Bring that shit home?

帶舊屎返屋企？咪講笑啦！

哈哈，唔係講笑架，真係有人要咁做，仲喺網上贊助添。啱啱睇咗一個叫做「Bring Kelsey Mudd Home」嘅網頁，有條友就叫人捐錢幫佢打官司，等佢可以返歸。

咁呢個Kelsey係乜水？咪一督屎囉！Kelsey嘅譯音就已經係「攪屎」啦，而且條友仲係疴屎國籍添。不過最主要都係佢勁賤格，簡直臭過屎！條友飲醉酒，搶的士嚟揸，結果害死個的士司機，咁都已經夠衰啦。點知再賤都仲有，佢居然將責任推晒喺死者身上，話自己完全冇錯，扮晒無辜。

單案啱啱判咗，條友誤殺罪名成立，要坐四年幾監，計我話已經益咗佢啦。但係佢竟然喺個網頁度堅持自己係無辜嘅，話佢只係一個乘客，發生咗嘅完全唔關佢事，仲講到自己係香港司法不公嘅受害人添。真係俾佢笑死，唔通而家的士乘客有刑事括免權，喺車裏面殺人放火都唔使受罰？抑或係佢覺得自己係一隻高人一等嘅疴屎簋，殺咗個卑微嘅黃種人又有乜問題？

再睇吓條友嘅抗辯理據，直頭係笑死人冇命賠。佢死都唔肯認罪，法官話佢冇悔意，冇得減刑。佢嘅理由係乜都唔記得晒，根本冇可能認罪。飲大咗會失憶我都知，但係絕唔代表對做過嘅唔使負責。而且事發過程好多人睇到，連電視新聞都影埋，咁都仲有得抵賴。就算條友唔識諗，個律師都應該識啦。好明顯個律師同佢一樣，都係食S大嘅。佢地仲將責任推喺死者身上，話個司機明知條友飲醉咗都要載佢，自己都要負責任。又話司機唔應該俾個醉酒佬單獨留喺架撻著咗嘅車裏面。咁嘅理據，即係話女人明知條街有色魔都仲要出街，就算俾人姦咗都係自己攞嚟嘅。你地話係咪荒謬到無倫？

再睇返條友個網頁，除咗話自己無辜，就係叫人捐錢，對事發經過一都冇提。完全唔明有乜人會捐錢俾佢，如果錢真係用嚟打官司，絕對同掉落鹹水海冇分別，只係益咗廢柴律師。講開個網頁，最離奇嘅都唔係呢，而係條友張相。佢只得23歲，但係睇張相就成個40幾歲嘅中坑咁樣，都唔知乜人種嚟架。唔得，要更正，係唔知乜物種先啱！

不過咁，條友想返歸都唔難，因為香港同疴屎國或者花旗國（佢有雙重國籍）都有移交被判刑人士協定，佢絕對有可能返祖家坐監。如果係返疴屎國就正啦，可以即刻成為國寶嘞。我唔係信口開河架，大家都聽過啦，疴屎三寶係：烏蠅肥婆醉酒佬。到時坐監都坐得特別有意義，因為可以為國爭光！

補充：
下面張相嗰舊真係浮金嚟架！

後記：
啱啱醒起個鬼字唔可以亂用，隨時會俾人告到甩褲！

咁教仔都得?!

早幾日喺Youtube睇到條標題叫做小器男嘅片，都幾搞笑吓。話說有個男人同兩個女搭地鐵，因為細路嘅毛公仔霸佔咗個座位而同一個阿婆發生爭執。個男人仲將過程拍低然後放上網，諗住聲討個阿婆。點知人算不如天算，個男人反而變成網民嘅圍毆對象，主要係話佢小器、唔敬老、同埋喺兩個女面前做埋咁嘅細教壞細路。其實不知幾多乜乜男乜乜女都試過拍放上網，結果就由原告變成被告。個男人竟然仲要以身試法，睇嚟佢唔止小器，仲好蠢吓添。

講到教壞細路，我都親身見識過。話說有一次由石家莊搭飛機返香港（當然係坐經濟艙啦），坐我後面係一個大約五六歲嘅𡃁仔，佢隔籬係個中年女人，應該係佢阿媽。佢地兩個都講普通話，我估係遊客或者新移民。個𡃁仔都不知幾活潑，由坐低開始就不停咁拍檯踢腳。佢拍一吓檯，我背脊就震一震，佢踢一吓腳，我個背脊又震一震，真係俾佢煩死。我都知細路唔懂事又貪玩，但係冇理由要我成程機都受咁嘅騷擾格，咁我咪擰轉頭同佢阿媽講囉。我當時講得好客氣，之前都提過啦，我連去7仔買都會講四聲唔該嘅。本來諗住咁簡單嘅開句聲就實掂架啦，點知事態發展竟然完全超乎我嘅想像。個女人同我講，話張檯係個𡃁仔嘅，佢鍾意點玩都得，呢個係佢嘅權利，我冇得過問！個𡃁仔知道我地講緊佢，就問個女人佢係咪做錯咗。個女人居然同佢講話佢冇做錯，叫佢繼續玩，仲話唔使理我添。我當時嘅第一反應係想兜巴星條八婆，不過好男不與女鬥，唯有嗗聲吞咗佢啦。其實呢禍國殃民嘅人，真係人人得而星之啦。話佢禍國殃民，絕對唔係無限上綱。佢咁教仔法，個𡃁仔第日實會好似佢咁，成為一個蠻不講理，自私自利嘅人。細路係國家嘅未來主人，佢地嘅品德係關乎整個民族嘅興衰。而家條八婆喺度荼毒我地國家嘅小主人翁，唔係禍國殃民係乜？！

另外一次又係搭飛機返香港（當然又係坐經濟艙啦），喺邊度返就唔記得嘞。一坐低就覺得背脊有異動，好有阿嬋feel，唔通航空公司換晒坐位做阿嬋按摩椅？不過諗吓，航空公司邊有咁好死，會咁益我地呢cheap cheap客啫。唔使再諗嘞，一定係後面有古怪，唔通後面真係有個阿嬋幫我做緊人肉按摩？擰轉頭一睇，原來唔係阿嬋，係一個十七八歲嘅𡃁妹。佢好似冇腰骨咁，坐到成個人墮晒落去，對膝頭就頂住我嘅椅背。頂都算嘞，佢仲要不停咁un吓un吓，原來阿嬋feel係咁樣嚟嘅。我又係好有禮貌咁同講，話佢頂到我好唔舒服。我諗大家都估到，個𡃁妹嘅回應又係激到人爆血管嗰隻。佢話唔知我舒唔舒服，不過佢就覺得好過癮嘞。真係俾佢吹到啤一聲！基於好男不與女鬥嘅原則，我又係嗗聲吞咗佢。同之前條八婆一樣，呢個𡃁妹都係蠻不講理，自私自利嘅人。好明顯，呢個係冇家教嘅結果。

睇返而家香港八九十後，好多都係極度自我中心，做從來唔會顧人地嘅感受，唔會理對其他人有乜影響。我相信呢係家庭教育失效嘅結果。事實上，而家好多父母都唔識點教仔，或者從來冇諗過要教。成日都喺新聞睇到，有人淨係顧住自己上大陸wet，連細路冇飯食都唔理，由得佢地自生自滅。有人就啱啱相反，過份愛錫仔女，佢地要乜都永冇say no。一係就過份保護，驚死仔女接觸吓出面嘅世界就會學壞。另外有就利益掛帥，教仔格言係千祈咪蝕底。

我一向都唔相信性善論或者性惡論，我只相信細路仔係一張白紙，張紙會變成點樣嘅圖畫，完全係睇大人喺上面畫乜。令人失望嘅係，好多人淨係識鬼畫符！

藍與黑

唔記得邊年，海關放寬咗烈酒入境限制。咁啱又去完旅行，一於冇蝕底，喺香港機場買咗兩枝藍牌。

之前冇買過藍牌，因為實在太貴。當然，就算免咗稅我都覺得好肉赤，記得好似係$12XX一枝，係黑牌嘅幾倍價錢。

平時飲開黑牌，多數加冰，有時都會淨飲。感覺上加冰好，不過淨飲都OK。至於藍牌，當然係唔會加冰啦。咁啱嗰排有朋友上嚟，兩枝藍牌飲咗三次就冇晒。

藍牌係咪好飲到值得貴黑牌幾倍，老實講，我就唔多覺嘞。感覺上係比黑牌好，不過亦可能只係心理上先入為主，覺得貴一定好。至於人地講嗰淡淡嘅煙燻味同埋細緻嘅口感，我就真係點都飲唔出。如果你話係黑牌同紅牌，我就可以飲得出有分別嘅。

其實威士忌我只係間中飲吓，都係買嚟上倉。飲得最多嘅係餐酒，一年會開過百枝紅白酒，當然都係平啦。食飯飲餐酒真係幾好架，煮得唔好食嘅會覺得好味，而平價酒又會覺得好飲，可以話相得益彰。至於乜係aroma、body、同texture，真係佢識我，我唔識佢。總之飲落覺得OK就得啦，唔明點解味覺咁基本嘅都有一大堆學問。

最佩服人玩blind tasting，就咁飲幾啖就可以講得出隻酒嘅葡萄、產地、同年份，直頭好似玩魔術咁。不過我又唔覺得玩到咁出神入化有乜實際作用，打個比喻，就算你識玩魔術，都唔會無啦啦喺屋企露兩手啫。

雖然我自己唔得，但係我都相信有人真係可以拆解到葡萄酒嘅複雜味道。不過有一樣我就點都想像唔到，就係鹹味都可以有唔同層次。人話喜馬拉雅山嘅粉紅色岩鹽同法國海鹽好正，味道有豐富層次，鹹都鹹得好有個性。以前黃X如仲有喺壹仔寫嘅時候就成日推介。係咪真係咁正我就唔知，我淨係知道嗰鹽貴到識飛啫。提起黃X如又順便講兩句，佢唔貴嗰樣都唔介紹，普通一個煲都要成幾千蚊。唔通真係用個幾千蚊嘅煲煮會好食？

味覺係一種原始感官，人對味道嘅喜惡本來就好簡單直接。味覺唔敏銳嘅人一樣會好享受佢地覺得好食嘅，滿足感同一嘴尖嘅人食到頂級貨色完全冇分別。咁無啦啦做乜要訓練自己去適應一套人地認為有品味嘅標準呢？

後記：
呢幾年喺免稅店都係買黑牌，藍牌就連價錢都費事問。我諗以後都唔會買架喇，除非發咗達，錢多到使唔晒啦！

我愛肥牛

今年驗身，總膽固醇係6.29，又爆燈嘞！舊年都冇爆得咁犀利，都唔知係唔係因為轉食咗隻超高脂嘅加拿大肥牛。

以前一直覺得食物一定係新鮮嘅好，所以牛肉都係喺街市買。我買開嘅係牛柳邊，已經算係比較好嘅部位，不過如果煮到熟透，一樣係好鞋吓。最近試過隻加拿大急凍牛肉，覺得正好多，之後就冇再喺街市買嘞。

呢隻急凍牛肉價錢好合理，只係比新鮮牛柳邊貴少少，不過下欄就比較多。一舊買返嚟大約係2kg，但係切走咗表面嘅肥膏就得返八折。雖然話切得走嘅肥膏都切走晒，不過仍然係勁高脂，因為舊肉裏面都布滿雲石紋嘅油花。唔健康我都知，不過嗰種滿口油香嘅感覺真係好正。呢隻牛肉仲有一樣好，就係煮到熟透都唔會韌。

因為油香味實在太濃，攞嚟蒸其實唔係咁適合，最好係炒或者整串燒。今晚就整咗個XO醬蘑菇珍珠筍炒牛肉，味道好濃，配紅酒啱晒。

可能有人會覺得我好無聊，咁嘅普通料都講得一餐。鬼唔知和牛正好多咩，不過要食得起先得架！做任何都要量力而為，所謂知足常樂，勉強冇幸福！

叛鴿風雲

話說白鴿黨有班改革派，其中包括幾個現任區議員，自己成立咗個叫做新民鼠同盟嘅政團。佢地事先冇知會過白鴿黨，結果搞到全世界都知，但係有黨高層竟然唔知。

據嗰班叛鴿講，佢地係不滿白鴿黨喺政改一役臨陣轉軚，失信於民，希望透過另一平台推動香港民主發展。佢地又認為有唔同意見係好正常，表明唔會退黨，出年區議會選舉仍然會以白鴿黨名義參選。至於白鴿黨高層，就表示黨內一向都有唔同聲音，唔擔心會造成分裂。只要班叛鴿冇做違反黨紀嘅，亦都唔會要求佢地退黨。

單真係好搞笑，我到而家先知道原來扮民中人係咁包容異見嘅。我一向仲以為求同存異只係建制派嘅專利，而黨同伐異至係扮民嘅真理。我就覺得班叛鴿相當無恥嘞，一方面標榜自己唔會同流合污，而另一方面又擔心自己個政團唔夠知名度，賴死唔肯退黨。好明顯佢地嘅理念同白鴿黨嘅主流路線已經有好大出入，所謂道不同不相為謀，佢地退黨反而唔會俾人覺得係叛徒。其實佢地都自動露咗餡，被問及點解唔退黨嘅時候，佢地竟然話而家退黨已經起唔到乜衝激作用。真係進退失據，愚不可及。如果好似X家富咁一早退黨，起碼都可以贏到激進fan屎嘅掌聲。既然已經錯失咗出位嘅時機，而家就唔好搞咁多小動作啦。

至於白鴿黨方面嘅回應，可謂冇厘新意。個個高層夾晒口供，話唔擔心會造成黨內分裂。反而平時唔覺佢牙尖嘴利嘅俊男主席就表現最突出。佢否認雙方存在好大分歧，如果唔係班叛鴿都唔會繼續留低，仲話班友先至需要向公眾解析清楚佢地嘅立場。好一招俊男推車，輕輕巧巧咁將督推返俾班叛鴿，絕對係四兩撥千斤嘅最佳示範。原來佢太極咁掂嘅，真係估佢唔到。都係大長老華叔最坦白，直斥班叛鴿冇政治道德。佢話如果唔順超就應該退黨，而唔係留喺度搞破壞。華叔講得好啱，佢始終係值得敬重嘅！

講到政治道德，我又笑咗出嚟嘞。係人都知，政治係世界上兩種最污穢嘅之一，根本冇道德可言。政治講求嘅係利益，而道德、公義、真理呢只不過係政客用嚟掩飾真相嘅煙幕。大家冇聽過咩？政客靠得住，豬乸都會上樹！

華叔，政治呢家真係唔適合你架！

同場加映：「鬼打鬼」
琴日喺報紙睇到，癲狗幫拉大隊去帘記投訴土皇帝以權謀私。哈哈，鬼打鬼，最好睇！如果打到兩敗俱亡就perfect嘞！

補充：
上文提到政治係世界上兩種最污穢嘅之一，咁另外嗰樣又係乜嚟呢？哈哈，呢個問題係冇標準答案架。總之自由發揮，自己覺得係乜就係乜啦！

笨豬

Bungy jumping喺國內譯做蹦極，無論係意思或者讀音都譯得好貼切。不過我都係鍾意香港嘅譯法多，笨豬跳，真係既傳神又抵死！

據聞笨豬跳嘅發源地係一個位於南太平洋嘅小島，嗰度男人為咗展示自己嘅勇氣，就用樹藤綁住對腳，然後喺高台跳落嚟。喺網上睇過有關圖片，真係覺得好牙煙。個高台由樹枝搭成，起得好簡陋，直頭係唔掂佢都隨時會自己冧嗰隻。樹藤冇乜彈性，而且表面又粗鞋，咁樣喺高台跳落嚟，就算跌唔死都刮到對腳甩晒皮啦。要證明自己夠勇敢都唔使攞條命嚟教飛啫，你話係咪笨？

我地玩到嘅笨豬跳當然安全好多，不過嘥幾舊水試吓跳樓嘅滋味，唔係笨豬係乜？笨豬我都做過兩次，都係喺紐西蘭，仲係同一地點，不過就隔咗兩年。其實有一次去十渡（北京附近）都見到有得玩，不過呢帶有危險性嘅，始終唔係咁有信心喺祖國玩。俾人鬧我唔愛國都係咁話架嘞，點都係自己條命仔緊要！

第一次玩笨豬跳嘅時候都考慮咗一陣，唔係因為驚，而係覺得有唔好意思。等緊玩嗰全部都係十零歲嘅𡃁仔𡃁妹，而自己就超晒齡，感覺上好似喺遊樂場同班細路一齊玩滑梯咁。點都好啦，冇理由一場去到唔玩啫。

跳嘅地方係一個峽谷上面嘅吊橋，跳台喺橋中央，下面係條河。跳台距離河面大約有十二三層樓咁高，望落去唔算太恐怖。不過如果跌落去都一樣死得，因為我唔識游水。但係感覺上點都好，起碼唔會爆頭或者甩手甩腳。

排緊隊等玩嘅時候已經諗定一套高難度嘅翻騰動作，諗住可以大展身手。點知喺跳台邊望落去嘅時候竟然有腳軟嘅感覺，原先諗好嘅動作完全做唔到出嚟，嗰時先知道原來跳樓真係要好大勇氣。

隔咗兩年再去紐西蘭，又心思思走去玩多次，希望可以將個動作做好。今次就唔搞咁多高難度嘞，諗住求其好似人地玩高台跳水咁，簡簡單單做個魚躍就算數。結果做出嚟都係似跳樓多過跳水，真係好失望。

總結兩次經驗，其實跳嗰刻唔係咁享受，跟住條橡筋彈吓彈吓嗰陣都幾過癮，不過要幾舊水玩一次就唔多值。要俾錢試吓跳樓自殺嘅感覺，諗落真係有少少笨豬。不過跳樓自殺都好喇，如過係俾人推落樓就仲笨豬。

話說第一次玩嘅時候，喺我前面係一個大約20歲嘅架仔。佢出到跳台邊但係又唔敢跳，死揸實台邊嘅欄杆唔放，無論個工作人員點樣遊說都冇用。如是者糾纏咗好耐，後面嗰就個個等到變晒化石。喺我正想一腳伸佢落去之際，個虎背熊腰嘅工作人員終於出手嘞。只見佢一招老漢推車，個架子就好似斷線紙鷂咁飛咗出去，跟住聽到谷底傳嚟一聲淒厲嘅慘叫。呢個架仔真係唔抵可憐，明知自己畏高就咪玩呢啦。就算出到跳台先發覺自己真係唔掂，都仲可以放棄，水就冇得回架喇，但係起碼唔使搞到咁瘀。

真係唔明架仔，殺人放火就面不改容，玩咁簡單嘅就搞到醜態百出。我都話架啦，蘿蔔頭真係一個怪雞民族！

抵制蘿蔔

又係新聞時間嘞。前兩日喺蘿蔔國福岡市發生咗單中蘿民間衝突，有十架載住幾百個中國遊客嘅旅遊巴俾一班右翼蘿蔔頭圍攻。事件擾攘咗二十分鐘，最後喺蘿蔔警察到場先和平結束，據報冇造成任何傷亡。

我唔知道嗰班中國遊客究竟係喺釣魚台撞船事件發生之前定之後報團。如果係事件發生之後報嘅，就算得罪都要講，佢地好冇腦！喺呢個風頭火勢嘅時候走去蘿蔔國玩，真係自取其辱！就算係事件發生之前報嘅，亦都應該顧吓自己嘅安全，考慮退團。

事後有個被圍嘅上海大學生覺得唔多高興，對記者話佢地只係單純去玩，根本就冇其他意思。哈哈，我都相信佢好單純。喺班右翼蘿蔔頭眼中，身為中國人而踏足蘿蔔國就已經係死罪啦。呢班友根本係出土文物，思維仲停留喺軍國主義年代，絕對係癲嘅！倒轉嚟睇，好多中國人都一樣憎死蘿蔔頭。好似我自己咁，夠想蘿蔔頭滅族啦，不過我唔會癲到付諸行動啫。仲有，而家國內反蘿情緒高漲，人人都話要抵制蘿蔔貨。班遊客呢個時候去蘿蔔國玩，就算出咗事都冇人可憐啦。事實上佢地已經喺網上俾人鬧到狗血淋頭，個個變晒賣國賊！

講到抵制蘿蔔貨，又真係令人好感慨。呢樣根本唔係新，由五四運動開始，已經講咗一百幾十年。但係有冇成效，大家有目共睹。有位網友講得好啱，佢話佢自己冇可能完全抵制蘿蔔貨，因為蘿蔔A片係無可代替嘅。但係咁又唔會益到蘿蔔頭喎，因為A片根本唔使買。

至於我自己，諗法基本上好接近。我贊成抵制蘿蔔貨，不過係用理性嘅方式。我買最緊要睇功能、品質、同埋價錢，如果有差唔多嘅選擇，我係唔會揀蘿蔔貨嘅，好似呢幾年就買多咗泡菜貨。死嘞，網民都係好憎泡菜國，唔知會唔會將我打成漢奸呢？

其實而家好多蘿蔔貨都唔係喺蘿蔔國製造，有仲係喺大陸造嘅添。但係蘿蔔貨（就算喺大陸造嘅都係）同國產貨點樣比較，相信大家都心裏有數。國產貨有時又真係好令人失望，風扇會著火，電視機會爆炸，都咪話唔得人驚！

唔知邊個古人話「修身、齊家、治國、平天下」，我絕對認同呢個自內而外嘅理念。又唔知邊個話「人必自侮而後人侮之」，呢句我都非常同意。要愛國，就要做好自己先。要做好自己，就要識自我檢討。要知道自己嘅不足之處，先至唔會俾人蝦，齋嗌口號係起唔到實質作用嘅！我都好想中國強大，唔單止喺軍事力量方面。仲要改善社會制度，更緊要嘅係提高國民質素。如果中國真正強大，蘿蔔都將佢變成魚肉啦！

有一樣我堅持咗好多年，亦都自信可以堅持到底，就係唔去蘿蔔國玩！我仲有好多地方未去過，而且有生之年都冇可能去得晒，唔去蘿蔔國真係一損失都冇！呢個係我對自己嘅承諾，我一定會永遠堅守！

想飛

唔知點解近排冇乜發夢，會唔會係老人痴呆症嘅先兆呢，有驚添。夢呢家真係好神奇，夢境有時感覺上仲真實過現實生活。整吓整吓，邊係夢境，邊係真實經歷，連自己都分唔清。人地話「日有所思，夜有所夢」，夢境會唔會真係反映咗一連自己都唔察覺嘅潛意識呢？

以前成日發夢，發得最多係俾鬼追同識飛，好多時更係因為俾鬼追所以先至飛。至於點解會成日俾鬼追，我自己就冇深入研究嘞。而飛就係由細細開始已經好嚮往嘅。

細個時好鍾意睇超人（鹹蛋超人）同小飛俠（阿童木），覺得識飛真係好正。不過好奇怪，我對美國嗰個超人又冇乜興趣喎。講開Superman，真係試過有細路披住張床單就由窗口飛咗落街。我當然冇咁傻仔，不過就證明咗好多細路都係好似我咁，好想飛。

飛嘅感覺係點，一直都好想試，好想搭吓飛機。不過嗰時屋企好窮，連荔園嘅低能飛機仔都冇機會玩。直到大學第三年嘅暑假，先有機會搭飛機。嗰次由廣州飛桂林，搭嘅係一架安24螺旋槳機。不過第一次飛嘅經歷，絕對係驚嚇多過興奮。首先，嗰種完全唔係我想像中飛嘅感覺。而且隻機全程震到想散咁，真係驚佢會飛飛吓跌落嚟。

出咗嚟做之後，間中會去吓旅行，搭過唔同嘅飛機。但係無論大型、中型、抑或小型飛機、甚至直升機，都唔係我想要嗰種飛嘅感覺。總之只要係坐喺機艙裏面就冇feel啦。試過有段時間成日要上大陸出差，直頭搞到好憎搭飛機添。

為咗追求嗰種飛嘅感覺，去親旅行都會留意吓有冇特別玩。試過坐熱氣球，感覺比飛機好，起碼真係覺得自己身處半空。不過熱汽球始終都係飄，而且飄得太慢，同飛爭好遠。

又試過玩要拋個身出去嘅。喺紐西蘭就玩過笨豬跳，唔算好好玩，感覺上似跳樓多。當然啦，跳樓我都冇試過，只係憑空想像啫。又試過喺黃金海岸玩過一隻叫做Flycoaster嘅，講得簡單，其實係一個超高嘅韆鞦。不過玩嘅時候唔係企喺度或者坐喺度，而係用一條V形嘅鋼纜吊住，身體同地面成平行。首先要將個人向後面扯，到高度接近支架頂部嘅時候就放開，個人就會蕩嚟蕩去，原理同打韆鞦一樣。呢隻都算幾好玩，相當刺激吓，真係有少少飛嘅感覺。不過蕩極都係一條弧形軌跡，俾條鋼纜限死咗，唔夠free。

講起free就一定要提吓skydiving嘞，freefalling嘅感覺真係好正吓。話就話係以高速下跌緊，不過感覺上就好似飄浮喺半空咁，非常過癮！雖然好玩，但係始終都唔似飛。而且事前準備工夫太多，跳嘅時候一陣就玩完，唔係好夠喉。跳一次要成二千幾蚊，都幾貴吓，不過包埋影相同video，都算係咁啦。

玩過最有飛翔feel嘅都算係滑翔降傘嘞，即係香蕉形嗰隻。開始嘅時候要喺懸崖衝出去，不過都唔算好驚，點都冇玩skydiving喺飛機跳出去嗰吓咁驚。飛咗出去之後就海闊天空，直頭free過carefree，正！原來滑翔降傘都好靈活吓，可以掟彎，可以打白鴿轉，仲可以爬升添，真係估佢唔到。雖然唔係親自控制，都絕對可以收貨。幾舊水玩十幾分鐘，都算物有所值。事隔兩年，再去紐西蘭嘅時候又玩多一次。不過個coach偷工減料，乜花式都唔玩，幾分鐘就落咗地，真係俾佢吹脹！

滑翔降傘雖然好正，不過都未係想像中最有飛翔feel嘅。最想玩嘅係滑翔風箏，但係一直都未有機會試。我個人好懶，見到有得玩就玩，見唔到就算，唔會特登走去。總之一切隨緣啦！