那媽是爹

心邪嘅你梗以為我又喺度講粗口嘞。咁又唔怪得晒你嘅，香港人一聽到「那媽」或者「老母」，都唔知點解一定會聯想到啲衰嘢。其實「那媽是爹」係問候人嘅語句，好嘢嚟架！

雖然話係好嘢，不過邏輯上就好似講唔通囉。人人都知阿媽係女人，當然亦知阿爹係男人，咁「那媽」就冇可能「是爹」啦。話時話，「那媽是爹」又真係唔可以用中國人嘅邏輯嚟解釋喎，因為呢句係尼泊爾話「namaste」嘅譯音，係「你好」咁解。

復活節去咗尼泊爾行山，短短個零禮拜，呢句嘢都唔知講咗同聽咗幾多次。如果喺香港，真係十年加埋都唔會有咁多問候人同俾人問候嘅次數。

尼泊爾人相當友善，見到遊客有時都會主動打個招呼問候吓。呢樣嘢喺香港就唔可能發生嘞，如果喺猩肛大道同啲自由行講「你好」，人地一定會覺得你係黐線佬，再唔係就會以為你係拐子佬囉。

主動同遊客打招呼，相信香港人會覺得難以理解。不過更估佢唔到嘅都仲有，喺尼泊爾，互相問候得最多嘅竟然係遊客之間，尤其是喺山上。四月同十月係當地行山旺季，山上遊客多如過街老鼠。而且大部分山路都比較窄，有人上山又有人落山，好易會狹路相逢。當喺山上遇到對頭人，雖然三九唔識七，大家好多時都會用「那媽是爹」問候對方。呢樣肯定係尼泊爾獨有嘅旅遊文化，就算喺第啲地方都有咁嘅情況，遊客間互相問候都只係會講「蝦佬」，而唔係用「那媽是爹」。

事實上，以我幾十年嚟旅行所見，三九唔識七嘅遊客真係好少會互相問候。就算撞到同聲同氣嘅香港團都係咁話，打招呼就唔會嘞，爭位影相、爭位食飯搞到打交就有份。尤其是喺啲發達地區或者熱門旅遊地點，無論係當地人抑或遊客，都唔會俾到人友善嘅感覺。試想喺巴薩隆拿，如果有個陌生人無啦啦走埋嚟say hello，我實會覺得佢係有啲不軌意圖囉。反而喺啲比較偏遠落後嘅地方，遊客之間會表現得比較友善，有時都會互相打吓招呼。

其實唔使講到咁遠，就睇番我地生活緊嘅地方，人與人之間嘅關係都好疏離。好似我住緊嗰度，就算係同層鄰居，等嘅時候都係互相當透明，莫講話唔會打招呼，連眼神接觸都可免則免。都唔知點解，啲人硬係要去到啲山卡啦地方先會表現得比較友善。好似喺尼泊爾山區，嗰種感覺就相當唔錯。不過咁，去行幾日山就過癮啫，如過要喺嗰度長住就咪搞嘞。對於我嚟講，物質條件點都比風土人情緊要。市儈？我認架！

Syauli Bazar, Nepal

Banthanti, Nepal

Tikhedhunga, Nepal