2010年7月19日星期一

麻雀三番四次事

三番
細個同屋企人打牌,食出鋪三番已經好威。嗰陣打三三制,有花,雞糊都俾食,最大數到四番。所以個個都死搶爛搶,除非一開牌就好靚,如果唔係就根本唔會做牌。其實嗰時阿伯阿毛仲係打緊二二制,我地已經係開潮流之先。後來越打越大(番數),由三翻起糊數盡八番,打到四翻起糊數盡十二番,最後仲打埋四四制添。結果打牌變成好公式化,鋪鋪死做爛做,冇乜牌章可言。咁打法完全係等運到,真係幾冇癮吓。所以後來轉咗打台灣牌,變化勁多,覺得好過癮。台灣牌可以好大,食出百幾番一都唔出奇。不過計錢就唔係好似廣東牌咁幾何級數上,係將一個基數乘個番數。但係台灣牌有拉莊,黑仔起上嚟都可以輸得好甘!

再大小相公
之前講過,如果發覺自己大小相公,千祈唔好自動投案。但係如果發現有人大小相公,又應唔應該督爆佢呢?呢個問題好難答,要睇實際情況。要留意吓個相公點打牌,睇佢知唔知道自己做咗相公。如果佢唔知,坐佢上家就不妨督爆佢,等佢誅死個下家。相反坐佢下家就最好扮無知,費事搞到自己。如果個相公已經知道自己衰咗,踢唔踢爆就各有好壞。好處係如果其他兩家未知,個相公會對佢地仲有牽制作用。壞處係個相公可能會博大霧,混亂中摸多隻牌或者打多隻牌出嚟。

奇牌
打牌贏錢當然開心,但點都唔夠食得出奇牌咁滿足。喺我嘅定義,大三元或者十三么嗰都唔算係奇牌,因為太容易食。要好似呢先算係奇牌:天糊、地糊、大四喜、十八羅漢、槓上槓上槓自摸、或者台灣牌嘅叻咕兩食。不過我又真係好失敗,打咗幾十年牌,淨係食過一次大四喜咁大把。

九子連環
雖然九子連環只係一鋪雞嘅清一色,但係就可能仲難過食奇牌。九子連環只得一種組合,就係好似下面幅圖咁。佢嘅難度在於摸齊十三隻就啱啱係咁嘅樣,過程中唔會有凸章。因為九子連環唔會加番,所以冇人會特登做,唔會話有得上唔上,有得碰唔碰,食得出完全係天意安排。我打牌咁耐,莫講話未見過,真係連諗都唔敢諗!

2010年7月18日星期日

麻雀接二連三事

照妖鏡
有人話麻雀檯係一塊照妖鏡,真係好有道理。唔怕你道行高深,識得七十二般變化,坐得落嚟就一定會現形。有人平時好斯文,但係打到興起就爆粗掟牌乜都齊。又有人平時好大方,但係打起牌嚟就好賴貓。明明莊家已經打咗第一隻牌,人先至發覺自己小相公,但係就死都要人俾佢摸返隻牌。或者隻牌打咗出街又係都要攞返。又或者輪到自己摸牌但係俾人叫碰,明明只係啱啱攞起隻牌,都要死唔蝕底甩一甩先放返落去。又見過男人老狗居然滿口啋啋揚揚,但係平時都不知幾man。如果閣下俾我講中咗就真係得罪晒喇。總之有則改過,無則嘉勉啦。我自己申報,我係爆粗同拍爛檯嗰隻!

醒目仔
唔好以為醒目仔打牌就一定掂,我就識得一個世界仔,做都算幾精叻,但係打牌就好低能吓。話說有一鋪牌已經去到終局,最後嗰隻牌輪到醒目仔打。其中一家有碰有上,根本冇可能係大牌。另外兩家都係十三隻齊全,而地下么九又寥寥可數,擺明有人做緊十三么啦,仲極有可能兩家都係添。其實醒目仔已經見到風頭火勢,衰就衰在佢手上全部都係么九牌。佢諗咗好耐,卒之打隻東(其實我都唔記得係咪東,當住係先啦)出嚟,俾我食咗十三么。見佢諗咗咁耐,我地就睇吓佢究竟揸住乜牌啦。點知唔睇由自可,一睇就笑到個個反晒艇。原來佢手上仲有另外一隻東,佢係見到東最熟章所以先打出嚟,因為地下已經有兩隻東。其實地下出咗兩隻,佢自己又手揸一對,只要攬住對東唔放就點打都唔會輸啦。雖然佢出沖俾我,但係我都忍唔住鬧咗佢一聲死蠢!

大小相公
做咗大小相公真係好不幸。但係大家有冇諗過,其實下家先係最無辜!如果真係咁不幸做咗大小相公,最緊要係不動聲色,千祈唔好自動投案。我就會全程用手遮住左右兩邊,等人地數唔到牌。點解要咁做?最主要係唔好俾其他人知道打少一家,等佢地有返顧忌。尤其是係上家,如果知道下家廢咗仲唔肆無忌憚咩。仲有係必要時(當然係好緊急嘅關頭啦)可以碰人卡窿,搞喎佢鋪大牌。如果一早現咗形就冇呢支歌仔唱啦。

塘邊鶴
有人好討厭塘邊鶴,而我就覺得冇乜所謂。因為我鍾意打花章,你睇得明咪睇囉。真係有師奶話睇我打牌睇到頭都暈。其實齋睇都冇問題,最衰係口眼並用嗰隻。例如見你打隻六萬,佢就話點解唔打七萬,係都要唱晒你牌出嚟先安樂。又有人睇到兩家牌,但係就一都唔避忌咁俾意見。最誇張嘅係見過有條友睇睇吓忽然起身,圍住張檯行咗個圈,晒其他三家牌,跟住又坐返低繼續做軍師教路。最搞係有次打雀局,有個企堂唔知係咪冇做,居然睇埋一份。睇都算嘞,仲要彈我地屎章,真係火都嚟埋!

竹館
雖然打咗幾十年牌,但係就從來冇入過竹館。自問係一等良民,咁雜嘅地方真係唔敢去。而且喺竹館打牌要好正路,有得上要上,有得碰要碰,又唔可以亂拆牌,完全唔係我嘅風格。我有時會發雞盲,有時會手抽筋,又有時會走吓偏鋒,如果喺竹館就實俾人打都得啦。

白痴Game
自從戒咗打牌之後,唯一接觸到麻雀嘅機會就係玩Mahjong Titans,即係下面幅圖嗰個game。不過呢個game真係唔好玩,睇到眼都花。仲要十鋪有九鋪都係死局,白痴到無倫!

2010年7月17日星期六

麻雀再二三事

瘋狂歲月
以前好鍾意打牌,真係到咗瘋狂嘅程度,直頭好似俾人落咗降頭咁。紀錄係一個禮拜打足六晚,仲要有四晚係通頂!又試過長週末喺貝澳租間度假屋,打足三日兩夜,真係打到天昏地暗。除咗吃喝拉撒,全程都係黐住張麻雀檯,連個海灘係點樣都冇見過。

通頂
次次打親牌都梗有大輸家要上訴,搞到欲罷不能,所以通頂係家常便飯。其實通頂都冇乜,沖個涼,換件衫,跟住就返工。以前真係好掂,打完通頂都唔會影響生產力,放工可以再打過。但係年紀越大就越唔掂,通完一晚頂第日就冇晒精神,對住個mon眼光光,好似遊魂咁,直頭想死。試過有一次真係好唔掂,坐喺度都不由自主咁舂吓舂吓。為咗唔想俾同事睇到,結果走咗入廁所瞓覺。

台灣牌
好多人話打過台灣牌之後就唔會再想打廣東牌。以前我都唔信架,但係試過之後就覺得好有同感。台灣牌打多三隻,挑戰性大好多。而且花款多到無倫,變化空間又大,打得好過癮。打廣東牌就好公式化,一味死做爛做,真係好單調。如果揸著副爛牌,就神仙都難救,絕對係勁冇癮。而台灣牌就唔同,就算係副雞糊牌,只要識得變化,隨時都可以好和味。仲有一樣,就係台灣牌細細隻,夾晒我手形。

花章
如果打牌唔打花章,硬係覺得少咗乜咁,唔夠過癮。就好似:蒸魚冇蔥、食飯冇酒、或者飲冇煙。打花章除咗夠挑戰性之外,仲有實際用途,就係唔會咁易俾人睇通自己牌。就算打台灣牌,我都照打花章,不過難度真係幾高吓。

詐糊
喺以前班雀腳之中,我都算係食得最多詐糊嗰個。食詐糊唔關打花章嘅事,就算係手上剩返一隻牌,單吊我都可以出事。食詐糊好多原因,有時係記錯牌,有時係發雞盲,不過最主要嘅原因係:冇得解釋!

2010年7月16日星期五

麻雀二三事

分手
唔經唔覺,同佢分咗手已經幾年。我都估唔到自己會咁有定力,竟然冇再過佢。曾經有一段時間,對佢嘅迷戀真係到達瘋狂程度,直頭係一日不見如隔三秋。不過同佢一齊真係開支好大,遲早會搞到破產。冇辦法啦,唯有忍著淚說goodbye。當時雖然有難受,不過總算係和平分手,冇發生血案,到而家我仲係十指齊全。佢係邊個?之唔係麻雀囉!

邂逅
我讀緊小學已經識打牌,係無師自通嗰隻。嗰時屋企成日有人打牌,睇得多就自然識,根本唔使人教。講真,廣東牌又真係幾簡單吓嘅。如果係台灣牌,齋睇冇人教嘅話就肯定睇十年都學唔識!

魔力
麻雀嘅魔力真係好大,有人為咗佢,幾大嘅犧牲都肯制。以前班雀腳當中,有兩三個師奶係唔食煙嘅,仲要係忍受唔到煙味嗰隻。但係其他雀腳就個個都係煙鏟,係打一晚牌可以食三包煙嗰種。如果唔係有麻雀賜俾佢地嘅神奇力量,嗰幾個師奶絕對冇可能忍受到漫長嘅煙燻過程。冇計啦,鬼叫佢地唔夠腳自己開一檯咩!

牌章
係人都知打牌要講章法,不過乜係牌章又真係幾抽象吓。咁點先算係高章呢?我覺得三樣最緊要:識計或然率,識睇牌路,同埋識捉心理。不過高章都唔係一定贏硬,仲要睇埋運氣。好多人話牌章同運氣嘅比重係一半一半,但係我就覺得三七會比較接近現實。有時老襯當旺,就算你牌章高到識飛都冇用,一樣俾佢打死。

2010年7月14日星期三

𡃁模=低俗?

前陣子𡃁模遭貿發局封殺,被拒在書展搞簽名會,事件鬧得沸沸揚揚。相信貿發局諸公(或豬公)是為了「順應民意」才作出這樣的決定,但手法卻是極其粗糙低劣。

據一𡃁模寫真集出版商稱,貿發局一聽到𡃁模名字,根本連書也沒看過就拒絕了簽名會的申請。當局給的理由是寫真集品味低俗,並不符合書展的健康形象及老少咸宜的要求。其後出版商變陣,為𡃁模推出寫真集的純文字版本,再度作出申請。然而有關申請再次被拒絕,理由是顧問團一致裁定:「作者在街外宣傳時被稱為𡃁模的人,均不獲批申請在書展場內辦簽名會」。

以言入罪聽得多了,但以名入罪還是第一次聽到,這是何等的荒謬!要給理由也得給個見得了人的吧,莫非貿發局諸公的一大把年紀都活在豬身上了?有關寫真集可以在書展中出現,但書中主角卻被拒諸門外,當局又怎能自圓其說?𡃁模能到高等學府參與研討會,但卻跨不進書展的門檻,不也太諷刺了嗎?

再說,何謂「低俗」也總得有個客觀的衡量標準吧。是取決於書中人物所穿衣服的布料多寡?還是取決於人物的神情和姿態?沒有交代有關標準而硬把𡃁模跟低俗劃上等號,無疑是將公眾當成了白痴!

說到底,𡃁模寫真集也只不過是一件商品,其品質應該由消費者鑒定。而書展也只不過是一個商品展銷會,只要書籍符合出版及銷售規例,實用不著有關當局持劍衛道。

況且,光說𡃁模低俗也絕不公平。且看一眾穿梭於大小波場的名媛,那個不是衣著性感(或暴露),煙視媚行?以程度而言,跟𡃁模也沒差多少。為甚麼名媛能受萬民仰望,而𡃁模卻要遭眾人唾罵?是因為名媛身分尊貴?還是因為她們穿的都是名牌晚裝?要是名媛也推出寫真集,又會否像𡃁模一樣遭到封殺?

有需求才會有供應,𡃁模現象其實是社會風氣使然。看看在黃金時段播放,而且收視極高的「獎門人」,在意識上能說不低俗嗎?港姐亞姐等節目不也在變相賣肉嗎?今屆亞姐更增添了「局部品評」的環節,真讓人無話可說。香港人接受得了這些,卻處處針對𡃁模,不是雙重標準還是甚麼?

在一個充斥著雙重標準的社會,平等和公義也只能是茶餘飯後的談資罷了!


2010年7月13日星期二

白灼花蛤

前日買咗死沙白,真係搞到一肚氣。而家諗起嗰陣屍臭味,仲有想作嘔。不過再之前整咗兩次花蛤就好正,真係回味無窮!

同其他蜆類比較,花蛤確係又易整又好食。就算稍為過熟都唔會太韌,而且特別鮮甜,唔需要借味,白灼已經好正。如果火候掌握得好,灼到僅僅熟(啱啱開口),絕對係鮮甜爽滑,味道同口感都一流。再點埋秘製嘅蒜茸辣椒豉油,增添少少香辣,真係算得上天下之美味!

而家電視講飲講食嘅節目成日標榜貴,睇到人流晒口水。但係我地呢草根階層,絕對只係得個睇字,連諗都唔敢諗。好似去X興食一塊白灼螺盞就要幾百蚊,你話有乜可能食得起?本來睇唔到都好地地,但係見到人有我冇,真係覺得好唔公平。呢咁嘅節目根本就係製造緊階級矛盾!

不過咁,我個人就好知足嘅,廿八蚊斤嘅花蛤都可以食得好開心。



2010年7月12日星期一

沙白

呢排唔知抽起邊條筋,好鍾意食貝類海產,琴日就買咗貴妃蚌同沙白。講起沙白就把幾火,買咗兩斤,竟然有超過一半係死嘅,仲要係死到發晒臭,肉已經半溶化嗰種。

買嘅時候睇唔出有問題,亦聞唔到有異味。梗係啦,街市魚檔本身已經係腥腥臭臭,而買呢又冇得逐隻揀,買到咁嘅貨色真係非戰之罪。返到屋企先聞到陣屍臭味,但係已經太遲啦。冇辦法啦,唯有逐隻聞吓,又試吓撬唔撬得開,結果揀完之後剩返唔夠一半。

最後沙白攞咗嚟白灼,肉睇起上嚟完全冇問題。點知試第一隻就覺得有異味,結果全部要報銷。都唔知係心理作用定係沙白浸得死屍水太耐,總之就博唔過啦。雖然唔係貴(30蚊兩斤),不過就真係好激氣。仲搞到我成晚形住形住,覺得周圍都係死屍味。

都唔知人乜心態,咁嘅貨色都可以攞出嚟賣。話明係街市,做嘅都係街坊客,來來去去都係嗰班人。賣埋咁嘅,人地下次仲會返嚟幫襯咩?唔通賣晒嗰幾十斤沙白就收夠籌,以後可以唔使撈?我就已經將嗰個魚檔剔出咗食品供應商名單,永不錄用!


2010年7月11日星期日

小人

琴晚喺電視見到李小人大發謬論,真係睇到眼火爆!雖然我一向都唔多鍾意白鴿黨,但係見到佢猛咁老屈呢個佢自己有份創立嘅黨,連我都睇唔過眼。

佢話白鴿黨太重視民調,放棄咗終極普選嘅原則。既然民調反映民意,咁重視民調有乜唔妥?只係堅持自己嘅原則而唔理大多數人點諗,呢唔係民主,係獨裁!唔通真係眾人皆醉佢獨醒?叫佢慳啦!枉佢仲話係乜民主之父,民主之恥就有佢份。

佢又話白鴿黨發表嘅報告唔能夠釋除公眾對檯底交易嘅疑慮。呢個絕對係有引導性嘅講法。最搞嘅係佢話何X仁講咗冇檯底交易,佢自己絕對相信。即係話公眾要唔相信係公眾嘅事,與佢無關。喺度扮晒好人,正一偽君子!既然佢自己都相信,而只係覺得白鴿黨份報告交代得唔清楚,咁就應該自己圍內傾掂數,睇吓份報告有乜要補充,而唔係公開話份報告唔得。

最攞命嘅係佢話白鴿黨走向建制。其實白鴿黨而家連溫和民主派都未算,只係由激進過渡到冇咁激進啫。話佢地走向建制,仲唔係老屈?條友咁講分明就係想隻白鴿死無全屍,因為扮民fan屎唔一定支持激進路線,但係就絕對憎死建制派。

條友仲驚隻白鴿死唔斷氣,再踩多腳勁嘅。佢話以前從來未聽過白鴿黨有人喺某一件事上面大讚政府官員,連民X聯都未試過讚得咁誇張。又拉埋建制派嚟講,佢都算惡毒喇。話時話,我就唔多覺有單咁嘅,但係條友又唔肯講明,搞到人一頭霧水。如果呢單只係喺白鴿黨嘅內部會議裏面發生,根本就唔應該公開講出嚟。

唔知邊個講過:君子絕交,不出惡言。條友既然唔認同白鴿黨嘅路線,咁和平分手咪算囉。但係佢居然出埋晒陰招,唔毒嗰句佢唔講,絕對係小人行徑。計我話,條友一定係嗰棄婦心態。男人移情別戀,女人就周圍唱衰個男人,要唱到街知巷聞為止。但係諗深一層,棄婦都唔會惡毒到想個男人死無全屍啫。終於俾我諗到喇,條友十足十天龍八部裏面嗰個康敏(馬夫人)。佢得唔到嘅男人就要親手毀滅,絕對唔會留返嚟益第個。聖人話:唯女子與小人為難養也。條友咁啱兩瓣都中晒!

仲有,真係好憎條友個死款。成日都眉頭深鎖,懶係憂國憂民咁,仲話唔係小人?我絕對冇人身攻擊,聖人都話啦:小人長戚戚。

李小人,以下係我私人醒你嘅:

打你個小人頭,等你有氣冇定抖!
打你隻小人手,等你有都唔識偷!
打你隻小人腳,等你有鞋都唔識着!
打你個小人忽,等你晚晚俾人拮!


2010年7月10日星期六

郴州

郴州是國內的二線城市,位於湖南省,鄰近廣東邊界。要不是前兩年媒體報導華南雪災時偶有提及,恐怕很多香港人也不知道中國有這麼一個地方。

對於我來說,郴州這名字卻一點也不陌生。以前到國內旅行,可不像現在動不動就飛來飛去,主要還是坐火車。郴州位於京廣線上,自然是南北往來必經之地。

印象最深的是乘火車南下,從北京到長沙還好,到了株洲便開始亂作一團了。株洲是個大站,下車的人很多,但上車的人更多,而且南方人比較積極進取,那有不亂之理。再到衡陽,混亂程度更是到了極點,只可以用可怕來形容。車廂裏擠得插針不入,座無虛席是當然了,過道也擠得密不透風,就連小桌子上也坐了人,甚至座位底下也躺了人。這裏要說明一下,當時為了省錢,買的是硬座票。在北京上車,座位當然有,但得硬坐36小時才能抵達廣州!

雖然擠得人也快要窒息了,但乘客還是沒有忘記他們的基本權利。要吐痰的總能找到地方吐,要抽煙的也慷慨地讓其他人分享著他們的二手煙。車廂裏煙霧瀰漫,仿如另類人間仙境(或地獄),那景像至今還是歷歷在目。

反正有座位,再擠也不是大問題。最麻煩的是要上廁所,百忍成金我可做不到。奈何坐在車廂中央,而廁所卻在兩端,正是行不得也哥哥。也虧當時年輕,而且身手敏捷,就像猴子般爬上行李架,輕輕巧巧的完成了任務。現在回想起來,當時也太魯莽了一點,萬一行李架塌下來砸傷了人怎辦?

待得到了郴州,感覺就好多了,因為家鄉已經在望。

現在的年輕人都在溫室裏成長,這樣的經歷對他們來說應該是難以想像吧。同樣地,我們這一輩對他們也真不理解。

話說回來,其實郴州這地方早在中學時候就知道了。話說有一天,某男同學在課本中發現了這名字,立時如獲至寶,想到了一條惡搞中文老師的妙計。在說明這條妙計(或毒計)之前,得先了解郴這個字。郴(唸作深)只有一個解釋,就是地名,而且不常用到。因為字形跟彬字很相近,對於識字不多而且懶翻字典的中學生來說,弄錯讀音實在正常不過。到了中文課,男同學就問了老師郴州兩字該怎唸,原意是要讓老師尷尬,我們班上可是有很多女同學的。老師隨口說了(當然是唸作深州),也沒留意為甚麼平常不發問的同學會突然變得這麼好學,更沒察覺到背後的大陰謀。也說不定他早已心知肚明,只是不動聲色而已。熱切期待的好戲就此泡了湯,一眾愛搞事的男生自然是失望透了。

回想起來也覺好笑,這還能算惡搞嗎?現在的小孩動不動就在課堂上用四字真言問候老師,真是後生可畏!相比之下,我們那年代的所謂惡搞絕對是小兒科,甚至可說有點低能。

人說三年一個代溝,看來不無道理。

後記:

在網上搜尋過,原來真有彬州這地方,現在叫作彬縣,屬陝西省,距西安不遠。宋代名儒范仲淹就是彬州人。


2010年7月9日星期五

鸚鵡大戰八爪魚

世界杯決賽即將揭開戰幔,不管荷西兩隊是否心中至愛,相信一眾球迷此刻也是望眼欲穿。然而另一邊廂兩隻靈異小動物卻已經較量起來,調劑了繃緊的氣氛。

眾所周知,自從神奇八爪魚保羅猜中了德國隊的各場戰果,已是紅透了半邊天。理所當然,牠對決賽的預測更是萬眾期待。這次牠還是選了西班牙,看來狂牛要成為頂頭大熱了。但遠在新加坡的小鸚鵡馬尼卻不甘寂寞,誓要搶保羅鋒頭,反其道而行的選了荷蘭。雖然鹿死誰手還是未知之數,但這場靈異前哨戰卻極具娛樂性。

德國水族館搞八爪魚預測賽果,也只不過是個小玩意。然而就策略而言,水族館此舉可謂非常成功,大收宣傳之效。就算保羅猜錯了,也不會對水族館有絲毫影響。反觀新加坡那邊,策略上就顯得有所不如了。首先,跟風之作從來就不會讓人有甚麼好印象。再者,馬尼的主人是個占卜師,要是馬尼這次猜錯了,他豈不是砸了自己的招牌?可見此人完全是賭徒心態,殊不可取!


2010年7月8日星期四

春光乍洩

星光大道變咗「走光大道」,真係搞得嚟又搞笑。如果唔係有呢單新聞,都唔知原來香港有咁多鹹濕佬。

友偷拍人地裙底春光,留返嚟私人珍藏就算啦。點知佢地仲要放埋上網,咁冇道德,又真係爭唔落嘅。搞到而家喺星光大道拎住部有長鏡嘅相機都會俾人當成鹹濕佬,呢班友都算累街坊喇。

當然,偷拍人地嘅走光相係唔啱,但係嗰俾人偷拍嘅受害者其實又使唔使負返一責任呢?着得性感冇問題,但係就應該避免做會走光嘅動作。着住條超短迷你裙,仲要踎低或者高高在上咁坐喺條大樓梯度,就算冇俾人偷拍都俾人睇到蝕啦。

警訊都有叫人財不可露眼啦,何況係千金難買嘅春光呢!

2010年7月7日星期三

再說小丑

昨天發了一篇名為「政治小丑」的博文,提到了社民連的荒謬行徑,並把他們比作小丑。怎料收到了一位匿名網友這樣的回應:

小丑是馬戲團中最有智慧,而且更是看透世情的人.你是否曲線為社民連打氣?

很明顯,這位網友是「曲線」地質疑我的論點了。其實我的立場很鮮明,絕對沒有重申的必要。不過小丑跟馬戲團倒是很有趣的題材,值得一談。所以今天只說小丑,不談政治,網友問題的部分就不作回應了。

首先,我想這位網友應該還很年輕吧。年輕人的通病是看事物時只憑一己喜好,而不作客觀的思考和分析。

為甚麼小丑是馬戲團中最有智慧的人?我想這位網友也說不出個所以然吧。人人生而不同,智慧的高低主要取決於先天因數,後天的學習和生活經歷也可讓其得以增長,但跟工作崗位卻半點扯不上關係。

為甚麼小丑更能看透世情?這問題恐怕也沒有答案。一個人能否看透世情主要跟他的閱歷有關,經歷越多自然看得越通透。所以我們不期望小孩能夠看透世情,而對一些拒絕成長的超齡兒童也作如是觀。

馬戲團裏有很多不同崗位,例如小丑、馴獸師、空中飛人、大力士、和雜技藝人等等。他們提供多元表演以迎合觀眾的不同口味。以小丑為例,他們的任務是在各主要表演項目中作適當調劑,也可避免項目交替時出現冷場。小丑的主要對象是小孩,因為他們最沒耐性,忍受不得一刻的悶場。說實話,小孩也真易哄。要逗他們笑也用不著甚麼智慧,翻個沒半點難度的跟斗就行了。甚至再簡單一點,在台上摔一交也可以。要是送他們一個氣球,更會讓他們樂上老半天。很自然地,小孩都會覺得小丑是馬戲團裏最棒的人。

既然小丑能逗得小孩開心,在馬戲團裏自然能佔一席位。但要是他們想喧賓奪主,甚至霸佔整個馬戲團,後果卻是災難性的。一個以小丑主導的馬戲團注定要關門大吉,光討得小孩歡心是沒用的,畢竟付費買票的是成年人。


2010年7月6日星期二

政治小丑

都話怪事年年有,今年特別多架啦。上星期日有幾十個網民搞咗個「反社民連大遊行」,最後由癲狗幫嘅副秘書長接收咗佢地封請願信。講真,搞呢反乜反物大遊行,佢地邊係癲狗幫嗰皮喎,不如慳返啖氣暖吓肚好過啦。

事後癲狗率領長毛同埋嗰個副秘書長喺記招度回應呢單,內容不知幾搞笑。有興趣可以睇吓呢條片:http://www.youtube.com/watch?v=KenwXGYpEvo

癲狗話香港係一個言論自由嘅社會,佢地作為一個政黨,係要接受各方面嘅批評。係咪好搞笑?係人都知癲狗一向聲大夾惡,有佢講冇人講。接受批評云云,真係難為佢講得出口。佢仲話班網民無的放矢,淨係識得用人身攻擊同抹黑嘅手段,例如惡搞佢地幾條友嘅大頭相。都唔知佢係突然失憶定老人痴呆,竟然唔記得咗呢都係癲狗幫最慣常用嘅招數,咁佢又有乜資格話人呢?佢都不知講到自己幾理性,話唔需要同班網民謾罵。佢又唔記得咗喇,謾罵根本就係癲狗幫嘅唯一對話方式。後尾仲搞,佢話如果社會上出現一股好大嘅力量反癲狗幫,癲狗幫就會玩完,而呢個社會都會玩完。睇怕佢唔只老人痴呆,仲有妄想症添,以為自己係救世主,冇咗佢呢個世界就會玩完。

長毛就發揮佢一貫嘅搞笑本色,全程係咁搞自己把秀髮,真係要幾噁心得幾噁心。佢間中又搭幾句嘴,一時窒班網民寫錯字,一時又話五十人令佢好驚,完全係八婆單單打打嘅口吻。呢條友真係唔知有邊忽似一個尊貴嘅議員。

呢班友,話佢地係政棍都抬舉咗喇,根本就係一班小丑!


2010年7月5日星期一

惡菌

信不信由你,原來煮飯仔係高危活動,真係餐餐都命博。點解?因為隨時會遇到殺人唔眨眼嘅恐怖殺手--食肉菌。

如果感染咗食肉菌,死亡率高達五成,而且24小時內就可以死人。就算唔死得,都隨時要鋸手鋸腳,真係好得人驚。

我平均一個禮拜煮三四餐飯,每餐都會有海產。咁啱食肉菌就最鍾意黐住海產,真係想避都冇得避。而且整親海產(尤其是蝦蟹)都會拮到對手見紅,直頭係玩緊死亡遊戲。戴咗套(係手套,唔好諗咗去第度)會安全,但係就冇晒手感,根本做唔到。為咗煮餐住家飯,明知危險都要頂硬上,都咪話唔偉大。

奉勸各位喺屋企食飯就唔好彈三彈四,每一碟餸都係冒住生命危險煮出嚟架。

2010年7月4日星期日

KY哥

怪事年年有,今年特別多。作風一向低調嘅KY哥呢排唔知係咪食錯藥,頻頻發表意見,仲要多數都係民生議題。最搞嘅係鑊鑊都要同政府唱反調,鋤得仲落力過扮民班友。雖然話插政府已經成為一種時尚,但係佢身為痕政會議成員,冇理由自己都插埋一份啫。如果佢覺得政府嘅施政有唔妥,應該喺痕政會議裏面提出,如果唔係要呢個乜鬼會議嚟托咩。一係就俾吉屎嚟睇吓,好似田大少咁劈炮唔玩,但係佢又唔捨得喎。佢玩得嚟完全唔依遊戲規則,好多人都睇佢唔順眼。早兩日,同係政壇重量級嘅犯婦人就不點名批評佢唔適合做突首。其實曾突首一早就同傳媒呻過吓。但係KY哥血統優良,絕對稱得上根正苗紅,而曾突首只係微不足道嘅前朝餘孽,真係睬佢都有味啦。

究竟KY哥做乜要搞咁多出位呢,唔通佢short咗?係就係short咗,不過係恨做突首恨到short咗啫。話時話,佢嘅策略又真係好奇怪。佢身為痕政會議成員,政府嘅決策唔可以話唔關佢事,係咁踩政府嘅施政又對自己有乜好處?我冧佢梗係金庸迷,深明七傷拳嘅要訣,就係:「先傷己,後傷人」。佢嘅主要勁敵係糖糖司長,狂踩政府一方面可以打擊對手,又可以爭取民意支持,始終係利多於弊。但係下一屆突首選舉仍然係小圈子遊戲,搞咁多谷民意又有乜用?我諗佢計過條數,知道2012勝算唔高,2017至係主要戰場。講能力,佢肯定高過糖糖呢個二世祖多多聲,但係佢就衰在人緣勁差。話明係小圈子選舉,當然係軟實力緊要啦。不過呢條友係一個機會主義者,相信佢2012一定會參選,除非係阿爺叫佢唔好搞寸個party啦。如果佢參選就真係好戲連場喇,到時大家可以睇吓佢玩變臉玩得幾出神入化。

講咗咁耐,究竟邊個係KY哥?呢條友嘅真名當然無係叫KY啦,不過佢份人咁滑頭,簡直係滑不留手,唔係搽咗KY係乜?仲要係由頭搽到落腳嗰隻添。

不過諗深一層,又可能真係冤枉咗佢喎。條友奸到出汁,仲使乜搽KY啫。

2010年7月3日星期六

一二三四五六七

「一二三四五六七」會令你聯想起乜?

打麻將叫三飛一四七?

抑或麥兜隻歌仔「一二三四五六七多勞多得」?

我就會諗起一副名聯,簡直好似為班扮民政棍度身訂造咁。成副對聯係:

一二三四五六七
孝悌忠信禮義廉

上聯意思係「忘八」(王八),下聯好直接,係「無恥」咁解。平仄有冇問題我唔知,不過就真係幾得意。

忽然又諗起另一副數字名聯,係我自己嘅寫照:

二三四五
六七八九

2010年7月2日星期五

人潮背後

今年的71遊行總算告一段落。一如既往,民陣又把遊行人數誇大了。真不明白,連最起碼的誠信也沒有,還談甚麼民主公義?嘿嘿,反正我們這些看戲的都懂得五折收貨,就由得他們「自我感覺良好」一番吧。

最讓我看不順眼的是他們到今天還在喊「2012雙普選」。2010年已經過了一半,民陣竟然沒檢討這口號是否還有意義。他們真的相信憑兩萬多人喊幾句口號就能讓中央推翻人大的決定,甚至更改基本法中為普選定下的條件?如果他們真的相信,我只能說一句:「好一群白痴」!如果連他們自己也不相信,卻領頭喊著這樣的口號,不是欺騙群眾是甚麼?

一幫政棍堅持特首要交出普選路線圖,那可是未來十年的事情。他們自己哪?除了扇動民眾上街,他們可曾交代過甚麼?要是兩年後還沒有雙普選,下一步該怎麼走?對他們來說,這已是迫近眉睫,怎能沒一個交代?要搞港獨?還是要推翻中央政府?好歹要有個說法吧。政棍們展示的正是「嚴以待人,寬以律己」的雙重標準,怎不讓人痛恨?話說回來,要造反吧,他們才不幹。只要在社會上挑起爭端,他們的議員寶座就能穩如泰山,何樂而不為?

人潮背後,看到的是一張張猙獰面目,毫不掩飾地展示著無恥和貪婪。擦亮眼啊,香港人!

2010年7月1日星期四

小野貓

聲明:本文立場偏頗,言論有欠理性,跡近貓身攻擊,敬請愛護動物及維護貓權人士立即離開!

勾魂奪魄嘅smoky eyes、性感迷人嘅tube top、肉香四溢嘅超短米你裙,真係睇到麻甩佬流晒鼻血。如果唔係見到佢拎住枝雪山獅子旗,仲以為又係嗰為咗博上位乜都敢死嘅𡃁模添。原來呢隻性感小野貓係新一代民主鬥士,仲係名牌大學高材生,的確一都唔簡單。

不過係名牌大學高材生又點?咪一樣係冇腦,好學唔學,學鬼佬支持藏獨。唔通佢唔知西藏從來都冇民主?係要支持藏獨都等達賴同班禪可以由普選產生先啦。不過又真係幾搞笑,佢後尾又話展示雪山獅子旗唔係要支持藏獨,而係要挑戰禁忌,彰顯言論自由。即係話我都可以兜口兜面向佢講句四字真言,然後話我絕對冇意圖冒犯佢或者佢嘅親貓,而只係示範緊我嘅言論自由啫。建議佢去公認最民主自由嘅花旗國,喺白宮門口展示阿爾蓋達枝旗(其實我都唔知阿爾蓋達有冇旗),睇吓會點?包保佢即刻貓間蒸發,到時佢就知道原來自己一直身在福中不知福。
仲有,全世界都知道雪山獅子旗係代表藏獨架啦,事後否認有叉用咩。都唔知佢係咪食得太多重金屬超標嘅外國貓糧,搞到思覺失調。

咪睇佢細細粒粒,原來發起爛渣上嚟絕對唔係貓咁品,搞到裙拉褲甩都在所不計。早排佢就因為涉嫌襲擊防治蟲鼠組人員俾人拉咗。真係好搞笑,網上傳聞話佢係set靚個頭,化行晒妝咁等人拉架。不過更搞笑嘅係佢俾人拉咗之後講嘅一番說話:「今日捉咗一隻小野貓,出面仲有千千萬萬隻小野貓」。哈哈,唔知佢當自己係秋瑾定係孫中山呢?

雖然佢講到自己好偉大,但係我就打死都唔信佢搞咁多唔係為咗博出位。如果唔係,點解鑊鑊示威遊行都要化行晒妝,仲要著到令人噴晒血?咁講真,佢身材都OK嘅,但係個樣就好普通吓。如果佢真係想上位,睇怕都要去韓國執執先掂喇。