亂倫

老餅聚頭，通常會傾乜話題呢？當然係80後啦，唔通會講亂倫咩！

有個熟朋友，見親面都會提起佢家姐個寶貝仔，猛講佢個80後姨甥思維有幾離奇古怪，次次都聽到覺得好ung耳。講真，80後有幾騎呢大家都好清楚，已經見怪不怪，其實ung耳嘅係「姨甥」兩個字。我朋友係男人，佢家姐個仔自然係佢外甥啦，有乜可能係姨甥呢，咁直頭係亂倫啦！

最頂唔順係條友屢教不改，明明講咗俾佢知應該係外甥，但係下次一樣係咁錯法。直至有次問咗佢一條問題，之後佢就再冇搞錯嘞。我問佢：你個姨甥點叫你，係阿姨定姨丈？哈哈，我覺得自己真係好勁，直頭有做人之患嘅天份！

我相信咁樣亂倫法嘅真係大有人在，有個舊同事又係咁，提起佢家姐個仔都係話姨甥。不過條友係朽木不可雕嗰隻，我都費試點醒佢。

咪以為淨係胸無點墨嘅人先會犯呢低級錯誤，原來有文化嘅人都一樣會咁錯。喺日月報副刊睇過一篇專訪，受訪者（男人）係一個新派文化人，佢提到佢家姐仔女都係用姨甥。我當時就有一個疑問，作為一個專業記者，係咪應該俾呢種錯誤出街呢？雖然話文章絕對要忠於受訪者嘅原意，但係冇理由見到咁嘅錯誤都仍然照搬。我覺得改就一定架嘞，不過要同受訪者確認咗先，除非係個記者本身都唔知道有問題。有理由相信，受訪者同記者都係亂倫一族。

諗深一層，點解會咁多人搞錯呢，係咪中國人嘅倫常關係太複雜呢？好似鬼咁，nephew一個字就搞掂晒，睇怕都幾難有機會亂倫。當然啦，鬼根本就冇乜倫常概念，梗係唔會有亂倫呢回事啦！

不過咁，我相信喺中國人嘅社會，呢亂倫事件一定會逐漸消失。而家中國實行一孩政策，而香港人又越生越少，相信再過兩代，人人都唔會有兄弟姊妹。到時自然唔會再有上述嘅亂倫事件，因為根本就無倫可亂！

縮水樓

既然講咗發水樓，咁又點少得縮水樓呢！

講到縮水樓，一般人會有兩種唔同嘅理解。第一種係指嗰房細窗台大，放咗張床已經冇位轉身嘅樓。而另外一種係指嗰實用率超低嘅樓，今日我想講嘅就係呢樣嘞。

大家都知道，舊樓（指樓齡20年以上嗰，不過阿茂樓除外）實用率比較高，一般都超過八成，大單位甚至可以接近九成添。而近年嘅新樓，如果實用率有八成（包括露台窗台）已經算好好架喇。不過大家有冇諗過，原來有樓嘅實用率竟然可以低到得三成幾！

話說幾年前元朗四季Ｘ園以呎價二千幾蚊開盤，用五六百萬就買到二千幾呎house（其實係半獨立屋）。有買家覺得好抵就扑槌買咗，但係到收樓時先知大鑊，原來室內面積只有大約800呎，實用率得嗰三成幾！業主覺得俾人咗笨，即刻傳媒入屋實地採訪，實行向發展商進行大控訴。

實用率低成咁，關鍵係喺發展商對「建築面積」嘅演繹。其實物業分為四層，地下係開放式車房同後花園，一二樓係住宅，上面仲有天台。建築面積係包括晒呢，仲要攤分公用面積，所以先有二千幾呎咁大。平心而論，呢個計法同一般慣例有好大出入，可以話相當有創意。不過咁，發展商亦提供咗物業嘅詳細資料，好似平面圖、室內同花園面積等等。事實上，對於建築面積嘅計法，行內從來都冇劃一標準。嗰個咁具創意嘅建築面積亦只係發展商嘅銷售技倆，令人產生好抵嘅感覺。你可以話發展商取巧，但係話人地明呃就點都講唔通。

睇番同類物業當時嘅成交資料，同屬元朗半獨立屋嘅Ｘ州花園，已經有十年樓齡，不過呎價就要成三四千蚊。新樓呎價竟然會比舊樓低四成，買家覺得抵之餘，係咪都應該諗吓點解會平得咁冇道理呢？講真，邊有咁大隻蛤乸隨街跳啫！

以下係爛生果嘅另一相關報導：
「買家恨錯未細看價單

已接獲收樓通知，但因事務繁忙暫仍未收樓的小業主黎女士，得悉四季Ｘ園實用率不足四成，反應錯愕，強調「唔知（實用率）咁低，知就唔買啦！」她憶述當日買樓時，只見現場墟冚，「手慢就冇」，心情好緊張，根本冇時間留意價單所列的各項面積資料。

她補充，當日入市四季Ｘ園，是貪屋苑空氣好，價錢2000多元一呎夠「抵」，在「羊群心態」下入市。黎女士指出，曾到現址睇樓，但只能在外面「望」，覺得用600多萬買入的洋房，「個600呎花園好細」。」

聽完「苦主」心聲，大家有冇寄予最深切嘅同情呢？我自己就冇嘞。買樓唔同去街市買斤菜，隨時講緊一千幾百萬，甚至有可能係一生人最大嘅投資，有乜可能只憑一個數字（呎價）就去馬？就算冇時間做功課，留意吓附近物業嘅行情，最起碼都要睇清楚目標樓盤嘅資料啩。自己連最起碼嘅都冇做到，又叫人地點同情得落呢？

真係難以理解，啱啱先經歷完世紀大跌市冇幾耐，人仲會好似97年咁篤手指買樓。講真，自己唔肯做功課，其實又怪得邊個呢？唔知點解香港人會變成咁，自己做咗傻事就話係奸商嘅錯、政府嘅錯、社會嘅錯，但係就永遠唔會係自己嘅錯！

發水樓

以下係轉載爛生果2010年09月11日嘅報導：

「樓市風雲：發水樓害死香港

發水樓的問題，纏繞香港多年，而港府一直對此問題談而不改，姑息發展商不斷發大可售樓面，以榨取港人樓奴的血汗供樓錢，至於港府亦坐地分成，再加上任由發展商自行訂定賣樓多寡的勾地表制度，藉以控制巿場供應量，這樣畸形的環境下，個個發展商都成為本地首富行列。
政府豁免樓面的方法，原意是鼓勵發展商多建質優的住宅，環保露台的設計，就是希望新樓多建些通風設施。政府為此將該等樓面豁免入可建樓面內，不過發展商多謝都無句，就將露台面積全計入可出售面積內，以一個巿區新盤 35方呎的小露台計，巿值高達 30多萬元，這樣一個大禮是政府明送的。

建議發水上限 10%內

最令人詬病的，是將會所面積全數計入可豁免興建樓面，就這樣的安排，一個中型發展項目，就可輕易多出以萬方呎計的可出售樓面，倘可以選擇的話，相信不少業主不願要這些要付錢的會所設施。
國內的做法可能比香港更為合理，因為這些露台，出售面積只可計一半，就這樣的簡單安排，既可達到鼓勵興建環保住宅的目的，又不致於對發展商過份厚待。
基於發水樓無法律規限，故發水程度最少都有三成，最多去到九成也不罕見，容許這些事情繼續下去，港府很難擺脫官商勾結的惡名。比較合理的做法，是將發水程度定在一成內，至於可豁免面積只限走廊及電梯面積，其他項目要計算入豁免項目內，要個別申請。」

爛生果講到發水樓係官商勾結嘅產物，係政府明益發展商，俾佢地賺多一筆。而嗰發水部份計埋入可出售面積，係發展商喺買家個袋搶錢。究竟係咪咁呢？後來政府順應民意，收緊新樓發水比率，發展商竟然冇強烈反對，只係拿拿林入則趕搭發水尾班車。咁又代表乜呢？

首先，我地要相信土地拍賣機制係公平嘅，即係發展商之間存在住競爭關係，出價係基於自己嘅利益計算。如果唔相信呢一點，以下嘅都唔使再睇落去嘞。

發展商投地，當然會計過條數，有合理利益先會出價。至於發水部份可以賣到錢，發展商當然預咗，亦都肯定會影響佢地出價。如果唔俾發水，佢地咪唔出咁高價囉，你慌班友會死錯人？其實容許發水，即係變相提高地積比率，至於實際提高幾多就視乎發展商自己條數點計嘞。不過有一點可以肯定，就係塊地一定可以賣貴，即係政府庫房收入多咗。至於發展商有冇因為咁而賺多咗，我就真係唔知嘞，要睇吓佢地條數計得準唔準。而嗰投咗地嘅項目，地產商已經將發水部份計埋落成本裏面，而家收緊發水比率，佢地就真係蝕咗嘞，所以唔拿拿林入則搭尾班車先怪。好似爛生果咁講到話係政府明送嘅，我就不敢苟同嘞！

至於會所同露台呢唔等使，又係咪好似爛生果講到咁，係明搶買家錢呢？喺自由市場機制，買賣雙方同意嘅價錢就係合理價錢。大拿拿攞一千幾百萬出嚟買樓，冇理由連層樓有幾大實用面積都唔知啩，而家當買家傻嘅咩！事實上，嗰有超豪會所嘅屋苑都不知幾受歡迎，人爭住買，反而嗰冇會所或者會所唔夠豪嘅就冇乜人吼。根據行情，同一屋苑面積相若嘅單位，有露台嘅亦比冇露台嘅受歡迎。人係要鍾意埋呢唔等使，又真係吹佢地唔漲喎。買賣嘅你情我願，邊有得搶？

咁而家收緊咗發水比率，係咪表示超豪會所同露台就會從此絕跡呢？我諗就未必嘞，如果係有市場嘅，發展商一定會做。至於呢個措施係咪會令發展商賺少咗？咪發夢啦，發展商賺幾多係睇市場環境嘅！

喺自由市場，點先算合理係由買賣雙方決定，而唔係取決於旁觀者嘅睇法。如果覺得價錢唔合理咪唔好買囉，一於用市場力量嚟抗衡。總之就有強姦冇焗買，呢句我講嘅！

P.S. - 本來已經寫完架嘞，最後都係忍唔住要插吓個爛生果。莫講話我唔同意佢地對發水樓嘅睇法，就算發展商真係因為咁而賺多咗，但係點都唔會嚴重到「害死香港」啩。友噏得出就噏，噏唔出嘅都照噏，直頭唯恐天下不亂，一傳媒操守都冇，真係唔得佢死！

身在輻中不知輻

是但台好！是但台有種！

平時我好少讚是但台，不過今次真係要讚吓佢地。香港傳媒一向俾我嘅印象係誇張失實、譁眾取寵，為咗銷量（或收視）就乜都做得出，甚至不惜同惡勢力同流合污。今次是但台真係抵讚，竟然冒住垮台嘅風險，同三大惡勢力對抗！我係指今晚播出嘅「新聞透視」，主題係「輻射恐慌」。

大家都知，自從福島發生核洩漏事件，連香港都人心惶惶，唔敢食日本不特止，仲發生埋極其戇居嘅「盲搶鹽」事件添。環保團體當然唔會錯過呢個大好機會，有咁大做到咁大，發起一連串反核示威。佢地不斷宣傳核輻射有幾危險，仲用埋切爾諾貝爾附近出生嘅畸形兒童相嚟嚇人，製造輿論迫政府關閉核電廠。究竟日本核洩漏事件嘅影響，係咪真係好似佢地講得咁嚴重呢？

今集「新聞透視」就咗幾位專家，用專業角度去分析呢個題目。我記性比較差，一睇完個節目已經有好多細節唔記得咗，不過大致上都明白佢地講乜。其實輻射並唔唔係聽起嚟咁恐怖，因為我地日日都會接觸到，根本就係無處不在。而由日本輸入嘅食品都經過檢測，輻射量屬於正常水平，唔會對人體健康構成威脅。至於喺切爾諾貝爾附近出生嘅畸形嬰兒，亦冇足夠證據顯示係核輻射造成，因為嘅畸形嬰兒度度都有，而喺當地出現嘅比率都只係屬於正常水平。

根據節目內容，香港人嘅過敏反應似乎係有杞人憂天。節目冇講明係乜（或邊個）導致今次嘅恐慌，不過就提供咗一好有趣嘅資料。專家做過研究，列出究竟一般人最容易受乜其他人影響。原來最具影響力嘅係親人，環保團體亦都喺前列，排名眾高過專家，而政府就差唔多最冇影響力。哈哈，唔怪得政府話驗過日本冇問題，但係就冇人信啦！

我當然知道電視台點解唔可以講得太明白，因為有惡勢力係唔可以得罪嘅。不過我就唔同嘞，我又唔係靠個blog食，就算得罪晒全人類又如何？引起呢次嘅恐慌，首先係環保團體喺度無限作大，跟住傳媒就加鹽加醋，而市民又唔用自己個腦諗吓，乜都照單全收。如果電視台敢話係人自己無知，睇怕聽朝連電視城都會俾人夷為平地！

雖然個節目睇得好過癮，不過始終係政治不正確，都唔知點解會出得街！

對唔住，係我錯！

致一眾獻身香港民主大業嘅熱血80後：

今日我要喺呢度向你地鄭重道歉！對唔住，係我錯！係我老到懵咗，竟然唔識得欣賞你地救黎民於水火嘅高尚情操！係我無知，連西方民主係乜都唔知就對你地作出唔合理嘅批評！直至近日希臘頻臨爆煲，我先領會到西方民主嘅優越性，先知道原來一直誤解咗你地！

希臘係西方民主發源地，雖然我都去過，但係居然冇留意到，原來佢地嘅民主方式真係有好多值得香港借鏡嘅地方。如果我唔係咁後知後覺，就唔會一直咁唔認同你地嘅行為。

好似喺捍衛天星、皇后、同菜園村呢幾單，你地話唔要經濟發展。當時係我無知，竟然唔認同你地嘅睇法，仲話如果香港經濟冇發展，你地班食失米聽食西北風啦。而家諗番上嚟，真係覺得好慚愧！睇番人地希臘，經濟差到無倫，但係社會福利就好到我地香港人完全想像唔到。原來喺有真正民主嘅地方，就算經濟唔掂，人民都一樣可以大魚大肉架！呢樣就要歸功於民主選舉制度，人民有權選擇為佢地謀福利嘅政客，總之邊個最疏爽就揀邊個！

至於你地嘅抗爭方式，例如瞓街、圍堵垃圾會、狙擊政府官員等等，我以前覺得係少數人擾亂社會秩序嘅過激行為。但係對比吓希臘嗰邊，個無良政府一話要削減福利，就即刻全民上街，嗰種自發性嘅民主意識同團結精神真係令人佩服到五體投地！見到希臘人喺條街打砸搶燒，直頭好玩過巴西嘉年華。最難得嘅係全民參與，唔會有人覺得唔開心。我到而家先明白，以前覺得你地嘅行為有問題，完全係因為自己嘅民主意識太薄弱！

仲有，你地竭力為港人爭取福利，我竟然唔識欣賞，真係唔好意思！我係怕福利過度膨脹，會搞到尾大不掉，最終令香港爆煲。不過睇番希臘嗰邊，原來爆煲都唔會有問題，根本唔使削減國民福利，因為大把人會出手打救。至於我地，情況都會差唔多。如果香港有難，阿爺肯定唔會坐視不理，原來我嘅憂慮都只係杞人憂天啫！

不過咁，如果香港真係有爆煲嘅一日，要阿爺出手打救，我反而最擔心你地。我明白你地個個都好有骨氣，直頭同伯夷叔齊有得比，就算餓死都唔會食共產黨一粒米。其實幫人都有個限度，你地始終要為自己打算吓。如果搞到你地要餓死，又叫全港市民點過意得去呢？我建議你地都係快移民去希臘，嗰度海闊天空，連空氣都充滿民主自由，真係最啱你地架喇！對於你地嘅無私奉獻，我相信全港市民都會銘記於心，你地就安心去啦！

生不逢地

早幾日凸首放風話要復建居屋，好多業主即刻俾佢嚇到三魂唔見七魄。咁又難怪嘅，當年成街負資產，相信大家都記憶猶新。仲有好多人走投無路，搞到要燒炭添。唉，只可以嘆一句生不逢時啦！不過咁，如果香港嘅法制可以好似美國咁照顧公民權益，相信人都唔使行到呢一步。

點解？咁又要講吓故仔嘞。話說喺遙遠嘅民主聖地美國，有個女人喺老麥買咗杯熱咖啡，但係佢冇即刻飲，而係攞咗上車。喺行緊嘅車上面，佢將杯咖啡夾喺兩腿中間，結果當然係有正常智力嘅人都估到啦，杯咖啡倒瀉咗，而佢雙玉腿亦都淥傷咗。如果係你，你會點做呢？覺得係自己唔小心所以算數？咁你就傻仔喇！

個女人不愧為美國公民，知道民主社會嘅公民權益，佢決定告到老麥甩褲！單畸屎嘅判法絕對體現咗美國嘅人權同民主精神，完全唔係我呢冇受過西方民主薰陶嘅香港人可以理解。法官認為老麥嘅咖啡喺製造上存在缺陷（太熱），結果判老麥要賠償折合幾百萬港幣俾個女人。

如果香港嘅法制好似美國咁保障公民權益就一天都光晒啦。負資產只要走去老麥買杯熱咖啡，然後向住自己兜頭淋（照估應該嚴重過淥傷大髀），隨時賠過千萬都有份。真係包保百發百中，因為官根本唔會理究竟單係點發生。有咗咁大筆橫財，唔止唔使燒炭，隨時還完債仲夠錢掃多兩件跳樓貨，揸到今日仲唔發過豬頭？！

哈哈，突然諗起一單本地新聞。話說有個男人唔知發乜神經，無啦啦攞把較剪去後樓梯剪咗自己條啫，送院途中見到傳媒影相仲識得豎起手指公對住記者笑添。條友發乜神經就唔好研究啦，不過如果單係喺美國發生，佢就發喇。佢直頭可以告較剪嘅生產商，要求巨額賠償。有乜理由把較剪會利到連條啫都剪得斷，咁實在太危險喇，絕對係有缺陷嘅產品。冇咗條啫咁大件事，賠償一定好甘，真係打跛腳下半世都唔使憂啦。唉，可惜呢度唔係美國，唯有嘆一聲生不逢地！

當然啦，生於香港我地冇得揀，不過國籍就可以自己選擇，好在香港而家仲有出境自由。奉勸嗰唔想做中國人嘅朋友，香港真係唔啱你架，唔止冇民主、法制唔健全、而且自己做咗傻事又冇得賠，美國先至最啱你！你今日移咗民未呀？

三棍合一

頂佢個心肝脾肺腎，嗰個三棍合一嘅政黨又走出嚟抽水喇！究竟係邊三棍？之唔係政棍、狀棍、同搞屎棍囉！

引述成報報導：「另外，公Ｘ黨建議把置安心計劃的單位轉為居屋，以及把北角邨、何文田山谷道、黃竹坑邨的地皮，把一半面積撥作興建居屋，預計可提供11,400單位，最快可以在2014年推出當中6,800多個，而綠白表申請比例應該訂為四比六。」

早兩日凸首放風話要復建居屋，狀棍幫就慌死蝕底，即刻走出嚟向佢地班選民獻媚，建議喺幾塊最優質嘅地皮攞一半出嚟起居屋。睇番呢個政黨一向嘅所作所為，佢地嘅目標選民應該係綜援人士，或者係嗰仲未畢業就已經計劃定買樓結婚嘅後生仔。真係唔明白，喺呢地皮起居屋，價錢都唔係上述人士可以負擔架啦。除非起好嘅時候，香港嘅樓價已經跌咗超過五成。不過世事嘅好難講，可能幾年之後，政棍搞到冇好搞，仲會關注埋綜援人士嘅置業需要添。

我一向唔贊成起居屋，資源用嚟起多公屋好過啦。樓係一種商品，具有投資價值，究竟點解要用公帑資助人買呢？公屋租平，已經俾咗人一個可以儲錢嘅環境，如果想改善生活，就努力做啦。不過咁，雖然我唔贊成，亦都唔係強烈反對。我最反對嘅係攞地王嚟起居屋！

眾所周知，賣地係政府嘅主要收入來源，錢係入咗庫房，不過最後都係會投放番喺民生福利或者基建上面。用靚地起居屋，只不過係資助少數人住另類樓王。相反，如果將賣地嘅錢用嚟做其他，受惠嘅人肯定多好多倍！

講到居屋樓王，又令我諗起紅灣半島，即係後來變身成為海景豪宅海Ｘ南岸嗰個居屋。用嗰塊臨海地王起居屋，直頭係荒謬到無倫。當時有好多人（其中包括好多所謂有識之士添）提出一個疑問：點解冇錢就唔可以住海景樓？其實我都想問：點解你兩萬蚊可以有無敵海景，反而我三萬蚊就只得無敵樓景呢？正如我前面提過，喺嗰塊地起居屋根本就係資源錯配。另一方面，亦違反咗多勞多得嘅香港精神。

後來香港樓市崩潰，政府將紅灣半島賣咗俾地產商。大家都知，地產商根本就唔係想要嗰幾棟樓，而係想拆咗嚟起豪宅。我係完全樂觀其成，因為咁先係撥亂反正。其實單同我一利益關係都冇，莫講話拆咗起過嘅豪宅我諗都唔敢諗，就算係後來化完妝，變咗身做海Ｘ南岸我都買唔起。

雖然買唔起，不過海Ｘ南岸嘅示範單位我又真係走去睇過喎。睇完之後，我嘅評語只有四個字：暴殄天物！示範單位喺高層位置，對正無敵維港煙花海景，本來真係正到無倫。不過窗又細又高，坐喺度根本就睇唔到個海。當然啦，如果你有姚明咁高就另當別論。如果想享受吓個無敵海景就一定要企高，你話係咪好荒謬？！咁唔係暴殄天物係乜？！

後來樓市有起色，班扮民議員唔抵得地產商賺大錢，就以環保為理由阻止拆卸，所以先有而家嘅海Ｘ南岸。就係由嗰時開始，我就再冇投票俾嗰班一時一樣、雙重標準、三刀兩面嘅扮民議員嘞。班友成日講合約精神，到人地根據合約真係可以拆嘞，又搬環保出嚟搞事。如果班友真係咁注重環保，我又想問一個問題，唔知佢地有冇呼吸嘅呢？班友日日製造咁多二氧化碳，加速地球暖化，佢地夠應該做番啦，例如從今以後停止呼吸！

而家狀棍黨又出嚟搞事，想整多幾個翻版紅灣半島，真係唔知佢地想搞到香港變成乜世界！呢咁嘅棍，絕對一存在價值都冇，直頭連地拖棍都不如！哈哈，攞地拖棍嚟同班友比較，真係有侮辱咗對人類有貢獻嘅地拖棍喎，我要向無辜嘅地拖棍致歉！

剝光豬

琴日某八卦周刊有料到，封面標題雞乸咁大隻字寫住「ABC剝光豬等愛，XYZ趕收工撲火」，仲登咗幾張裸男相添。唔使睇都知，當然又係狗仔隊嘅傑作啦。呢本平時好少睇，不過見佢今期咁激，就即刻買咗本。

話說狗仔隊偷影到某小生喺租住火炭豪宅單位裏面嘅家居活動，仲有同某姐仔喺屋企嘅激吻相。原來小生喺屋企鍾意剝光豬走嚟走去，實行回歸大自然。

可能好多人會覺得小生有問題，喺屋企剝光豬咪益晒隔籬左右鄰居？抑或佢根本就有暴露狂？如果咁諗就錯嘞，因為喺正常情況下係唔會有人睇到嘅。小生租住嘅豪宅係嗰屏風樓，各座一字排開，唔會有樓望樓嘅情況。而其他屋苑住宅，最近嘅都距離幾百呎，正常情況下係唔會睇到單位裏面發生嘅。當然啦，正常情況係指用肉眼，如過用睇雀、甚至觀星嘅望遠鏡就另當別論。哈哈，估唔到喺火炭又真係有雀睇喎！

呢本周刊冇幾耐之前先偷影過另一對藝人情侶嘅閨房樂，而家咁快又有新料，佢地嘅狗仔隊真係效率驚人。除咗效率高，佢地嘅耐性都令人佩服。小生相係分開唔同日子影嘅，即係話班狗仔隊已經咗好耐，付出咗好多，咁嘅專業精神真係好難得。

狗仔隊交到功課，讀者又有睇，當然係皆大歡喜啦。不過又有冇人會諗下當事人同附近單位住客嘅感受呢？當事人都算嘞，始終成名係要付出代價。附近單位嘅住客先最無辜，佢地嘅閨房私生活隨時已經俾人順便埋。諗諗吓，住唔起豪宅都未嘗唔係好事，起碼冇明星鄰居，唔會無啦啦俾人埋。

講開又講，而家傳媒真係夠惡，鍾意影乜就影乜，鍾意寫乜就寫乜。如果有人質疑佢地嘅做法，就係妨礙新聞自由，剝奪公眾知情權。尤其是記協嗰隻肥豬乸，副嘴臉真係好Q乞人憎，次次喺電視見到佢都令人無名火起，想兜巴車埋去！總之所有記者（當然啦，愛國報紙嗰除外）都係神性不可侵犯，批評親都係死罪！

而家個社會就係咁，所有公認嘅核心價值都俾人無限放大，凌駕一切。講真，明星名人喺屋企做乜關人叉事咩，公眾又有乜知情權呢？用新聞自由做擋箭牌，將人地嘅私生活公諸於世，又算係乜傳媒操守呢？唔知肥豬乸又會唔會講吓佢嘅睇法呢？

當然，班友可以話佢地只係順應市場，如果冇人想睇呢，佢地就根本唔會做。無可否認，有咁嘅讀者就有咁嘅傳媒，但係呢個絕對唔係將侵犯他人私隱合理化嘅藉口。私煙夠大把市場啦，唔通友又可以大聲話私煙無罪咩？

點都好啦，有一樣我始終唔知道，究竟係有鍾意揭人私隱嘅傳媒先，定係有鍾意八人私隱嘅讀者先。呢個問題就好似問有雞先定係有蛋先咁，永遠唔會有答案。不過有一樣我可以肯定，呢個係惡性循環！

有病

呢排搞緊大鑊，忙到連blog都唔得閒寫。其實最大鑊嗰部分都仲未開始，直頭諗起都煩！不過睇完前晚嗰集「星期日檔案」，真係有不吐不快，就算點忙都要講兩句。

嗰集嘅主題係「港產內地B」，本來都冇乜好講。大量內地孕婦嚟香港生仔，佔用本地醫療資源，其實都唔係今日先發生。而且同我冇乜關係，我一向都係抱住隔岸觀火嘅心態嚟睇。不過對於節目裏面其中一個個案，我就有想講嘞。

話說有個本地孕婦抱怨喺私家醫院完全唔到位，淨係得番公立醫院先有位，搞到佢唔知點算，直頭好似世界末日咁。佢話覺得喺私家醫院生會安全，呢樣我唔會同佢拗。如果人有條件去私家醫院生，當然係好事，不過香港嘅公共醫療其實已經相當唔錯。總之一句講晒，有錢就有得揀啦。

如果個女人只係擔心醫療質素嘅問題，我都仲可以理解。最頂唔順係佢話如果喺公立醫院生，張出世紙上面就會有公立醫院個名，而呢個標籤會影響阿仔嘅前途。聽完佢呢番說話，我嘅評語只得兩個字：有病！

如果喺邊間醫院出世都可以成為一個標籤，會影響到一個人嘅前途，咁嘅社會唔止有病，簡直係病入膏肓！當然啦，世事無絕對，有病嗰個可能係我自己！