兩單新聞

今日想講吓兩單唔算好新，而且大纜都扯唔埋嘅新聞。

第一單發生喺遙遠嘅沙地阿拉伯，係好普通嘅傷人事件。話說有條友同人打交，整到對方癱咗。咁濕碎嘅，本身冇乜好講，值得講嘅係判刑方面。法庭原本已經判咗個兇徒坐監，但係個受害人唔順氣，要求以伊斯蘭法「以眼還眼」嘅原則嚟處罰個兇徒。於是個法官就周圍問醫院，睇吓有冇辦法用外科手術整癱一個人，例如切斷脊柱神經。結果冇醫院敢制，但係單就揚咗，俾人權組織大肆評擊。

伊斯蘭法「以眼還眼」嘅原則好簡單易明，懲罰方式係針對犯人嘅罪行。例如整盲人隻眼，懲罰係挖眼。又例如偷，懲罰係斬手。除咗「以眼還眼」嘅方式，伊斯蘭法仲有好多嚴厲嘅罰則，喺現代人眼中簡直係匪夷所思。好似褻瀆伊斯蘭教同叛教都係死罪，通姦更要死於亂石之下添。唔好以為伊斯蘭社會淨係嚴於男女之防，其實男男之防都係咁，搞機一樣死得。

好明顯，以現代人權標準，伊斯蘭法嘅罰則係過於嚴厲。懲罰方式唔止殘忍，而且仲冇得返轉頭，就算發現錯判都冇得補救。死刑當然係啦，挖眼斬手一樣係。又因為「以眼還眼」實在太簡單直接，亦都間接令到任用私刑嘅情況好普遍。不過呢始終係人地嘅事，而且又好遙遠吓，唯有冷眼旁觀啦。

跟住講單冇咁遙遠嘅，相信好多人都仲會記得。話說有個安老院嘅護理員，因為不滿患老人痴呆嘅阿婆成日失禁，竟然餵阿婆食C。單因為有安老院嘅員工睇唔過眼而揚咗，結果個護理員俾人判咗幾個月監。法官仲話佢無良缺德，必遭天譴添。不過佢家人就覺得判刑太重。

呢個護理員唔止無良，仲非常不負責任。喺得安老院做，都預咗要處理失禁架啦。如果老人家個個都有自理能力，仲使鬼入安老院咩，到時佢聽乞米都得啦。佢對一個唔識自保，而且冇表達能力嘅阿婆下咁嘅毒手，直頭係無恥到無倫。怕惡係人之常情，冇得話啱唔啱。不過欺善就唔同，可以話係引致社會各種不平現象嘅主因，絕對神憎鬼厭。

個護理員家人嫌判刑太重？好簡單啫，不如參考吓伊斯蘭法，實行「以C還C」！