剪影情人橋

本人縱橫影圈幾十年……哈哈，我當然唔係打牌打到思覺失調，以為自己做咗大明星！其實「影」係指攝影，而「縱橫」就係橫衝直撞、毫無章法嘅意思。冇錯，本人影咗幾十年相，一向都係有拍無類、見乜影乜，總之亂影一通啦。雖然話有拍無類，但係有啲題材就完全冇接觸過，因為本人只係去旅行先會影相。例如人體寫真，試問跟鴨仔團又點會有機會影到呢？哈哈，除非係日本仔最鍾意嘅採花團啦！

話時話，有一種唔算好特別嘅題材，本人都係甚少影，而且就算影咗，效果滿意嘅亦少之又少。影呢種題材，唔需要乜嘢特別技術或高級器材，難度一啲都唔高，相機用auto mode就搞掂。之所以少影，係因為跟團旅行好少會遇到適合嘅場景。聰明嘅你相信已經估到，我講緊嘅係剪影。

剪影一定係逆光拍攝，主體嚴重曝光不足會令表面細節消失，得番個輪廓。想有滿意效果，主體最好係輪廓分明、線條唔過於呆板，如果能夠帶有美感、動感、或趣味性就更好嘞。而且暗部（主體同前景）不宜有太大片死黑，光部（背景）亦不宜有太大片死白。如果暗部面積太大，最好能夠保留番適度細節。同理，光部面積太大容易流於單調，如果真係細節欠奉，起碼都應該喺色調上有啲變化。講到呢度，大家可能已經暗笑緊在下冇料扮四條。其實我只係講出一個初學者嘅體會，同埋解釋番點解會咁難遇到適合嘅場景啫。嚴格啲嚟講，本人連初學者都未算，因為我根本就冇學過攝影。至於啲大師級人馬，自然能化腐朽為神奇，完全唔會受呢啲限制啦。

基於上述條件，如果以戶外環境嚟講，最適合拍剪影應該係日出或日落時分。不過鴨仔團甚少會安排睇日出日落，一來避免啲團友披星戴月咁辛苦，亦唔想延誤用餐時間。如果安排得睇日出或日落，咁嗰個一定係當地旅遊指定動作，而有關景點就必然係人山人海。叫得做鴨仔團，自然係樣樣都趕，絕對唔會安排團友早幾粒鐘去霸定靚位。通常去到景點都已經插針唔入，莫講話影靚相，就算見得到個太陽都要劏雞還神啦。本來以剪影嚟講，人絕對係極佳素材。但係如果人頭湧湧，影出嚟疊埋晒變成一大pat黑影，咁就唔影好過影囉。

啱啱聖誕假去咗緬甸，行程包括喺曼德勒嘅情人橋睇日落。事前做過吓功課，知道嗰度最出名係黃昏剪影，初時仲擔心會唔會又只係影到人頭添。好在去到當地，落車一睇，條橋成1.2公里咁長，完全唔使同人爭位，鐘意點影就點影。哈哈，終於影到覺得滿意嘅剪影喇！

話時話，大家有冇對呢幾張相嘅紀實性有些少懷疑呢？哈哈，唔使懷疑嘞，啲相全部都執過架！所謂「相不執不發」，我所有相都會執過先發上網嘅囉。就好似有啲女士一樣，唔化妝係絕對唔會出街見人架。當然啦，如果本身天生麗質，就算唔塗脂抹粉都唔會失禮人。不過天賦唔係人人都有，如果先天不足，用人工方法補救吓亦無傷大雅啫。講真，其實本人已經好克制架喇，雖然啲相有執過，但係都只屬於化妝程度，仲未算整容囉！

補充：
加咗幾張相嘅原片，等大家睇吓化妝前同化妝後嘅分別。

U Bein Bridge, Mandalay, Myanmar

U Bein Bridge, Mandalay, Myanmar

U Bein Bridge, Mandalay, Myanmar

Original version of photo #1

Original version of photo #2

Original version of photo #3

水土不服

去旅行最麻煩係乜？對於我嚟講，肯定係水土不服。自問有少少潔癖，絕對唔係去到邊痾到邊嘅人。除非十萬火急，否則大單嘢一定會喺酒店房解決。好彩我個唔係玻璃肚，而係效率奇高嘅多功能有機堆肥桶，所以喺飲食方面，本人一向都係百無禁忌。點知三十年道行一朝喪，兩個禮拜前喺緬甸竟然水土不服，搞到行程最尾幾日冇晒mood。

出事唔係食咗污糟嘢，而係當地食物實在太肥膩。嗰啲團餐，碟碟餸都油淋淋，而且餐前例牌有薯片或者蝦片之類嘅油炸小食，仲要無限量供應添。本人恃住內置功能強勁嘅環保堆肥桶，自然係有殺錯冇放過啦。頭幾日都仲好地地，直至有晚食咗個用油浸住嘅「蜜糖雞」，第二日起身就覺得飽飽滯滯，連早餐都冇胃口食。跟住全日肚脹脹，仲感覺到堆肥桶裏面不斷有氣體產生，谷到鬼死咁唔舒服。經驗話俾我知，雖然個肚谷到爆咁滯，但係絕對唔可以靜雞雞放氣減壓，否則隨時會一褲都係。結果忍足成日，頂到食完晚飯返酒店，入房就第一時間衝去廁所排污。先係排咗好多糊仔狀嘅便便，跟住係大量氣體。過咗一陣，見再冇乜動靜先敢做善後清潔。點知啱啱搞掂，褲都未著番，肚仔又作動嘞，唯有將之前嘅排污程序再重複一次。如是者，最後排咗三次先排得清。

有別於一般由食錯嘢引起嘅腹瀉，呢次完全冇攪肚痛，而且啲便便同氣體亦唔算十分惡臭難當，所以相信唔係食物中毒，而係食得太多肥膩嘢，諗住排清晒第二朝瞓醒應該就會冇事。點知事與願違，第二朝瞓醒，仍然係嗰種脹爆嘅感覺。咪講笑，即刻衝入廁所減壓先。至於事後會唔會令同房一路刷牙一路嘔，咁就唔理得咁多喇。

雖然之後每餐都食得好少，而且主要係食白飯，脹爆情況仍然維持咗四日，要返到香港先冇事。個團只不過玩八日，結果有一半時間肚仔唔舒服，都咪話唔掃興。而且仲搞到我破埋戒，要喺公廁做大事添。

話說有一日下晝去到大金塔（Shwedagon Pagoda），領隊喺售票大堂話有需要嘅就去咗先，入到景點就冇廁所架喇。其實食完午飯，個肚已經脹到想爆，我自己都驚捱唔到返酒店，咁咪入廁所視察吓，就算唔掂都冇乜損失啫。又真係估佢唔到，雖然大金塔萬七咁多遊客，但係個廁所竟然相當乾淨，好過仰光國際機場九千幾倍。而且廁格尚算寬敞，有地方俾我掛背囊。題外話，以前大陸啲廁勁污糟，我真係試過孭住個大背囊做大事囉。言歸正傳，個廁所都有不足之處，就係廁格裏面冇廁紙。本人萬一要喺公廁開大，一定會消耗大量廁紙。首先要抹乾淨塊廁板，不過單用廁紙就抹得乾淨，講出嚟都冇人信啦。用廁紙抹，極其量只可以抹乾塊廁板，跟住仲要鋪起碼四層廁紙先坐得落去囉。廁格冇廁紙，而我自己隨身又只係得一包迷你紙巾，咁冇辦法嘞，唯有坐唔知幾多年冇坐過嘅無影櫈啦。結果又係經過三輪大爆發先排得清，真係坐都坐到腳軟。排完污，玩都玩得輕鬆好多。

不過輕鬆狀態只係維持兩粒鐘，未到晚飯時間個肚仔已經勁作怪。嗰日仲要係喺街食，跟住先返酒店，慘！返到酒店，仲要等領隊慢慢分房，而我嘅團號又排到最後咁滯，大鑊！本人一向好守規矩，但亦明白「辦大事不拘小節」嘅道理。喺咁危急嘅情況，唯有厚住面皮打尖，叫領隊俾鎖匙我先。上到房，衝入廁所，啱啱趕得切喺大爆發臨界點同馬桶嚟個終極結合，真係遲一分鐘都死得人！

講開又講，本人肚仔一向聽話，除咗食完辣嘢一定會有反應，絕少連續幾日扭計。對上一次嚴重水土不服，已經係三十年前嘅事喇。

話說82年一條友返大陸玩，由西南開始，玩咗兩個月先去到新疆。本人一早有晒心理準備，喺大陸預咗要大菌食細菌，總之眼不見為乾淨，根本唔驚得咁多。事實上，喺湖南四川，食涼粉冷麵仲多過食飯，肚仔都完全頂得住。點知一入到新疆就出事嘞，痾足成個禮拜。不過唔係因為食物唔乾淨，嚴格嚟講，係自己攞嚟衰。

由第一站吐魯番開始，已經覺得新疆係美食天堂。因為除咗唔使再捱本人最討厭嘅豬肉，嗰度有勁好食嘅烤羊肉串。喺和靜就創咗個紀錄，一口氣消滅咗31串，到而家都仲回味無窮。睇到呢度，大家都應該估到，本人出事係因為「多吃壞肚皮」。不過你地一定估唔到，食到出事嘅，根本唔係烤羊肉，而係最最最健康嘅生果。

新疆盛產瓜果，其中又以哈密瓜同葡萄最出名。葡萄都算嘞，始終唔係乜嘢特別嘢。哈密瓜就唔同喇，喺嗰個年代嘅香港，絕對算係貴價生果。當年本人係一個清貧學生，老實講，呢啲高貴嘢根本就食唔起。一去到吐魯番，見到啲哈密瓜堆到成座山仔咁，而且又賣得平，豈有不大察特察之理呢？唔知乜水話「日啖荔枝三百顆，不辭長作嶺南人」，我當然冇咁誇張，只要每日食兩三個，就覺得不枉千里迢迢去到新疆咁遠囉。

事實上，第一日去到吐魯番就食咗兩個哈密瓜同大量葡萄。跟住日日如是，除非冇得賣，每日都keep住消滅起碼兩個哈密瓜同一公斤葡萄。亦係由第一日開始，每日都keep住起碼去四次廁所（肚瀉嗰隻），足足持續咗一個禮拜。我就硬係唔信，個肚仔會敵唔過區區哈密瓜囉。果然，過咗一個禮拜，肚仔適應咗就冇事嘞。

本來呢，旅行遇著水土不服真係好唔方便。不過嗰時已經喺大陸玩咗兩個月，習慣晒去到邊痾到邊，大不了咪喺路邊解決囉。而且嗰時大陸根本冇坐廁，反而仲少咗啲顧忌添。如果換轉係今日，唔使講，我一定會選擇忍口。

不過講番轉頭，見到堆到山仔咁高嘅哈密瓜又真係好難忍口囉。大家咪恥笑我住，冇錯，喺今日嚟講，哈密瓜根本唔係乜嘢矜貴嘢。但係你地有所不知嘞，當年我喺新疆食嘅，係白肉哈密瓜，同而家喺香港買到嘅紅肉貨色可以話係天壤雲泥。白肉哈密瓜冇咁爽脆，不過就超甜多汁、香味濃郁，跑贏紅肉貨色九條街。都唔知點解，咁好食嘅哈密瓜，喺香港竟然從來未見過有得賣。喺今日，哈密瓜已經唔再係高不可攀嘅嘢，但係就完全提唔我嘅興趣。講得老土啲，曾經滄海難為水呀！

Bagan, Myanmar

Mandalay Hill, Mandalay, Myanmar

Shwedagon Pagoda, Yangon, Myanmar

烏魯木齊, 新疆