狗噏短評

早兩日睇報紙，又見到有人形動物喺度亂噏。

對於兩名凸首候選人先後捲入漏報利益申報同僭建醜聞，法律界選委張達明又發表高論。佢話「當參選人的誠信操守備受質疑時，無論政綱寫得如何冠冕堂皇，也只是空口講白話，還有人會相信嗎？」

張教授早前先牽涉入疑似區選種票醜聞，估唔到咁快又走出嚟講誠信有幾緊要。佢明明搬咗屋，但係唔止冇去選舉事務處改地址，仲走番去舊居嗰區投票。咁啱嗰區有個候選人係張教授嘅友好，真係好難唔令人懷疑佢係咪有種票嘅意圖。事件被揭發後，佢力證自己冇犯法，因為選舉條例冇規定選民搬屋後要喺一定時間內通知有關部門。好，就當咁做係合法，不過又係咪合情合理呢？區議員只係處理自己嗰區嘅事務，如果可以由其他區嘅選民投票揀出嚟，咁當然係唔合理啦。至於係咪合情，咁就要睇張教授點理解呢個「情」字喇。如果係指「賣人情」，咁就梗係合到唔合啦。喺未解釋清楚單嘢，釋除公眾疑慮之前，佢呢番咁冠冕堂皇嘅誠信論，真係令人覺得好刺耳囉！再者，根據張教授嘅邏輯，冇觸犯法例就唔係問題，咁佢呢番高論又係咪應該等到有關凸首候選人被正式定罪先發表呢？

同日又有另一單新聞，一哥話鑒於近年不時有差人喺執法嘅時候俾市民以粗言辱罵，如果情況繼續惡化，會考慮引入辱警罪。對於引入辱警罪，民陣警權關注組召集人王浩賢表示反對，佢話「因草根階層示威者言語或較粗魯，擔心辱警罪會被警方濫用。」

係咪要引入辱警罪，肯定會有唔同意見，不過王某嘅講法又真係太騎呢囉。佢話草根階層言語較粗魯，分明係侮辱連我在內嘅大部分香港人啦。我自認係草根階層架，雖然粗口我都有講，但係一定會睇場合囉。講得最多嘅時候，就係睇報紙或電視新聞，見到啲無厘頭人講埋晒啲無厘頭嘢。我就唔相信我地呢啲草根階層會完全唔識得尊重別人，或者冇晒自制能力，喺任何場合都一定要爆粗。王某亦冇理由唔知啫，根據港鐵附例，喺港鐵範圍講粗口係犯法架，咁啲草根階層係咪唔應該搭港鐵呢？如果佢要反，唔該反咗港鐵附例先啦，搭港鐵嘅草根階層肯定比去示威嘅多好多囉。倒番轉嚟睇，如果喺港鐵講粗口都犯法，咁點解用粗口問候一個執行緊職務嘅差人反而冇問題呢？冇錯，港人有表達意見嘅權利，但係咁唔代表可以隨便侮辱他人。如果連起碼嘅尊重都唔識，我就睇唔出咁嘅人會知道乜嘢係民主同人權囉！

Hyena, Krugger National Park, South Africa

那話兒排行榜

警告：本文包含成人內容及疑似陽具圖片，或會引起讀者不適，敬請對此等題材具過敏性反應之人士馬上離開！

早幾日提到ESPN以「Chink in the armor」作為林書豪輸波報導嘅標題，有種族歧視之嫌。其實早喺林瘋熱潮剛開始嘅時候，體育專欄作家Jason Whitlock已經衰咗一鑊，最後都係搞到要道歉。條友懶係風趣，竟然用咗「Some lucky lady in NYC is gonna feel a couple inches of pain tonight」作為對林書豪贏波嘅評語。

雖然喺美式英語，「couple inches」唔一定指兩吋，不過就肯定唔會係好多吋囉。條友當然係想取笑林書豪短，但係佢又冇可能真係見過，所以咁講應該係要搞吓笑啫，其實班林粉屎根本唔使咁認真。

最近留意多咗林書豪嘅新聞，摷吓摷吓就見到有個網頁討論呢單嘢。有人認為Jason Whitlock咁講係因為佢係黑人，又有人貼咗張世界地圖撐條友講得有道理添。張地圖好搞嘢，用唔同顏色顯示世界各地男人嘅勃起長度。不過張圖實在太細，點都睇唔清楚，咁我咪Google吓「penis map」囉。結果真係有發現，喺一個網頁揾到幾張好清晰嘅地圖。當中綠色代表最長，主要集中喺非洲同南美。而東亞（中日韓）、南亞（印度同孟加拉）、東南亞就係一大片紅色，即係最短咁解。

我又揾到另一個網頁，有埋各國男人勃起長度嘅排名添，真係難得一見嘅資訊。排首位嘅係剛果，第二位係厄瓜多爾，中國就排到112 位，接近包尾咁滯。So sad！而一般人以為好勁嘅印度就仲要低我地幾級，排116位。最搞嘢係乜都認屎認屁嘅南韓，竟然排119位，榮膺世界之最！泡菜佬極度自大就係人都知，不過我到今日先明白，原來係呢種心態係由極度自卑引起架！

雖然我地嘅排名唔係咁理想，不過各位中華男兒又唔使太失望。之前嗰個網頁又有另一張地圖，顯示勃起長度同IQ嘅關係。真係發夢都估唔到，呢兩樣嘢竟然可以拉埋嚟講。喺長度佔盡優勢嘅非洲同南美，原來IQ係最低囉。所謂有得必有失，呢個世界始終係公平嘅！

講來講去都係陽具，可能大家已經睇到好嘔心。不過唔好咁快轉台住，即刻就有啲醒神嘢，女人嘅cup size地圖。真係估佢唔到，喺男人最大嘅非洲，女人竟然係最細！咁喺男人最細嘅亞洲，女人又會唔會亦係倒番轉呢？好可惜，同佢地嘅男伴一樣，亞洲女人都係得唔到造物者嘅眷顧。So sad again！

World Penis Size Map (from the web)

Penis size ranking by country (from the web)

World IQ vs Penis Size Map (from the web)

World Breast Cup Size Map (from the web)

Travel souvenirs

Chink in the armor

所謂人怕出名豬怕肥，真係一啲都冇講錯。自從林書豪一夜走紅，傳媒都將焦點集中喺佢身上，最近就有人因為喺報導標題玩嘢玩出禍。

話說ESPN喺林書豪輸波之後發表咗一篇報導，標題竟然係「Chink in the armor」。連我呢啲唔係太識英文嘅人都知道chink呢個字帶有種族歧視成份，喺美國咁嘅多元種族社會，當然會引起極大回響啦。結果ESPN受千夫所指，唔止一再道歉，仲要炒埋個寫手，連涉事主播都要停職一個月添。

Chink呢個字係歧視中國人嘅講法，我一早就知，不過一直都以為係「清」（清朝）嘅譯音。早兩日睇完相關報導先知道，原來chink係裂縫咁解。而「chink in the armor」就係一句由來已久嘅西洋成語，意思係「弱點」。好明顯，個寫手係懶醒，想玩語帶雙關。至於係咪針對林書豪，咁我就唔知嘞，一定要睇埋報導裏面有冇不符事實嘅惡意攻擊先得。

話時話，我睇完呢句嘢，又真係冇乜特別感覺喎。一來，林書毫唔係我偶像，事實上，我根本就冇偶像。而且，chink字對中國人有幾侮辱，我亦冇乜概念。如果未喺由其他種族主導嘅社會生活過，又真係未必體會到俾人歧視嘅感受係點，甚至連人地有乜歧視用語都唔一定會知囉。好似Chinaman呢個字，就咁睇我會唔覺有乜歧視成份，但係事實上，呢個字同chink一樣，都係對中國人歧視嘅講法。

不過咁，好多時啲所謂歧視語句，其實都係「言者無心，聽者有意」。而家喺香港，有人就認為鬼佬、阿差、賓妹呢啲講都法帶有歧視成份，不過事實又係咪咁呢？好似我舊公司咁，基本上係聯合國，除咗黑人，幾乎乜嘢種族都有。我地班同事圍內提起啲expatriates，都係白人叫鬼佬、南亞人叫阿差、菲律賓人叫賓佬、日本人叫架仔，泰國人叫泰仔，國內人叫大陸佬。呢啲只係口語化嘅叫法，起碼我自己就完全冇歧視啲外籍同事嘅意思囉。事實上，啲白人同事根本就唔介意俾人叫鬼佬。有隻鬼仲用唔鹹唔淡嘅廣東話講「我係一個死鬼佬」添，真係俾佢笑死。話時話，鬼佬講唔鹹唔淡嘅廣東話，人人都覺得好cutie。不過啲新移民講嘢帶口音，就俾人笑都面都黃，呢啲就係真正歧視嘞。

當然啦，我唔係話所有歧視都係啲弱勢社群自己幻想出嚟。有隻喺飲過鹹水嘅舊馬，就同我講過佢喺澳洲嘅親身經歷。佢話有次喺條街行緊，竟然有個白人阿婆無啦啦喺對面馬路走過嚟鬧佢。無獨有偶，香港最近都發生咗類似嘅嘢，有人特登走去購物熱點鬧啲自由行旅客。連同文同種都可以歧視，唔同種族嘅就更加唔使講啦。

冇人會鍾意被歧視，不過最諷刺嘅係，好多人一方面受到歧視，而另一方面又歧視番啲比自己更弱勢嘅群體。好似白人歧視有色人種，而黃種人又睇唔起比自己膚色更深嘅南亞人同黑人。舉個例，如果港女嫁俾白人，相信唔會有人覺得有問題，可能仲會有好多人羨慕添。但係嫁俾南亞人或者黑人嘅話，唔止家人會反對，連三九唔識七嘅路人都會投以奇異目光。

諗深一層，咁其實都好正常，啲人只係維護自己嘅權益啫。如果淨係俾人歧視，自己又唔歧視番其他人，咁咪好蝕底？尤其喺華人社會，「千祈咪蝕底」早已被奉為金科玉律。連我自己都係咁架，如果啲九唔搭八嘅蒙面人走嚟留言辱罵，我肯定會還拖囉！

不過凡事都有例外，好似「盔甲裂縫」單嘢，林書豪嘅反應就好唔同嘞。被問到對事件點睇，佢話相信ESPN唔係故意，仲話要學會原諒，真係答得非常得體。事實上，佢由走紅開始，一直都表現得好謙遜，同時下啲年輕人「一朝得志，語無倫次」嘅態度可謂判若雲泥。佢嘅球技有幾好，我自問冇資格評論，但係對於佢嘅內涵，我就非常欣賞！寄語香港嘅後生仔，唔好淨係睇到林書豪喺球場有幾威，其實佢嘅處世態度都好值得學習架！

London Tower, London, UK

Consuegra, Spain

自駕遊

雖然基本法保障咗港人表達意見嘅權利啫，都唔使個個禮拜日都搞遊行啩！唔通駕駛人士使用部分道路嘅權利就可以任意剝奪？琴日又有政黨同民間團體遊行去政府總部，要求無限期擱置粵港自駕遊計畫。

我連車牌都冇，其實呢單嘢完全唔關我事。而且自駕遊又唔見得有好大實質作用，就算擱置計畫我都冇乜意見。遊行人士就認為自駕遊會帶嚟空氣污染同交通安全等問題，其實唔係無中生有，不過程度上有冇佢地講得咁嚴重就唔知嘞。我始終覺得，對於有啲參與者嚟講，遊行根本就係反蝗運動嘅一部分。好似有人高舉嘅標語，上面竟然寫住「反簡體字」。其實簡體字關自駕遊乜事呢？而且，簡體字又有乜好反呢？話時話，我都好想大陸轉番用繁體字，不過咁同反簡體字係完全兩回事囉。

更離奇嘅係連豉油黨都玩埋一份，同政府打對台。仲有邊個敢話建制派唔重視民意？不過咁，豉油黨嘅訴求始終同其他遊行人士有啲分別。佢地唔係想煞停成個計畫，而係要求淨係俾港人自駕北上，唔俾大陸人揸車南下。黨主席瘤健儀話，喺呢單嘢上面，粵港唔需要對等喎。佢呢番偉論，真係聽到我無名火起，中港矛盾日益加深，就係因為某啲港人有咁嘅態度！

好多內地人唔妥香港，就係因為唔抵得港人有特權。隨住大陸改革開放，經濟起飛，內地人肯定會有一份自豪感，亦難免會有啲暴發戶心態。而另一方面，香港嘅重要性就已經大不如前。喺此消彼長之下，內地人自然唔會認同港人可以擁有特權。當然啦，呢個期實係歷史遺留落嚟嘅問題。不過內地人普遍認為香港嘅殖民史係喪權辱國，而港人竟然因此得到特權，甚至覺得自己高高在上，佢地又有乜理由唔反感呢。

對於內地人嚟講，自由行嘅意義唔單止係購物同觀光，更係國家主權嘅體現。中國嘅土地，有乜理由中國人反而要禁足呢？將心比心，假設你係國內人，你又會點諗？而家瘤主席居然話自駕遊只准北上，唔准南下，咁喪權辱國嘅不平等條約，我就諗唔到點解啲同胞會受嘞。如果唔想大陸人揸車落嚟，就應該成個計畫拉倒，而唔係提出啲咁嘅無理要求囉。好心啲人唔好再製造啲新嘅中港矛盾啦，真係嫌未夠煩咩！

香港真係越嚟越民粹，而家連建制派都中埋毒添！再係咁落去，香港好快會自我邊緣化，套用Dr. Dylan嘅名句：The city is dying！

South Island, New Zealand

狼虎之年

早幾日喺日月報副刊睇到李X銘一篇題為「仁，竟不及狼、豬？！」嘅文章，真係忍唔住又要插吓條狀棍。條友質疑點解喺凸首參選人支持度民調，何俊男竟然會輸九條街俾另外嗰兩件。呢啲直頭係棄婦心態啦，俾條佬飛咗就話人唔識貨，天姿國色嘅美女都唔要，竟然揀件貌比無鹽嘅醜婦。條友又懶醒，喺標題玩食字，將「人」同狼豬作對比。如果係出自高登仔手筆，我都唔會講乜嘢。不過條友貴為法律界翹楚，社會地位崇高，又不遺餘力捍衛人權民主，但係竟然用呢啲帶有人身攻擊嘅手法揶揄政治對手，真係令人睇唔過眼。唔通只有理念相同嘅「俊男」先係人，持唔同政見嘅就係禽獸？香港啲所謂民主派有幾虛偽同無恥，由此已經可見一斑！

講到狼同豬，一奸一蠢，原本都唔係好嘢。不過喺香港呢個笑貧不笑娼嘅社會，兩者嘅貶義喺程度上就有好大分別嘞。奸雖然係唔好，不過亦代表有適應能力同求生本領。所以俾人話奸，震鷹哥應該唔會太介意，仲有可能會狼心竊喜添。至於蠢，俗語都有講啦，「寧生敗家仔，莫生蠢鈍兒」，所以話人豬真係一種極大嘅侮辱。當然啦，「傻豬」、「老公豬」、「老婆豬」呢啲肉麻稱謂就唔算囉。

我份人比較厚道，所以好少話人係豬，就算好似唐唐咁蠢，我都唔會咁講佢。不過睇見佢喺僭建地宮事件嘅應對，我都忍唔住要對條友講：「唐豬，你收皮啦！」

不過我唔係好似一般人咁，質疑佢嘅誠信。所謂「水太清則無魚」，我根本就唔期望政治人物會有絕對誠信。我覺得有問題嘅，係佢嘅策略同臨場應對。最初死口否認，跟住又逐日認多少少，到最後仲拉埋老婆出嚟認罪，真係睇到人眼火爆。要認就第一日好認啦，唔通佢真係以為單嘢可以咁易過到骨？策略出錯都算嘞，最離譜係佢嘅對答，簡直係挑戰全港觀眾嘅智慧，當晒個個都好似佢自己咁蠢。有記者提到早排曾凸首要求眾高官睇清楚自己名下物業有冇僭建，條友竟然答話當時有揾合資格人士睇過，但係凸首冇再問番單嘢，所以就冇講喎。即係話阿媽叫佢睇火，佢就淨係識睇住個火，就算煲乾水甚至燒埋個廚房都唔會有其他反應。如果條友所言屬實，佢唔止冇資格做凸首，就連做一個普通人都唔係好掂囉！

條友唔掂就係人都知啦，不過有樣嘢好奇怪，佢班智囊冇理由都係咁低能啫，佢地點解唔教吓條友點講嘢呢？唔通呢班所謂智囊，真正身分其實係X囊？好似任總咁，琴日仲高調走出嚟撐條友。唔通任總以為自己真係沙皇，講乜人地都要照單全收？計我話，都係揾唔同蠢人做朋友嘅星爺出嚟撐場好啲，起碼可以添加啲喜劇元素，港人會比較buy囉。

連我咁冇所謂嘅人都覺得唐豬應該收皮，其他人就更加唔使講啦。一時之間，要求條友退選嘅人多如過江之鯽，其中仲不乏重量級人馬添。好似葉瘤咁，早兩日就挺身而出，狂踩唐豬之餘，仲話會積極考慮參選。見佢拳拳到肉，招招攞命，真係忍唔住讚嘆一聲：好一隻老虎乸！

講真，我一向對葉瘤冇乜反感，仲覺得佢好能幹添。佢同震鷹哥旗鼓相當，如果真係參選，絕對會係一場狼爭虎鬥，比豬狼對決肯定好睇得多。究竟龍年會唔會變成狼虎之年，我就不作預測嘞，大家拭目以待啦。

講開龍年，又忍唔住要插多唐豬一嘢嘞，明知自己本命年犯太歲就信吓邪啦。話時話，唔知條友嘅智囊團裏面有冇啲玄學大師呢，如果冇就真係太失策喇。其實選委會都絕對應該加入玄學界別，俾啲玄學大師揀凸首，我相信起碼會有個譜囉！

Himalayan wolf, Padmaja Naidu Himalayan Zoological Park, Darjeeling, India

Padmaja Naidu Himalayan Zoological Park, Darjeeling, India

Taman Safari, Bogor, Indonesia

恩難酬白骨，淚可到黃泉

呢兩句詩係出自清代才子袁枚手筆，用以悼念亡故嘅祖母。講到袁大才子嘅詩作，我淨係識得呢兩句，因為九十幾年前會考中文科課程裏面有一篇範文「深情與至誠」引述過。早幾日喺網上無意中見到呢兩句詩，當堂令我記番起一段陳年往事，跟住又聯想到兩個可惡賤人。

話說當年臨近會考，已經唔使再返學。有日喺屋企溫緊書，一個平時冇乜兩句嘅鄰居竟然登門造訪。我同佢根本講唔上有乜嘢交情，淨係知道佢都係同一屆嘅會考生。寒暄咗幾句就入到正題，原來佢想交流吓會考嘅嘢。我都覺得有啲奇怪，點解佢會知道我係一個高材生呢，雖然敝校當時仲係處於垃圾級別啫。再傾多兩句至知佢係讀文科，咁就冇乜好交流啦，因為我讀理科。見我面有難色，佢亦唔再轉彎抹角。原來佢知我讀嗰間係官校，想問我攞啲中文科試題嘅內幕貼士。都唔知好嬲定好笑，莫講話我根本冇乜嘢內幕貼士，就算真係有，我都唔會醒佢啦。就當我有，但係醒咗佢又對我有乜好處呢？如果啲料係堅嘅，棧多個香爐多隻鬼。如果係流嘅仲弊，佢實以為我存心跣佢，話唔定會尋仇添。估唔到佢十幾歲人思想仲咁幼稚，以為教育署會派晒啲試題俾官校。有時間溫吓書仲實際啦，竟然做埋晒啲咁無聊嘅嘢。

打發完佢之後，我直頭由心度笑咗出嚟，因為我好肯定有一個人會墊我底，雖然只係中英數三科。講真，如果佢係虛心求教，我都會醒啲好嘢俾佢囉。當然唔係內幕貼士啦，不過第六感話俾我知，嗰年一定會出「深情與至誠」呢篇範文。事實證明，我嘅第六感好堅，嗰年真係出咗。至於條題目係點就一啲印象都冇喇，因為我都冇揀到嚟答。唔揀嘅原因係我根本唔認同作者嘅觀點，就算勉強答都肯定唔會答得好，所以我直頭費事嘥時間溫呢篇添。

如果我冇記錯，呢篇文章嘅主旨係：要有好嘅文學作品，先決條件係作者要懷有深情同至誠，否則就算造詣幾高，都一定會露出馬腳。文章引述咗上面提及嗰兩句詩，指出袁大才子其實好涼薄，從「白骨」二字就可以睇到。對於作者嘅觀點，我當時並唔認同。首先，我唔覺得嗰兩句詩有問題。而且，只要枝筆掂，又有乜嘢寫唔出呢，如果會露出馬腳，都係因為功力未到啫。

不過隨住閱歷增長，我又有咗新嘅體會。原來點老奸巨猾都好，啲人都會不自知咁流露出本來真面目架。就好似上面提到嘅兩個賤人（咁啱都係姓李嘅添），即係發表四川地震天譴論嘅嗰件蛋散，同埋致力游說歐美圍堵中國嘅嗰條狀棍。呢兩個賤人凡係中國嘅嘢都鬧，表面上都不知幾大義凜然，等人以為佢地係愛之深責之切。但係睇清楚啲佢地嘅言論，就會發覺裏面充斥住惡毒嘅咒罵，簡直係同中國有不共戴天之仇，想置諸死地而後快。都唔明點解呢啲賤人都會有市場，唔通香港人真係睇唔出佢地嘅用心？

所以話呢，其實名家哲人嘅觀點絕對好有參考價值，睇嚟會考取消咗範文真係好不智囉！不過話時話，我到而家都仲係睇唔出袁大才子嗰兩句詩有乜唔妥，唔通我嘅中文水平真係咁低？

Skull map, S21 Concentration Camp, Phnom Penh, Cambodia

National Museum of Anthropology, Mexico City, Mexico

Bosra, Syria

Ancient royal tomb, Axum, Ethiopia

情人節快樂！

祝大家情人節快樂！

哈哈，而家至講會唔會遲咗啲呢？！冇所謂啦，有心唔怕遲，十月都係拜年時嘛！而且我相信，情人節最緊要嘅慶祝活動，好多人都仲未開始囉！

其實我一向對啲冇假期嘅節日唔多感冒，可能係我個人比較功利啦，覺得節日嘅價值係在於有假放。講真，我都覺得好唔合理，點解情人節唔係公眾假期呢？喺香港呢個重洋輕中嘅社會，對於大多數成人，甚至好多早熟兒童嚟講，情人節嘅重要性應該只係緊次於聖誕節。

情人節同中秋節一樣，慶祝活動主要都係喺夜晚進行。如果可以好似中秋節咁，第二日唔使返工返學，冇咗後顧之憂，玩都玩得盡情好多啦。最好連公共交通工具都延長服務時間，咁就真正造福人群嘞。

香港真係有好多無厘頭嘢，例如為咗政治正確，夾硬將佛誕納入法定假期。其實又有幾多屋企有拜神（指滿天神佛）嘅人，真係知道佛誕係邊一日呢？而家仲有人倡議將孔誕列為公眾假期添，根本就完全脫離實際。如果政府真係想做到以民為本，首先要考慮嘅應該係情人節囉！

哈哈，唔好意思，忘記咗啲暫時仲未有另一半嘅朋友添！其實一個人自由自在都幾好丫，起碼樂得耳根清靜。覺得悶又隨時可以揾番件，真係恨死好多人架！

Bled, Slovenia

Durnstein, Austria

Bergen, Norway

Bergen, Norway

Raykjavik, Iceland

Raykjavik, Iceland

假蛋疑雲

早兩日電視新聞報導，大陸又發現疑似假雞蛋。畫面所見，煮熟嘅蛋黃極富彈性，掟落地唔止唔會散，仲彈得勁過乒乓波添。其實呢樣嘢都已經唔算係新聞，澳門早前就發現過類似嘅乒乓蛋，因而引起一陣恐慌。後來經過檢測，證實懷疑有問題嘅乒乓蛋全部都係真嘢，根本唔係假貨。據專家推測，啲蛋可能係放置喺零下低溫環境太耐，又經過長時間搖晃，先會令到蛋黃產生彈性。事實上，呢種情況又真係同冬天運輸雞蛋好吻合。除咗呢個原因，亦可能係雞隻飼料加咗太多棉籽餅，當中嘅棉酚令雞蛋出現變異。棉酚係有毒物質，會導致男性不育。如果啲蛋真係受到棉酚污染，咁就千祈唔好食咁多喇，除非想避孕啦！

雖然啲蛋出現咗變異，但係始終係真嘢。不過好多人硬係神經過敏，一發現啲蛋有些微異樣，就一口咬定係假嘢。喺網上隨便摷吓，好容易就揾到大量報告買到乒乓假蛋嘅網頁。其中呢篇題為「我居然买到了假鸡蛋！」嘅文章可謂圖文並茂，難得啲相仲好清晰添。作者除咗同廣大網民分享佢買到假蛋嘅經歷，亦教埋大家點樣分辨假蛋，都算係一個有心人喇。不過睇清楚啲相就真係笑到趴街，嗰啲根本就係真蛋，人頭博芋頭我都敢！如果可以造到由內至外都咁逼真，咁就唔係假蛋，而係一件完美嘅藝術品啦。應該攞去博物館俾人參觀，或者放喺魯班廟供奉。莫講話咁完美嘅技術，就算只係做到可以亂真嘅蛋殼，都已經係一條財路啦，絕對可以賣去南非囉，嗰度啲鴕鳥蛋殼都不知賣得幾貴！

大家可能會覺得我太武斷，喺冇實質證據支持嘅情況下就作出結論。為咗證明真蛋可以變成乒乓蛋，琴晚特登買咗四隻雞蛋做實驗，一於嚟個以身試蛋。首先，煮飯用咗三隻蛋，整咗個XO醬金菇炒蛋。講開又講，XO醬係私房出品，幾正架，而個餸都整得唔錯，送飯最啱。測試結果係，啲蛋外觀好正常，又有蛋味，絕對係真嘢。淨番嗰隻蛋就放入冰格雪一晚，今朝烚嚟做早餐。烚咗大約三十分鐘，隻蛋肯定熟透。首先食蛋白，口感比較淋，不過味道就好正常。跟住攞個蛋黃做彈力測試，因為最後仲要試味，所以冇掟落地下，而係掟落隻碗。結果蛋黃冇碎到，而係好似膠波咁彈吓彈吓。然後做壓力測試，輕輕㩒吓，感覺幾實淨，仲有少少彈性。再大力啲，隻蛋黃㩒到扁咗都冇散到。將隻蛋黃開邊，就發覺斷口質感比較光滑，同一般熟蛋黃有啲分別。再用一邊蛋黃做壓力測試，仍然冇散到，只係出現咗一條裂痕。最後係試食，口感實中帶爽，完全唔係熟蛋黃嗰種粉嘅感覺。至於味道方面，就同正常蛋黃冇乜分別。綜合各項測試結果，同網上嘅乒乓蛋描述完全冇分別。所以我嘅結論係，零下低溫的確可以令蛋黃產生變異。如果再將隻蛋搖晃幾粒鐘，效果可能會更明顯添。當然啦，我雖然有求證精神，但係就點都唔會傻到咁做囉。

講到嗰位覺得自己買咗假蛋嘅網民，我只可以話佢無知。不過對於另一位網民，我就一定要用無恥嚟形容嘞。有個台灣網民發表咗一篇題為「假蛋已來台（請小心） ~ 大家要注意囉嗦 ! 」嘅文章，內容竟然係一字不漏咁喺上面提到嘅大陸網民嗰篇文章搬過嚟，只係冇搬到啲相啫。佢冇提到篇文章係轉載，咁已經等同盜竊。而且文章係以第一身敘述事件，再加埋危言聳聽嘅標題，呢位網民分明係存心以虛構嘅情節誤導公眾，等人以為台灣已經受到乒乓假蛋侵襲。就算佢只係想提醒公眾要小心假蛋，咁做都係絕對唔應該。用造假手段叫人提防造假，根本就係賊喊捉賊，咁同啲人用暴力手段爭取民主又有乜分別呢？！

記得以前學校教過「曾參殺人」呢個典故，不過係中學定小學就一啲印象都冇嘞。唔知而家學校仲有冇教呢？

Yerevan, Armenia

Ostrich egg shells, Johannesburg, South Africa

Ostrich egg handicraft, Johannesburg, South Africa

XO醬金菇炒蛋

實驗材料

實驗材料

烚完30分鍾

烚完30分鍾

壓力測試

開邊蛋黃

壓力測試

凍冰冰嘅眾多生平第一次

呢幾日又凍番，救命呀！雖然香港凍極都係10度上下，不過就已經搞到我朝早唔願起身，夜晚唔想沖涼。其實後生嗰時唔算怕凍，起碼唔覺得香港嘅冬天好難頂。記得有一年成年都沖凍水涼，嗰年最凍都試過10度以下。當然，如果凍到會落雪，咁又係另一回事啦。

生平第一次見到落雪係82年喺新疆，嗰時只係八月中，吐魯番同烏魯木齊仲仍然好熱，但係天山上面已經落雪。嗰次原本只係去天池玩，完全冇諗過要上山，所以只係著住一件薄如蟬翼嘅短袖T恤。不過喺天池撞到一班HKU學生，臨時決定同佢地一齊上博格達峰雪線，求其租咗件羽絨背心就頂硬上，仲喺山上住咗一晚添。雖然從來未試過咁凍，但係都勉強頂得住。其實嗰次算唔算落雪都好難講，因為只係疏疏落落嘅雪粉，同我想像中嘅落雪根本係兩回事。估唔到，真正嘅鵝毛大雪，喺十日後竟然俾我見到。

按照原本計畫，玩完天池就會落南疆，逐站玩到落喀什。不過喺庫爾勒聽到人講話巴音布魯克好正，所以又臨時更改行程。巴音布魯克位於天山上嘅一片盆地，嗰度水草豐盛，據聞係中國第二大草原。由庫爾勒去巴音布魯克，首先要到和靜，然後再搭兩日長途車，所以前後用咗三日。由和靜開始，車程主要都係上山路，行行吓仲落起大雪添。其中有一段因為路面情況惡劣，所有乘客都要落車，我就趁機喺路邊堆咗生平第一個雪人。雖然由於時間所限，個雪人只係侏儒版，但係對於未見過雪（雪櫃嗰啲唔算）嘅我，已經覺得好滿足。至於之前喺博格達峰，雪線以上嘅全部都係冰，所以冇得玩堆雪人。

去到巴音布魯克，雖然冇落雪，但係就好大風，感覺上真係好凍。因為冇預到會去啲咁凍嘅地方，帶嘅全部都係薄衫，就算著晒上身都仍然覺得好寒，最難頂係啲外露嘅地方，好似耳仔、頸、同埋對手。唯有即刻走去買咗頂羊皮帽，加埋之前喺庫爾勒嘅一對勞工手套，都叫做頂得吓，雖然上身其實唔係好夠暖。

有樣嘢好奇怪，我著一條牛仔褲都冇問題，但係啲本地人當時已經著緊四條長褲（一條面褲加三條虧佬褲），真係誇張到爆！聽聞嗰度最凍可以去到零下三十幾度，咁啲人冬天係咪要著十條褲呢，就算著得落都行唔到路啦。等我仲以為當地人已經習慣晒，一定比我地啲南方人捱得凍添。

過咗兩三年，唔知邊個同事抽起條筋，話過年想凍吓，要去杭州北京玩。吸取咗上次嘅教訓，今次準備就好充足，厚衫、毛毛帽、頸巾、皮手套呢啲當然不在話下，仲連耳套同leg warmer都出埋添。嗰年華東大雪，杭州完全變咗白色世界，雖然我地去到之後已經冇再落雪，不過有啲地方積雪仍然有膝頭咁深。見到咁多雪，但係就冇再低能到玩堆雪人，始終已經成熟咗唔少。嗰時玩嘅係另一樣更過癮嘅嘢，生平第一次雪戰。因為唔係新雪，所以有少少硬，俾人掟中都幾係嘢架。仲有一樣更甘，就係啲雪跌咗落條頸，嗰種感受真係好攞命！

跟住去到北京，雖然冇落雪，但係昆明湖就凍到結晒冰。生平第一次踏冰而行（溜冰場嗰啲唔算），對腳竟然唔覺得特別凍，亦冇想像中咁跣。其實喺市內有冇雪都冇乜所謂，我最希望係見到長城鋪晒雪。因為長城之前喺夏天去過，感覺唔係太特別，如果有雪應該會靚好多。可惜事與願違，去到八達嶺真係有啲失望，唔止雪都冇滴，周圍仲枯枯黃黃，而且又大風，差啲吹到變人乾。不過都算有啲收穫，因為嗰日生平第一次感受到零下16度低溫。雖然聽起上嚟好係好凍，但係實際上又唔算好難頂，可能係由於有太陽啦。反而另一日喺北京市內，就經歷咗生平第一次凍到由心震出嚟嘅感覺。嗰日氣溫其實唔算好低，大致徘徊喺兩度左右，不過就好大霧，濕度好高。到而家仲記得好清楚，透骨嘅寒意慢慢咁滲入嚟，就算著咗幾多衫都擋唔住。

之後都有去啲凍嘅地方玩，雪亦見過唔少，但係點都冇北京嗰次咁難頂。當然啦，大家可以話我見識少，根本未去過啲真正凍嘅地方。事實係，嗰啲郁吓都零下三四十度嘅地方（例如中國東北），我就絕對唔敢見識囉！哈哈，夏蟲不可語冰，我認架！

博格達峰, 天山, 新疆

雪人, 巴音布魯克, 新疆

巴音布魯克, 新疆

西湖, 杭州, 浙江

昆明湖, 頤和園, 北京

長城, 八達嶺, 北京

變色龍

之前講到高登仔條「蝗蟲天下MV」極度侮辱中國人，歌詞中就有咁嘅一句：蟲國化名叫支那。相信好多香港人都同我一樣，一早就知「支那」係對中國嘅蔑稱。但係國內人對「支那」一詞有幾反感，可能未必個個香港人都清楚嘞。今日想同大家分享吓幾年前喺網上見到嘅一單小風波，單嘢由「支那」一詞引起，亦令我明白到原來對於一個簡單嘅詞彙，唔同族群會有好唔同嘅感受。

話說幾年前追開韓劇，間中都會去吓有關網上討論區，不過只限於睇，從來唔會留言。有次睇到一個post，討論好踴躍，來自國內、香港、台灣嘅網民都有參與。其中有個睇嚟係韓劇專家嘅台灣妹，不斷提供資料，解答其他網民嘅問題。眾人談談笑笑，氣氛融洽到不得了，睇到我都有啲感動。大家都知啦，網上世界一向多紛爭，就算唔係討論時事或政治，喺啲娛樂討論區，網民都可以因為捧唔同嘅偶像而大吵大鬧。兩岸三地網民可以融洽相處，老實講，我真係好似未見過囉。

點知好景不常，就係因為兩個字，討論氣氛就即刻完全逆轉。台灣妹提到中國嘅時候，竟然用咗支那二字，雖然留言並冇負面意思。我估佢係綠營粉屎，平時喺台灣嗰邊用慣咗，一時唔記得改口啫，其實條留言並無惡意嘅。但係有大陸網民就不由分說，即刻留言鬧爆台灣妹。佢兩個原本仲傾得好投契，估唔到話反面就反面，竟然一啲先兆都冇。跟住其他大陸網民亦紛紛加入戰團，狂插之餘，仲扯埋兩岸議題嚟講。台灣妹不甘受辱，亦留言反擊，雖然只係單槍匹馬，仍然負隅頑抗。一時之間，韓劇討論區竟然極速變身成為政治討論區，仲犀利過變形金剛。而一班香港網民就消聲匿跡，似乎喺度隔岸觀火。最後台灣妹都係寡不敵眾，落得曳甲而逃，事件先得以平息。

大家可能會覺得喺事件之中，啲大陸網民實在係太敏感，台灣妹只係無心之失，唔需要有咁大反應。事實係，講到膚色、種族、宗教呢啲嘢，人會變得冇理性可言。就算係有爭拗，鬧乜都冇所謂，但係呢幾樣嘢就點都唔掂得，除非同對方有不共戴天之仇啦。喺大陸，支那二字已經同日本侵華扯上關係，肯定會牽動民族情緒，又難怪啲國內人會有咁大反應囉。

所以我話，高登仔喺歌詞裏面用咗呢兩個字，如果唔係無知，就係惡毒到極點！而韓劇討論區事件亦令我體會到另一樣嘢，原來人竟然可以喺一秒間變臉，真係勁過變色龍！

Souvenir bought in South Africa

蝗蟲與狗

首先，想喺度澄清吓拙文「狗噏風波」嘅觀點。我絕對無意幫孔某開脫，佢咁講嘢，當然係冇品，完全配唔起北大教授嘅身分。有關短片引致全港聲討，可能係有好多人俾媒體嘅精選版本誤導，以為佢鬧晒所有香港人係狗。如果真係咁，我強烈建議大家摷番個七分鐘嘅完整版本睇吓。似乎多數人將焦點集中喺孔某嘅狗噏，而忽略咗佢亦有佢嘅理據，當中有部份我都覺得並非完全無理。例如嗰啲唔肯承認自己係中國人嘅香港人，我就好唔認同嘞，不過我唔會譴責呢啲人，而係覺得佢地自欺欺人。我唔知有幾多香港人會好似我咁諗，不過呢樣根本就唔緊要，因為孔教授嘅目標係國內市場。相信經此一役，佢已經成為好多國內人心目中嘅民族英雄，正如喺港鐵主持正義嘅嗰位四眼哥哥俾好多港人封咗做偶像一樣。

單嘢掀起新一輪中港罵戰，一時之間，你一句港狗，我一句蝗蟲，中港網民真正打成一片。有高登仔甚至喺報紙登蝗蟲廣告反擊，令矛盾進一步升級。戰火亦蔓延到香港本土，連我一年前嘅舊文「蝗蟲天下」，都有疑似高登粉屎入嚟留言辱罵。而校長嗰邊就熱鬧得多嘞，篇鴻文「誰是蝗虫 --- 張堅庭說得實在太好」嘅留言多如雪片飛來，當中唔少仲帶有火藥味添。今日想攞其中一條留言講吓，唔喺校長嗰邊回應，係因為我一向唔鍾意喺人地嘅地方搞事，希望校長唔好介意。

以下係節錄自一位署名Alan嘅網民題為「反蝗蟲 ~ 反雙非 ~」嘅留言：
反蝗蟲 尼個 term, 我會一直照用 ~
因為我唔係針對一個種族 or 人 ~
蝗蟲 指 侵略別人資源既人 ~
。。。。
如果你罵我, 叫人蝗蟲是歧視別人 ~
咁請係係罵我之前, 罵左叫香港人是狗的人先 ~
另外, 我用蝗蟲是指, "侵略別人資源既人" ~
如果你 "沒有 " 侵略別人資源既人 ~
咁請你唔好自己把自己對號入坐
。。。。
如果我們今日唔反抗, 將來無人反抗既時候, 剩下你一個既時候會點 ?
做人要睇長遠的, 唔好為了眼前短少既利益而放下原則 ~

唔通呢位Alan真係唔知道？蝗蟲一詞發揚光大，並唔係近期嘅事，而係始自一年前高登仔（本文提到嘅高登仔都係指部分高登仔）製作嘅「蝗蟲天下MV」。至於蝗蟲係指邊啲人，而當中又有冇歧視成份，睇過條片嘅自然心裏有數。雖然上載者喺簡介度咁樣強調：「希望大家注意蝗蟲只是指某部份嘅大陸人」，不過歌詞就有以下呢幾句：
其實見這個國家 偷呃拐騙到家
高呼一句中國人誰人亦怕
蟲國化名叫支那 一早醜遍東亞

好明顯，蝗蟲係泛指中國人，而唔係上載者所講嘅「部份嘅大陸人」。睇嚟高登仔唔係思覺失調，就係有文字障礙，竟然可以自相矛盾成咁。歌詞極度侮辱中國人，根本係不可爭辯嘅事實。連我呢個喺香港土生土長嘅中國人都睇唔過眼，如果啲國內同胞見到，又有乜可能唔嬲到爆呢！條片上咗youtube，到而家已經有超過八十萬點擊，啲同胞點都唔會唔知有樣咁嘅嘢啩。究竟引發中港罵戰嘅係高登仔定孔教授，就留番俾大家自己判斷嘞。喺鬧爆孔教授嘅同時，大家不妨撫心自問，你地又係咪認同製作條片嘅高登巴打呢？

我當然知道有部分國內人嘅行為的確惹人反感，亦唔會反對攞呢啲問題出嚟討論，甚至嚴詞譴責。不過用非理性嘅謾罵，甚至對整個國家民族嘅侮辱嚟作回應，我就絕對唔可以認同嘞，因為帶嚟嘅只會係反效果。

當大家都知道蝗蟲泛指中國人，而Alan君就叫人唔好「自己對號入坐（座）」，咁又有乜意義呢？如果佢真係唔想引起不必要嘅誤會，我會建議佢用過另外一個詞囉。反過嚟講，孔教授亦唔係鬧所有香港人都係狗，如果唔屬於佢講嘅嗰幾類人，Alan君亦冇需要對號入座。

Alan君又話香港人要「反抗」、要「睇長遠的, 唔好為了眼前短少既利益而放下原則」。雖然佢冇講到具體上點反抗，不過睇番網上觀點類似嘅言論，都不外乎對同胞謾罵同拒絕國內人來港，講得簡單啲，就係要香港玩自閉。如果Alan君確實係咁嘅意思，我就真係好驚訝於佢嘅長遠目光嘞。自閉呢家嘢，中國都玩過，後果係點自有公斷，都唔使我多講啦。

前面提過非理性對抗只會造成反效果，琴日睇日月報就見到一個佐證嘞。有班中港大專生抗議蝗蟲廣告，話咁係種族歧視。內地學生嚟香港讀書，自然會受到我地嘅文明同文主氣息感染，長遠嚟講，對中國嘅健康發展會有好大幫助。而家挑動埋佢地嘅對抗情緒，我就真係睇唔到有任何方面會得益囉。

對於有關大專生嘅抗議行動，中大社會學系副教授陳健民就有咁嘅回應：「同民同種，用種族主義是講不通。」對於陳教授嘅學術（或法律）觀點，我當然唔敢質疑。我只想提出一點，應該係「同文同種」而唔係「同民同種」囉，都唔知係陳教授定係日月報嘅記者仔搞錯。

而平機會亦就蝗蟲廣告作出評論（引述日月報）：
平機會發言人表示，港人與內地人同為中國人、即同屬一個種族，根據法例而言，有關針對內地人作出中傷性、諷的言語，不構成種族歧視。但發言人強調，「不觸犯種族歧視法例不代表是正確，不希望社會出現有違平等共融、互相尊重價值的言論」。

估唔到講得咁四平八穩都會出事，今日喺日月報竟然睇到一篇好搞笑嘅報導。有網民指摘平機會帶頭歧視，話內地人係蝗蟲，因為有關廣告裏面嗰隻係草蜢，而唔係蝗蟲。真係笑死人，嗰隻係草蜢定蝗蟲，大家心裏有數。估唔到啲疑似高登仔嘅水平可以低得咁緊要，呢個所謂辯解，根本低能到連狡辯都唔算，只不過係老翻癲狗嘅癲瘋之作，將「X街」變身做「不該」同「poor guy」。如果香港真係玩自閉，將來由呢班人當家作主，後果會係點我就不作預測嘞，大家自己想像啦！

Georgia

Lobeysa, Bhutan

狗噏風波

北大教授單狗噏事件鬧得沸沸揚揚，網民紛紛發表評論，搞到我都有啲痕，忍唔住要學人講埋一份添。不過事先聲明，我份人冇乜涵養，如果講得唔啱聽就當我狗噏啦，要插就無謂嘞！

單嘢喺我去咗旅行之後發生，喺非洲呢啲蠻荒之地，連電話都費事開，所以香港發生乜嘢事，原本都唔會知道。都係多得一位身在非洲心在港嘅團友，全靠佢日日上網睇香港新聞，朝朝向大家做早餐匯報，我先知有單咁嘅嘢。呢位團友一連講咗幾日，鑊鑊都講到咬牙切齒。直到年初三，喺鬧爆孔教授同廣大國內同胞之餘，佢仲忿忿不平咁話：點解香港九七嗰時唔獨立呢！聽到呢度，我差啲啲就忍唔住，想開聲反駁佢。不過最後我都係冇出聲，初三赤口，費事搞咁多嘢啦。

真係唔明白，點解佢幾十歲人仲可以咁天真嘅呢，連香港獨立都噏得出。講大原則，香港根本唔應該獨立，而睇實際環境，香港亦冇條件獨立。其實呢位團友想唔做中國公民都應該冇乜難度，佢兩公婆年年用一百幾十萬去旅行，絕對係有米之人，要移民真係話咁易啦。有能力走又唔走，但係就日日喺度鬧，你話有乜謂呢。話時話，我相信香港有好多人都係咁嘅心態。

講番孔教授嘅言論，條片我返到香港先上網摷嚟睇，果然極盡挑釁之能事，話係狗噏都不為過。問題主要出喺佢嘅態度，簡直囂張跋扈到無倫，對於一啲自覺比國內同胞優越嘅香港人嚟講，當然係難以接受。但係睇清楚佢嘅論點，就會發覺唔係完全無的放矢。所以呢一番言論，極有可能代表咗一部份國內人嘅心聲。

事實上，孔教授並冇話所有香港人都係狗，佢仲講過香港都有好多好人添。佢亦提到香港有比國內優勝嘅地方，例如法制。根據我嘅理解，佢話係狗嘅香港人，主要有幾類。第一，唔肯承認自己係中國人嗰啲。第二，同國內人溝通，故意唔講普通話嗰啲。第三，自恃殖民地遺民身分，歧視、欺負國內同胞嗰啲。我睇嘅片係七分鐘完整版本，應該係最全面。如果大家睇嘅係某互動媒體嘅兩分鐘精選版本，觀感當然會完全唔同。

講到國民身分認同，香港真係有好多人唔承認自己係中國人。早排港大嘅一個有關民調就引起一場小風波，最後仲扯埋干預學術自由嚟講，都咪話唔搞笑。更搞笑嘅係政府想喺教育同宣傳上做啲嘢，增加港人對國家嘅歸屬感，但係咁都要俾人鬧，香港都算係舉世無雙喇。正如孔教授所講，香港已經優勢盡失，全靠阿爺照住。呢個係鐵一般嘅事實，國內人自然好明白。香港攞盡阿爺著數，但係偏偏有好多香港人唔肯認自己係中國人。以國內人嘅角度嚟睇，咁樣根本就係食碗底反碗面，真係唔嬲至奇啦。

至於普通話，又真係有好多香港人唔肯學或者唔俾心機學，完全搞唔清佢地係乜嘢心態。對於一個國家嚟講，有一種共通語言係理所當然嘅事，根本冇得異議。香港人唔識普通話，蝕底嘅最終都係自己。當然啦，呢種情況唔係喺香港先有。我去上海出差，當地同事講上海話，我一句都聽唔明。去北京出差，啲同事講嘢猛咁捲脷，我淨係聽到一半。講真，我覺得班友好討厭囉。呢種山頭主義，對任何人都唔會有好處。

以上兩點都未必係個中矛盾嘅主因，我覺得香港人對大陸人長期以嚟嘅歧視先係關鍵所在。由八十年代開始，香港人已經叫國內人做阿燦，後來又出現咗北姑、北嫂、大陸喱呢啲名詞，最近仲將啲同胞貶為蝗蟲添。如果易地而處，大家究竟會有乜嘢感受，又會點樣反應呢？當然啦，呢個問題已經有咗答案。但係喺插爆孔教授嘅同時，香港人又有冇諗吓，歧視咗人地幾十年就好地地，而家俾人鬧番一次就發晒癲咁，會唔會有啲嚴人寬己呢？算嘞，基於言論自由嘅大原則，鬧爆一個北大教授根本唔算得乜嘢。香港人一向自由慣，上至國家領導人，下至販夫走卒，總之鍾意鬧邊個就鬧邊個。不過搞到要圍中聯辦，又要迫北大炒孔教授，咁就有啲唔妥當嘞。人地話晒都係知名學府嘅教授，發言當然有作為學者嘅觀點，而家搞到向官方機關施壓，咁又係咪干預學術自由呢？淫人妻女笑呵呵，香港人果然優為之呀！

講真，我只係以事論事，絕對無意幫孔教授護航。好似佢話香港人嘅質素係屬於全國比較差之列，我就唔多同意嘞。我當然唔會覺得香港人嘅質素高到識飛，事實上，嚴人寬己已經冇乜道德可言。唔理你認唔認都好，大家始終都係中國人，質素自然唔會有太大分別。你鬧吓我，我又插番你，大家半斤八兩，咁咪幾好囉！

Seal, Galapagos, Ecuador

劫根

劫根究竟係乜叉？相信呢條問題一定考起好多腦筋正常嘅人。照字面睇，應該係劫難根源咁解。原來正確答案係dragon嘅譯音，真係估佢唔到。不過如果用普通話發音，又咪話唔得喎。

話說國內有語文專家同學者，覺得唔應該將dragon譯做龍，就倡議另創新詞代替，劫根係其中一個選擇。班專家學者亦認為將中國嘅龍譯成dragon好唔妥當，建議用long、loong或者liong取代。佢地嘅諗法係，中國嘅龍同西方嘅dragon並唔等同。中國龍代表如意吉祥，而dragon就係一種有翼、會噴火嘅怪獸，形象邪惡、具攻擊性。正值西方流行中國威脅論，實在唔應該將龍同邪惡嘅dragon混為一談，因為龍一向係中國嘅象徵。

單嘢係最近喺報紙見到，睇完只可以話得啖笑。語文嘅嘢，根本唔係幾個專家話點就點，要人地受先得格。日日都有人自創新詞，有邊啲可以流行，邊啲會被淘汰，完全係由大眾決定，絕對唔係啲語文權威可以左右。

而且，並非所有龍都係好嘢，例如掘尾龍、烏龍、亂龍、追龍、托水龍等等，真係多到講唔晒。咁又係唔係要將全部有個龍字，而又帶負面意義嘅詞都改晒呢？

忽然諗到，如果dragon譯做龍有問題，咁dinosaur都唔應該譯做恐龍啦。Dinosaur有幾得人驚，睇過豬玀紀公園嘅都知道。暴龍兇殘成性，速龍就鍾意鬼祟偷襲，簡直映衰晒個龍字啦。如果根據班專家嘅思維，譯做恐龍就真係好有問題嘞。咁應該點譯至啱呢？我又想試吓喎，不如譯做呆拿傻啦。

講真，如果啲西人係要玩針對，就算將龍譯成long、loong或者liong又有乜用呢？無論點譯，人地都會將嗰個字當成負面詞囉！又好似喺香港，而家唔俾講賓妹同阿差，要叫菲傭同南亞裔，不過咁係咪表示佢地已經冇受到歧視呢？咪嘥氣啦！

九龍壁, 大同, 山西

華表, 堯都廣場, 臨汾, 山西

九龍壁, 北海, 北京

故宮, 北京

Khai Dinh Mausoleum, Hue, Vietnam

Khai Dinh Mausoleum, Hue, Vietnam

Dragon robe, Literature Temple, Hanoi, Vietnam

Huong River cruise, Hue, Vietnam