可樂飲死人？

新聞話有個年僅30就已經生咗8件嘅紐西蘭女人，喺屋企心臟病發失救，懷疑死因係同飲得太多可樂有關。專家喺死因研訊指出，飲得太多汽水或會引起低血鉀症，導致心律不正。另外可樂含有咖啡因，吸收得太多會中毒，亦可能係致命原因。而死者家人就話可樂公司要負上責任。

睇完呢單新聞，又一次證明我真係好冷血，因為我嘅即時反應係笑咗出嚟！係呀，我一啲都唔同情個女子架！咁飲法，唔死先奇啦！

有人話每日一罐可樂已經可能會對健康構成不良影響，個女子竟然長期日日飲10公升（相當於30罐），真係誇張到爆。莫講話可樂，就算只係清水，日日飲咁多都死得人啦！

點解飲過量可樂會唔健康，相信唔使講得太詳細。可樂含有酸性，會加速人體鈣質流失，可能會導致骨質疏鬆。高糖亦係健康大敵，除咗會致肥，仲會增加糖尿病嘅風險添。而且飲用大量液體，亦會令體內電解質流失，引致水中毒。

講番個女子，除咗每日勁飲可樂，其他生活習慣亦好唔健康。據報佢食好少嘢，不過煙就煲好多，一日成30枝。日日飲咁多可樂，照理早就變咗大肥婆。不過睇佢張相，竟然係面無四兩肉，一啲都唔肥。我就懷疑佢已經搞到自己生理機能失調，所以先會飲極都唔肥。所以出事都係必然架喇，只係遲早問題啫。

講開呢位奇女子，有一樣我最唔明。我飲水比較少（遠低於啲權威建議嘅每日8杯），但係每日就已經要去19幾次廁所。好似奇女子咁，每日飲10公升液體，究竟要去幾多次廁所先掂呢？如果生活只係循環不息嘅飲完就屙、屙完再飲，咁其實仲有冇人生樂趣呢？

Dattatreya Square, Bhaktapur, Nepal

那媽是爹

心邪嘅你梗以為我又喺度講粗口嘞。咁又唔怪得晒你嘅，香港人一聽到「那媽」或者「老母」，都唔知點解一定會聯想到啲衰嘢。其實「那媽是爹」係問候人嘅語句，好嘢嚟架！

雖然話係好嘢，不過邏輯上就好似講唔通囉。人人都知阿媽係女人，當然亦知阿爹係男人，咁「那媽」就冇可能「是爹」啦。話時話，「那媽是爹」又真係唔可以用中國人嘅邏輯嚟解釋喎，因為呢句係尼泊爾話「namaste」嘅譯音，係「你好」咁解。

復活節去咗尼泊爾行山，短短個零禮拜，呢句嘢都唔知講咗同聽咗幾多次。如果喺香港，真係十年加埋都唔會有咁多問候人同俾人問候嘅次數。

尼泊爾人相當友善，見到遊客有時都會主動打個招呼問候吓。呢樣嘢喺香港就唔可能發生嘞，如果喺猩肛大道同啲自由行講「你好」，人地一定會覺得你係黐線佬，再唔係就會以為你係拐子佬囉。

主動同遊客打招呼，相信香港人會覺得難以理解。不過更估佢唔到嘅都仲有，喺尼泊爾，互相問候得最多嘅竟然係遊客之間，尤其是喺山上。四月同十月係當地行山旺季，山上遊客多如過街老鼠。而且大部分山路都比較窄，有人上山又有人落山，好易會狹路相逢。當喺山上遇到對頭人，雖然三九唔識七，大家好多時都會用「那媽是爹」問候對方。呢樣肯定係尼泊爾獨有嘅旅遊文化，就算喺第啲地方都有咁嘅情況，遊客間互相問候都只係會講「蝦佬」，而唔係用「那媽是爹」。

事實上，以我幾十年嚟旅行所見，三九唔識七嘅遊客真係好少會互相問候。就算撞到同聲同氣嘅香港團都係咁話，打招呼就唔會嘞，爭位影相、爭位食飯搞到打交就有份。尤其是喺啲發達地區或者熱門旅遊地點，無論係當地人抑或遊客，都唔會俾到人友善嘅感覺。試想喺巴薩隆拿，如果有個陌生人無啦啦走埋嚟say hello，我實會覺得佢係有啲不軌意圖囉。反而喺啲比較偏遠落後嘅地方，遊客之間會表現得比較友善，有時都會互相打吓招呼。

其實唔使講到咁遠，就睇番我地生活緊嘅地方，人與人之間嘅關係都好疏離。好似我住緊嗰度，就算係同層鄰居，等嘅時候都係互相當透明，莫講話唔會打招呼，連眼神接觸都可免則免。都唔知點解，啲人硬係要去到啲山卡啦地方先會表現得比較友善。好似喺尼泊爾山區，嗰種感覺就相當唔錯。不過咁，去行幾日山就過癮啫，如過要喺嗰度長住就咪搞嘞。對於我嚟講，物質條件點都比風土人情緊要。市儈？我認架！

Syauli Bazar, Nepal

Banthanti, Nepal

Tikhedhunga, Nepal

死都死得衰過人

下晝就要飛，而家仲未執完嘢，真係踢晒腳呀！不過踢腳還踢腳，有單嘢就點都要鬧兩句先得。

琴日有個女人喺太古城玩跳樓，由三十幾樓飛落街，咁啱責正個路過嘅菲傭，結果雙雙去咗賣鹹鴨蛋。

我唔知，亦冇興趣知個女人點解要自殺。不過為求得到解脫，竟然害死個無辜路人，如果佢泉下有知，又會唔會安樂呢？死咗係咪一了百了我當然唔知，但係好似呢個女人咁自私，如果真係有afterworld嘅話，佢一定會落地獄囉，而且仲要日日受刀山油鑊之苦添！

唔知邊個話人死為大，死人點都唔鬧得，呢種講法真係好荒謬。唔通死就大晒，可以隨便揾人陪葬？咁嘅行為，根本就係冇特定目標嘅恐怖襲擊！

如果多幾個呢啲自私人，就連屋企樓下都會變成危險地帶，日日落街都要提心吊膽。今次唔好彩嘅係個菲傭，下次又唔知會輪到邊個，總之就人人有機會啦！

Rom, Norway