酸葡萄

世界上邊種葡萄最酸？唔使諗嘞，一定係「御葡萄」！貴到食唔起嘅葡萄已經夠酸啦，仲要係貢品，只供皇帝享用，肯定係酸中之最！不過搞嘅係，呢種葡萄唔止勁酸，仲要唔係俾人食嘅添。點解？因為係俾人住嘅囉！「御葡萄」係元朗「葡萄園」嘅第二期，屬於獨立屋類型豪宅。至於貢品生果點解會成為樓盤名就真係天曉得嘞，不過搞笑程度絕對爆晒燈。話時話，其實用「葡萄園」做樓盤名亦唔好得去邊，因為好可能過唔到「的士測試」。咁乜係「的士測試」呢？即係你上到的士，會唔會唔好意思講個地方名出嚟，就算講咗，司機又會唔會唔知你想去邊。如果你同的士司機講去「葡萄園」，佢會唔會車咗你去機場呢？因為無論你想去法國、澳洲、加州、定係智利，都一定要搭飛機。講開又講，「葡萄園」仲有第三期，叫做「葡萄薈」。如果發展商諗住起埋第四期，唔知會唔會叫做「葡萄適」呢？

講到騎呢樓盤名，其實早幾日先寫過，不過材料實在太多，真係唔執多三五七劑都對唔住發展商啦。星爺有「長江七號」，何文田就有「半山壹號」，啱啱配成一對，而且都係爆笑之作。另外中半山又有「梅道一號」，樓盤名其實係門牌地址，本來都冇乜。不過千祈唔可以講得太快，費事人地聽錯，以為係「梅毒一號」！將軍澳「慧安園」都有同樣問題，個名一定要慢慢講，唔係隨時會變成「慰安園」。尤其是女住客，無啦啦同「慰安婦」扯上關係就唔抵啦！

灣仔有個樓盤叫做「5 Star Street」，以我嘅半桶水英文程度，逐隻字直譯就係「五星級的街」。成二萬蚊一呎嘅豪宅，唔通尊貴住客真係要瞓街？雖然話條街係五星級啫，不過冇瓦遮頭點都唔係咁好啩。俾著我呢cheap人，就寧願要大陸嘅「五星級的家」嘞！北角又有個豪宅叫做「海景軒」，我就硬係覺得個名似海鮮酒家多。諗吓諗吓，某高級酒店嘅海鮮餐廳又真係叫做「海景軒」喎，估唔到豪宅都鍾意玩撞名。講到撞名，沙田嘅低密度豪宅「戈林」就仲離譜，竟然同納粹頭子戈林（Hermann Goering）撞到正！唔通發展商想暗示呢個樓盤係只為人類中嘅精英而設？就算唔理撞名，齋睇字義，個樓盤名都好嚇人吓。兵戈林立，會唔會太殺氣騰騰咗少少呢？

不過咁，又唔好以為香港嘅樓盤名淨係得貴氣、霸氣、同殺氣，其實有都好有書卷氣架。好似港島西就有「學士臺」同「博士臺」，真係萬般皆下品，唯有讀書高！睇怕如果嗰區再有新樓盤，都應該叫做「碩士臺」架喇。但係到時就大鑊嘞，乜都俾人用晒，咁再新嘅樓盤咪要被迫降格，要叫做「副學士臺」？

上述樓盤名都未算天馬行空，更具創意嘅仲有大把。太子有「別樹華軒」同「別樹一居」，真係夠晒別樹一幟。咪住，係別樹兩幟至真！深水埗就有「喜居」，如果遲再起第二期，睇怕要叫做「飲蝕」先得喇。至於荃灣嘅「立坊」又可以點理解呢，究竟發展商想立乜坊呢？我就諗起一句俗語嘞：又要做老舉，又要立貞節牌坊！

西半山嘅「瑧環」先搞，個「瑧」字連我本字典（中華新字典）都查唔到，黃錫凌嘅網上粵音韻彙又唔到呢個字，搞到唔知點讀好。發展商分明想玩啦，特登喺康熙字典摷個冇人識嘅字嚟做樓盤名。不過咁，我呢識字唔多嘅人自有對策，一於有邊讀邊，就當個樓盤名叫做「秦環」啦。但係去到「的士測試」，問題又嚟嘞。如果同司機講「唔該秦環」，佢肯定會媽媽聲。循環？即係不停兜圈？咪玩啦！同樣過唔到「的士測試」嘅仲有何文田「 懿薈」。的士佬問你去邊，你話「 唔該懿薈」，佢肯定又會媽媽聲。意會？你當人地識心靈感應咩！

咁又寫咗千幾字嘞，不過仲有好多漏網之魚，點都冇可能講得晒。其實攞呢豪宅樓盤名嚟恥笑吓，只不過係出於酸葡萄心態，鬼叫我住唔起咩！相信住喺上述樓盤嘅朋友，亦都唔會無聊到同我呢cheap人計較啩！

P.S.：
1. 其實「5 Star Street」除咗係樓盤名，亦係門牌地址，樓盤嘅中文名係「星街5號」。
2. 根據「在線新華字典」，「瑧」係玉名，普通話讀［zhen1］，粵音就真係唔知。