對唔住，係我錯！

致一眾獻身香港民主大業嘅熱血80後：

今日我要喺呢度向你地鄭重道歉！對唔住，係我錯！係我老到懵咗，竟然唔識得欣賞你地救黎民於水火嘅高尚情操！係我無知，連西方民主係乜都唔知就對你地作出唔合理嘅批評！直至近日希臘頻臨爆煲，我先領會到西方民主嘅優越性，先知道原來一直誤解咗你地！

希臘係西方民主發源地，雖然我都去過，但係居然冇留意到，原來佢地嘅民主方式真係有好多值得香港借鏡嘅地方。如果我唔係咁後知後覺，就唔會一直咁唔認同你地嘅行為。

好似喺捍衛天星、皇后、同菜園村呢幾單，你地話唔要經濟發展。當時係我無知，竟然唔認同你地嘅睇法，仲話如果香港經濟冇發展，你地班食失米聽食西北風啦。而家諗番上嚟，真係覺得好慚愧！睇番人地希臘，經濟差到無倫，但係社會福利就好到我地香港人完全想像唔到。原來喺有真正民主嘅地方，就算經濟唔掂，人民都一樣可以大魚大肉架！呢樣就要歸功於民主選舉制度，人民有權選擇為佢地謀福利嘅政客，總之邊個最疏爽就揀邊個！

至於你地嘅抗爭方式，例如瞓街、圍堵垃圾會、狙擊政府官員等等，我以前覺得係少數人擾亂社會秩序嘅過激行為。但係對比吓希臘嗰邊，個無良政府一話要削減福利，就即刻全民上街，嗰種自發性嘅民主意識同團結精神真係令人佩服到五體投地！見到希臘人喺條街打砸搶燒，直頭好玩過巴西嘉年華。最難得嘅係全民參與，唔會有人覺得唔開心。我到而家先明白，以前覺得你地嘅行為有問題，完全係因為自己嘅民主意識太薄弱！

仲有，你地竭力為港人爭取福利，我竟然唔識欣賞，真係唔好意思！我係怕福利過度膨脹，會搞到尾大不掉，最終令香港爆煲。不過睇番希臘嗰邊，原來爆煲都唔會有問題，根本唔使削減國民福利，因為大把人會出手打救。至於我地，情況都會差唔多。如果香港有難，阿爺肯定唔會坐視不理，原來我嘅憂慮都只係杞人憂天啫！

不過咁，如果香港真係有爆煲嘅一日，要阿爺出手打救，我反而最擔心你地。我明白你地個個都好有骨氣，直頭同伯夷叔齊有得比，就算餓死都唔會食共產黨一粒米。其實幫人都有個限度，你地始終要為自己打算吓。如果搞到你地要餓死，又叫全港市民點過意得去呢？我建議你地都係快移民去希臘，嗰度海闊天空，連空氣都充滿民主自由，真係最啱你地架喇！對於你地嘅無私奉獻，我相信全港市民都會銘記於心，你地就安心去啦！