋晒啲低Ｂ婆娘（如黃Ｘ樂、陳Ｘ姿、關Ｘ珊之流）寫嘢，早排仲加埋李Ｘ玲隻癲雞乸添。搞到副刊版群癡粥粥（咦，好似用錯別字喎，係咪「群雌粥粥」先啱呢？），真係吾不欲觀之矣囉。希望個新老總可以清理門戶，掃晒呢班垃圾婆娘去堆填區啦。

一眾低Ｂ婆娘之中，又以關Ｘ珊最冇料到。此豬（弊嘞，又打錯添，應該係「此姝」）行文無甚見地，而且文筆平庸之極，完全吾明點解可以喺日月報長寫長有。早幾日佢又大發妙論（或謬論），講述自己買到大陸黑心食品嘅經歷，真係睇到唔知好嬲定好笑。以下係節錄自佢嗰篇題為「紫心和黑心」嘅文章：

「……最近到超市買番薯…… 標籤寫紫心薯，種植地是江永縣，收購加工企業在東完市，沒有寫明加工的意思是染色。番薯皮正常，但去皮時，看見番薯有紫色染料滲出來，連刀都變紫色。 相信加工廠將米黃色番薯染成深紫色，也許是注射染料的。 我浸洗番薯多遍，多次倒去變成紫色的水，才拿去煮。 煮成糖水後，連薑都染成紫色，糖水更是深紫色。我在超市常見這種紫心薯，長賣長有，應該不會食死人。 為免浪費食物，我吃了番薯，倒掉糖水，飲那種紫色水不見得有益健康……食物跟我們的健康息息相關，製假藥和假食物的奸商同樣黑心。我為深紫色糖水拍照放上fb，有留言指像被賜死的(藥酒) ，那紫色真像毒藥。 我對加工染料充滿好奇，到底怎樣的染料才可將番薯染成劇毒似的紫色呢？」

紫心番薯我喺Ｐ街超市都買過，全部都係洗乾淨晒再斬頭斬尾，呢啲咪加工囉。關小姐都唔用個腦（如果佢有嘅話）諗吓，就認定人地嘅加工係染色。既然認定番薯嘅紫色係來自染料，又講到顏色好似毒藥咁恐怖，但係就仍然食落肚，真係非正常人可以做得出囉。

紫心番薯糖水我都整過，煲出嚟嗰隻深紫色真係好誘人，見到都流晒口水。條婆娘喺度大驚小怪，係因為佢自己無知啫。其實好多純天然食物，例如紫心番薯、紅菜頭、桑葚，根本就係會勁甩色，呢樣係普通常識嚟囉。舊年我就喺科索沃食過樹上摘嘅新鮮桑葚，結果成隻手染到紅晒，好似鮮血咁，都唔知幾辛苦先洗得甩。又當條婆娘冇食過桑葚，但係紅菜頭夠普通喇啩，喺自助餐嘅salad bar成日會出現，佢冇理由未見過啫。紅菜頭切開咗，滲出嚟嘅水呈深紅色。而羅宋湯嘅紅色，亦係由呢種嘢嗰度得嚟。唔通咁又表示紅菜頭加咗染料？

事實上，染色紫心番薯已經傳咗好幾年，連食安中心都跟進過，以下係節錄自佢地嘅報告：

「化驗結果顯示所有的紫心番薯都含有一種名為「花青素」的紫色色素。花青素是一種天然色素，存在於紫心番薯中，並無證據顯示番薯內的色素是外來添加的。其實，「花青素」還自然存在於多種供食用的水果及蔬菜中，例如紫心番薯、葡萄、紅椰菜和漿果，一般的食用對人體無害。處理紫心番薯時出現色滲問題，只是自然現象，在蔬果類食物中十分普遍，不用擔心。」

無知唔可怕，無知又扮醒先至攞命囉。完全唔求證就話人賣黑心食品，分明係老屈啦。仲要喺報紙專欄寫埋出嚟，咁直頭係散布謠言添。如果喺大陸，條婆娘真係監都有得坐。啱啱上網摷吓，原來佢篇拙文歸類咗入日月報網上版嘅「通識教育」一欄，簡直誤人子弟呀！本人正認真考慮緊，係咪要寫信去日月報投訴呢？

除咗呢啲，對於關小姐處理事件嘅態度，本人亦十分睇唔過眼。條婆娘成日懶有批判精神，講到自己幾咁有公民意識。但係買到黑心貨，佢竟然冇諗過要懲治啲無良奸商，淨係識寫埋晒啲九唔搭八嘢呃稿費。如果啲紫心番薯係由黃肉番薯染色，有關超市肯定已經違反咗商品說明條例。而且根據《食物內染色料規例》，可用於食物嘅染色料亦有嚴格限制。用嗰啲睇嚟好似毒藥嘅深紫色染料，話唔定已經觸犯埋相關法例。作為一個負責任嘅公民，關小姐應該向有關當局舉報囉。就算唔舉報，佢亦應該公開嗰間售賣黑心貨嘅超市，等其他人可以防範。當然啦，咁要基於一個大前提，就係關小姐真心相信啲番薯係黑心染色貨。

而家佢淨係寫咗單嘢出嚟，客觀效果係令讀者覺得大陸紫心番薯都係黑心貨，進一步打擊香港人對大陸食品安全同政府監管嘅信心。究竟呢個係咪佢嘅真正意圖呢？佢既唔舉報，又唔公開有關超市，究竟係咪根本就知道啲紫心番薯冇問題呢？究竟邊個先係黑心呢？呢一連串問題我就冇答案嘞，留番俾大家自己判斷啦。

忽然有啲好奇，唔知關小姐係點樣嘅呢？睇佢啲文章，無論係文筆定內涵，水平都同時下成日出書嗰啲模差唔多。佢會唔會好似猿狸鳴咁，都係一個獻身公義嘅美少女呢？即刻上網摷吓先……

Ｘ！嚇得我吖，原來係條阿毛嚟架！

後記：
啱啱睇完日月報副刊，兩分鐘搞掂。而家群雌之中，我淨係睇屈穎妍，真係覺得佢越嚟越啱睇。至於林燕妮姐姐，so sorry，我對啲懶靚懶高貴嘅女人冇乜好感！

致校長：
雲在青天水在瓶……瓶中清水化為雲霧，雖然摸不到、捉不住，其實從未消失，只是換了另一種形態！

Georgia

紫心番薯糖水

焗紫心番薯

Mulberry, Patriarchal Monastery, Peje, Kosovo