2014年7月13日星期日

100年,兩次世界大戰(上)

100年前,奧匈帝國王儲費迪南大公喺薩拉熱窩遇刺身亡,觸發第一次世界大戰。本人對一戰絕對冇研究之至,想講都冇得講。不過我相信冰凍三尺非一日之寒,就算冇呢單刺殺事件,班友遲早都係會打到七彩囉。

薩拉熱窩,聽個名已經唔係好嘢。「薩拉」同「撒拉」同音,即係屎尿齊發。一隻燒熱咗嘅大鑊,仲要喺上面痾屎痾尿,咁直頭係人間地獄啦。舊年有機會親臨呢個一戰名城,真係估佢唔到,薩拉熱窩竟然係一個山明水秀、古意盎然、盛產美女嘅好地方。本人到過嘅地方都唔算太少,咁靚嘅城市就好少見,絕對可以排喺我嘅城市排行榜頭五位。

雖然同一戰爆發有莫大關係,不過薩拉熱窩喺一戰期間並冇受到大規模破壞。到20年前爆發波黑戰爭,薩拉熱窩終於難逃一劫。92年,佔波黑地區人口44%嘅波斯尼亞人唔理佔人口33%嘅塞爾維亞人反對,舉行獨立公投。結果塞爾維亞人杯葛投票,議案以大比數通過。波斯尼亞隨即宣布脫離南斯拉夫獨立,亦好快得到歐美西方國家承認。講開又講,其實呢單嘢同克里米亞獨立公投好相似,不過西方民主社會嘅反應就啱啱相反,簡直雙重標準到冇朋友。唔係盟友嘅就支持分拆上市,到時就可以收編獨立出嚟嘅新國家。如果係盟友就要保持領土完整嘞,咁先可以保留己方實力。支持民族自決云云,原來只係一個美麗嘅誤會。奧巴馬早排就出晒口術,講到明唔想見到蘇格蘭獨立。人地根本唔介意展示俾全世界睇自己有幾虛偽,慘得過仲有大把第三世界人民(包括香港人)盲目相信佢係正義朋友,你吹咩!

言歸正傳,波黑宣布獨立,由於種族宗教分歧,區內塞爾維亞人亦決定另起爐灶,成立塞族共和國,因而引發波黑內戰。作為波斯尼亞人嘅政治文化中心,薩拉熱窩自然首當其衝,成為塞族人攻擊目標。塞軍喺薩拉熱窩市區周邊山上布兵,開始咗為期三年幾嘅圍城。直到後來北約大規模軍事介入,呢場內戰先結束。

喺薩拉熱窩,參觀過一間「希望隧道」(Tunnel of Hope)博物館。話說圍城期間,四面環山嘅薩拉熱窩完全與世隔絕,各種物資極其短缺,居民過住暗無天日嘅生活。據博物館講解員講,塞軍甚至喺市內水源落毒添。後來有波斯尼亞人諗到挖一條隧道,由市郊通往當時聯合國維和部隊駐紮嘅薩拉熱窩機場,以解決物資補給問題。只用簡單工具,不分晝夜係咁掘,結果用咗4個月完成呢條800米長嘅隧道。期間既要避開塞軍耳目,又要解決各種技術問題(例如嚴重滲水問題同點樣棄置挖出嚟嘅泥土等等),難度可能不下於我地嘅高鐵工程囉。就係因為有呢條隧道,薩拉熱窩市民先可以捱到內戰結束。

時至今日,薩拉熱窩已經成為旅遊熱點,不過對於當地人,戰爭陰影似乎仲係揮之不去。市內好多建築物,牆身仍見纍纍彈痕。市民亦唔見得已經忘記當年傷痛,好似嗰位希望隧道博物館講解員,就完全冇掩飾自己對塞爾維亞人嘅憎恨。

嗰位講解員仲極力推薦一套有關波黑戰爭嘅電影,等我地可以對當年塞軍嘅暴行有多啲認識。套戲叫做《In the Land of Blood and Honey》,港譯《波斯尼亞的羅密歐與茱麗葉》,係畢嫂嘅自編自導處女作。我地嘅隨團導遊(阿爾巴尼亞人)真係唔話得,第二日就已經買咗套戲隻碟喺旅遊巴放。不過有畫冇聲(其實係好細聲),電視螢幕又細,根本唔知佢做緊乜,淨係覺得攝影唔錯。結果睇咗一陣就決定放棄,都係揾周公傾吓實際啲。

返到香港,第一時間上IMDb摷吓,原來畢嫂呢套處女作劣評如潮,評分低到得4.2,即刻冇晒興趣。而且,相信評分已經俾好多反戰人士嘅感情分拉高咗,否則可能連3分都冇添。所以話呢,就算你有幾偉大嘅情操、幾明確嘅目標、幾堅定嘅決心,如果本身條件不足,到頭來都係敗事有餘。可能有人會話,畢嫂第一次做導演,表現差係好正常嘅事。咁我又唔同意嘞,姜文首執導筒就技驚四座啦,呢個根本就係資質問題。其實畢嫂應該發揮佢嘅專長,繼續做番個靚靚花瓶,咁先係大眾之福囉。

講開又講,戲名譯做《波斯尼亞的羅密歐與茱麗葉》,簡直又長又臭,而且分明係炒作鄭天后某首名曲,手法絕不高明。本人就覺得大陸直譯做《血與蜜之地》好好多囉。難為毛姑姑同飯桶威之流仲講到香港電影譯名幾有水準,呢兩條友根本就係自暴其短。哈哈,越講越遠添!

最後想講吓圍城其間薩拉熱窩人遇到嘅一個兩難問題,又係喺希望隧道博物館聽到嘅。話說當時出街係一件好危險嘅事,因為好多地方都有塞族狙擊手喺高處埋伏,見人就放冷槍。所以迫不得已要落街嘅話,人人都會以100米9秒9嘅速度走過啲危險地帶。咁落街攞水就出現兩難嘞,究竟每次攞幾多至好呢?攞多自然走得慢,中槍機會必定大好多。攞得少就要落多幾次街,中伏可能一樣會大增。如果當時身處薩拉熱窩,你又會點抉擇呢?

Sarajevo, Bosnia

Sarajevo, Bosnia

Sarajevo, Bosnia

Sarajevo, Bosnia

Sarajevo, Bosnia

Tunnel of Hope, Sarajevo, Bosnia

6 則留言:

  1. 巴爾幹半島是歐洲的火藥庫,打起仗上嚟唔喺人咁品。不過,點解彈痕累累嘅牆壁,企咗一個書生喺度嘅?嘻嘻!

    回覆刪除
  2. 政治只講利益,唔講道義。戰火屠城,人類總係犯錯後懺悔,懺悔後又犯錯!

    回覆刪除
  3. 佛爺:
    哈哈,呢啲叫做人肉scale,等大家對啲彈窿嘅嘥屎有啲概念啫!

    laulong,
    國與國可以打,民族之間可以打,宗教之間又可以打,國家裏面可以有內戰,城市裏面可以有派系鬥爭,同一民族可以有內鬨,同一家族都可以有內鬥,我話好戰性格根本就係hardcode咗喺人類基因裏面囉!

    回覆刪除
  4. 個美女兩條眉好犀利!

    回覆刪除
  5. 巴爾幹半島越來越多人去,好吸引!

    回覆刪除
  6. Coffee,
    係囉,我都估唔到波斯尼亞會興王小虎眉!

    Jessica,
    係呀,真係唔錯架,有時間可以去睇吓!

    回覆刪除