細豪志

釣魚台撞船事件發生咗咁耐，似乎仲未有平息嘅跡象。事件令中日兩國關係跌到落谷底，亦令國內反日情緒再度升溫。呢單成為近日熱門話題，傳媒日日煲，網民日日寫。本來都唔諗住講呢單，因為自己又唔係有乜真知灼見。不過最近有單新聞幾得意，寫吓都好。

話說日本派咗個特使去北京，希望修補中日關係。佢嘅主要任務係尋求溫總同日本首相奸直人喺亞歐首腦會議期間舉行會談。呢單本身冇乜特別，寫嚟都無謂。我想講嘅係個特使嘅名，條友叫做細豪志。

明明係兜細，但係又要有豪志，你都咪話唔搞。男人係咁都冇乜所謂，最多係食吓檸檬啫。不過如果一個國家係咁就大鑊嘞，隨時會自取滅亡。咁啱呢條友嘅祖國就係同佢個名一樣，都係國仔細細，野心大大。

係人都知日本地方細，天然資源貧乏，但係野心就大到無倫。本來要吞晒成個東亞已經唔係容易，架仔仲不自量力到搞埋美國佬，真係買棺材唔知定！食兩粒原子蛋絕對係咎由自取，當係買個教訓。不過架仔硬係死不悔改，而家又想侵佔東海資源。但係中國已經今時唔同往日，唔使再驚架仔，最衰又係美國佬喺度阻頭阻勢！

講起美國佬又係把幾火，除咗架仔之外，最憎嘅就係佢地。美國佬成日周圍蝦蝦霸霸都係其次，最嬲係點解當年嗰兩粒原子蛋唔係掟落東京！

老到懵咗？

你老到懵咗？呢句我地成日聽到，我自己就間中都會用嚟鬧吓老而不，好似李XX同陳XX之流。不過鬧人老到懵其實好惡毒吓，因為老人痴呆真係好慘，病情嚴重嘅簡直生不如死！

早幾日提到一個老人痴呆嘅阿婆因為失禁而俾個無良護理員餵食C，真係好得人驚。令人震驚嘅唔止係個護理員咁喪盡天良，更加係因為老人痴呆症嘅可怕。

呢個病會令人記憶力衰退，唔記得自己住喺邊，甚至連親人都唔認得。表達能力亦會受影響，嚴重起嚟仲會語無倫次添。最可怕嘅係會喪失自理能力，會大小便失禁，甚至連著件衫咁簡單嘅都做唔到。

好似上面提及嗰單，阿婆好明顯係冇自理能力同表達能力，結果就任人魚肉。我又會諗，呢個病會唔會影響埋人嘅感官同基本認知能力呢？會唔會根本分辨唔到C嘅味道呢？又抑或會唔會冇咗對臭味抗拒嘅本能呢？我冇做過查證，只係亂咁諗吓啫。

琴日又睇到新聞話因為藥費太貴，高錕校長停藥幾個月，結果導致病情惡化。睇完單新聞真係令人好唔安樂，高錕校長一個咁好嘅人，唉。我又諗，如果以高校長嘅家境都覺得藥費貴，好似我呢草根階層，如果得到呢個病都唔知點算好！

講開又真係好驚吓，我發覺自己近來好冇記性。買唔記得找錢，煮飯唔記得㩒掣，炒餸唔記得落糖，煲湯唔記得落蜜棗，連整我最拿手嘅XO醬都衰咗，居然唔記得落蝦乾。有一次去超市買仲經典，填送貨單嘅時候竟然諗唔起自己個地址！唔得，真係越諗越驚！

聽人講打麻雀可以預防老人痴呆，都唔知真定假。不過我已經連手指都斬埋，行唔通。哈哈，唔知寫多blog又有冇幫助呢？

後記：
上文提及嘅李XX同陳XX係兩條棍，至於係兩條乜棍就不便說明嘞。而相裏面嗰位老人家，只係旅行時影嘅，並唔係話佢有老人痴呆。

姿整男

早排睇咗集「星期二檔案」，主題叫做「人工型男」，講幾個「型男」點樣扮靚。睇完之後差想寫信去廣管局投訴，因為個標題有誤導成份。節目裏面講嗰幾條友，根本冇一個稱得上型男，叫做姿整男就差唔多！

其實男人貪靚好正常，有時姿整吓都無可厚非。扮靚亦唔應該有性別界限，男人化妝、做facial、甚至整容都冇問題。不過嗰幾個「型男」就真係好惡頂，連我咁冇所謂嘅人都接受唔到。

最難頂嘅係佢地個個都好女性化，講得難聽就係乸型。不過「乸型」有歧視成份，都係用返「女性化」好。無論係佢地講嘅腔調，抑或係小動作都好女性化，直頭比女人更女人。佢地講嘅時候扭扭擰擰，表情動作多多，真係要幾可愛得幾可愛。其中有一個仲大拋媚眼，勁放生電添。而另一個更犀利，連心態都十足十女人咁。佢話有一次俾人飛咗之後就走去整容，執靚個樣等個舊愛見到會後悔。男人根本唔會咁做，俾人飛咗就肯定係第一時間過件啦。只有女人先會咁執著個舊愛點睇。

另外一樣惡頂嘅係班友過度膨脹嘅自信心。明明執完之後都只係普通料，佢地就覺得自己係天姿國色，可以顛倒眾生。其中一個做模特兒嘅話，有一次做嘅時候化咗個妝好鬼死靚，塊面滑到好似豆腐花咁。結果佢做完就特登唔返屋企，喺條街度四圍蕩，盡情將塊豆腐花面晒俾路人睇。另外一個做市場推廣嘅就話佢嘅上司係女人，佢嘅上司嘅上司又係女人，連佢嘅上司嘅上司嘅上司都係女人。佢個靚樣就令佢得到上司嘅賞識，喺工作上比一個同期入職但係外型冇咁突出嘅男同事有優勢。唔係卦，莫非佢班女上司個個都係les嚟嘅？

最激都算係一個29歲嘅美容顧問，佢由22歲開始不斷整容，成塊面執過晒，絕對係整到阿媽都唔認得。佢唔肯公開易容前嘅相，話怕行出街會引起騷動喎。吓，騷動？有冇咁嚴重呀！

講起整容，其實我都好想整走對超級無敵大眼袋。不過我又唔敢試，一來怕阿媽唔認得，更怕會好似MJ咁，搞到塊面爛晒。真係諗起都嚇親，唔好搞我！

攞架嚟丟

四年一度嘅英聯邦運動會又嚟喇！今次輪到印度主辦，喺首都德里舉行。令人估唔到嘅係，個運動會都未開始就已經好戲連場。

首先，印度搞呢個運動會花費咗60億美元，超支十幾倍。咁嚴重嘅超支，唔知算唔算史無前例。如果係嘅話，就保證今屆運動會起碼可以產生一項世界紀錄。

運動員嘅安全問題亦都引起關注。早前就發生咗單槍擊事件，有兩個台灣記者受咗傷，據聞係激進回教組織所為。而且當地又爆發登革熱，令到有運動員以安全理由退出。

雖然個運動會搞得咁豪，但係就出現疑似豆腐渣工程。有個場館嘅天花竟然冧咗，而一條連接主場館嘅行人天橋亦都遭遇同樣命運。好彩係開幕前冧啫，唔係就死得人多喇。

距離開幕只得一個禮拜，但係選手村居然仲未搞掂。就算係起咗貨嗰，據選手講，根本就唔住得人。地方污糟唔在講，房裏面連蛇都有，張床仲離譜到一坐落去就冧咗。但係最估佢唔到嘅都係床單上面竟然有動物嘅腳印。你話有人嘅腳印都唔出奇，有動物嘅腳印就真係耐人尋味嘞。

不過最最最離奇嘅都唔係呢，而係一個印度官員。呢個商業和工業部長喺加拿大駁斥外界對印度嘅批評，話係誇張失實同不可接受。佢嘅理由係世界上冇任何建設係完美嘅。至於嗰運動員退出，佢唔認為同安全問題有關，而係運動員自己冇信心攞牌。佢仲警告貿易伙伴要尊重印度呢個新興經濟大國，如果唔係睇吓邊個蝕底。呢條友都算極品中嘅極品，佢嘅一番偉論絕對係由極度自卑演化成極度自大嘅完美示範。

印度呢個新興超級經濟大國本來想藉呢次英聯邦運動會顯示國力，威一次俾人睇。點知搞到千瘡百孔，變成國際大笑話。人要有自知之明，國家都係一樣。總之面係人地俾，架係自己丟！

咪住，印度貪污風氣盛行，豪花60億搞壇咁嘅，都唔知有幾多係俾人貪咗落袋。唔通呢個先係官員咁積極爭取主辦英聯邦運動會嘅主因？哈哈，呢個只係得啖笑嘅陰謀論，唔當得真架！

兩單新聞

今日想講吓兩單唔算好新，而且大纜都扯唔埋嘅新聞。

第一單發生喺遙遠嘅沙地阿拉伯，係好普通嘅傷人事件。話說有條友同人打交，整到對方癱咗。咁濕碎嘅，本身冇乜好講，值得講嘅係判刑方面。法庭原本已經判咗個兇徒坐監，但係個受害人唔順氣，要求以伊斯蘭法「以眼還眼」嘅原則嚟處罰個兇徒。於是個法官就周圍問醫院，睇吓有冇辦法用外科手術整癱一個人，例如切斷脊柱神經。結果冇醫院敢制，但係單就揚咗，俾人權組織大肆評擊。

伊斯蘭法「以眼還眼」嘅原則好簡單易明，懲罰方式係針對犯人嘅罪行。例如整盲人隻眼，懲罰係挖眼。又例如偷，懲罰係斬手。除咗「以眼還眼」嘅方式，伊斯蘭法仲有好多嚴厲嘅罰則，喺現代人眼中簡直係匪夷所思。好似褻瀆伊斯蘭教同叛教都係死罪，通姦更要死於亂石之下添。唔好以為伊斯蘭社會淨係嚴於男女之防，其實男男之防都係咁，搞機一樣死得。

好明顯，以現代人權標準，伊斯蘭法嘅罰則係過於嚴厲。懲罰方式唔止殘忍，而且仲冇得返轉頭，就算發現錯判都冇得補救。死刑當然係啦，挖眼斬手一樣係。又因為「以眼還眼」實在太簡單直接，亦都間接令到任用私刑嘅情況好普遍。不過呢始終係人地嘅事，而且又好遙遠吓，唯有冷眼旁觀啦。

跟住講單冇咁遙遠嘅，相信好多人都仲會記得。話說有個安老院嘅護理員，因為不滿患老人痴呆嘅阿婆成日失禁，竟然餵阿婆食C。單因為有安老院嘅員工睇唔過眼而揚咗，結果個護理員俾人判咗幾個月監。法官仲話佢無良缺德，必遭天譴添。不過佢家人就覺得判刑太重。

呢個護理員唔止無良，仲非常不負責任。喺得安老院做，都預咗要處理失禁架啦。如果老人家個個都有自理能力，仲使鬼入安老院咩，到時佢聽乞米都得啦。佢對一個唔識自保，而且冇表達能力嘅阿婆下咁嘅毒手，直頭係無恥到無倫。怕惡係人之常情，冇得話啱唔啱。不過欺善就唔同，可以話係引致社會各種不平現象嘅主因，絕對神憎鬼厭。

個護理員家人嫌判刑太重？好簡單啫，不如參考吓伊斯蘭法，實行「以C還C」！

月圓月半

天上月圓，人間月半，月月月圓逢月半！

今日咁啱就係月半，而且仲係一個好特別嘅月半，一年只係得一次。每年中秋都要睇吓個月光先安樂，不過只係望一眼就算。至於真正賞月，已經好多年冇咁嘅雅興。頭先落街過，雖然個月光有少少朦朧，都算可以收貨。天文台今次又報流料嘞！

細個嗰陣好鍾意過中秋，因為有燈籠玩同有月餅食。燈籠同月餅都當係寶，而家細路肯定覺得好白痴。佢地根本冇可能明白嗰時嘅物質條件有幾差。

嗰時燈籠款式好少，除咗最普通嘅風琴燈籠之外，就只係得楊桃燈、金魚燈、同白兔燈幾款。印象中好似冇乜玩過白兔燈，因為呢種燈籠製作最複雜，賣得最貴。講真，燈籠又唔係話好好玩。只不過如果喺屋企玩火，實俾阿媽打鑊甘，中秋節係唯一可以公然玩火嘅機會。仲記得嗰時有小惡人好鍾意蝦蝦霸霸，個燈籠俾佢地一撞就燒到渣都冇得剩。燒咗個燈籠真係好傷心架，因為阿媽一定唔會俾錢買過第二個。

講到月餅，嗰時款式仲少，來來去去得五仁鹹肉月同純正蓮蓉月。蛋黃蓮蓉月已經係極品，雙黃就諗都唔敢諗。至於三黃四黃，嗰時根本就冇呢。邊有而家咁多花款，又雪糕、又冰皮、又有機、又朱古力。嗰陣有月餅食已經好開心，點會好似而家細路咁，又呃又氹先肯食少少。

自從大個仔之後，已經唔覺得月餅好食。不過每年中秋節都會食少少，唔係為咗應節，而係要緬懷吓以前嘅艱苦歲月。

早幾日買咗盒奶皇月餅，頭先仲諗住開枝紅酒送月餅。點知打開個盒先發覺全部發晒霉，真係激死人！今年中秋冇月餅食，有失落添。

算啦，唔開心嘅唔好講咁多喇。喺呢度祝大家中秋快樂，闔府安康！

請對浪費資源說不！

請對魚翅說不！

呢句口號一都唔新鮮，聽都聽到厭，直頭已經到咗疲勞轟炸嘅地步。不過環保團體硬係樂此不疲，又攞呢句嚟炒作。

今日睇報紙，話有九個環保團體印咗近三萬張明信片周圍派，呼籲市民齊齊寄俾邱騰華，請佢向魚翅說不。明信片上面就係印咗呢句口號。據講明信片仲係用料上乘，印刷精美添。

都唔知呢班友個腦係咪用咗嚟養草，抑或係俾佢地自己坐住咗，仲叫人寄明信片。而家乜年代呀，要寄都寄email啦。炸爆邱生個mailbox，效果可能仲好添。我唔知印三萬張明信片要斬幾多樹，不過就好肯定係唔環保。真係難為嗰班環保大過天嘅人做得出！

班友上次猛鬧「起錨」宣傳品唔環保，但係今次自己又搞壇咁嘅出嚟，呢咪雙重標準囉。肯定上次佢地係借環保之名，對凸首進行政治打壓。

雙重標準呢家，真係令人心惡痛絕。不過偏偏嗰班自命正義嘅人就最叻呢家。同一樣，人地做就天地不容，自己做就天經地義。偽君子絕對討厭過真小人，起碼真小人衰都衰得光明磊落。

講到魚翅，我食唔食都冇所謂。魚翅本身冇厘味道，一定要靠個湯底，真係要個韭黃瑤柱羹實際好多。不過咁，如果有人請我食，我又唔拘嘅，因為始終都係貴嚟。我相信好多人都係好似我咁嘅諗法。如果想人食少翅，一定要知道人點諗，然後對症下藥做宣傳。寄明信片俾邱生有Q用咩！

講到尾，宣傳叫人唔好食翅我唔反對，但係要浪費大量樹木資源我就好反感！

題外話，頭先去7仔買，又係上次黑口黑面嗰個𡃁妹當值。佢今日都係一樣，嬲晒成村人咁。哈哈，咁就可以證實，佢嘅態度咁惡劣唔係因為佢有某唔方便啦。咪住，可能係佢個親戚賴死唔肯走喎。如果係咁，佢都幾慘啫！

有乜相似？

今日想問大家一個問題，究竟環保同民主有乜相似嘅地方？

以下係標準答案：
～都係好
～都係冇咗就會死得人
～都係重要性凌駕一切
～都係唔會自動喺天跌落嚟，一定要不惜代價爭取先有

以下係我嘅答案：
～都係兩個字嘅名詞
～都係虛無縹緲嘅概念
～都係唔同人會有唔同嘅理解
～都係聽起嚟冠冕堂皇，但係實行起嚟就烏煙瘴氣
～都係好似毒品咁，會上癮
～都係好似烈酒咁，會上腦
～都係成日俾人騎劫
～都係成日俾人強姦
～都係成日俾人掛起嘴邊，但係廬山真面目就冇人見過

咁你又點睇呢？

綠色反智

如果我問放煙花環唔環保，你地一定會覺得我好無聊，咁都仲使問。如果我話放煙花可以推動環保，你地更加會以為我黐咗線，應該搬去青山寫blog。

雖然我係黐黐地，但係都黐得好勻循吓，未去到羽毛鱗翅亂噏一通嘅地步。我只係想講吓今年嘅國慶煙花匯演有幾反智啫。

琴日睇到一單花邊新聞，話今年國慶煙花匯演有個「環保香港」環節，會用晒全綠色嘅煙花。唔通綠色煙花環保，污染物少？新聞冇講，我諗都唔會，如果係嘅話仲唔重點報導咩。咁你話用唔環保嘅嚟宣揚環保係咪好反智？

講到呢度，你地又唔好以為我係嗰環保鬥士喎。我唔係嗰環保大過天嘅人，如果一年放三幾次煙花，等人可以喺喜慶日子開心吓，我又覺得無傷大雅。當然，如果好似老鼠樂園咁日日放，又唔同講法喇。不過我份人好實際吓，如果唔俾佢地放，我又會反對喎，因為會打爛好多人嘅飯碗。

講返綠色煙花，都唔知起到乜環保宣傳作用。對於熱愛環保嘅人，唔環保就係唔環保，理得你係乜色啫。對於一般市民，煙花就係煙花，最緊要好睇，又理得你係乜色啫。如果有人被誤導，以為綠色煙花係環保，咁就仲該煨。呢條咁嘅絕橋，都唔知係邊高人喺食飽飯後嘅漫長等待過程中諗出嚟架！

我好鍾意綠色，可嘆呢隻色成日俾人濫用。人乜都用綠色，根本都唔考慮事物嘅本質，以為個個見到綠色就會覺得係環保，係好。呢度係香港嚟架，你估係台灣咩，人見到綠色就癲晒咁。阿扁總統明明係貪到出晒面，簡直係如取如攜，但係鄉親父老都係咁愛戴佢，當佢神咁拜。

講起台灣，真係令人失笑。其實放眼世界，呢咁嘅荒謬直頭係數之不盡。美國佬周圍打人，原來係為咗維護世界和平。日本仔發動太平洋戰爭，原來係為咗大東亞共榮。泰國軍人搞政變，原來係為咗捍衛民主。冷血槍手門多薩令到菲律賓顏面盡失，都仲配得起枝國旗。真係要幾荒謬有幾荒謬！但係你咪理，人地國民又受喎，你吹咩！

其實使乜講到咁遠，就睇返香港，一樣係荒謬到無倫。一班政棍，口口聲聲話要爭取民主法治，不過用嘅都係獨裁霸道，無法無天嘅手法。乜都有佢講冇人講，有反對聲音就用言語暴力，甚至肢體暴力打壓。仲不時搞所謂公民抗命，簡直視法紀如無物。你又咪理，嗰班友都唔知幾多fan屎。

講咗一大堆唔啦更嘅，都係為咗證明一點：呢個係反智嘅世界！咁用一反智嘅手法嚟宣揚環保可能真係有效喎。套用中國傳統智慧，呢招叫以毒攻毒。諗吓諗吓，其實百佳個綠色背心袋絕對係有助推動環保架，應該豁免徵費，等多人用。哈哈，滿城盡挽綠膠袋之日，就係環保大業有成之時！

大殺傷力武器

首先聲明，本文絕無歧視女性或中年女性之意圖，所針對者只限於文中提及之某不知名阿嬸及另一知名阿嬸！

琴日有位網友講開俾人屈激氣，絕對感同身受。其實俾人屈係家常便飯，有時都唔嬲得咁多。但係有一次俾人屈就真係好激氣，雖然事隔多年，到而家諗返起都仲係好嬲，因為係關乎一個男人嘅清白。居然有個阿嬸屈我非禮佢！

話說好多年前（當時廿幾歲），有晚收工後如常咁搭火車返屋企，點知就出事嘞。架火車就快到站，人已經企晒喺門口等落車。雖然嗰晚唔係好多人搭火車，但係近門口嘅位置都幾迫吓，我就同前面嘅人保持住一呎唔夠嘅距離。忽然發覺有人想從後斜斜地咁攝入我前面個位，我望吓，原來係個阿嬸。再睇真，估佢都應該有五十幾年歷史，而且係自從出廠之後都冇保養過嗰隻。見佢著得幾斯文吓，睇嚟係個超齡OL。

想攝我個位？真係發夢冇咁早！我即刻向前移動少少，將個位收窄到得返幾吋，睇佢仲有冇得攝。有人可能會覺得，俾人攝個位有幾蝕底啫。其實呢個唔係有幾蝕底嘅問題，呢個係原則嘅問題。我唔鍾意人著數，亦都唔喜歡俾人佔便宜。呢個係我嘅原則，就係咁簡單！

火車停定，車門打開咗，令人意想唔到嘅事亦都發生。阿嬸居然強攻，得返幾吋嘅位都要硬攝入嚟！莫講話我根本冇意思讓佢，就算有都嚟唔切啦，結果佢個膊頭就撞咗埋我度。其實同呢個阿嬸有身體接觸已經覺得好嘔心，仲諗住返到屋企要即刻用1比99漂白水沖涼。點知一落咗車，阿嬸就當眾大鬧，話我非禮佢！雖然當時佢用嘅唔係「非禮」呢兩個字，佢係用「博懵」，聽起嚟好似冇咁嚴重，其實意思係一樣。結果搞到個個望住晒，好似睇馬騮戲咁，而家諗起都仲覺得瘀到爆。阿嬸一路行一路鬧，來來去去都係「鹹濕仔」、「博懵」、「無恥」呢幾句，冇厘新意。我當然唔會示弱，就用「八婆」、「你貴庚呀」、「你照吓鏡啦」、「我要博懞都個好嘅啦」呢幾句回敬。講真，其實都係新意欠奉，個個男人遇到呢情況都會咁講。不過當時真係好嬲，根本就發揮唔到任何創意。就係咁一路行一路對罵，直到出咗閘，場鬧劇先至結束。真係完全唔明白呢個阿嬸，搞場咁嘅馬騮戲出嚟，佢自己唔覺得尷尬嘅咩？

俾人屈非禮當然嬲，而俾一個雖無過犯面目可憎嘅阿嬸屈就仲嬲。我當年雖然講唔上玉樹臨風，但係起碼五官無缺、四肢齊全，使非禮一個咁樣質素嘅阿嬸？簡直係天大嘅侮辱！仲有，阿嬸鬧我係鹹濕仔，絕對係更大嘅侮辱！嗰時廿幾歲，點都算係一個佬啦。一個男人俾人話係鹹濕佬，真係冇乜所謂，但係鹹濕仔就唔同嘞。鹹濕仔會令人想起嗰未經人道但係又發女人寒嘅宅男，佢地叫X又唔夠膽，淨係喺火車地鐵趁人迫揩吓女人油，就已經興奮到有高潮。俾人叫鹹濕仔，你話嬲唔嬲？！

事後諗返，當時冇堅持要個阿嬸報警真係好失策。如果報咗警，還我清白，就唔使嬲到今日啦。不過都係諗吓啫，佢根本冇可能敢報警。

忽然諗起另外一個阿嬸，佢都係有鋪咁嘅癮，鍾意屈人非禮。不過佢就出名好多，因為夠騎呢，我次次喺電視見到佢都搞到噴晒飯。呢個阿嬸屈人非禮屈出癮，直頭係樂此不疲，其中一個「受害人」仲係同樣以騎呢見稱嘅臘鴨會議員添。真係天下之大，奇人異士多不勝數！

女人絕對唔係弱者，因為佢地有兩件大殺傷力武器，就係佢地嘅身體同把口。只要佢地肯犧牲少少，拋個身出嚟，然後大嗌非禮，男人就隨時會搞到一身蟻，水洗都唔清。諗落都幾恐怖吓，只要喺攻擊範圍內，絕對係防不勝防。呢種大殺傷力武器有冇被濫用就唔知，我自己都只係中過一次招啫。唔好講笑，即刻塊木掂吓先！

唔係鵪鶉

首先聲明，本文絕對無意歧視從事室內裝飾及物業管理之人士！

前文講到我喺7仔受咗個𡃁妹氣，反應都只係冇講最後嗰聲唔該，好似好鵪鶉吓咁。其實我唔係鵪鶉，我係熱愛和平，唔想同個𡃁妹計較啫。講開又講，有時我都可以幾毒辣吓架。

話說有一次我著住短褲涼鞋，買完拎住個背心膠帶返屋企。離遠見到守大閘嘅係一個幾新吓嘅肥仔管理員，雖然話新，但係都已經見過幾次，諗住佢應該會認得我。點知我行到埋去，佢居然問我去邊個單位裝修。雖然佢問得好客氣吓，不過我都係即時扯火，第一時間俾咗個凌厲嘅眼神佢睇。跟住同佢講：乜我似裝修佬咩！然後直接行入去，完全冇等佢嘅回應。

返到上樓，拿拿林走去照鏡，睇吓個轆係咪好似裝修佬。橫睇掂睇，根本就冇一忽似！有乜理由咁樣冤枉我，真係越諗越激氣。其實之前有個朋友上嚟坐嘅時候都同我講過，話守大閘個管理員當咗佢係送外賣嘅。當時我都覺得有少少唔好意思，不過就輕描淡寫咁叫個朋友自己檢討吓。估唔到呢咁嘅居然會發生喺自己身上，真係是可忍熟不可忍，新仇舊恨一鋪過同佢算清！雖然送外賣單多數唔關個肥仔事，但係當時火遮眼，仲邊理得咁多喎。

我當然唔會走落去打個肥仔，事實上我都冇可能夠佢打。唔打人咪打電話囉，我即刻管理處個掃把，即係肥仔嘅老頂。齋投訴唔會好有效，肥仔最多係俾句老頂話幾句。我用咗個一定有效嘅方法，就係狂炳個掃把，鬧佢領導無方。個掃把無啦啦俾人噴到一面屁，但係又唔駁得嘴，實會肥仔洩憤，鏟到佢反艇。

唔好以為個掃把好無辜，其實佢係罪有應得嘅，因為佢冇好好咁調教新人。唔知有乜可以幫到你呢？咁簡單嘅一句，任何情況都啱用。新人唔識係佢自己唔夠醒目，但係掃把冇教就係冇盡到做掃把嘅責任。

講返肥仔，過咗兩日又喺大閘見到佢。一見到我就沙晒冧，猛咁道歉，搞到我都有唔好意思。其實我已經冇，一來嗰日即場俾咗面色佢睇，而且炳完個掃把之後連啖氣都消埋。睇肥仔嘅表現，肯定係俾個掃把鏟咗鑊甘嘅。我都懷疑自己係咪做得有過份咗，所以之後對佢都會特別客氣。

古語有云：人情留一線，日後好相見。其實係唔係古人講嘅我都唔知，不過就覺得好有道理。所以我而家時時都會提醒自己，做唔好去到咁盡。

𡃁妹

兩包XXXX，唔該！
八達通，唔該！
要返張單，唔該！

去親7仔買都會講四次唔該，最後嗰次係當個售貨員遞張單俾我嘅時候。

今日去7仔買只係講咗三次，最尾嗰次慳返，因為當值個𡃁妹好唔掂。佢全程嬲爆爆，兼夾藐嘴藐舌，好似我嚟買煩親佢咁。尤其是當我問佢攞單嘅時候，佢就好唔耐煩，想張單掟我咁滯。

我都知7仔人工好奀，但係呢個絕對唔係咁樣對客嘅理由。打工嘅，你情我願，嫌奀咪唔好做囉。香港係自由社會，有強姦，冇焗做。你要唔做攞綜援，絕對唔會有人阻止，使乜做得咁唔開心啫。人嘅心態真係好有問題，最好有人俾幾皮請你返嚟坐喺度唔使做！

其實咁嘅情況都試過好多次，7仔係咁，OK又係咁，𡃁妹嘅態度都係好惡劣吓。反而阿嬸同𡃁仔嘅態度就好好多，有時仲會講聲多謝添。好奇怪，點解𡃁妹嘅態度會特別差呢？唔通係我樣衰，佢地睇唔順眼？抑或係我咁黑仔，次次都撞正佢地唔係咁方便嗰幾日？

把幾火

今日睇新聞又俾人激親，真係把幾火！

話說有個住喺公屋嘅綜援阿婆，因為唔順政府02同07年嘅「免收差餉及公屋租金」紓解民困措施冇佢份，走去告政府。原本小額錢債審裁處已經判佢輸咗，但係佢啱啱喺高院上訴得直。如果社署唔提出上訴嘅話，佢就會有二千幾蚊落袋。二千幾蚊梗係濕濕碎啦，最甘嘅係如果社署認輸，政府隨時要攞三億幾出嚟俾有同樣情況嘅公屋綜援戶。

主審法官話雖然綜援戶唔使交租，但係喺免租措施裏面冇受惠。佢又批評社署同房署喺帳目上「左袋入右袋」，根本就幫唔到最窮嘅綜援戶，唔合乎紓解民困嘅目標。對於咁嘅官，除咗叫佢去食，都唔知仲有乜好講。

紓困措施係有針對性嘅，話明係免租措施，梗係舒緩公屋戶喺租金方面嘅壓力啦。綜援戶根本都唔使交租，喺呢方面仲有冇困好紓啫！而且紓困措施又唔係只得免租一款，仲有綜援出雙糧同其他好多花款架，又點可以話幫唔到最窮嘅綜援戶啫！

講起綜援出雙糧又係把幾火！所謂紓困措施都係喺經濟不景嘅時候推出，幫受影響嘅人渡過難關。攞綜援嘅個個月坐喺度就準時有糧出，唔使驚會失業。咁經濟差又對佢地有乜壓力，有乜影響？壓力就冇，但係影響就有喇，不過係好嘅影響啫。因為物價平咗，佢地份糧會好使。咁佢地又憑乜會有雙糧出，就憑夠惡？呢個只係原因之一，最主要係我地有一個軟弱無能嘅政府同一班樂於「為民請命」嘅尊貴議員。

錢冇人會嫌多，個個都想賺到盡。但係攞著數都要出師有名，俾個有邏輯嘅理由先得格。事實係，政府為咗買民意，議員為咗買選票，乜荒謬都做得出。可以預見，隨住政制民主化，類似嘅荒謬仲會陸續有嚟。不過我又唔驚普選，因為我相信「置諸死地而後生」。衰過之後，納稅人自然會識得點揀，到時就撥亂反正。除非到時攞綜援嘅佔咗大多數，咁就真係死得嘞。哈哈，話時話，會唔會真係有咁嘅機會呢？

綠色荒謬

我唔係講緊民進黨，雖然佢地又真係好荒謬吓。

我好鍾意綠色，因為睇落好養眼。似乎環保人士都好鍾意綠色，所以環保組織成日叫做綠色乜乜，綠色物物。本來用綠色代表環保都好合理，但係有環保分子嘅荒謬就令我覺得佢地侮辱咗呢隻顏色。

環保組織成日開口和平，埋口和平，但係作為就好霸道，有時仲會用埋暴力添，好彩呢情況香港比較少。佢地成日話人唔環保，但係自己示威就出動大量banner，有製造垃圾之嫌。雖然我唔敢肯定banner係唔係用完即棄，但係次次行動都會有特定主題，用得返嘅機會就真係微囉。除咗呢，仲有以下嘅荒謬。

荒謬1：魚翅婚宴，人情七折
竟然教唆人地喺朋友嘅大喜日子玩，真係冇品。對食翅反感咪唔好去飲囉，做乜要搞寸人地個party先。一係就索性絕交，連人情都慳埋。總之喺人地個婚宴搞事就絕對無可以接受。咁嘅屎橋，都唔知係邊個諗出嚟架。睇嚟呢條友除咗一班志同道合嘅環保先鋒之外，冇可能會有其他朋友。

荒謬2：保持室內25.5度
我都唔知商場同埋公共交通工具搞乜，夏天就凍過殮房，冬天又熱到焗爐咁。室溫保持喺25.5度真係好舒服，絕對值得提倡。不過如果淨係按本子辦事，唔識靈活變通，又會出現問題。有個朋友同我講，而家去親康文處嘅室內運動場打波都熱到想死，因為佢地將冷氣校細咗，令到室溫保持喺25.5度。正常情況梗係冇問題啦，但係打波打到㷫合合就唔同咁講法。而家呢個弱勢政府，行政僵化，又驚俾環保人士插，真係冇計。睇怕要熱死一兩件，呢個情況先可以改善。

荒謬3：驗葉唔驗梗
話說有次XX和平驗到有菜心農藥超標，佢地都不知幾開心咁公報結果，因為又係一次環保嘅重大勝利。點之後來俾人督爆，原來佢地只驗菜葉唔驗菜梗，並唔係標準做法，有誤導之嫌。計我話，邊度係誤導，直頭係存心欺騙觀眾。唔知佢地驗橙又會唔會齋驗橙皮，唔驗橙肉呢？

其實環保荒謬仲有好多，真係罄竹難書。不過又唔好以為我係反對環保，只係我嘅理念同嗰環保塔利班有唔同啫。我覺得最緊要係珍惜資源，唔好浪費。好似手提電話，唔壞我都唔會換。我牛仔褲閒閒地著十幾廿年，穿窿都照著。款式過時？有乜所謂啫。不過咁，如果會令到我好唔方便嘅，就打死都唔制。好似去超市買，我會自備購物袋。但係去街市買餸，就唔會用環保袋。買魚嘅話仲一定要兩個膠袋添，如果唔係魚腥水實滴到周圍都係。唔環保？見仁見智啦！

綠色恐怖

唔好諗咗去第度，我係講緊環保啫。

冇幾耐之前，喺美國嘅發現頻道總部發生咗一單槍手挾持人質事件。槍手係一個極度支持環保嘅亞裔男人。佢走去搞事，都係為咗宣揚環保。遽聞佢好不滿發現頻道喺節目裏面叫人生多仔，同環保原則背道而馳。佢講得好過癮，話人類BB仔係寄生蟲，生仔係危害地球嘅行為。佢仲話連昆蟲都係忠嘅，只有人類係奸嘅。

好明顯，呢條友係太過沉迷喺佢嗰套環保理論，搞到自己short咗。其實唔止環保係咁，所有都係，如果過度沉迷同執著，就算原本係好嘅都會變得好恐怖。好似政治、宗教、民主、自由，通通都係。曾特首都講啦，極端民主就會變成文革。問你驚未！

講返單，雖然美國唔係菲律賓，事件最後都係以流血收場。唔同嘅係只有個傻佬流血，佢俾人一槍搞掂咗。不過對於佢嚟講，都可以話係求仁得仁喇。佢成日都想地球少人，起碼而家少咗一個啦。

自由何價

美國有個傻佬牧師話要喺今日（即係911事件九周年紀念日）當眾焚燒可蘭經，目的係抗議喺911襲擊遺址附近起一個回教社區。結果佢都冇實行到呢個計劃，單擾攘咗成個禮拜，最後變成一場鬧劇。

本來燒幾本書係咪好大件事就見仁見智，但係嗰班宗教狂熱分子係癲嘅，完全唔可以理喻。佢地自己做就好地地，人地做就要打要殺。佢地夠日日燒人枝星條旗啦，咁都仲可以話係美國佬咎由自取，但係炸咗個巴米揚大佛就真係神憎鬼厭喇。

雖然個傻佬牧師冇乜實際行動，淨係齋噏，不過已經搞到好多回教國家暴動咁滯。如果佢真係燒，肯定會觸發恐襲潮，世界各地嘅美國人都會成為襲擊目標，到時就死得人多喇。呢個後果係人都諗到，但係就連美國總統都冇辦法阻止佢，最多都係譴責吓，又係得把口。如果個傻佬收到全球追殺令，咁都算係罪有應得，最弊係隨時有好多無辜嘅人要陪葬呢。同班癲佬玩，簡直係瓷器撼缸瓦。

美國真係一個好自由嘅地方，只要唔犯法，個人自由可以凌駕一切。就算會死人冧樓又點，真係你死你事。成蟲大哥話中國人唔管唔得，其實美國佬咪一樣！